Kiko Realmente Ta Fièrnu?

SEA kual sea e idea ku abo tin di “fièrnu,” por lo general mayoria hende ta pensa ku e ta un lugá di duna kastigu pa piká. Enkuanto piká i su efekto, Beibel ta bisa: “Dor di un hende piká a drenta den mundu, i morto dor di piká, i asina morto a pasa pa tur hende, pasobra tur a peka.” (Romanonan 5:12) Tambe e Skritura ta bisa: “Pago di piká ta morto.” (Romanonan 6:23) Siendo ku e kastigu pa piká ta morto, ta importante pa haña sa ta kiko ta e berdadero nifikashon di fièrnu: Kiko ta sosodé ku nos ora nos muri?

Tin un òf otro forma di bida despues di morto? Kiko ta fièrnu, i ki sorto di hende ta bai ei? Tin speransa pa esnan ku ta bai fièrnu? Beibel ta duna kontesta franko i satisfaktorio riba e preguntanan aki.

Tin Bida Despues di Morto?

Tin algu den nos, manera un alma òf un spiritu, ku ta sigui biba despues ku e kurpa muri? Wak kon e promé hòmber Adam, a haña bida. Beibel ta bisa: “SEÑOR Dios a forma hende di e stòf di tera i a supla e rosea di bida den su nanishi.” (Génesis 2:7) Ounke ta halamentu di rosea a sostené su bida, ora Yehova a pone “e rosea di bida den su nanishi” esei a enserá mas ku simplemente supla airu den su pulmonnan. El a nifiká ku Dios a pone den e kurpa sin bida di Adam e chispa di bida—“e forsa di bida,” ku ta aktivo den tur kriatura riba tera. (Génesis 6:17; 7:22) Beibel ta yama e forsa di bida aki “spiritu.” (Santiago 2:26) Bo por kompará e spiritu ei ku koriente ku ta aktivá un mashin òf un aparato i lag’é funshoná. Meskos ku koriente mes no ta haña e karakterístikanan dje aparato ku e ta pone traha, e forsa di bida mes no ta tuma over ningun dje karakterístikanan dje kriaturanan ku e ta duna forsa. E no tin personalidat ni kapasidat mental.

Kiko ta sosodé ku e spiritu ora un persona muri? Salmo 146:4 ta bisa: “Su spiritu ta sali, e ta bolbe na tera; e mes dia ei su pensamentunan ta peresé.” Ora un persona muri, su spiritu impersonal no ta sigui eksistí den un otro region komo un kriatura spiritual. E ta “bolbe na Dios, kende a duna esaki.” (Eklesiástes 12:7) Esaki ta nifiká ku kualkier speransa pa futuro pa e persona ei ta dependé kompletamente di Dios.

E filósofonan griego di antigwedat Sókrates i Plato tabatin e kreensia ku un alma den un persona ta sigui biba despues di morto i no ta muri nunka. Kiko Beibel ta siña tokante alma? Adam “a bira un alma bibu,” segun 1 Korintionan 15:45. E no a risibí un alma;  e tabata un alma—un persona kompleto. E Skritura ta papia di alma ku ta bendishoná, alma ku ta pasa amargura, alma ku ta yora di tristesa, etcetera. (Génesis 27:4; Yeremías 13:17; Salmo 119:28) Sí, hende mes ta un alma. Ora un persona muri, e alma ei ta muri.—Ezekiel 18:4.

Den ki kondishon e mortonan ta anto? Ora Yehova a pronunsiá sentensia riba Adam, el a bis’é: “Stòf bo ta, i na stòf lo bo bolbe.” (Génesis 3:19) Unda Adam tabata promé ku Dios a form’é di stòf di tera i dun’é bida? Masha simpel, e no tabata eksistí! Ora Adam a muri, el a stòp di eksistí kompletamente. Eklesiástes 9:5 i 10 ta splika bon kla den ki kondishon e mortonan ta. Ei e ta bisa: “Mortonan no sa nada mas . . . den e graf kaminda bo ta bai no tin trahamentu, ni planeamentu, ni konosementu, ni sabiduria.” (Beibel na papiamentu koriente) Segun Beibel, morto ta un estado di no-eksistensia. E mortonan no ta konsiente di nada, nan no por sinti ni pensa nada.

Tormento Eterno òf Graf Komun?

Siendo ku e mortonan no ta konsiente di nada, fièrnu no por ta un lugá ardiente di tormento kaminda e malbadonan ta sufri despues di morto. Kiko ta fièrnu anto? Ora nos eksaminá loke a sosodé ku Hesus despues ku el a muri, e ta yuda nos kontestá e pregunta ei. E eskritor di Beibel, Lukas, ta konta: “E [Hesus] no a wòrdu lagá den Hades [fièrnu, E Testament Nobo], ni su karni no a mira korupshon.” * (Echonan 2:31) Unda e fièrnu ei, kaminda asta Hesus a bai, ta? Apòstel Pablo a skirbi: “Mi a duna boso . . . ku Kristu a muri pa nos pikánan segun e Skrituranan i ku el a wòrdu derá, i ku el a wòrdu lantá riba e di tres dia segun e Skrituranan.” (1 Korintionan 15:3, 4) Di manera ku Hesus tabata den fièrnu, esta graf, pero e no a ser lagá ei pasobra el a ser lantá, òf resusitá.

Konsiderá tambe e kaso dje hòmber hustu Job, kende a sufri masha tantu. E kier a skapa for di su sufrimentu, p’esei el a roga: “Bo lo . . . skonde mi den Seol, . . . te ora bo furia pasa!” * (Job 14:13) Ta hopi irazonabel pa pensa ku Job a deseá di bai den un lugá kayente p’e haña alivio! Pa Job, “fièrnu” tabata simplemente e graf, kaminda su sufrimentu lo a kaba. Kier men anto, e fièrnu di Beibel ta e graf komun di humanidat kaminda tantu bon hende komo mal hende ta bai.

Fièrnu di Kandela —Destrukshon Kompleto?

Ta eksistí e posibilidat ku e kandela di fièrnu ta un símbolo di destrukshon kompleto òf kabal? E Skritura ta hasi un distinshon entre kandela i Hades, òf fièrnu, i ta bisa: “Morto i  Hades a wòrdu tirá den e lago di kandela.” “E lago” menshoná aki ta simbóliko, ya ku e morto i fièrnu (Hades) ku ta ser tirá den dje no por kima literalmente. “Esaki [lago di kandela] ta e di dos morto”—morto for di kua no tin speransa di bini bèk na bida.—Revelashon 20:14.

E lago di kandela tin e mesun nifikashon ku e “kandela di fièrnu [“kandela di Gehena,” NW]” ku Hesus a papia di dje. (Mateo 5:22; Marko 9:47, 48) E palabra Gehena ta aparesé 12 biaha den e Skritura Griego Kristian, i e ta referí na e vaye di Hinom, pafó dje murayanan di Yerúsalèm. Tempu ku Hesus tabata riba tera, nan tabata usa e vaye aki komo un landfill, “kaminda tabata tira kadaver di kriminal i di animal, i tur otro sorto di sushedat.” (Smith’s Dictionary of the Bible) Tabata mantené e kandela sendé dor di tira suafel den dje pa kima sushi. Hesus a usa e vaye ei komo un símbolo apropiado di destrukshon eterno.

Meskos ku Gehena, e lago di kandela ta simbolisá destrukshon eterno. Morto i Hades ta “wòrdu tirá” den dje den e sentido ku e kosnan aki lo ser eliminá ora humanidat wòrdu librá for di piká i e kondena di morto. Hende ku ta peka boluntariamente sin repentí tambe lo bin resultá den e lago ei. (Revelashon 21:8) Nan tambe lo ser eliminá pa semper. Di otro banda, esnan ku ta den e memoria di Dios i ku ta den fièrnu—graf komun di humanidat—tin un futuro maravioso.

Fièrnu Ta Bira Bashí!

Revelashon 20:13 ta bisa: “Laman a entregá e mortonan ku tabata den dje, i morto i Hades a entregá e mortonan ku tabata den nan.” Sí, e fièrnu di Beibel lo ser hasí bashí. Manera Hesus a primintí, “e ora lo yega den kua tur ku ta den graf lo tende [Hesus] su bos, i lo sali.” (Huan 5:28, 29) Ounke e miónes di mortonan ei ku ta den e memoria di Yehova Dios no ta eksistí den ningun forma aktualmente, nan lo wòrdu resusitá, òf tres’é bèk na bida, den un paradeis restorá aki riba tera.—Lukas 23:43; Echonan 24:15.

Den e mundu nobo di Dios, hende resusitá ku ta kumpli ku su leinan hustu lo no muri nunka mas. (Isaías 25:8) Yehova lo “seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló.” Echo ta ku “e promé kosnan [lo] a pasa.” (Revelashon 21:4) Esnan ku ta den fièrnu awor, esta “grafnan konmemorativo [NW],” lo risibí un gran bendishon. Sí, e bendishon aki ta sufisiente motibu pa nos gana mas konosementu di Yehova Dios i di su Yu, Hesukristu.—Huan 17:3.

[Nota]

[Plachi na página 5]

Job a pidi p’e bai fièrnu p’e haña alivio

[Plachi na página 6]

Kandela di Gehena—símbolo di destrukshon eterno

[Plachi na página 7]

‘Esnan ku ta den graf lo sali’