Wak pa Bo No Ser Engañá

ENGAÑO ta kasi mes bieu ku humanidat. Un dje promé susesonan di historia skirbí tabata un akto di engaño. Esei tabata ora Satanas a gaña Eva den e hòfi di Eden.—Génesis 3:13; 1 Timoteo 2:14.

Ounke semper tabatin engaño tur kaminda, awe e ta mas plamá ku nunka. Beibel a premirá loke lo sosodé den tempu moderno, p’esei el a spièrta: “Hendenan malbado i gañadónan lo bai di malu pa pió, gañando i siendo gañá.”—2 Timoteo 3:13.

Tin hopi diferente motibu pakiko hende ta gaña otro. Hende tramposo i estafadó ta gaña nan víktimanan pa ranka plaka for di nan. Algun polítiko ta gaña nan votadónan pa nan por keda na poder kueste loke kueste. Hende ta gaña asta nan mes. En bes di enfrentá bèrdatnan ku nan no gusta, nan ta konvensé nan mes ku práktikanan peligroso manera huma, usa droga òf kometé inmoralidat seksual no ta hasi daño.

Anto den asuntunan religioso tambe tin engaño. Lidernan religioso den tempu di Hesus tabata gaña e pueblo. Hesus a bisa di e mentirosonan aki: “Nan ta guiadó siegu di e siegunan. I si siegu guia siegu, tur dos lo kai den buraku.” (Mateo 15:14) Fuera di esei, tin hende ku ta gaña nan mes relashoná ku asuntunan religioso. Proverbionan 14:12 ta deklará: “Tin un kaminda ku ta parse bon den bista di hende, ma su fin ta e kaminda di morto.”

Meskos ku den tempu di Hesus, awe tambe religion ta gaña hopi i esei no ta un sorpresa! Apòstel Pablo a bisa ku Satanas “a siega mente di esnan ku no ta kere, pa nan no mira e lus di e evangelio di e gloria di Kristu, kende ta e imágen di Dios.”—2 Korintionan 4:4.

Si un estafadó gaña nos, nos ta pèrdè nos plaka. Si un polítiko gaña nos, nos lo por pèrdè algu di nos libertat. Pero si Satanas gaña nos i pone nos rechasá e bèrdat tokante Hesukristu, nos lo pèrdè bida eterno! Pues wak pa bo no ser engañá. Habri bo mente i kurason pa e fuente indiskutibel di bèrdat religioso, Beibel. Di otro manera, lo bo tin hopi di pèrdè.—Huan 17:3.