Agregá Deboshon na Dios na Boso Perseveransia
Agregá Deboshon na Dios na Boso Perseveransia
“Añadí na boso fe . . . perseveransia, i na boso perseveransia, santidat [“deboshon na Dios,” NW].”—2 PEDRO 1:5, 6.
1, 2. (a) Den ki sentido un mucha tin ku krese? (b) Kon importante kresementu spiritual ta?
TA IMPORTANTE pa un mucha krese, pero no ta kresementu físiko so ta importante. Mucha mester krese tambe den sentido mental i emoshonal. Ku tempu mucha lo stòp di hasi kos di mucha i desaroyá bira un hòmber òf muhé madurá. Apòstel Pablo a referí na esaki ora el a skirbi: “Tempu mi tabata mucha, mi tabata papia manera mucha, pensa manera mucha, rasoná manera mucha; ma awor ku mi a bira hòmber, mi a pone kos di mucha un banda.”—1 Korintionan 13:11.
2 E palabranan di Pablo ta presentá un punto importante tokante kresementu spiritual. Kristiannan tin ku progresá for di ser mucha spiritual pa bira ‘madurá den pensamentu.’ (1 Korintionan 14:20) Nan tin ku hasi esfuerso i purba alkansá “e midí di e estatura di e plenitut di Kristu.” Nan lo no ta “mucha mas, tirá p’aki p’aya dor di olanan, i hibá dor di tur bientu di doktrina.”—Efesionan 4:13, 14.
3, 4. (a) Kiko nos tin ku hasi pa madurá spiritualmente? (b) Ki kualidatnan ku ta agradá Dios nos mester manifestá, i kon importante nan ta?
3 Kon nos por madurá spiritualmente? Bou di sirkunstansianan normal kurpa di hende ta krese kasi outomátikamente, pero pa krese den sentido spiritual sí nos tin ku hasi esfuerso. Pa kuminsá, nos tin ku gana konosementu berdadero òf eksakto di e Palabra di Dios i aktua na armonia ku loke nos ta siña. (Hebreonan 5:14; 2 Pedro 1:3*) Esaki ta permití nos manifestá kualidatnan ku ta agradá Dios. Meskos ku kresementu físiko i loke ta bai kompañá kuné, por lo general kresementu den vários kualidat di Dios tambe ta tuma lugá simultáneamente. Apòstel Pedro a skirbi: “Pa e mesun motibu aki tambe, hasiendo tur diligensia, añadí na boso fe, birtut, i na boso birtut, konosementu; i na boso konosementu, dominio propio, i na boso dominio propio, perseveransia, i na boso perseveransia, santidat *; i na boso santidat kariño fraternal, i na boso kariño fraternal, amor.”—2 Pedro 1:5-7.
4 Tur e kualidatnan ku Pedro ta menshoná ta vital, i no por salta ningun di nan. “Si e kualidatnan aki ta den boso i ta oumentando, nan lo no laga boso keda inútil ni sin fruta den e konosementu berdadero di nos Señor Hesukristu.” (2 Pedro 1:8) Laga nos enfoká riba e nesesidat pa agregá santidat òf deboshon na Dios na nos perseveransia.
Nos Tin Ku Perseverá
5. Pakiko nos tin ku perseverá?
5 Tantu Pedro komo Pablo a konektá deboshon na Dios ku perseveransia. (1 Timoteo 6:11) Perseveransia ta nifiká mas ku djis para firme i soportá ora tin difikultat. E ta enserá mustra pasenshi, kurashi i lealtat, sin pèrdè speransa ora nos haña nos ku prueba, opstákulo, tentashon òf persekushon. E echo ku nos ta hiba un “bida santu [“deboto na Dios,” NW] den Kristu Hesus,” ta pone ku nos por ser persiguí. (2 Timoteo 3:12) Si nos kier demostrá nos amor pa Yehova i desaroyá e kualidatnan nesesario pa salbashon, nos tin ku perseverá. (Romanonan 5:3-5; 2 Timoteo 4:7, 8; Santiago 1:3, 4, 12) Sin perseveransia, nos lo no haña bida eterno.—Romanonan 2:6, 7; Hebreonan 10:36.
6. Kiko kier men perseverá te na fin?
6 Maske kon bon nos kuminsá, loke ta konta finalmente ta ku nos a perseverá. Hesus a bisa: “Esun ku perseverá te na fin, esei lo ta salbá.” (Mateo 24:13) Sí, nos tin ku perseverá te na fin, sea ku esei ta e fin di nos bida aktual òf e fin di e mal sistema di kosnan aki. Den ámbos kaso nos tin ku mantené nos integridat na Dios. Pero si nos no agregá deboshon na Dios na nos perseveransia, nos no por agradá Yehova, i nos lo no haña bida eterno. Pero kiko ta deboshon na Dios?
Loke Deboshon na Dios Ta Nifiká
7. Kiko ta deboshon na Dios i kiko e ta motivá nos pa hasi?
7 Deboshon na Dios ta nifiká tene un rèspèt profundo pa Yehova Dios, ador’é i rindi sirbishi na dje pa motibu di nos lealtat na su gobernashon supremo i universal. Pa nos por ta deboto na Yehova, nos mester tin konosementu eksakto di dje i di su kamindanan. Nos lo mester kier konosé Dios personalmente i íntimamente. Esaki lo motivá nos pa desaroyá un laso tierno kuné, un laso ku ta bisto na nos manera di aktua i biba. Nos mester deseá di ta mas tantu posibel manera Yehova: imitá su maneranan i reflehá su kualidatnan i personalidat. (Efesionan 5:1) Sí, deboshon na Dios ta motivá nos deseo pa agradá Dios den tur loke nos ta hasi.—1 Korintionan 10:31.
8. Ki relashon estrecho tin entre deboshon na Dios i deboshon eksklusivo?
8 Pa por praktiká berdadero deboshon na Dios, nos tin ku adorá Yehova so i no permití nada otro okupá su lugá den nos kurason. Komo nos Kreador, e tin derecho riba nos deboshon eksklusivo. (Deuteronomio 4:24 *; Isaías 42:8) No opstante, Yehova no ta forsa nos ador’é. E ta deseá nos deboshon boluntario. Ta nos amor pa Dios, basá riba un konosementu eksakto di dje, ta motivá nos pa drecha nos bida i hasi un dedikashon inkondishonal na dje i kumpli ku nos dedikashon.
Kultivá un Relashon ku Dios
9, 10. Kon nos por kultivá i mantené un relashon estrecho ku Dios?
9 Despues ku nos a simbolisá nos dedikashon na Dios dor di batisá, nos tin ku sigui kultivá un relashon asta mas estrecho kuné. P’esei nos deseo pa hasi esaki i pa sirbi Yehova fielmente ta motivá nos pa sigui studia su Palabra i meditá riba dje. Segun ku nos ta permití e spiritu di Dios influensiá nos mente i kurason, nos amor pa Yehova ta bira mas profundo. Nos relashon kuné ta sigui ser e kos mas importante den nos bida. Nos ta mira Yehova komo nos mihó Amigu i kier agrad’é na tur momentu. (1 Huan 5:3) E goso ku nos relashon plasentero ku Dios ta duna ta sigui krese, i nos ta gradisidu ku e ta instruí nos ku amor i ta korigí nos kaminda ta nesesario.—Deuteronomio 8:5.
10 A ménos ku konstantemente nos ta dal paso pa fortalesé nos relashon presioso ku Yehova, e por bira débil. Si esei sosodé, lo no ta Dios su falta, pasobra “e no ta leu di kada un di nos.” (Echonan 17:27) Nos ta masha kontentu ku Yehova no ta stroba nos di aserk’é! (1 Huan 5:14, 15) Klaro ku nos tin ku hasi esfuerso pa mantené un relashon personal estrecho ku Yehova. Sin embargo, e ta yuda nos hala serka dje dor di duna nos tur e yudansa nesesario pa kultivá i mantené deboshon na dje. (Santiago 4:8) Kon nos por hasi uso kompleto di tur e perkurashonnan amoroso aki?
Keda Spiritualmente Fuerte
11. Den ki manera asina nos ta manifestá nos deboshon na Dios?
11 Nos amor profundo pa Dios lo motivá nos pa demostrá kon grandi nos deboshon na dje ta, na armonia ku e konseho di Pablo: “Hasi tur bo esfuerso pa presentá bo mes aprobá dilanti di Dios manera un trahadó ku no tin motibu pa tin bèrgwensa, ku ta parti e palabra di bèrdat na un manera korekto.” (2 Timoteo 2:15) Pa logra esaki nos mester tin un bon rutina ku ta konsistí di studia Beibel, asistí na reunion i partisipá den sirbishi di vèlt ku regularidat. Tambe nos por keda fiel na Yehova dor di “hasi orashon sin stòp.” (1 Tesalonisensenan 5:17) Tur esakinan ta maneranan importante ku nos por manifestá nos deboshon na Dios. Si nos neglishá kualkier un di nan, nos por bira spiritualmente malu i vulnerabel p’e mañanan di Satanas.—1 Pedro 5:8.
12. Kon nos por enfrentá prueba ku éksito?
12 Dor di keda spiritualmente fuerte i aktivo tambe nos por enfrentá e hopi pruebanan ku ta bini riba nos. Pruebanan por bini di fuentenan ku por kousa nos hopi difikultat. Indiferensia, oposishon i persekushon por ta mas difísil pa soportá ora nan ta bini di famia yegá òf bisiña. Preshonnan sutil pa komprometé nos prinsipionan kristian por surgi na trabou òf na skol. Desanimashon, enfermedat i depreshon por debilitá nos físikamente i hasié mas difísil pa enfrentá prueba di fe. Pero nos por enfrentá tur prueba ku éksito si nos perseverá “den un kondukta santu i deboto, sperando i purando e binida di e dia di Dios.” (2 Pedro 3:11, 12) I nos por mantené nos goso ora nos ta hasi e kosnan aki komo ku nos ta sigur di Dios su bendishon.—Proverbionan 10:22.
13. Kiko nos mester hasi si nos kier keda deboto na Dios?
13 Ounke Satanas ta mek riba esnan ku ta praktiká deboshon na Dios, nos no mester tin miedu. Pakiko? Pasobra “Señor sa tambe kon pa reskatá e santunan [“esnan deboto na dje,” NW] for di tentashon.” (2 Pedro 2:9) Pa nos por wanta prueba i eksperimentá e liberashon ei, nos tin ku “renunsiá impiedat i deseonan mundano i . . . biba huisioso, hustu i santu [“ku deboshon na Dios,” NW] den e siglo presente.” (Tito 2:12) Komo kristiannan, nos tin ku tene kuidou pa ningun debilidat ku tin di haber ku deseo- i aktividatnan karnal no afektá nos deboshon na Dios i kaba kuné. Laga nos konsiderá algun dje menasanan aki.
Kuidou ku Loke Por Afektá Nos Deboshon na Dios
14. Si e trampa di materialismo ta tenta nos, kiko nos tin ku kòrda?
14 Materialismo ta un trampa pa hopi hende. Nos por gaña nos mes pensando ku deboshon na Dios “ta un medio pa hasi ganashi [finansiero].” Nos por kere ku sin mas nos por abusá dje konfiansa ku nos rumannan den fe ta pone den nos. (1 Timoteo 6:5) Nos por asta konkluí ekibokadamente ku no tin nada malu den pone preshon riba un kristian riku p’e fia nos plaka ku probablemente nos lo no por paga bèk. (Salmo 37:21) Ma ta deboshon na Dios “ta kontené promesa pa e bida presente i pa esun ku ta bin” i no kos material. (1 Timoteo 4:8) “Nos no a trese nada den mundu, i nos no por hiba nada for di dje tampoko,” p’esei laga nos hasi mas esfuerso ku nunka pa sigui ta deboto na Dios “akompañá pa kontentamentu” i ‘keda kontentu ku kuminda i paña pa bisti.’—1 Timoteo 6:6-11.
15. Kiko nos por hasi si korementu tras di plaser ta menasá nos deboshon na Dios?
15 Korementu tras di plaser no ta laga lugá pa deboshon na Dios. Nos lo tin ku hasi kambio inmediato den e asuntu aki? Ta bèrdat ku ehersisio físiko i dibertishon ta trese algun benefisio. Pero e rekompensanan ei ta nada na komparashon ku bida eterno. (1 Huan 2:25) Awe, hopi hende ta “mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder.” I nos tin ku evitá e tipo di hendenan aki. (2 Timoteo 3:4, 5) Esnan ku ta pone énfasis riba deboshon na Dios ta “montoná pa nan mes e tesoro di un bon fundeshi pa futuro, pa nan gara loke ta bida berdadero.”—1 Timoteo 6:19.
16. Ki deseonan pekaminoso ta stroba algun hende di kumpli ku e rekisitonan hustu di Dios, i kon nos por dominá e deseonan aki?
16 Alkohòl i uso di droga, inmoralidat i deseonan pekaminoso por ruiná nos deboshon na Dios. Si nos sede na esakinan nos lo no por kumpli ku e rekisitonan hustu di Dios. (1 Korintionan 6:9, 10; 2 Korintionan 7:1) Asta Pablo tabatin un lucha kontinuo ku e karni pekaminoso. (Romanonan 7:21-25) Nos tin ku tuma medida fuerte pa eliminá mal deseo. Na promé lugá, nos mester ta determiná pa keda moralmente limpi. Pablo ta bisa nos: “Konsiderá e miembronan di boso kurpa terenal komo morto pa inmoralidat, impuresa, pashon, deseo malu, i golosidat, ku ta igual na idolatria.” (Kolosensenan 3:5) Pa nos konsiderá miembronan di nos kurpa komo morto relashoná ku kosnan pekaminoso, nos mester ta determiná pa eliminá nan, kore ku nan. Orashon sinsero p’e yudansa di Dios lo yuda nos rechasá mal deseo i sigui hustisia i deboshon na Dios den e mundu malbado aki.
17. Kon nos mester mira disiplina?
17 Desanimashon por debilitá nos perseveransia i perhudiká nos deboshon na Dios. Hopi sirbidó di Yehova a pasa den periodonan di desanimashon. (Numbernan 11:11-15; Èsdras 4:4; Yónas 4:3) Desanimashon por tin un efekto spesialmente devastador riba nos ora e ta kompañá pa renkor pa motibu ku nos ta sinti nos ofendí òf pasobra nos a ser disipliná severamente. Sin embargo, reprendementu i disiplina ta evidensia dje interes i amor ku Dios tin pa nos. (Hebreonan 12:5-7, 10, 11) Nos tin ku mira disiplina no simplemente komo kastigu sino komo un medio pa entrená nos den e kaminda di hustisia. Si nos ta humilde, nos lo aseptá i mira e balor di konseho, realisando ku “e reprendementunan di disiplina ta e kaminda di bida.” (Proverbionan 6:23) Esaki por yuda nos progresá bon den sentido spiritual i sigui ser deboto na Dios.
18. Ki responsabilidat nos tin ora nos ta sinti nos personalmente ofendí òf ora nos ofendé otro hende?
18 Malkomprendementu i renkor kontra otro por difikultá nos deboshon na Dios. Esakinan lo por kousa ansiedat òf pone algun dal e paso imprudente di isolá nan mes for di nan rumannan spiritual. (Proverbionan 18:1) Pero ta bon pa kòrda ku kargamentu di renkor i keda disgustá ku otro hende por perhudiká nos relashon ku Yehova. (Levítiko 19:18) De echo, “esun ku no ta stima su ruman ku el a mira, no por stima Dios, kende e no a mira.” (1 Huan 4:20) Den su Sermon Riba Seru, Hesus a enfatisá ku nos mester dal paso mesora pa resolvé desakuerdonan personal. El a bisa su oyentenan: “Si bo presentá bo ofrenda na altar, i ayanan bo kòrda ku bo ruman tin algu kontra bo, laga bo ofrenda ayanan dilanti di altar, i bai; rekonsiliá ku bo ruman promé, i despues bin presentá bo ofrenda.” (Mateo 5:23, 24) Un despensa por yuda kura un herida kousá pa palabra òf akshon ku no tabata bondadoso. Nos por kura un herida i drecha un relashon hasié pasífiko bèk si nos pidi pordon i atmití ku nos no a atendé un asuntu korektamente. Tambe Hesus a ofresé otro konseho pa atendé desakuerdonan. (Mateo 18:15-17) Nos ta keda masha kontentu ora nos esfuersonan pa resolvé problema ta duna fruta!—Romanonan 12:18; Efesionan 4:26, 27.
Sigui Hesus Su Ehèmpel
19. Pakiko ta asina importante pa imitá e ehèmpel di Hesus?
19 Nos lo haña nos ku prueba sigur, pero nan no mester kita nos for dje kareda pa bida eterno. Kòrda ku Yehova por libra nos for di prueba. Segun ku nos ta “pone un banda tur strobashon” i ‘kore e kareda ku ta poné nos dilanti ku perseveransia,’ laga nos ‘fiha nos wowo riba Hesus, e Outor i Kumplidó di nos fe.’ (Hebreonan 12:1-3) Ora nos analisá bon e ehèmpel di Hesus i hasi esfuerso pa imit’é ku palabra i akshon, esei lo yuda nos kultivá deboshon na Dios i manifest’é na un grado mas kabal.
20. Si nos perseverá i keda deboto na Dios, kon e ta rekompensá nos?
20 Perseveransia i deboshon na Dios ta dos kualidat ku huntu ta yuda nos hasi nos salbashon sigur. Dor di desplegá e kualidatnan presioso aki, nos por kumpli fielmente ku nos sirbishi sagrado na Dios. Asta ora nos haña nos ku prueba, nos por ta felis pasobra Yehova ta trata nos ku tierno kariño i ta duna nos su bendishon pa motibu ku nos ta perseverá i mustra deboshon na dje. (Santiago 5:11) Ademas, Hesus mes a sigurá nos: “Dor di boso perseveransia boso lo gana boso alma.”—Lukas 21:19.
[Nota]
^ par. 3 Beibel Santu ta usa e palabra “santidat” pa e ekspreshon griego ku den Tradukshon di Mundu Nobo ta ser tradusí komo “deboshon na Dios.”
^ par. 8 Na Deuteronomio 4:24, Beibel Santu ta tradusí “eksigí deboshon eksklusivo” komo “yalurs.” Esaki ta un tradukshon alternativo korekto di e palabranan original na hebreo.
Kon Lo Bo Kontestá?
• Pakiko perseveransia ta importante?
• Kiko ta deboshon na Dios, i kon e ta ser manifestá?
• Kon nos por kultivá i mantené un relashon estrecho ku Dios?
• Kiko ta algun kos ku por difikultá nos deboshon na Dios, i kon nos por evitá nan?
[Preguntanan di Estudio]
[Plachinan na página 12, 13]
Nos ta manifestá deboshon na Dios den hopi manera
[Plachi na página 14]
Kuidou ku loke por afektá bo deboshon na Dios