Informe di Proklamadónan di Reino

El A Haña e Bèrdat na un Lugá Ku E No A Ferwagt

E BOLUNTAT di Dios ta pa “tur hende wòrdu salbá i yega na konosementu di e bèrdat.” (1 Timoteo 2:3, 4) Pa logra esei, Testigunan di Yehova a imprimí i distribuí miónes di Beibel i publikashon pa studia Beibel. E publikashonnan aki a yega di yuda hende onesto siña e bèrdat na maneranan di mas straño ku tin. Relashoná ku esaki, e proklamadónan di Reino na Freetown, Siera Leone, ta konta e siguiente eksperensia.

Osman tabata e di dos yu hòmber di un famia di nuebe yu. El a lanta den un famia religioso, i semper e tabata bai misa huntu ku su tata. Sin embargo, loke su religion ta siña tokante fièrnu a preokupá Osman mashá. E no por a komprendé kon un Dios miserikordioso por torturá hende malbado dor di kima nan den kandela. Ningun di e splikashonnan ku Osman a haña pa yud’é komprendé e doktrina di fièrnu di kandela no a dun’é pas mental.

Un dia, tempu ku Osman tabatin 20 aña di edat, el a mira un buki blou kasi skondí entre tur e ròmel ku tabatin den un ko’i shushi. Dor ku e ta gusta lesa, el koh’é, limpi’é i a mira ku e título ta: E berdad cu ta hiba na bida eterna. *

Osman a puntra su mes: ‘Kua bèrdat esaki ta?’ Osman a bira kurioso, el a bai kas ku e buki i a les’é den un lesá. El a keda masha kontentu ora el a haña sa ku Dios tin un nòmber personal: Yehova! (Salmo 83:18, NW) Tambe Osman a haña sa ku e kualidat dominante di Dios ta amor i ku e idea so di tormentá hende den un lugá di kandela ta algu repugnante pa Yehova. (Yeremías 32:35; 1 Huan 4:8) Finalmente Osman a lesa ku pronto Yehova lo hasi e tera un paradeis kaminda hende lo por biba pa semper. (Salmo 37:29; Revelashon 21:3, 4) Esakinan tabata bèrdatnan maravioso for di un Dios miserikordioso i amoroso! Ku un kurason yen di gratitut, Osman a yama Yehova danki p’e echo ku el a pèrmitié haña e bèrdat na un lugá ku e no a ferwagt.

Un par di dia despues, ku yudansa di algun amigu, Osman a lokalisá e Salon di Reino di Testigunan di Yehova i a asistí na un reunion pa promé bes. Einan, el a pidi un Testigu pa studia Beibel kuné. Maske Osman su famia tabata masha kontra, el a sigui progresá spiritualmente i a batisá. (Mateo 10:36) Awe e ta sirbi komo ansiano den e kongregashon. Ta asombroso ku tur esaki a kuminsá ora el a haña un publikashon basá riba Beibel, den ko’i shushi!

[Nota]