Kiko Abo Ta Pensa Ku Morto Ta?

MASKE kon riku òf salú nos por ta, morto ta manera un sombra skur ku ta kologá riba nos kabes segun ku nos ta hasi nos kosnan di tur dia. Nos por topa kuné e siguiente bes ku nos krusa kaya, òf e siguiente bes ku nos subi kama. Desasternan manera e atake terorista di 11 di sèptèmber 2001 na New York i Washington, D.C. ta pone nos kara-kara ku e echo ku “e delaster enemigu,” morto, ta kosechá víktima den tur área di bida i di tur edat, i tin biaha un kantidat di míles den kuestion di un par di minüt.—1 Korintionan 15:26.

Tòg ta parse ku hende ta fasiná ku morto. No tin nada ku ta pone hende kumpra korant òf wak televishon mas tantu ku notisia di morto, i pió ainda si ta hopi hende a muri na un manera horibel. Ta manera kos ku hende no ta kansa di notisia di morto, sea ku ta morto dor di guera, desaster natural, krímen òf enfermedat. Ora un hende konosí òf un selebridat muri, públiko ta ekspresá nan emoshonnan di lamento ku asta mas intensidat. Esaki ta un dje manifestashonnan di mas straño dje opseshon ku hende tin ku morto.

Tur e reakshonnan aki ta bon konosí. Hende ta fasiná ku morto, esta, morto di otro hende. Nan propio morto sí no ta un tema ku nan ta gusta pensa ariba. Loke mayoria di nos tin ménos gana di meditá ariba ta nos propio fin.

Morto Tin Nos Konfundí?

Semper hende a sinti fastioso ora di pensa ku nan mester muri un dia, i semper lo e keda un kos fastioso tambe. Dikon? Dor ku Dios a hinka un deseo fuerte den nos pa biba pa semper. Eklesiástes 3:11 ta bisa ku ‘el a pone eternidat den nos kurason.’ P’esei, e echo ku nos no por skapa di morto a krea den hende un konflikto interno ku no kier kita. Pa nan por kalma e konflikto interno aki i satisfasé nan deseo natural pa sigui biba, hende a inventá tur sorto di kreensia ku ta varia entre inmortalidat di alma te reenkarnashon.

Di tur manera, morto ta i ta keda un kos mahos, un kos spantoso, i miedu di muri ta un kos ku tur pueblo tin en komun. P’esei, no ta nada straño ku morto ta pone mayoria hende sinti miedu di futuro. Por ehèmpel, morto ta laga hende realisá ku di bèrdat no tin sentido pa dediká bo bida na kore tras di rikesa i poder.

Morto Ta Isolá Nos?

Ántes tabata asina ku un hende malu pa muri, òf ku un herida mortal, por a muri na kas, den e ambiente ku el a kustumbrá kuné, i kaminda e ta sintié bon. Den tempu bíbliko  hopi bes tabata asina, i ainda ta asina den algun kultura. (Génesis 49:1, 2, 33) Den e kasonan ei, e famia ta bini huntu i muchanan tambe ta partisipá den e kòmbersashon. Dor di esei niun miembro di famia no ta sinti ku nan ta so den nan pena. Ta un konsuelo ku nan por kompartí e responsabilidatnan i e tristesa.

E situashon ta kompletamente otro den sosiedatnan kaminda ta tabú pa papia riba morto, kaminda hende ta haña ku morto ta un tema fastioso, i mucha no por tin nada di haber kuné pasobra hende ta pensa ku esei lo ta “muchu duru” pa nan. Muri awendia ta diferente for di ántes den vários sentido. Entre otro, hopi bes e ta un eksperensia mas solitario. Mayoria hende lo tin gana di muri na kas, trankil i ku e kuido amoroso di nan famia. Pero pa hopi hende, e realidat tristu ta ku nan mester muri den un hospital, hopi bes nan so i yen di doló, pegá na yen di aparato sofistiká. Pero tin miónes di otronan tambe ku tin ku muri sin ku hende ta na altura mes, komo víktima sin nòmber di eksterminashon rasial, hamber, AIDS, guera sivil òf simplemente pobresa ekstremo.

Un Kos pa Pensa Ariba

Beibel no ta deskurashá nos di pensa riba morto. E mes ta bisa nos na Eklesiástes 7:2: “Ta mihó bai na un kas di rou ku bai na un kas di fiesta, pasobra morto ta e fin di tur hende.” Dor di konfrontá e realidat di morto, esei por pone nos stòp di pensa un ratu riba nos preokupashonnan i aktividatnan di tur dia, i para ketu n’e echo ku bida ta kòrtiku. Esei por yuda nos hiba un bida ku mas nifikashon, na lugá di djis biba pa biba, òf tira nos añanan afó.

Kiko abo ta pensa di morto? Bo a yega di eksaminá loke bo ta sinti, kere, spera i teme tokante e fin di bo bida?

Morto, meskos ku bida mes tambe, ta bai mas ayá di loke hende por splika i komprendé. E úniko persona ku por papia riba e tema aki ku outoridat konfiabel ta nos Kreador. Serka dje “e fuente di bida ta,” i serka dje “tin skapatorio for di morto.” (Salmo 36:9; 68:20) Pa straño ku por parse, nos por haña konsuelo i animashon si nos eksaminá un par di kreensia popular tokante morto a base di loke e Palabra di Dios ta bisa. Nos lo haña sa ku morto no mester ta fin di tur kos.

[Komentario na página 4]

E echo ku nos por muri ta yuda nos hiba un bida ku mas nifikashon