Un Lès for di Historia Romano

“SI KOMO hende mi a bringa ku bestianan di mondi na Efeso.” Algun hende ta pensa ku e palabranan ei na 1 Korintionan 15:32 ta duna di konosé ku nan a sentensiá apòstel Pablo pa bringa den un arena romano. Sea ku esei tabata e kaso òf nò, batayanan te na morto den arena tabata masha komun den e tempu ei. Kiko historia ta konta nos tokante arena i susesonan ku a tuma lugá den nan?

Komo kristian, nos kier pa nos konsenshi ta un refleho di Yehova su manera di pensa, i esei por yuda nos determiná ku kiko nos por dibertí den e tempu moderno aki. Por ehèmpel, wak kiko Dios ta pensa di violensia, manera e siguiente palabranan ta mustra: “No envidiá un hende di violensia, i no skohe ningun di su kamindanan.” (Proverbionan 3:31) E kristiannan di promé tabatin e spièrtamentu ei komo guia den un tempu ku hopi hende rònt di nan tabata enkantá ku e romanonan su  kompetensianan di gladiadó. Despues ku nos analisá loke tabata tuma lugá n’e evenementonan ei, laga nos mira ki lès kristiannan djawe por saka.

Dos gladiadó armá ta enfrentá otro den un arena romano. Asina ku e promé sla di spada dal kontra eskudo, e multitut ta kuminsá grita den euforia pa animá nan faborito. Ta un bataya di desesperashon. Djis despues, un di nan, heridá i inkapas pa sigui, ta tira su arma abou i kai na rudia. E ta rekonosé derota i pidi miserikòrdia. E públiko ta kuminsá grita asta mas duru. Algun ta grita pa klemensia, otronan pa su morto. Tur bista ta fihá riba e emperador. E ta paga bon tinu den ki direkshon e deseo dje multitut ta bai. E por sea libra e guerero derotá òf, ku e gesto di dùim abou, ordená su morto.

E romanonan tabata fanátiko ferviente di espektákulonan di gladiadó. Kisas lo bo keda sorprendí pa sa ku inisialmente nan tabata tene e batayanan ei na entiero di personahenan importante. Aparentemente e kompetensianan a haña nan orígen den sakrifisio humano entre e pueblonan osko òf samnita di loke awe ta Italia sentral. Nan tabata hasi sakrifisio pa kalma spiritu dje defuntunan. Nan tabata yama e kombatenan ei munus, òf “regalo” (plural, munera). E promé weganan registrá na Roma a tuma lugá na aña 264 promé ku Era Komun ora tres par di gladiadó a bringa den e marshe di bue. N’e entiero di Marko Emilio Lepido, tabatin 22 bataya. Na Publio Lisinio su entiero, 60 par a enfrentá otro. Na aña 65 promé ku Era Komun, Julio Sésar a manda 320 par den arena.

“Entieronan aristokrat tabata okashonnan pa logra ambishonnan polítiko,” segun historiadó Keith Hopkins, “i e weganan na entiero tabatin konotashonnan polítiko . . . pa motibu di nan popularidat bou dje pueblo votadó. Sí, ta e kompetensia polítiko entre noblenan ambisioso a yuda duna eksibishonnan di gladiadó mas i mas splendor.” Bou dje reinado di Augusto (27 P.E.K. pa 14 E.K.), ya e munera a bira regalonan generoso ku ofisialnan riku di estado tabata ofresé pa promové nan kareranan polítiko. Esakinan tabata alabes dibertishon pa multitutnan.

E Partisipantenan i Entrenamentu

Kisas bo ta puntra: ‘Ken tabata e gladiadónan?’ Wèl, talbes nan tabata katibu, kriminal kondená na morto, prezu di guera, òf gewoon personanan liber atraí p’e euforia òf e speransa di haña fama i rikesa. Nan tur a haña nan preparashon den skolnan ku parse prizon. E buki Giochi e spettacoli (Weganan i Espektákulonan) ta informá ku “semper tabatin hende ta vigilá e entrenamentu di gladiadónan i nan tabata someté nan na disiplina rígido, e reglanan di mas severo i kastigu partikularmente pisá . . . Hopi bes e trato aki a hiba na suisidio, lantamentu i rebelion.” E skol di gladiadó mas grandi di Roma tabatin sèl pa por lo ménos mil hende. Kada hòmber tabatin su spesialidat. Algun tabata bringa ku harnas, eskudo i spada; otronan ku nèt i sper di tres punta. Tabatin un grupo ku a ser entrená pa enfrentá bestia salbahe den un otro tipo di ekshibishon popular: matansa di bestia. Ta dje evenemento ei mes Pablo tabata papia?

Organisadónan di show por a buska yudansa di komersiantenan ku tabata reklutá hóben di 17 pa 18 aña di edat, i entrená nan pa bira gladiadó. Trafikashon di hende tabata un negoshi lukrativo. Un show ekspeshonal ku Trahano a ofresé pa selebrá un viktoria militar a presentá 10.000 gladiadó i 11.000 animal.

 Un Dia na Arena

Parti mainta na arena tabata dediká na matansa di bestia. Nan tabata manda tur tipo di bestia salbahe den arena. Públiko tabata gusta speshalmente pelea entre toro ku oso. Hopi bes nan tabata mara nan na otro pa nan bringa te ora unu muri. Despues un matadó ta kaba ku e otro. Otro konfrontashonnan popular tabata di leon kontra tiger, òf olefante kontra oso. E matadónan tabata mustra kon bon nan tabata den mata e animalnan eksótiko ku nan tabata trese for di tur parti dje imperio, manera leopardo, neushoorn, hipopótamo, zjiraf, hiena, kamel, wòlf, porko brabu i antiloop. E gastunan no tabata un problema.

E esenarionan kreá tabata hasi e matansanan aki inolvidabel. Nan tabata pone baranka di piedra, plas di awa i mata pa imitá mondi. Den algun arena, tabata presentá e bestianan ku hopi kreatividat, por ehèmpel dor di laga nan sali via left i luik for di bou di tera. Ora un animal a komportá straño e públiko a keda enkantá, pero loke aparentemente a fasiná e públiko mas tabata e krueldat dje konfrontashon- i matansanan.

Despues a sigui e ehekushonnan. Nan a hasi esfuerso pa duna esakinan un toke original. Tabata presentá dramanan mitológiko den kua e aktornan tabata muri di bèrdè.

Parti atardi, diferente grupo di gladiadó ku distinto arma i entrená den e vários téknikanan di pelea tabata lucha kontra otro. Algun di esnan ku tabata lastra e kadavernan saka afó tabata bistí manera e dios di fièrnu.

E Efekto Riba Espektadornan

E públiko su hamber pa akshon tabata insasiabel. P’esei ora ku e luchadónan no tabatin gana di bringa, tabata suta nan òf kima nan ku heru kayente pa lanta nan ánimo. Públiko tabata grita: “Pakiko e ta enfrentá spada manera kobarde asina? Pakiko e ta dal sin smak? Pakiko e no ta [dispuesto di] muri? Sut’é pa lanta su ánimo pa bringa! Laga nan gòlpia otro kurpa habrí na man di spada!” E estadista romano Séneka ta skirbi ku un biaha durante pousa nan a anunsiá: “Entre tantu lo kòrta un par di garganta, ya asina tòg tin algu pa wak!”

Nada straño anto ku Séneka ta atmití ku el a regresá kas “mas kruel i mas inhumano.” E konfeshon franko ei ta pone nos pensa seriamente riba e asuntu. Tin posibilidat ku algun dje deportenan djawe ta afektá e públiko di mes manera, pone nan bira “mas kruel i mas inhumano”?

Algun dje espektadornan por a konsiderá ku nan tabatin suerte mes di por a yega kas bèk. Ora un espektador a hasi bofon di Emperador Domisiano, esaki a laga lastr’é for di su asiento i tir’é pa kachó. Falta di kriminal pa ser ehekutá a pone Calígula ordená pa gara henter un sekshon  dje públiko i tira nan pa bestia salbahe. I ora Claudio a haña ku e aparatonan di esenario no tabata funshoná na su smak, el a laga manda e mekánikonan na enkargo bai bringa den arena.

E fanatismo dje públiko tambe a hiba na desaster i disturbio. Un anfiteater djis parti nort di Roma a basha den otro i segun informenan míles di hende a muri. Durante un espektákulo na Pompei na aña 59 di nos era a kuminsá un disturbio. Tásito ta informá ku e konfrontashonnan entre e públiko lokal i gruponan rival ku a bini for di un pueblo den besindario a kuminsá ku un interkambio di insulto, despues tiramentu di piedra i a kaba na uso di spada. Vários a ser desfigurá òf heridá, i hopi a ser matá.

Un Lès Masha Kla

Un ekshibishon resien (Sangue e arena, “Sanger i Santu”) den e Koliseo di Roma a mustra riba e paralelonan moderno dje weganan di munera. El a pasa vários video clip di pelea di toro, bòkseo profeshonal, chokenan horibel den kareda di outo i motosaikel, peleanan entre atletanan ku ta sali for di kòntròl i disturbio bou di fanátikonan ku ta lanta kontra otro. E presentashon a kaba ku imágen dje Koliseo mirá djariba. Kiko bo ta kere ku e bishitantenan mester a konkluí? Kuantu di nan lo a saka un lès?

Pelea di kachó, di gai i di toro i deportenan violento ta komun den algun pais awe. Kareda di outo i di motosaikel ku ta eksitá públiko grandi ta pone bida di hende na peliger. Pensa tambe riba e shownan di tur dia na televishon. Estudionan den un pais oksidental a mustra ku pa tempu muchanan ku ta wak televishon yega dies aña, ya nan lo a mira 10.000 asesinato i 100.000 akto di agreshon.

E plasernan ku e espektákulonan tabata brinda no a “kuadra ku e religion berdadero i obedensia berdadero na e Dios berdadero,” segun Tertuliano, eskritor di terser siglo. El a konsiderá esnan ku a asistí na e evenementonan ei komo kómplise di esnan ku ta hasi e matansanan. Kiko di awe? Bo por puntra bo mes: ‘Mi ta dibertí ku espektákulo di sanger, morto òf violensia na televishon òf riba Internet?’ Ta bon pa nos kòrda ku Salmo 11:5 ta bisa: “SEÑOR ta pone e hustu i e malbado na prueba, ma esun ku ta gusta violensia Su alma ta odia.”

[Kuadro na página 28]

Bataya pa “Kalma e Defuntunan”

Tertuliano, un eskritor di siglo tres, ta bisa tokante e orígen di kombatenan di gladiadó: “Hende di antigwedat a pensa ku mediante e tipo di espektákulo aki nan tabata rindi un sirbishi n’e mortonan, despues ku nan a moder’é ku un forma mas sivilisá di krueldat. Den pasado nan tabata kere ku mester a usa sanger humano pa kalma alma di defuntu. P’esei nan tabatin kustumber di sakrifiká esnan ku nan kapturá òf e katibunan di mal kalidat ku nan tabata kumpra. Mas despues nan a haña ku lo tabata bon pa tapa nan maldat dor di hasié un kos di plaser. Pues despues ku nan a entrená e personanan ku nan a buska ku e mihó armanan ku nan tabatin e tempu ei, nan tabata mata nan n’e grafnan riba e fecha stipulá p’e entiero. Pues dor di mata un otro hende nan tabata haña konsuelo pa morto di nan ser kerí. Esaki ta e orígen di munus. Pero despues di poko tempu nan a refiná e aspekto kultural i a pon’é na mes nivel ku e krueldat dje espektákulo; pasobra e plaser dje dia di fiesta lo no tabata kompleto si bestia salbahe tambe no a yuda sker kurpa humano na pida. Loke nan a ofresé pa kalma e defuntunan a ser kontá komo un rito di entiero.”

[Plachi na página 27]

Hèlm i protekshon pa pia di gladiadó di antigwedat

[Plachi na página 29]

Kristiannan di pasado a haña ku dibertishon violento tabata inaseptabel. Abo ta pensa meskos?

[Rekonosementu]

Bòkseo: Dave Kingdon/Index Stock Photography; choke di outo: AP Photo/Martin Seppala

[Rekonosementu pa Potrèt na página 26]

Phoenix Art Museum, Arizona/Bridgeman Art Library