Kiko A Pasa ku Fièrnu?

KIKO ta bini na bo mente ora bo tende e palabra “fièrnu”? Bo ta mira fièrnu komo un lugá literal di kandela i suafel, di tormento i angustia eterno? Òf kisas fièrnu ta un deskripshon simbóliko di un kondishon?

Pa hopi siglo, lidernan religioso di kristiandat a mira fièrnu di tormento doloroso komo e destino final pa hende pekadó. Ainda e idea aki ta popular den hopi otro religion. U.S.News & World Report ta bisa: “Talbes ta kristianismo a hasi fièrnu un palabra masha konosí, pero no ta nan so tin e doktrina ei. Kasi tur religion prinsipal di mundu i algun di e chikitunan tambe ta spièrta hende kontra un kastigu doloroso den e bida despues di morto.” Hindú, budista, mòslem i algun otro religion oriental ta kere den un sorto di fièrnu.

Pero awendia hende a kuminsá haña un otro konsepto di fièrnu. Segun e revista menshoná anteriormente, “ounke ainda tin hopi hende ta kere den e fièrnu tradishonal, mas i mas hende tin e punto di bista moderno ku perdishon eterno ta un lugá di isolashon partikularmente desagradabel; kier men kisas fièrnu no ta dje kayente ei tòg.”

E revista hesuita La Civiltà Cattolica a remarká: “Ta un engaño . . . pa pensa ku Dios, pa medio di demoño, ta pone esnan ku ta bai pèrdí pasa den tormento spantoso manera esun di kandela.” El a agregá: “Fièrnu ta eksistí, no komo un lugá, sino komo un estado, un kondishon den kua e persona ku a alehá for di Dios ta sufri doló.” Papa Huan Pablo II a bisa na 1999: “Fièrnu no ta un lugá literal; e ta mas bien e kondishon di esnan ku a skohe pa separá nan mes totalmente for di Dios, e fuente di tur bida i goso.” Pa loke ta e imágennan di un fièrnu di kandela, el a bisa: “Esakinan ta mustra kon frustrá i bashí un bida sin Dios ta.” Si papa a deskribí fièrnu ku palabranan manera “vlam di kandela i un diabel ku fòrki grandi bistí na kòrá, hende lo no a tuma esei muchu na serio,” segun historiadó di iglesia Martin Marty.

Kambionan similar ta tumando lugá den otro organisashonnan religioso tambe. Un informe dje komishon di doktrina di Iglesia di Inglatera a bisa: “Fièrnu no ta tormento eterno, sino e kurso di bida ku un persona ta skohe irevokablemente ku ta asina kontra Dios i asina definitivo ku e úniko fin ku e ta hiba na dje ta destrukshon kompleto.”

E katisashi di Iglesia Episkopal di Merka ta definí fièrnu komo “morto eterno pa motibu di a rechasá Dios.” Segun U.S.News & World Report, un kantidat kresiente di hende ta promoviendo e idea ku “e fin dje malbadonan ta destrukshon, no sufrimentu eterno. . . . [Nan] argumento ta ku esnan ku finalmente ta  rechasá Dios lo simplemente disparsé for di eksistensia den e ‘kandela ardiente’ di fièrnu.”

Ounke e tendensia djawe ta pa rechasá e pensamentu di kandela i suafel, hopi ta sigui pega na e kreensia ku fièrnu ta un lugá literal di tormento. “E Skritura ta papia klaramente di fièrnu komo un lugá literal di tormento di kandela,” segun Albert Mohler dje Seminario Teológiko di Boutistanan di Sùit na Louisville, Kentucky, Merka. I e informe The Nature of Hell ku e Komishon di Aliansa Evangéliko a prepará, ta deklará: “Fièrnu ta un eksperensia konsiente di rechaso i tormento.” E ta agregá: “E grado di kastigu i sufrimentu den fièrnu ta dependé dje gravedat di e pikánan kometé riba tera.”

Un biaha mas, fièrnu ta un lugá di kandela di tormento eterno òf di destrukshon? Òf e ta simplemente un kondishon di separashon for di Dios? Kiko realmente ta fièrnu?

[Kuadro/Plachinan na página 4]

Un Historia Kòrtiku di Fièrnu

KI TEMPU esnan ku ta bisa ku nan ta kristian a kuminsá kere den fièrnu? Hopi tempu despues di Hesukristu i su apòstelnan. “E Apokalípsis di Pedro (di dos siglo E.K.) tabata e promé obra kristian [apókrifo] ku ta deskribí e kastigu i torturanan di pekadónan den fièrnu,” segun e Encyclopædia Universalis franses.

Sin embargo, entre e promé Tatanan di Iglesia, tabatin un desakuerdo riba fièrnu. Hustino Martir, Klemente di Alehandria, Tertuliano i Sipriano tur a kere ku fièrnu ta un lugá di kandela. Orígen i e teólogo Gregorio di Nisa a pensa ku fièrnu ta un lugá di separashon for di Dios—di sufrimentu spiritual. Di otro banda, pa Agustin di Hipo, sufrimentu den fièrnu tabata tantu spiritual komo literal: un punto di bista ku a haña aseptashon amplio. “Pa siglo sinku e doktrina rígido ku pekadónan lo no haña un di dos chèns despues di e bida aki i ku e kandela ku lo devorá nan lo no paga nunka, a bira e siñansa dominante tur kaminda,” profesor J.N.D. Kelly a skirbi.

Den siglo 16, pa reformadónan protestant manera Martin Luther i Johannes Calvijn, e tormento di kandela den fièrnu tabata símbolo di un separashon eterno for di Dios. Sin embargo, e idea di fièrnu komo un lugá di tormento a regresá den e siguiente dos siglonan. Predikadó protestant Jonathan Edwards tabatin kustumber di hinka miedu den kurason di e merikanonan kolonial ku pinturanan bibu di fièrnu.

Pero no muchu tempu despues, e vlamnan di fièrnu a kuminsá baha i kaba na nada. “Siglo 20 kasi a trese un fin na fièrnu,” segun U.S.News & World Report.

[Plachinan]

Segun Hustino Martir, fièrnu tabata un lugá di kandela

Agustin di Hipo a siña ku hende a sufri den sentido spiritual i literal den fièrnu