E Orígen Antiguo di Prenchi Religioso

“Prenchi ta un manera di uni nos ku e bondat i santidat di Dios i Su Santunan.”—ARSOBISPADO GRIEGO ÒRTODÒKS DI OUSTRALIA

RIBA un dia kalor den ougùstùs, e rayonan di solo tabata kima riba e trapi di semènt ku ta hiba n’e monasterio di “Santísima Mama di Dios” na e isla Tínos, den Laman Egeo. E kalor sofokante no a kita nada di e determinashon di e mas ku 25.000 peregrinonan deboto di e religion griego òrtodòks ku tabata kana pokopoko pa yega n’e prenchi tur dòrná di e mama di Hesus.

Un hobensita lam, klaramente yen di doló i ku un kara di desesperashon, ta gatia riba su rudianan ku ta sangra pisá. No leu for di dje, un señora bieu agotá ku a biaha for di e otro punta di e pais, ta fòrsa su pianan pa sigui kana. Un hòmber di rònt di 40 aña, papa sodá ta purba pasa ansiosamente dor di e multitut ku ta pusha den otro. Tur hende kier yega pa nan sunchi un prenchi di Maria i hinka rudia dilanti dje.

No tin duda ku e hendenan sumamente religioso aki ta sinsero den nan deseo pa adorá Dios. Pero kuantu di nan ta konsiente ku venerashon di prenchi religioso a kuminsá hopi siglo promé ku kristianismo tabata eksistí?

Popularidat di Prenchi

Den e mundu òrtodòks, tin prenchi religioso tur kaminda. Den edifisionan di iglesia, prenchi di Hesus, di Maria i di hopi “santu” ta okupá un lugá sentral. Hopi bes e kreyentenan ta onra e prenchinan ku sunchi, sensia i bela sendé. Ademas, kasi tur kas òrtodòks tin nan mes huki di prenchi, kaminda nan ta resa. Ta masha normal pa un kristian òrtodòks bisa ku ora e ta venerá un prenchi, e ta sintié mas serka Dios. Hopi di nan ta kere ku prenchi a haña grasia divino i poder milagroso.

Probablemente e kreyentenan ei lo keda sorprendí di sa ku e kristiannan di promé siglo no a aprobá uso di prenchi den adorashon. E buki Byzantium ta bisa: “E promé kristiannan, ku a heredá for di e hudiunan un sintimentu di repugnansia pa ku idolatria, a desaprobá tur venerashon di prenchi di personanan santu.” E mesun buki ta remarká: “For di Siglo 5 padilanti, prenchi òf imágen . . . a bira mas i mas popular den adorashon públiko i privá.” Si no ta den kristianismo di promé siglo uso di prenchi religioso a originá, ta na unda anto?

 Yegando na e Orígen di Prenchi Religioso

E investigadó Vitalij Ivanovich Petrenko a skirbi: “Uso di imágen i su tradishonnan ta bini for di hopi tempu promé ku e era kristian i a ‘originá den paganismo.’” Hopi historiadó ta di akuerdo ku esei, i ta bisa ku adorashon di prenchi a originá den e religionnan di Babilonia, Egipto i Gresia. Por ehèmpel, Gresia di pasado tabatin hopi símbolo religioso den forma di imágen. Supuestamente, esakinan tabata dotá ku poder divino. Tambe tabata reina e pensamentu ku no ta man di hende a traha algun di e imágennan aki sino ku nan a kai for di shelu. Durante sierto fiestanan spesial, nan tabata kana ku e imágennan religioso ei den un proseshon rònt di e stat i ofresé sakrifisio na nan. “Ounke filósofonan griego a hasi intento . . . pa distinguí entre e dios i su imágen, hende deboto tabata mira imágen religioso komo un dios mes,” segun Petrenko.

Kon e ideanan i práktikanan ei a filtra drenta kristianismo? E investigadó Petrenko a remarká ku den e siglonan despues ku e apòstelnan di Kristu a muri, spesialmente na Egipto, “kreensianan kristian a haña nan konfrontá ku un ‘meskla di tradishonnan pagano’—ku a konsistí di kustumber- i kreensianan egipsio, griego, hudiu, oriental i romano ku tabata ser praktiká samsam ku e fe kristian.” Konsekuensia di esei tabata ku ‘artesanonan kristian a adaptá un método di union di fe i a hasi uso di símbolonan pagano, dunando nan un nifikashon nobo den kristianismo, sin embargo sin purifiká nan totalmente for di influensia pagano.’

No a dura muchu ku prenchinan a haña un lugá importante den tantu lugánan públiko religioso komo den kasnan privá. Den e buki The Age of Faith (Époka di Fe), historiadó Will Durant ta deskribí kon esaki a tuma lugá. E ta bisa: “Segun e kantidat di santunan a multipliká, a surgi e nesesidat pa identifiká nan i kòrda nan; a produsí prenchi di nan i di Maria na gran kantidat; i den e kaso di Kristu, no ta Su aparensia físiko imaginá so a bira opheto di venerashon sino tambe Su krus. Asta pa mente simpel, e prenchinan a bira talisman mágiko. E pueblo  su abilidat natural di imaginashon a kombertí relikia-, prenchi- i imágennan santu den ophetonan di adorashon; hende tabata bùig dilanti nan, sunchi nan, sende bela i kima sensia nan dilanti, koroná nan ku flor, i buska milager for di nan influensia sobrenatural. . . . Na vários okashon e Tatanan i konsilionan di Iglesia a splika ku e imágennan mes no tabata dios, sino simplemente algu pa yuda hende kòrda riba dios; e pueblo sí no kier a hasi e distinshon ei.”

Awe, hopi hende ku ta usa prenchi religioso tambe lo ta bisa ku e imágennan ta simplemente ophetonan di rèspèt, i no pa adorá. Kisas nan ta pretendé ku pintura religioso ta un yudansa legítimo—asta indispensabel—pa adorá Dios. Tal bes bo ta pensa meskos. Pero e pregunta ta: Kon Dios ta mira esaki? Ta eksistí e posibilidat ku venerá un prenchi ta meskos ku ador’é? E práktikanan ei realmente por tin un peliger skondí den nan?

[Kuadro/Plachi na página 4]

Prenchi Religioso

Miéntras ku hopi hende den religion katóliko romano ta usa imágen den adorashon, Iglesia Òrtodòks tin hopi prenchi òf kuadro (yamá tambe ikono) di Kristu, di Maria, di “santu,” di angel, di personahenan i susesonan di Beibel, òf di susesonan den historia di Iglesia Òrtodòks. Por lo general ta pinta e prenchinan religioso aki riba tabla di palu portátil.

Segun Iglesia Òrtodòks, “den Prenchi di e Santunan, e figuranan no ta parse figura di hende normal di karni i sanger.” Generalmente “no tin sombra, ni manera pa mustra di dia i anochi.” Tambe hende ta kere ku e palu i fèrf di un prenchi por “yena ku e presensia di Dios.”

[Plachi na página 4]

Uso di imágen a originá di kustumbernan pagano

[Plachi na página 3]

© AFP/CORBIS