Kongresonan Internashonal pa Aña 2003

DJASABRA, 6 di óktober 2001 a tene e reunion anual dje miembronan di Watch Tower Bible and Tract Society of Pennsylvania na Jersey City, New Jersey, Merka. Despues di e reunion ei, e miembronan i nan invitadonan a disfrutá di un programa spesial. E siguiente dia, durante un otro reunion ku nan a tene den kuater stat di Kánada i Merka, e Kuerpo Gobernante di Testigunan di Yehova a hasi e siguiente anunsio despues di e diskurso final:

“Ku bista riba futuro, ta di sumo importansia pa niun di nos ku ta forma parti di e pueblo di Dios no laga di bai nos reunionnan. Apòstel Pablo a urgi nos pa hasi esaki i tambe pa animá otro muchu mas ainda awor ku nos ta mira ku Yehova su dia grandi i inspirador di temor ta yegando serka. (Hebreonan 10:24, 25) Na armonia ku e mandato di Beibel aki, nos ta spera di tene nos kongresonan di distrito den tur parti di mundu otro aña [2002]. Anto pa aña 2003, si ta Yehova su boluntat, lo ta posibel pa nos tene kongresonan internashonal speshal den sierto region di mundu. Awor ta tempu pa keda lantá i vigilá, i diserní kon susesonan ta desaroyá riba esena mundial.”

Ounke insiguridat i tenshon ta oumentá mas i mas segun ku e sistema aktual ta yegando su fin, e aktividat dje pueblo di Dios mester sigui padilanti. E bon nobo di Reino, inkluso e mensahe di spièrtamentu ku Beibel ta duna, mester ser deklará na tur nashon, tribu, lenga i pueblo. Mester hasi un yamada na nan pa “teme Dios i dun’é gloria, pasobra e ora di su huisio a yega.” (Revelashon 14:6, 7) P’esei, na armonia ku nos Tata selestial su boluntat, nos ta plania pa tene kongresonan internashonal den vários region di mundu durante aña 2003.

Pa kuminsá, e lugánan tentativo ku ta programá pa tene e kongresonan aki ta algun stat na Nort Amérika i djis despues, na Europa. Un tiki mas despues den aña 2003, lo hasi areglo pa gruponan di delegado biaha bai algun stat na Asia; i pa fin dje aña otro gruponan lo bai Áfrika, Suramérika i den e área di Laman Pasífiko. Lo pidi vários sukursal pa manda un kantidat limitá di delegado na sierto sitionan spesífiko di kongreso, pues no ta tur hende por haña invitashon pa bai. Pero pa chikitu ku e delegashonnan aki ta, lo ta un animashon pa na kada lugá tin representante di diferente pais.

Pronto kongregashonnan di Testigunan di Yehova lo risibí informashon relashoná ku e reunionnan aki. Nan respektivo sukursalnan lo duna informashon tokante fecha i lugá eksakto kaminda e delegadonan invitá por asistí. P’esei, nos ta pidi boso pa no skirbi ni hasi pregunta tokante e asuntu aki awor akí.

Finalmente, ta únikamente Testigunan dediká i batisá ku ta un bon ehèmpel i ku lo mustra amor fraternal n’e rumannan lokal lo ser selekshoná komo delegado. Testigunan lokal, na nan turno, lo tin e ekselente oportunidat pa duna e bishitantenan un bonbiní amoroso i mustra berdadero hospitalidat na nan. (Hebreonan 13:1, 2) Tur lo por “enkurashá” otro. (Romanonan 1:11, 12) E sukursalnan ku haña invitashon pa manda delegado na un pais en partikular òf vários pais, lo duna mas detaye relashoná ku e areglo aki.

Manera ta kustumber, lo hasi areglo pa tene e kongresonan di distrito di tres dia pa aña 2003 den mayoria pais. Dor di reuní huntu, tur hende lo tin oportunidat pa ‘tende, siña i ser eksortá.’ (Deuteronomio 31:12; 1 Korintionan 14:31) Esaki lo duna henter e pueblo di Dios e oportunidat pa “purba i mira ku SEÑOR ta bon.” (Salmo 34:8) Na tur kongreso internashonal i tambe na hopi kongreso di distrito lo tin misionero presente i algun di nan lo partisipá den e programa.

Durante e aña aki nos ta disfrutando di e Kongreso di Distrito “Proklamadónan Seloso dje Reino,” ku ta stimulá nos pa duna mas testimonio. Segun ku nos ta hasi esaki, nos espektativanan pa loke Yehova tin wardá pa otro aña lo oumentá sigur. Esaki lo yuda nos ‘sigui vigilá, keda lantá i duna prueba ku nos ta prepará’ durante e tempu krítiko i krusial aki.—Mateo 24:42-44.