Purifiká Komo un Pueblo pa Hasi Bon Obra

“Laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.”—2 KORINTIONAN 7:1.

1. Kiko Yehova ta rekerí di esnan ku ta ador’é?

“KEN por subi bai den e seru di SEÑOR? I ken por para den su lugá santu?” Rei David di Israel di antigwedat a lansa e preguntanan interesante ei tokante ki sorto di adorashon Yehova ta aseptá. Despues e mes a duna e kontesta: “Esun ku tin man limpi i kurason puru, ku no a halsa su alma na banidat, i ku no a hura ku engaño.” (Salmo 24:3, 4) Yehova ta e personifikashon di santidat, i p’e aseptá nos, nos mester ta limpi i santu. Mas promé ku esei Yehova a yega di rekordá e kongregashon di Israel esaki: “Konsagrá boso mes anto i sea santu, pasobra ami ta santu.”—Levítiko 11:44, 45; 19:2.

2. Kon Pablo i Santiago a enfatisá e importansia di limpiesa den adorashon berdadero?

² Vários siglo despues, apòstel Pablo a skirbi su kompañeronan kristian den e stat inmoral di Korinto: “Komo ku awor nos tin e promesanan aki, stimánan, laga nos purifiká nos mes di tur impuresa di karni i spiritu, i asina perfekshoná nos santidat den e temor di Dios.” (2 Korintionan 7:1) Esaki ta bolbe mustra ku si nos kier tin un relashon ku Dios i risibí e bendishonnan ku el a primintí, nos mester ta limpi i liber di sushedat físiko i spiritual. Disipel Santiago tambe a hasi un deklarashon similar ora el a skirbi tokante e tipo di adorashon ku ta aseptabel pa Dios: “Esaki ta e  religion puru i sin mancha den bista di nos Dios i Tata: bishitá huérfano i biuda den nan aflikshon, i konserbá bo mes liber di mancha di mundu.”—Santiago 1:27.

3. Si nos kier pa Dios haña nos adorashon aseptabel, den kiko nos mester ta masha interesá?

³ Ya ku ta asina importante pa adoradó di Dios ta limpi, santu i sin mancha, ken ku kier haña su aprobashon mester ta masha interesá pa kumpli ku e rekisitonan aki. Pero dor ku awendia hende tin hopi diferente norma i konsepto di limpiesa, nos tin ku komprendé ta kiko Yehova ta konsiderá limpi i aseptabel, i biba di akuerdo ku esei. Nos tin ku haña sa kiko Dios ta spera di su adoradónan pa loke ta limpiesa, i kiko el a hasi pa yuda nan bira i keda limpi i aseptabel den su bista.—Salmo 119:9; Daniel 12:10.

Limpi pa Adorashon Berdadero

4. Splika e konsepto bíbliko di limpiesa.

⁴ Mayoria hende ta pensa ku una bes nan kurpa no ta sushi, esei kier men ku ya nan ta limpi. Sin embargo, den Beibel tin vários palabra hebreo i griego ku ta mustra kiko kier men ser limpi no djis den sentido físiko, sino mas tantu biaha den sentido moral i spiritual. P’esei, un ensiklopedia di Beibel ta deklará: “Masha poko biaha e palabranan ‘limpi’ i ‘impuru’ ta relashoná ku solamente asuntunan di higiena. Nan ta prinsipalmente konseptonan religioso. Komo tal, e prinsipio di ‘limpiesa’ tin di haber ku kasi tur aspekto di bida.”

5. Kon leu e Lei di Moises relashoná ku limpiesa a bai den bida dje israelitanan?

⁵ En bèrdat, e Lei di Moises tabatin regla riba práktikamente tur aspekto di bida dje israelitanan, bisando spesífikamente kiko tabata limpi i aseptabel i kiko nò. Por ehèmpel, den Levítiko kapítulo 11 pa 15 nos ta haña instrukshon detayá relashoná ku limpiesa i impuresa. Algun animal tabata impuru i e israelitanan no tabatin mag di kome nan. Un muhé ku a kaba di duna lus lo tabata impuru pa un sierto tempu. Algun malesa di kueru, prinsipalmente lepra, i derame òf fluho di e órganonan genital di un hòmber òf muhé tambe lo a hasi un persona impuru. Ademas, e Lei a bisa spesífikamente kiko un persona mester a hasi den situashonnan ku tabatin di haber ku impuresa. Por ehèmpel na Numbernan 5:2 nos ta lesa: “Ordená e yunan di Israel pa saka tur leproso i tur esnan ku tin un derame i tur esnan ku ta impuru pa motibu di un morto, for di e kampamentu.”

6. Pa ki propósito Yehova a duna e leinan relashoná ku limpiesa?

⁶ Sin duda, e leinan aki i otro reglanan di parti di Yehova a kontené konseptonan médiko i di bon salú ku tabata hopi adelantá pa nan tempu, i e pueblo a saka benefisio ora nan a sigui nan. No opstante, Yehova no a duna e leinan aki djis komo un kódigo di salú òf pa sirbi solamente komo instrukshon médiko. Nan tabata parti di adorashon berdadero. E echo ku e leinan aki a toka kosnan di bida di tur dia—manera kome, duna lus, relashon matrimonial, etcetera—a simplemente enfatisá e punto ku komo nan Dios, Yehova tabatin e derecho pa determiná pa su pueblo loke tabata korekto i loke no tabata korekto den tur aspekto di nan bida, un bida ku tabata eksklusivamente dediká na Yehova.—Deuteronomio 7:6; Salmo 135:4.

7. Ki bendishon e nashon di Israel lo a risibí dor di warda e Lei?

⁷ Tambe e pakto di Lei a protehá e israelitanan for dje kustumbernan degradá dje nashonnan rònt di nan. Dor di kumpli fielmente ku e Lei, i tambe ku tur e rekisitonan pa keda limpi den bista di Yehova, e israelitanan lo tabata apto pa sirbi nan Dios i pa risibí su bendishon. Relashoná ku esaki, Yehova a bisa e nashon: “Si di bèrdat boso kier obedesé mi bos i warda mi aliansa, e ora ei boso lo ta un tesoro pekuliar riba tur pueblo, pasobra henter tera ta di mi; i boso lo ta pa mi un  reino di saserdotenan i un nashon santu.”—Éksodo 19:5, 6; Deuteronomio 26:19.

8. Pakiko kristiannan djawe mester presta atenshon na loke e Lei di Moises ta bisa tokante limpiesa?

⁸ E echo ku Yehova a agregá e detayenan ei den e Lei pa instruí e israelitanan kon nan por a bira limpi i santu i haña su aprobashon, lo no mester pone kristiannan djawe tambe pensa seriamente riba kon nan ta kumpli ku e rekisitonan aki? Maske kristiannan no ta bou di e Lei di Moises, nan mester tene na mente ku, manera Pablo a splika, tur loke tin den e Lei ‘ta sombra di loke mester bin; ma e realidat ta pertenesé na Kristu.’ (Kolosensenan 2:17; Hebreonan 10:1) Si Yehova Dios—ku ta bisa ‘mi no ta kambia’—a mira un bida limpi sin kontaminashon komo un faktor asina importante den adorashon berdadero e tempu ei, nos tin ku tuma e asuntu di ser limpi den sentido físiko, moral i spiritual mashá na serio awe, si nos kier haña su aprobashon i bendishon.—Malakías 3:6; Romanonan 15:4; 1 Korintionan 10:11, 31.

Limpiesa Físiko Ta Rekomendá Nos

9, 10. (a) Pakiko limpiesa físiko ta importante pa un kristian? (b) Ki komentario hende sa duna hopi bes dje kongresonan di Testigunan di Yehova?

⁹ Ainda limpiesa físiko ta un aspekto importante di adorashon berdadero? Ounke no ta limpiesa físiko so ta hasi un persona un adoradó berdadero di Dios, sigur ta masha apropiado pa un adoradó berdadero ta físikamente limpi te asina leu ku su sirkunstansianan ta pèrmití. Spesialmente den nos tempu, masha poko hende ta presta atenshon na tene nan kurpa, nan paña i nan kas limpi. Pero, bista di otro hende ta kai riba esnan ku sí ta duna importansia na e kosnan ei. Esaki por hiba na resultadonan positivo, nèt manera Pablo a bisa e kristiannan korintio: “Nos no ta duna motibu di ofensa den nada, pa e ministerio no wòrdu desakreditá, ma den tur kos nos ta rekomendá nos mes komo sirbidónan di Dios.”—2 Korintionan 6:3, 4.

¹⁰ Na vários okashon funshonarionan públiko a elogiá Testigunan di Yehova pa nan komportashon i kustumbernan limpi, ordená i respetuoso prinsipalmente na nan kongresonan grandi. Por ehèmpel, relashoná ku un kongreso ku nan a tene den e provinsia di Savona, Italia, e korant La Stampa a komentá: “Ora bo kana den e lugá, loke ta resaltá mesora ta kon limpi i ordená e hendenan eiden ta.” Despues ku e Testigunan a tene un kongreso den un stadion na São Paulo, Brazil, un funshonario di e stadion a bisa su gerente dje tim di mantenshon: “Di awor padilanti nos kier pa boso limpia e stadion manera e Testigunan di Yehova ta hasié.” Un otro funshonario di e mesun stadion a bisa: “Ora e Testigunan di Yehova kier hür e stadion, ta ku e fechanan so nos ta preokupá. Nos no ta wòri ku nada otro.”

11, 12. (a) Ki prinsipio di Beibel nos mester tene na mente ora ta trata di limpiesa personal? (b) Ki preguntanan nos por hasi tokante nos kustumbernan personal i nos manera di biba?

¹¹ Si órden i limpiesa den nos lugá di adorashon por ta un fuente di alabansa na e Dios ku nos ta adorá, ta importante tambe pa nos manifestá e kualidatnan aki den nos bida personal. Sin embargo, na nos kas nos por pensa ku ningun hende no tin nada di bisa nos i ku nos por hasi kiko ku nos kier. Pa loke ta nos manera di bisti i drecha nos kurpa, bèrdat nos tin e libertat pa skohe loke nos ta haña atraktivo i konfortabel. Tòg, hopi bes tur esaki ta masha relativo. Kòrda ku ora Pablo a papia tokante kiko hende ta preferá di kome, el a spièrta su kompañeronan kristian: “Tene kuidou pa e libertat aki di boso, di un manera òf otro, no bira un piedra di trompeká pa esnan ku ta débil.” Anto el a deklará un prinsipio balioso: “Tur kos ta pèrmití, ma no ta tur kos ta kumbiní. Tur kos ta pèrmití, ma no ta tur kos ta edifiká.” (1 Korintionan 8:9; 10:23) Kon e konseho di Pablo ta apliká na nos den e asuntu di limpiesa?

 ¹² Ta lógiko pa hende ferwagt ku un sirbidó di Dios ta hiba un bida limpi i ordená. P’esei, nos tin ku sòru pa e aparensia di nos kas i rònt di kurpa di kas no rebahá loke nos ta bisa ku nos ta, esta, sirbidó dje Palabra di Dios. Ki klase di testimonio nos kas ta duna tokante nos i nos kreensianan? E ta mustra ku nos ta ègt anhelá pa biba den un mundu nobo di órden i hustisia, ku nos ta rekomendá otronan asina tantu? (2 Pedro 3:13) Meskos tambe, nos aparensia personal—sea den nos tempu liber òf den sirbishi—por hasi e mensahe ku nos ta prediká sea mas òf ménos atraktivo. Por ehèmpel, tuma nota di loke reportero di un korant na Mèksiko a bisa: “Mayoria miembro di Testigunan di Yehova ta hende yòn, i loke ta resaltá ta nan manera di pela, di bisti i nan limpiesa.” Ta un goso pa por tin hóbennan asina den nos seno!

13. Kiko nos por hasi pa garantisá ku tur aspekto di nos bida diario ta limpi i ordená?

¹³ Naturalmente, ta fásil pa bisa ku nos mester sòru pa nos kurpa, nos kosnan i nos kas ta limpi i ordená. Pa hasié ta otro kos. Loke nos mester no ta aparatonan sofistiká ni kostoso, sino bon planifikashon i esfuerso konsistente. Nos tin ku saka tempu pa limpia nos kurpa, nos pañanan, nos kas, nos outo, etcetera. E echo ku nos ta drùk ku sirbishi, ku baimentu di reunion i ku studio personal—huntu ku otro obligashon di bida diario—no ta dispensá nos dje nesesidat pa keda limpi i aprobá den bista di Dios i di hende. E prinsipio konosí ku “tin un tempu stipulá pa tur kos” ta apliká tambe na e parti aki di nos bida.—Eklesiástes 3:1.

Un Kurason Puru

14. Pakiko nos por bisa ku limpiesa moral i spiritual ta asta mas importante ku limpiesa físiko?

¹⁴ Si ta importante pa duna atenshon na limpiesa físiko, nos mester ta asta mas interesá ainda den limpiesa moral i spiritual. Nos ta yega na e konklushon aki ora nos kòrda ku Yehova a rechasá e nashon di Israel, no pasobra nan kurpa no tabata limpi, sino pasobra nan a bira sushi den sentido moral i spiritual. Mediante profeta Isaías, Yehova a bisa nan ku  dor ku nan ta un “nashon pekaminoso, pueblo kargá ku inikidat,” nan sakrifisionan, nan wardamentu di luna nobo i sabat, sí, asta nan orashonnan a bira un karga p’e. Kiko nan mester a hasi pa bolbe haña Dios su aprobashon? Yehova a bisa nan: “Laba boso mes, hasi boso mes limpi; kita e maldat di boso echonan for di mi bista. Stòp di hasi maldat.”—Isaías 1:4, 11-16.

15, 16. Kiko segun Hesus ta kontaminá hende, i kon nos por benefisiá dje palabranan di Hesus?

¹⁵ Pa komprendé mihó e importansia di limpiesa moral i spiritual, wak kiko Hesus a bisa e fariseo- i eskribanan ora esakinan a laga sa ku su disipelnan no tabata limpi pasobra nan no a laba man promé ku kome. Hesus a korigí nan dor di bisa: “No ta loke ta bai den boka ta kontaminá hende, ma loke ta sali for di boka, ta esei ta kontaminá hende.” Anto Hesus a splika: “E kosnan ku ta sali for di boka ta bin for di kurason, i ta esei ta kontaminá hende. Pasobra for di kurason ta sali pensamentu malu, matamentu, adulterio, fornikashon, ladronisia, testimonio falsu, kalumnia. Esakinan ta e kosnan ku ta kontaminá hende; ma kome sin laba man no ta kontaminá hende.”—Mateo 15:11, 18-20.

¹⁶ Kiko nos por siña for di Hesus su palabranan? Hesus a mustra ku mal inklinashon di kurason i mal deseo ta hiba na loke ta malu, inmoral i impuru. Manera disipel Santiago a deklará, “kada un ta wòrdu tentá ora ku e wòrdu atraé i sedusí dor di su mes pashon.” (Santiago 1:14, 15) Pues, si nos no kier kai den e pikánan grave ku Hesus a deskribí, nos tin ku eliminá kualkier tendensia ku nos kurason por tin di hasi e kosnan ei, i tene nan afó. Esei ta nifiká ku nos mester tene kuidou ku loke nos ta lesa, mira i skucha. Awe, bou di e kapa di libertat di ekspreshon i imaginashon artístiko, e industria di entretenimentu i di publisidat ta produsiendo un fluho interminabel di músika i imágen ku ta diseñá pa satisfasé loke e karni pekaminoso ta antohá. Nos mester ta determiná pa no laga ningun idea asina saka rais den nos kurason. E punto klave ta ku pa nos agradá Dios i haña aprobashon  den su bista, nos tin ku vigilá konstantemente pa por mantené un kurason limpi sin kontaminashon.—Proverbionan 4:23.

Purifiká pa Bon Obra

17. Pakiko Yehova a reuní su pueblo den un kondishon limpi?

¹⁷ E echo ku Yehova mes ta yuda nos pa nos por tin un posishon limpi su dilanti, sigur ta un bendishon i un protekshon. (2 Korintionan 6:14-18) Pero nos ta komprendé tambe ku Yehova a reuní su pueblo den un kondishon limpi pa un propósito spesífiko. Pablo a bisa Tito ku Kristu Hesus “a duna su mes pa nos, pa e por redimí nos di tur inikidat i purifiká pa su mes un pueblo pekuliar, ku selo den hasimentu di bon obra.” (Tito 2:14) Komo un pueblo purifiká, ki obra nos lo hasi ku selo, es desir, ku un deseo ferviente?

18. Kon nos por mustra ku nos tin un selo pa hasi bon obra?

¹⁸ Na promé lugá, nos tin ku hasi esfuerso pa deklará públikamente e bon nobo di e Reino di Dios. (Mateo 24:14) Dor di hasi esei, nos ta presentá na tur hende e speransa di biba pa semper riba un tera ku lo ta liber di tur klase di kontaminashon. (2 Pedro 3:13) Bon obra ta enserá tambe manifestá e fruta dje spiritu di Dios den nos bida di tur dia, i asina glorifiká nos Tata selestial. (Galationan 5:22, 23; 1 Pedro 2:12) I nos no ta lubidá esnan ku no ta den e bèrdat i ku ta ser asotá pa desaster natural òf tragedia humano. Nos ta kòrda riba e konseho di Pablo: “Asina anto, miéntras nos tin oportunidat, laga nos hasi bon na tur hende, i spesialmente na esnan ku ta di e famia di fe.” (Galationan 6:10) Tur e tipo di sirbishinan ei ku nos ta rindi ku un kurason limpi i motivashon puru ta agradá Dios mashá.—1 Timoteo 1:5.

19. Ki bon kosnan ta spera nos si nos sigui pega na un norma haltu di limpiesa físiko, moral i spiritual?

¹⁹ Komo sirbidó di e Dios Haltísimo, nos ta tuma na pechu e palabranan di Pablo: “Mi ta roga boso, rumannan, pa medio di e miserikòrdianan di Dios, pa presentá boso kurpanan komo sakrifisionan bibu i santu, aseptabel pa Dios, kual ta boso sirbishi spiritual di adorashon.” (Romanonan 12:1) Pa nos, ta un privilegio ku Yehova a hasi nos limpi. Wèl laga nos apresiá esei i hasi nos máksimo esfuerso pa mantené un norma haltu di limpiesa físiko, moral i spiritual. Si nos hasi esei, nos lo haña no solamente rèspèt propio i satisfakshon awor, sino tambe e speransa di mira e mundu malbado i kontaminá djawe—“e promé kosnan”—pasa bai ora Dios “hasi tur kos nobo.”—Revelashon 21:4, 5.

Bo Ta Kòrda?

• Pakiko Dios a duna e israelitanan hopi lei relashoná ku limpiesa?

• Kon limpiesa físiko ta hasi e mensahe ku nos ta prediká mas atraktivo?

• Dikon limpiesa moral i spiritual ta asta mas importante ku limpiesa físiko?

• Kon nos por mustra ku nos ta un pueblo ‘ku tin selo pa hasi bon obra’?

[Preguntanan di Estudio]

[Plachinan na página 21]

Limpiesa físiko ta hasi e mensahe ku nos ta prediká mas atraktivo

[Plachi na página 22]

Hesus a spièrta ku mal pensamentu ta hiba na malecho

[Plachinan na página 23]

Komo un pueblo purifiká, Testigunan di Yehova tin un selo pa hasi bon obra