Haña Plaser den Yehova Su Hustisia

“Esun ku aspirá na hustisia i lealtat ta haña bida, hustisia i onor.”—PROVERBIONAN 21:21.

1. Ki komportashon di hende djawe a hiba na resultadonan desastroso?

“TIN un kaminda ku ta parse bon den bista di hende, ma su fin ta e kaminda di morto.” (Proverbionan 16:25) E proverbio di Beibel aki ta un hopi bon deskripshon dje manera ku hopi hende ta komportá nan mes awe. Mayoria hende ta interesá pa hasi solamente loke ta bon den nan propio bista, i nan ta ignorá asta e nesesidatnan di mas básiko di otro hende. (Proverbionan 21:2) Ta ku boka so nan ta onra lei- i normanan di nan pais. Ki ora ku nan haña un chèns nan ta purba evadí nan. P’esei sosiedat humano ta dividí, konfundí i sin por mira un salida.—2 Timoteo 3:1-5.

2. Kiko humanidat tin nesesidat urgente di dje pa su mes bon?

² Pa nos mes bon, i pa henter e famia humano por tin pas i siguridat, ta urgente pa nos tin un lei òf un norma hustu ku tur hende ta dispuesto pa aseptá i obedesé. Klaramente no tin un hende ku por bini ku un lei òf norma pa yena e nesesidat ei, ni maske kon sabí òf sinsero e hende ei ta. (Yeremías 10:23; Romanonan 3:10, 23) Si ta eksistí un norma asina, unda nos por hañ’é, i ki sorto di norma e ta? I kisas esaki ta un pregunta asta mas importante: Si e norma ei ta eksistí, lo bo asept’é i haña plaser den dje?

Kon pa Haña e Norma Hustu

3. Ken ta esun mas kapas pa duna nos un norma aseptabel i benefisioso pa tur hende, i dikon?

³ Pa nos por haña un norma ku ta aseptabel i benefisioso pa tur hende, nos lo tin ku akudí na un persona ku no ta mará na rasa, kultura ni divishon polítiko, i ku no ta ser limitá dor di debilidat i falta di vishon di hende. Sin duda, e úniko persona ku ta kualifiká ta e Kreadó todopoderoso Yehova Dios, kende ta deklará: “Meskos ku e shelunan ta  mas haltu ku tera, asina mi kamindanan ta mas haltu ku boso kamindanan, i mi pensamentunan mas haltu ku boso pensamentunan.” (Isaías 55:9) Ademas, Beibel ta deskribí Yehova komo “un Dios di fieldat i sin inhustisia. Hustu i rekto e ta.” (Deuteronomio 32:4) Den henter Beibel nos ta topa e ekspreshon: “SEÑOR [Yehova, NW] ta hustu.” (Éksodo 9:27; 2 Krónikanan 12:6; Salmo 11:7; 129:4; Lamentashonnan 1:18; Revelashon 19:2 [NW, nota na pia di página]) Sí, nos por akudí na Yehova pa haña e norma perfekto, ya ku e ta fiel, hustu i rekto.

4. Kiko e palabra “hustu” ta nifiká?

⁴ E palabra “hustu” no ta muchu popular awendia. De echo, e ta zona negativo i asta insultante den orea di mayoria hende, dor ku pa nan e ta zona meskos ku bisa ku bo ta mas santu ku tur hende, òf ku bo ta deboto na un manera hipókrita. Pero ora Beibel ta papia di ser hustu, e ta nifiká simplemente ser rekto, ku birtut, sin kulpa, sin piká, na armonia ku loke lei di Dios òf normanan moral ta preskribí; aktua na forma rekto òf hustu. Abo lo no tin plaser den un lei òf un norma ku ta kuadra ku karakterístikanan asina ekselente?

5. Deskribí e kualidat di hustisia, manera e ta ser usá den Beibel.

⁵ Enkuanto e kualidat “hustisia” Encyclopaedia Judaica ta komentá lo siguiente: “Hustisia no ta un idea apstrakto. Mas bien e ta konsistí di hasi loke ta hustu i rekto den tur bo tratonan.” Por ehèmpel, e hustisia di Dios no ta djis un karakterístika personal interno di dje, manera su santidat i su puresa. Mas bien e ta konsistí dje maneranan hustu i rekto ku e ta aktua di akuerdo ku su personalidat. Lo bo por bisa ku, debí ku Yehova ta santu i puru, tur loke e hasi i tur loke originá kuné ta hustu. Manera Beibel ta bisa, Yehova “ta hustu den tur su kamindanan, i miserikòrdioso den tur su obranan.”—Salmo 145:17.

6. Kiko Pablo a bisa tokante sierto hudiunan den su tempu ku no tabata kreyente, i dikon?

⁶ Apòstel Pablo a pone hopi énfasis riba e punto aki den su karta n’e kristiannan na Roma. El a skirbi lo siguiente tokante sierto hudiunan ku no tabata kreyente: “Pasobra sin konosé e hustisia di Dios, i buskando pa establesé nan mes hustisia, nan no a someté nan mes na e hustisia di Dios.” (Romanonan 10:3) Pakiko Pablo a bisa ku nan no “konosé e hustisia di Dios”? Nan no a siña e Lei, e normanan hustu di Dios? Sí, nan a siñ’é. Pero mayoria di nan a mira hustisia simplemente komo un birtut personal ku nan por a optené dor di kumpli estriktamente i diligentemente ku reglanan religioso, na lugá di mir’é komo un norma pa guia nan den e manera ku nan ta trata ku hende. Meskos ku e lidernan religioso den tempu di Hesus, nan a keda sin kapta e berdadero nifikashon di hustisia i rektitut.—Mateo 23:23-28.

7. Kon Yehova ta ekspresá su hustisia?

⁷ Yehova su hustisia ta totalmente diferente. E ta bini dilanti i ta klaramente bisto den tur loke e ta hasi. Maske ku dor di su hustisia e no por djis ignorá piká ku hende a kometé deliberadamente, tòg e no ta un Dios friu i eksigente ku hende mester tin miedu di dje òf evitá di aserká. Al kontrario, den su hustisia el a sòru pa un medio pa asina humanidat por aserk’é i skapa for dje konsekuensianan tristu di piká. P’esei, ta totalmente apropiado pa Yehova ser yamá “un Dios hustu i un Salbadó.”—Isaías 45:21.

Hustisia i Salbashon

8, 9. Den ki maneranan e Lei a ekspresá e hustisia di Dios?

⁸ Pa nos por komprendé bon ki relashon tin entre e hustisia di Dios i su amoroso akto di salbashon, nos mester eksaminá e Lei ku el a duna e nashon di Israel pa medio di Moises. E Lei tabata hustu sin duda. Den Moises su palabranan di despedida el a rekordá e israelitanan di lo siguiente: “Ki gran nashon tin, ku  tin statutonan i huisionan asina hustu, manera henter e lei aki ku mi ta pone boso dilanti awe?” (Deuteronomio 4:8) Vários siglo despues, Rei David di Israel a deklará: “E huisionan di SEÑOR ta berdadero, nan tur ta kompletamente hustu.”—Salmo 19:9.

⁹ Pa medio di e Lei, Yehova a revelá bon kla su normanan perfekto tokante kiko ta bon i kiko ta malu. E Lei a splika ku luho di detaye kon e israelitanan mester a komportá nan mes, i no den asuntunan religioso so, sino tambe den transakshonnan di negoshi, relashon matrimonial, kustumber di kome i di limpiesa, i di mes, den asuntunan hudisial. Tambe e Lei a indiká kastigu estrikto pa esnan ku keda sin kumpli kuné. Den algun kaso, asta nan por a risibí pena di morto. * Pero, e rekisitonan hustu di Dios ku a bini padilanti den e Lei tabata un karga pisá i difísil p’e pueblo? El a kita nan libertat i goso, manera hopi hende djawe ta pretendé?

10. Kiko hende ku a stima Yehova a pensa tokante su leinan?

¹⁰ Esnan ku a stima Yehova tabatin hopi plaser den su lei- i dekretonan hustu. Por ehèmpel, Rei David no solamente a rekonosé ku Yehova su desishonnan hudisial ta hustu i berdadero, manera nos a mira, pero tambe el a sinti un kariño i apresio di kurason pa nan. Esaki el a skirbi tokante e leinan i desishonnan hudisial di Yehova: “Nan ta mas deseabel ku oro, sí, mas ku hopi oro fini; tambe mas dushi ku miel i gotanan di panal di miel. Ademas, pa medio di nan bo sirbidó ta keda spièrtá; i obedensia na nan ta trese gran rekompensa kuné.”—Salmo 19:7, 10, 11.

11. Den ki sentido e Lei tabata un ‘tutor pa guia na Kristu’?

¹¹ Vários siglo despues, Pablo a mustra kon e Lei tin un balor asta mas haltu. Den su karta p’e kristiannan galatio el a skirbi: “Lei a bira nos tutor pa guia nos na Kristu, pa nos por wòrdu hustifiká pa medio di fe.” (Galationan 3:24) Den tempu di Pablo, un tutor [yaya pa kuida mucha, Beibel na papiamentu koriente] tabata un sirbidó òf esklabo den un famia grandi. Su trabou tabata di protehá e muchanan i hiba nan skol. Meskos, e Lei a protehá e israelitanan kontra e kustumbernan moral i religioso baho dje nashonnan rònt di nan. (Deuteronomio 18:9-13; Galationan 3:23) Ademas e Lei a hasi e israelitanan konsiente di nan estado di piká i di nan nesesidat di pordon i salbashon. (Galationan 3:19) E areglo di sakrifisio a mustra ku tabatin mester di un sakrifisio di reskate, i el a pone un patronchi profétiko via kua nan por a identifiká e Mesías. (Hebreonan 10:1, 11, 12) Pues, maske Yehova a ekspresá su hustisia pa medio di e Lei, el a hasié ku bienestar i salbashon eterno dje pueblo na mente.

Esnan Ku Dios Ta Konsiderá Hustu

12. Kiko e israelitanan por a risibí si nan a paga bon tinu pa kumpli ku e Lei?

¹² Ya ku e Lei ku Yehova a duna tabata  hustu den tur sentido, dor di obedes’é e israelitanan lo por a haña un posishon hustu den Dios su bista. Moises a rekordá e israelitanan esaki ora nan tabata kla pa drenta e Tera Primintí: “Lo ta hustisia pa nos si nos perkurá di kumpli ku henter e mandamentu aki dilanti di SEÑOR nos Dios, manera el a ordená nos.” (Deuteronomio 6:25) Ademas Yehova a primintí: “Warda mi statutonan i mi ordenansanan, pa medio di kual un hende lo biba si e hasi nan; ami ta SEÑOR.”—Levítiko 18:5; Romanonan 10:5.

13. Tabata inhustu di parti di Yehova pa rekerí pa su pueblo tene nan mes na e Lei hustu? Splika.

¹³ Lamentablemente, Israel komo nashon a keda sin “kumpli ku henter e mandamentu aki dilanti di SEÑOR,” i p’esei nan a pèrdè e bendishonnan primintí. Nan a keda sin kumpli ku tur Dios su mandamentunan debí ku e Lei di Dios ta perfekto, pero nan sí nò. Esei kier men ku Dios ta inhustu? Sigur ku nò. Pablo a skirbi: “Kiko nos lo bisa anto? Akaso tin inhustisia serka Dios? Di ningun manera!” (Romanonan 9:14) Echo ta ku tantu promé komo despues ku e Lei a ser duná, Dios a konsiderá sierto hendenan komo hustu maske nan tabata imperfekto i pekadó. Den e lista ei di hendenan ku temor di Dios tin entre otro Noe, Abraham, Job, Rahab i Daniel. (Génesis 7:1; 15:6; Job 1:1; Ezekiel 14:14; Santiago 2:25) E pregunta ku ta lanta ta: A base di kiko Dios a konsiderá e personanan aki hustu?

14. Kiko Beibel kier men ora e bisa ku un hende ta “hustu”?

¹⁴ Ora Beibel bisa ku un hende ta “hustu,” e no kier men ku e ta sin piká ni ku e ta perfekto. Mas bien e kier men ku e persona ta kumpli ku su obligashonnan ku Dios i ku hende. Noe, por ehèmpel, a ser yamá “un hòmber hustu” i “perfekto den su generashonnan” dor ku ‘konforme tur loke Dios a orden’é, asina el a hasi.’ (Génesis 6:9, 22; Malakías 3:18) Zakarías ku Elisabèt, e mayornan di Huan Boutista, “tabata hustu den bista di Dios” pasobra nan “tabata kana ireprochabel den tur e mandamentunan i ordenansanan di Señor.” (Lukas 1:6) I Kornelio, un ofisial di ehérsito italiano ku no tabata un israelita, a ser yamá “un hòmber hustu ku ta teme Dios.”—Echonan 10:22.

15. Kiko hustisia tin hopi di haber kuné?

¹⁵ Ademas, ku un hende ta hustu òf nò tin hopi di haber ku loke tin den su kurason—e fe, e apresio i e amor ku e tin pa Yehova i pa su promesanan—i no djis ku e ta hasi loke Dios ta bisa. Beibel ta bisa ku Abraham “a kere den  SEÑOR, i el a konta esaki komo hustisia p’e.” (Génesis 15:6) No ta den Dios su eksistensia so Abraham tabatin fe, sino tambe den su promesa tokante e “simia.” (Génesis 3:15; 12:2; 15:5; 22:18) A base dje fe ei, i di obranan ku ta na armonia ku fe, Yehova por tabatin trato ku Abraham i a bendishoná e i otro hendenan fiel apesar ku nan tabata imperfekto.—Salmo 36:10; Romanonan 4:20-22.

16. Kiko fe den e reskate a trese kuné?

¹⁶ Por último, pa un hende ta hustu e mester tin fe den e sakrifisio di reskate di Hesukristu. Pablo a skirbi lo siguiente tokante kristiannan di promé siglo: “Komo un don grátis nan ta ser deklará hustu dor di [Dios] su bondat inmeresí mediante e liberashon dje reskate ku Kristu Hesus a paga.” (Romanonan 3:24, NW) Aki Pablo tabata papia di esnan skohé pa bira heredero huntu ku Kristu den e Reino selestial. Pero tambe e sakrifisio di reskate di Hesus a habri oportunidat pa miónes di otro hende haña un posishon hustu den Dios su bista. Den un vishon apòstel Huan a mira “un multitut grandi ku ningun hende no por a konta . . . pará dilanti di e trono i dilanti di e Lamchi, bistí na paña blanku.” E pañanan blanku ta simbolisá ku nan ta limpi i hustu den Dios su bista dor ku “nan a laba nan pañanan i a hasi nan blanku den e sanger di e Lamchi.”—Revelashon 7:9, 14.

Haña Plaser den Yehova Su Hustisia

17. Ki pasonan nos mester dal pa nos por haña un posishon hustu?

¹⁷ Maske den su amor Yehova a duna su Yu Hesukristu komo e medio pa hende por haña un posishon hustu den su bista, di ningun manera esaki no ta sosodé outomátikamente. Promé nos tin ku ehersé fe den e sakrifisio, pone nos bida na armonia ku e boluntat di Dios, dediká nos mes na Yehova i simbolisá e dedikashon aki dor di batisá den awa. Despues nos tin ku sigui buska hustisia, i tambe otro kualidatnan spiritual. Maske Timoteo tabata un kristian batisá ku a risibí e yamada pa shelu, Pablo a urgié pa “buska hustisia, santidat, fe, amor, perseveransia i mansedumbre.” (1 Timoteo 6:11; 2 Timoteo 2:22) Hesus tambe a enfatisá ku ta nesesario pa nos sigui hasi esfuerso. El a bisa: “Ma [sigui, NW] buska promé e reino di Dios i Su hustisia.” Kisas nos ta traha hopi duru pa nos haña e bendishonnan dje Reino di Dios, pero nos ta traha mes duru pa nos aktua ku hustisia tambe, meskos ku Yehova?—Mateo 6:33.

18. (a) Dikon no ta fásil pa buska hustisia? (b) Kiko nos por siña dje ehèmpel di Lòt?

¹⁸ Klaro ku buska hustisia no ta fásil. Esei ta asina dor ku nos ta imperfekto, i nos tin un inklinashon natural pa inhustisia. (Isaías 64:6) Pa kolmo nos ta rondoná dor di hende ku no tin muchu apresio pa Yehova su hustisia. Nos ta den un situashon hopi similar na esun di Lòt, kende a biba na Sódoma, un stat konosí pa su maldat. Apòstel Pedro a splika dikon Yehova a disidí di libra Lòt for dje destrukshon ku tabata na kaminda. Pedro a bisa: “E hòmber hustu ei, bibando meimei di nan, a sinti su alma hustu tormentá dia aden dia afó ku nan echonan malbado.” (2 Pedro 2:7, 8) P’esei, ta bon pa kada un di nos puntra nos mes: ‘Mi ta aprobá e práktikanan inmoral ku nos ta mira rònt di nos, ketu-ketu den mi kurason? Ta djis gusta mi no ta gusta dibertishon òf deporte violento? Òf mi ta sinti mi tormentá dor di nan, manera hustu Lòt?’

19. Ki bendishonnan nos por risibí si nos tin plaser den e hustisia di Dios?

 ¹⁹ Den e tempu peligroso i insigur aki, haña plaser den Yehova su hustisia ta un fuente di siguridat i protekshon. David a puntra: “O SEÑOR, ken por biba den bo tabernakel? Ken por biba riba bo seru santu?” E mes a kontestá: “Esun ku ta kana den rektitut i ta hasi hustisia.” (Salmo 15:1, 2) Dor di buska Dios su hustisia i haña plaser den dje, nos por keda ku un bon relashon kuné i gosa di su fabor i su bendishon. Asina nos ta haña satisfakshon den bida, rèspèt propio i pas mental. “Esun ku aspirá na hustisia i lealtat ta haña bida, hustisia i onor,” ta loke e Palabra di Dios ta bisa. (Proverbionan 21:21) Ademas, si nos ta hasi nos bèst pa ta semper hustu i rekto den tur loke nos hasi, nos lo gosa di bon relashonnan personal i un mihó kalidat di bida, tantu den sentido físiko komo spiritual. E salmista a deklará: “Bendishoná ta esnan ku ta mantené huisio, kendenan ta praktiká hustisia tur ora.”—Salmo 106:3.

[Nota]

Bo Por Splika?

• Kiko ta hustisia?

• Kiko e hustisia di Dios tin di haber ku salbashon?

• A base di kiko Dios ta konsiderá hende hustu?

• Kon nos por haña plaser den Yehova su hustisia?

[Preguntanan di Estudio]

[Plachinan na página 15]

Rei David a ekspresá kariño sinsero pa e leinan di Dios

[Plachinan na página 16]

Bo sa dikon Dios a konsiderá Noe, Abraham, Zakarías ku Elisabèt i Kornelio komo hende hustu?