Ta Ken Su Falta?—Di Bo òf di Genétika?

SIENTÍFIKONAN ta trahando duru pa purba haña sa ta kua di nos genenan ta kousa alkoholismo, homoseksualidat, bida parotin, violensia, otro komportashonnan apnormal, i asta morto mes. Lo no ta un alivio pa sa ku no ta nos ta responsabel pa nos aktonan, ma ku nos ta djis víktima di herensia genétiko? Hende gusta tira falta riba otro hende òf otro kos pa nan fayonan.

Sientífikonan ta bisa ku si ta nos genenan tin falta, nan lo por kambia nan i asina eliminá karakterístikanan indeseabel usando manipulashon genétiko. Awor ku resientemente nan a logra traha un mapa di henter e sèt di genenan di hende, e speransanan aki a kuminsá parse mas probabel.

Pero pa esei por ta posibel, ta nos herensia genétiko mester ta esun responsabel pa tur nos piká- i fayonan. E reshèrshinan sientífiko a haña sufisiente evidensia pa mustra ku ta nos genenan tin falta? Ta klaro ku e kontesta lo tin un efekto profundo riba e punto di bista ku nos tin di nos mes i di nos futuro. Pero promé ku nos eksaminá e evidensia, lo ta bon pa wak kon humanidat a kuminsá.

Kon Tur Kos A Kuminsá

Mayoria hende sea konosé òf a yega di tende dje relato ku ta mustra kon e promé pareha humano, Adam ku Eva, a kai den piká den hòfi di Eden. Ta Dios a traha nan for di kuminsamentu ku un fayo den nan genenan, un sorto di fayo den nan diseño, ku a obligá nan kai den piká i desobedensia?

Nan Kreador tabata Yehova Dios, i tur su obranan ta perfekto. I el a deklará ku su kreashon di mas haltu riba tera tabata “masha bon.” (Génesis 1:31; Deuteronomio 32:4) Tin mas evidensia di ku e tabata satisfecho ku su trabou: El a duna e promé pareha humano su bendishon i a manda nan bira fruktífero, yena tera ku hende i goberná su kreashon riba tera. Un persona ku no ta muchu sigur di loke el a kaba di traha lo no aktua asina.—Génesis 1:28.

Relashoná ku kreashon dje promé pareha humano, Beibel ta konta nos: “Dios a krea hende segun su mes imágen; segun e imágen di Dios el a krea hende; hòmber i muhé el a krea nan.” (Génesis 1:27) Esei no kier men ku Dios a traha hende pa nan pars’é den sentido físiko, pasobra “Dios ta [un] Spiritu.” (Huan 4:24) Mas bien e kier men ku Dios a dota hende ku e mesun kualidatnan ku e tin, un sentido di moralidat i un konsenshi. (Romanonan 2:14, 15) Nan tabatin  boluntat liber tambe: nan tabata kapas pa evaluá un asuntu i disidí kiko pa hasi.

Pero Dios no a laga nos promé mayornan sin guia. Mas bien el a spièrta nan kiko lo ta e konsekuensianan si nan hasi malu. (Génesis 2:17) P’esei, evidensia ta mustra ku ora Adam a hañ’é enfrentá ku un desishon moral, ta skohe el a skohe pa hasi loke tabata mas bentahoso den su bista n’e momentu ei. El a bai tras di su kasá ora esaki a hasi malu na lugá di para pensa riba su relashon ku su Kreador, òf e efekto di largu alkanse ku su akshon lo tin. Ademas, despues el a purba tira e falta riba Yehova bisando ku ta e kasá ku Dios a dun’é a pon’é hasi malu.—Génesis 3:6, 12; 1 Timoteo 2:14.

Nos por siña hopi for dje manera ku Dios a reakshoná riba e piká di Adam ku Eva. E no a purba koregí niun supuesto fayo den e diseño di nan genenan. Mas bien, el a kumpli ku loke el a bisa ku lo ta e konsekuensia di nan akshon, i finalmente esei a hiba na nan morto. (Génesis 3:17-19) E historia antiguo aki ta siña nos hopi tokante komportashon di hende. *

Evidensia Ku No Ta Genétika Ta e Problema

Sientífikonan tin hopi tempu ta lucha ku e enorme tarea pa haña e kousa- i solushonnan genétiko pa enfermedat i komportashon di hende. Despues ku seis tim di sientífiko a traha dies aña largu, nan a logra identifiká e gene ku tin di haber ku e enfermedat di Huntington, ounke ainda nan no tin ni e menor idea kon e gene aki ta kousa e enfermedat. Sin embargo, den un informe tokante e investigashon aki, Scientific American a sita Evan Balaban, biólogo di Harvard, kende a bisa ku lo ta “hopi pero hopi mas difísil pa deskubrí genenan ku tin di haber ku desviashon den komportashon.”

De echo, ainda nan no a logra establesé e relashon entre genenan spesífiko ku sierto formanan di komportashon. Por ehèmpel, un informe den Psychology Today tokante esfuersonan pa haña e kousa genétiko di depreshon ta bisa: “Datonan disponibel tokante e enfermedatnan mental prinsipal ta mustra bon kla ku no por mara e enfermedatnan aki simplemente na kousanan genétiko.” E informe ta duna un ehèmpel: “Apénas 1 porshento di merikano ku a nase promé ku 1905 a sufri di depreshon promé ku nan a pasa 75 aña. Pero 6 porshento di merikano ku a nase mei siglo despues a sufri di depreshon promé ku nan a pasa 24 aña di edat!” Pues, nos por konkluí ku ta faktornan eksterno òf sosial so por okashoná un kambio asina drástiko den asina poko tempu.

 Kiko e estudionan aki i hopi otro ta duna nos di komprendé? Ku ounke nos genenan por ta hunga un papel importante den forma nos personalidat, klaramente mester tin otro kos ku ta hasi influensia. Un faktor hopi importante ta nos ambiente, i esaki a kambia drástikamente último tempunan. Relashoná ku loke hóbennan di awendia ta bini den kontakto kuné via dibertishon popular, e buki Boys Will Be Boys, ta remarká ku no ta fásil pa mucha desaroyá prinsipionan moral sano si nan ta “krese mirando míles i míles di ora di programa na televishon i pelíkula den kua nan ta wak kon hende ta ataká otro, tira otro, hinka otro, saka mondongo di otro, kap otro na pida-pida, soya otro òf kap otro su man ku pia kita afó. I meskos ta konta si mucha ta krese skuchando músika ku ta glorifiká violashon, suisidio, droga, alkohòl i diskriminashon.”

Ta bisto ku Satanas, “e dios di e mundu aki,” a krea un ambiente ku ta stimulá hende su deseonan di mas baho. I kua di nos por nenga ku e ambiente aki ta ehersé un influensia fuerte riba nos tur?—Huan 12:31; Efesionan 6:12; Revelashon 12:9, 12.

Rais dje Problemanan di Humanidat

Manera nos a mira kaba, hende su problemanan a kuminsá ora e promé pareha humano a kometé piká. Kiko tabata e resultado? Maske e generashonnan di desendiente di Adam no ta responsabel pa e piká ku Adam a kometé, nan tur ta nase ku piká, imperfekshon i morto komo nan herensia den bida. Beibel ta splika: “P’esei, meskos ku dor di un hende piká a drenta den mundu, i morto dor di piká, i asina morto a pasa pa tur hende, pasobra tur a peka.”—Romanonan 5:12.

Definitivamente, nos estado imperfekto ta un hèndikèp. Pero esei no kier men ku nos no tin niun responsabilidat moral. Beibel ta bisa ku esnan ku pone fe den Yehova su perkurashon pa bida i ku pone nan bida na armonia ku Dios su normanan, lo haña su aprobashon. Den su bondat amoroso Yehova a hasi un perkurashon miserikordioso pa kumpra humanidat bèk, komo si fuera rekuperando loke Adam a pèrdè. E perkurashon ku el a hasi ta e sakrifisio di reskate di su Yu perfekto Hesukristu, kende a bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.”—Huan 3:16; 1 Korintionan 15:21, 22.

Apòstel Pablo a ekspresá e apresio profundo ku el a sinti p’e perkurashon aki dor di deklará: “Hende miserabel ku mi ta! Ken lo libra mi di e kurpa di morto aki? Mi ta duna gradisimentu na Dios dor di Hesukristu, nos Señor!” (Romanonan 7:24, 25) Pablo tabata sa ku si el a sukumbí na piká pa motibu di debilidat, e por a pidi Dios pordon a base dje sakrifisio di reskate di Hesukristu. *

Meskos ku den promé siglo, awe tambe tin miónes di hende ku tabata hiba un bida hopi robes, òf ku tabata den un situashon ku a parse sin speransa, pero ku a gana konosementu eksakto dje bèrdat di Beibel, a hasi e kambionan nesesario den nan bida, i awor ta den posishon pa risibí e bendishon di Dios. E kambionan ku nan mester a hasi no tabata fásil, i hopi di nan ainda tin ku lucha kontra mal inklinashon. Pero ku yudansa di Dios nan por mantené nan integridat i sirbié ku goso. (Filipensenan 4:13, NW) Wak djis un ehèmpel di un hende ku a hasi kambionan drástiko pa e por a agradá Dios.

Un Eksperensia Animante

“Tempu mi tabata un mucha hòmber hóben na un internat, mi a kai den práktikanan homoseksual, maske nunka mi no a konsiderá mi  mes un homoseksual. Mi mayornan a divorsiá, i mi tabata anhelá e kariño di mayor ku nunka mi a risibí. Ora mi a kaba skol mi a bai den servisio militar obligatorio. Tabatin un grupo di homoseksual den e baraknan nèt banda di esun di mi. Dor ku mi a envidiá nan estilo di bida, mi a kuminsá asosiá ku nan. Despues di asosiá ku nan pa rònt di un aña mi a kuminsá konsiderá mi mes un homoseksual. Mi tabata rasoná ku ‘ta asina mi ta, i mi no por hasi nada pa kambia.’

Mi a kuminsá siña papia manera nan i bai klup di homoseksual, kaminda tabatin droga i alkohòl na abundansia. Maske e bida ei a parse hopi eksitante i atraktivo, en realidat e ta un kos repugnante. Den mi mes mi tabata sinti ku e tipo di relashonnan ei ta innatural, i ku nan no tabata hiba mi niun kaminda.

Den un pueblo chikitu mi a topa un Salòn di Reino di Testigunan di Yehova nèt ora tabatin un reunion. Mi a drenta skucha e diskurso ku a papia di e Paradeis den futuro. Despues mi a topa un par di Testigu, i nan a invitá mi pa bai un asamblea. Mi a bai, i mi a keda sorprendí di mira famianan felis ta adorá huntu. Mi a kuminsá studia Beibel ku Testigunan di Yehova.

Apesar ku tabata un lucha, mi a kuminsá pone na práktika e kosnan ku mi tabata siña for di Beibel. Mi a logra libra di tur mi práktikanan sushi. Despues di studia 14 luna, mi a dediká mi bida na Yehova i batisá. Pa di promé bes den mi bida mi tabatin amigu di bèrdat. Mi por a yuda otro hende siña e bèrdat di Beibel, i awor mi ta sirbi komo sirbidó ministerial den e kongregashon kristian. Yehova a bendishoná mi di bèrdat.”

Nos Ta Responsabel

Purba tira tur e falta pa nos mal komportashon riba nos herensia genétiko simplemente no ta e solushon. Na lugá di yuda nos resolvé òf vense nos problemanan, segun e revista Psychology Today, esei “por pone nos sinti ku no tin nada ku nos por hasi, i ta nèt e sintimentu ei ta e rais di hopi di nos problemanan. En bes di pone ku nos ta kai ménos den e problemanan aki, ta parse ku e pensamentu ei ta hasi nan bira pió.”

Ta bèrdat ku tin influensianan fuerte ta bringa nos, entre otro nos propio tendensia pa hasi piká, i Satanas su esfuersonan pa kita nos di sirbi Dios. (1 Pedro 5:8) Tambe ta bèrdat ku nos genenan por influensiá nos di un manera òf otro. Pero di ningun manera nos no ta sin yudansa. Kristiannan bèrdadero tin aliadonan poderoso: Yehova, Hesukristu, Dios su spiritu santu, su Palabra Beibel i e kongregashon kristian.—1 Timoteo 6:11, 12; 1 Huan 2:1.

Promé ku e nashon di Israel a drenta e Tera Primintí, Moises a rekordá e pueblo ku nan tabatin un responsabilidat dilanti Dios. El a bisa nan: “Mi a pone bida i morto boso dilanti, e bendishon i e maldishon. P’esei, skohe bida pa bo biba, abo i bo desendientenan, dor di stima SEÑOR bo Dios, dor di obedesé su bos i dor di tene duru na dje.” (Deuteronomio 30:19, 20) Awe tambe, ta kada ken tin ku disidí personalmente si lo e sirbi Dios i kumpli ku su rekisitonan. E desishon ta den bo man.—Galationan 6:7, 8.

[Nota]

[Plachinan na página 9]

Ta un defekto genétiko a obligá Adam ku Eva kai den piká?

[Plachinan na página 10]

Ta kada ken mester para responsabel pa e desishonnan ku e tuma?

[Rekonosementu]

Usadó di droga: Godo-Foto

[Plachi na página 11]

Esfuersonan pa haña genenan ku ta determiná komportashon di hende no a duna fruta

[Plachi na página 12]

Pone loke Beibel ta bisa na práktika por yuda hende sinsero kambia