“Nan A Senk”

“E abismonan ta tapa nan; nan a senk bai den e profundidatnan manera piedra.”

MOISES i e israelitanan a kanta e palabranan aki pa selebrá nan liberashon via Laman Kòrá i e likidashon di nan enemigunan egipsio ku tabata persiguí nan: Fárao i su forsa militar.—Éksodo 15:4, 5.

Tur hende ku a mira e suseso espektakular aki ku nan propio wowo, a saka un bon lès. Ningun persona por bai kontra Yehova su outoridat òf resistié i keda na bida. Sin embargo, djis algun luna despues, israelitanan ku posishonnan prominente—manera, Kore, Datan, Abiram i 250 persona ku a apoyá nan—a bai kontra e outoridat ku Dios a duna Moises i Aron.—Numbernan 16:1-3.

Bou di direkshon di Yehova, Moises a urgi e israelitanan pa hala kita for di tènt di e rebeldenan. Pero Datan i Abiran, huntu ku nan famianan di kas a nenga di kambia nan aktitut. Anto Moises a anunsiá ku Yehova lo tin Su manera pa laga e pueblo mira ku e hòmbernan aki “a despresiá” Yehova. N’e momentu ei Yehova a habri tera bou di nan pia. “Asina nan, i tur loke nan tabatin, a baha bibu bai den Seol; i tera a tapa nan.” Kiko a sosodé ku Kore i e otro rebeldenan? “A bin kandela for di SEÑOR i a kaba ku dos shent’i sinkuenta hòmber ku tabata ofresé sensia.”—Numbernan 16:23-35; 26:10.

Fárao i su ehérsitonan, i tambe e rebeldenan den desierto a muri pasobra nan no a rekonosé Yehova su outoridat ni ku e ta interesá den asuntunan di su pueblo. P’esei anto, ta urgente pa tur hende ku kier haña protekshon di Yehova durante e dianan krítiko aki siña tokante Yehova i obedes’é komo “e Haltísimo” i “e Todopoderoso.” Ora nan hasi esei, nan por tin tur konfiansa den e palabranan di Yehova: “Mil por kai band’i bo, i dies mil na bo man drechi, ma serka bo e lo no yega. Solamente ku bo wowo lo bo opservá, i mira e rekompensa di e malbadonan. Pasobra bo a hasi [Yehova, NW], kende ta mi refugio, e Haltísimo, bo lugá di biba.”—Salmo 91:1, 7-9.