Kristiannan Ta Adorá Dios den Spiritu i Bèrdat
Kristiannan Ta Adorá Dios den Spiritu i Bèrdat
“Dios ta Spiritu, i esnan ku ta ador’é mester adorá den spiritu i bèrdat.” —HUAN 4:24.
1. Ki klase di adorashon ta agradá Dios?
HESUKRISTU, e Yu unigénito di Yehova, a indiká klaramente kiko ta agradá su Tata selestial. Ora el a duna un testimonio konmovedor na un señora samaritano banda di un pos pegá ku e stat di Sikar, el a bis’é: “Boso ta adorá loke boso no konosé; nos ta adorá loke nos konosé, pasobra salbashon ta bin for di e hudiunan. Ma e ora lo yega, i ta awor, ku e adoradónan bèrdadero lo adorá e Tata den spiritu i bèrdat; pasobra ta hendenan asina e Tata ta buska pa ador’é. Dios ta Spiritu, i esnan ku ta ador’é mester adorá den spiritu i bèrdat.” (Huan 4:22-24) Kon nos mester komprendé e palabranan ei?
2. Riba kiko e samaritanonan a basa nan adorashon?
2 E samaritanonan tabatin un punto di bista eróneo enkuanto adorashon. Nan a aseptá solamente e promé sinku bukinan dje Skritura Santu—anto solamente den nan propio tradukshon ku nan a yama e Pentateuko Samaritano. E samaritanonan no tabata konosé Dios realmente, pero e hudiunan sí a risibí konosementu dje Skritura. (Romanonan 3:1, 2) Hudiu i otro personanan fiel tabatin oportunidat di disfrutá di e fabor di Yehova. Pero kiko esaki lo a eksigí di nan?
3. Kiko nos tin ku hasi pa adorá Dios “den spiritu i bèrdat”?
3 Kiko e hudiunan, e samaritanonan i otro hende di pasado tabatin ku hasi pa agradá Yehova? Nan tabatin ku ador’é “den spiritu i bèrdat.” Esei ta konta pa nos tambe. En bèrdat nos tin ku sirbi Dios na un manera bibu, entusiasmá i motivá pa un kurason yen di amor i fe, pero pa nos adorá Dios den spiritu, su spiritu santu mester ta riba nos i guia nos. Nos mester pone nos spiritu, esta, nos disposishon mental, na armonia ku esun di Dios dor di studia i apliká su Palabra. (1 Korintionan 2:8-12) Pa Yehova aseptá nos adorashon, nos mester ador’é ku bèrdat. E mester ta di akuerdo ku loke e Palabra di Dios, Beibel, ta revelá tokante dje i su propósito.
E Bèrdat Por Ser Hañá
4. Kon algun hende ta mira bèrdat?
4 Algun studiante di filosofia a desaroyá e punto di bista ku bèrdat apsoluto ta fuera di alkanse di humanidat. De echo, e outor sueko Alf Ahlberg a skirbi: “Hopi pregunta filosófiko no ta dje tipo ku bo por duna kontesta definitivo p’e.” Ounke algun hende ta bisa ku tin solamente bèrdat relativo, esei ta realmente e kaso? No segun Hesukristu.
5. Pakiko Hesus a bini na mundu?
5 Laga nos imaginá nos mes ta opservá e siguiente esena: Ta kuminsamentu di aña 33 di nos era i Hesus ta pará dilanti Gobernadó Romano Ponsio Pilato. Hesus ta bisa Pilato: “Pa esaki mi a bin den mundu, pa duna testimonio di e bèrdat.” Pilato ta puntr’é: “Kiko ta bèrdat?” Pero e no ta warda pa Hesus sigui papia.—Huan 18:36-38.
6. (a) Kon un dikshonario a definí “bèrdat”? (b) Ki enkargo Hesus a duna su siguidónan?
6 Un dikshonario ta definí “bèrdat” komo “e konhunto di kos, suseso i echo ku ta real.” (Webster’s Ninth New Collegiate Dictionary) Pero, ta di e bèrdat en general Hesus a duna testimonio? Nò. E tabatin un bèrdat spesífiko na mente. El a duna su disipelnan e enkargo pa deklará e bèrdat ei, pasobra el a bisa nan: “Hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso.” (Mateo 28:19, 20) Promé ku fin di mundu yega, Hesus su siguidónan berdadero lo deklará “e bèrdat di e evangelio” rònt mundu. (Galationan 2:14) Esaki lo kumpli ku e siguiente palabranan di Hesus: “E evangelio aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:14) Pues ta vital pa nos wak ta ken ta esnan ku ta siñando tur nashon e bèrdat dor di prediká e evangelio dje Reino.
Kon Nos Por Siña e Bèrdat
7. Kon abo lo proba ku Yehova ta e Fuente di e bèrdat?
7 Yehova ta e Fuente di bèrdat spiritual. De echo, e salmista David a yama Yehova “e Dios dje bèrdat.” (Salmo 31:5; 43:3, NW) Hesus a rekonosé ku e palabra di su Tata ta e bèrdat, i tambe el a deklará: “Ta pará skirbí den e profetanan: ‘I nan tur lo wòrdu siñá dor di Dios.’ Tur hende ku a tende i a siña di e Tata ta bin serka mi.” (Huan 6:45; 17:17; Isaías 54:13) Klaramente anto, esnan ku ta buska e bèrdat mester ser siñá dor di Yehova, e Magnífiko Instruktor. (Isaías 30:20, 21) Esnan ku ta buska e bèrdat tin ku gana “e konosementu di Dios.” (Proverbionan 2:5) I den su amor pa hende Yehova a siña nan e bèrdat òf revelá esaki na nan den vários manera.
8. Den ki maneranan Dios a siña hende e bèrdat òf revelá esaki na nan?
8 Por ehèmpel, ta pa medio di angel Dios a revelá e Lei n’e israelitanan. (Galationan 3:19) Den soñonan, el a primintí di bendishoná e patriarkanan Abraham i Yakòb. (Génesis 15:12-16; 28:10-19) Dios asta a papia for di shelu, manera ora Hesus a batisá. Hende a tende e palabranan emoshonante aki: “Esaki ta mi Yu stimá, den kende mi tin goso.” (Mateo 3:17) Tambe nos por ta gradisidu ku Dios a revelá e bèrdat dor di inspirá eskritornan di Beibel. (2 Timoteo 3:16, 17) Dor di siña for dje Palabra di Dios, nos por tin “fe den e bèrdat.”—2 Tesalonisensenan 2:13.
E Bèrdat i e Yu di Dios
9. Kon Dios a usa su Yu pa revelá e bèrdat?
9 Dios a usa spesialmente su Yu Hesukristu pa revelá e bèrdat na humanidat. (Hebreonan 1:1-3) De echo, Hesus a papia e bèrdat manera niun otro hende a yega di papi’é. (Huan 7:46) Asta despues ku el a subi na shelu, el a sigui revelá e bèrdat di su Tata. Por ehèmpel, apòstel Huan a risibí “e revelashon di Hesukristu, ku Dios a dun’é pa mustra su sirbidónan e kosnan ku mester sosodé pronto.”—Revelashon 1:1-3.
10, 11. (a) E bèrdat ku Hesus a duna testimonio di dje ta relashoná ku kiko? (b) Kon Hesus a pone e bèrdat bira realidat?
10 Hesus a bisa Ponsio Pilato ku el a bini na tera pa duna testimonio di e bèrdat. Durante su ministerio, Hesus a revelá ku e bèrdat ei tabatin di haber ku e derecho ku Yehova tin di ehersé su soberania pa medio di e Reino di Dios ku Kristu komo Rei. Pero Hesus mester a hasi mas ku solamente prediká i siña hende pa duna testimonio di e bèrdat. Hesus a hasi e bèrdat ei bira realidat dor di kumpli kuné. En konekshon ku esei, apòstel Pablo a skirbi: “No laga ni un hende aktua komo boso hues enkuanto komementu òf bebementu, òf enkuanto un dia di fiesta òf luna nobo òf dia di sabat; kosnan ku ta djis sombra di loke mester bin; ma e realidat ta pertenesé na Kristu.”—Kolosensenan 2:16, 17.
11 Un manera den kua e bèrdat a bira realidat tabata pa medio dje nasementu profetisá di Hesus na Bètlehèm. (Mikéas 5:2; Lukas 2:4-11) Tambe e bèrdat a bira realidat ora e palabranan profétiko di Daniel tokante aparishon dje Mesias a kumpli na final di 69 ‘siman di aña.’ Esei a tuma lugá ora Hesus mes a presentá na Dios p’e batisá, i a ser ungí ku spiritu santu, presis n’e aña profetisá, na aña 29 di nos era. (Daniel 9:25; Lukas 3:1, 21, 22) Hesus su ministerio di iluminashon komo proklamadó di Reino a pone e bèrdat bira realidat. (Isaías 9:1, 2, 6, 7; 61:1, 2; Mateo 4:13-17; Lukas 4:18-21) Tambe el a bira realidat ora Hesus a muri i resusitá.—Salmo 16:8-11; Isaías 53:5, 8, 11, 12; Mateo 20:28; Huan 1:29; Echonan 2:25-31.
12. Pakiko Hesus por a bisa: ‘Ami ta e bèrdat’?
12 Dor ku e bèrdat ta enfoká riba Hesukristu, e por a bisa: “Ami ta e kaminda, i e bèrdat, i e bida; ni un hende no ta bin serka e Tata, sino pa medio di mi.” (Huan 14:6) Hende ta ser librá den sentido spiritual ora nan “ta [di parti] di e bèrdat” dor di aseptá e papel di Hesus den e propósito di Dios. (Huan 8:32-36; 18:37) Dor ku hende manera karné ta aseptá e bèrdat i sigui Kristu den fe, nan lo risibí bida eterno.—Huan 10:24-28.
13. Nos lo analisá e bèrdat bíbliko den ki tres área?
13 E konhunto di bèrdatnan ku Hesus i su disipelnan inspirá a presentá ta forma e berdadero fe kristian. Pues esnan ku ta “obedesidu na e fe” ta “kana den e bèrdat.” (Echonan 6:7; 3 Huan 3, 4) Anto ta ken ta esnan ku awe ta kana den e bèrdat? Ken realmente ta siñando tur nashon e bèrdat? Ora nos kontestá e preguntanan ei, nos lo enfoká riba e kristiannan di promé siglo i analisá e bèrdat bíbliko relashoná ku (1) kreensia, (2) e manera di rindi adorashon i (3) kondukta personal.
E Bèrdat i Kreensianan
14, 15. Kiko lo bo bisa dje aktitut di kristiannan di promé siglo i Testigunan di Yehova pa ku e Skritura?
14 E kristiannan di promé siglo tabatin masha rèspèt pa Yehova su Palabra skirbí. (Huan 17:17) El a sirbi komo base pa tur nan kreensia- i práktikanan. Clemente di Alehandria di siglo 2 i 3 a bisa: “Esnan ku ta hasiendo esfuerso pa desaroyá kualidat ekselente lo no para den nan búskeda pa e bèrdat, te ora nan mes haña prueba di loke nan ta kere a base dje Skritura.”
15 Meskos ku e kristiannan di promé siglo, Testigunan di Yehova tin masha rèspèt pa Beibel. Nan ta kere ku “tur Skritura ta inspirá pa Dios i ta útil pa siñansa.” (2 Timoteo 3:16) Pues laga nos konsiderá algun kreensia dje promé kristiannan den lus di loke Yehova su sirbidónan aktual a siña dor ku nan ta usa Beibel komo nan buki di instrukshon prinsipal.
E Bèrdat Tokante Alma
16. Kiko ta e bèrdat tokante alma?
16 Dor ku e promé kristiannan a kere loke ta pará skirbí den e Skritura, nan a siña e bèrdat tokante alma. Nan tabata sa ku e promé hende “a bira un alma bibu” ora Dios a kre’é. (1 Korintionan 15:45) Ademas, nan a rekonosé ku alma humano ta muri. (Ezekiel 18:4; Santiago 5:20) Nan tabata sa tambe ku “e mortonan no sa nada.”—Eklesiástes 9:5, 10.
17. Kon lo bo splika e speransa ku tin pa hende morto?
17 Sin embargo, e promé disipelnan di Hesus tabatin e speransa sigur ku e mortonan ku ta den memoria di Dios lo ser resusitá, òf restorá na bida. Pablo a ekspresá e kreensia ei masha kla ora el a deklará: ‘Mi tin speransa den Dios ku lo tin un resurekshon di tantu e hustunan komo e malbadonan [“inhustunan,” NW].’ (Echonan 24:15) Un poko tempu despues, asta Minucius Felix, kende a bisa ku e ta kristian, a skirbi: “Ta ken ta asina estúpido òf sin sintí p’e tribi di kere ku Dios, kende ta esun ku originalmente a traha hende, no por krea hende di nobo?” Meskos ku e kristiannan di promé, Testigunan di Yehova ta pega na e bèrdat bíbliko tokante alma humano, morto i resurekshon. Awor, laga nos konsiderá e identidat di Dios i di Kristu.
E Bèrdat i Trinidat
18, 19. Pakiko nos por bisa ku Trinidat no ta un siñansa bíbliko?
18 E kristiannan di promé siglo no a mira Dios, Kristu i spiritu santu komo un Trinidat. The Encyclopædia Britannica ta bisa: “Ni e palabra Trinidat ni e idea dje doktrina ta aparesé den Tèstamènt Nobo. Ni Hesus ni su disipelnan no tabatin intenshon di kontradesí e Shemá [un orashon hebreo] den e Tèstamènt Bieu: ‘Tende, o Israel: Señor nos Dios ta un solo Señor’ (Deu. 6:4).” Kristiannan no a adorá e trinidat romano ni ningun otro dios. Nan a aseptá e deklarashon di Hesus ku ta Yehova so mester adorá. (Mateo 4:10) Ademas, nan a kere den e palabranan di Kristu: “E Tata ta mas ku mi.” (Huan 14:28) Awe, Testigunan di Yehova tin e mesun punto di bista.
19 E promé siguidónan di Hesus a hasi un diferensia kla entre Dios, Kristu i spiritu santu. De echo, nan a batisá disipelnan (1) den nòmber dje Tata, (2) den nòmber dje Yu i (3) den nòmber di spiritu santu; no den nòmber di un Trinidat. Meskos tambe Testigunan di Yehova ta siña e bèrdat bíbliko i p’esei ta hasi un diferensia kla entre Dios, su Yu i spiritu santu.—Mateo 28:19.
E Bèrdat i Boutismo
20. Ki konosementu kandidatonan pa boutismo mester haña?
20 Hesus a duna su siguidónan e enkargo di hasi disipel dor di siña nan e bèrdat. Pa nan por batisá, nan mester haña un konosementu básiko dje Skritura. Por ehèmpel, nan mester rekonosé e posishon i outoridat di e Tata, i di su Yu Hesukristu. (Huan 3:16) Tambe kandidatonan pa boutismo tin ku komprendé ku spiritu santu no ta un persona sino e forsa aktivo di Dios.—Echonan 2:1-4.
21, 22. Pakiko lo bo bisa ku boutismo ta pa kreyente?
21 E promé kristiannan a batisá solamente personanan ku tabatin konosementu i ku a repentí i dediká nan mes inkondishonalmente na Dios pa hasi su boluntat. Hudiu i prosélito ku a reuní na Yerúsalèm na Pentekòste di aña 33 di nos era ya tabatin un konosementu dje Skritura Hebreo. Ora nan a tende apòstel Pedro papia tokante Hesus e Mesias, rònt di 3.000 di nan a “risibí su palabra” i “a wòrdu batisá.”—Echonan 2:41; 3:19–4:4; 10:34-38.
22 Boutismo kristian ta pa kreyente. Hende di Samaria a aseptá e bèrdat, i “ora nan a kere Felipe, kende tabata prediká e bon nobo tokante di e reino di Dios i e nòmber di Hesukristu, nan tabata wòrdu batisá, tantu hòmber komo muhé.” (Echonan 8:12) Komo un prosélito deboto ku tabatin konosementu di Yehova, e eunuko etiope a aseptá promé e splikashon di Felipe tokante kumplimentu di profesia Mesiániko, i despues el a batisá. (Echonan 8:34-36) Mas despues, Pedro a bisa Cornelio i otro paganonan ku “e hende ku ta teme [Dios] i ku ta hasi hustisia ta aseptabel p’e,” i ku tur hende ku ta pone fe den Hesukristu ta risibí pordon di piká. (Echonan 10:35, 43; 11:18) Tur esaki ta armonisá ku e mandamentu di Hesus pa ‘hasi disipel, i siña nan pa kumpli ku tur loke el a ordená.’ (Mateo 28:19, 20; Echonan 1:8) Testigunan di Yehova tin e mesun norma. Ta solamente esnan ku tin un konosementu básiko dje Skritura i ku a hasi un dedikashon na Dios por batisá serka nan.
23, 24. Kon ta e manera korekto pa kristiannan batisá hende?
23 E manera korekto pa batisá kreyente ta dor di baha nan kompletamente bou di awa. Despues ku Hesus a batisá den Riu Hordan, el a “sali for di awa.” (Marko 1:10) E eunuko etiope a ser batisá na “un lugá ku [tabatin] awa.” E ku Felipe “a baha bai den awa” i despues a “sali for di” dje. (Echonan 8:36-40) E echo ku Beibel ta konektá boutismo ku un entiero figurativo tambe ta indiká ku mester bai kompletamente bou di awa.—Romanonan 6:4-6; Kolosensenan 2:12.
24 The Oxford Companion to the Bible ta bisa: “E deskripshonnan di algun boutismo di Tèstamènt Nobo ta indiká ku tabata manda e persona ku a ser batisá bou di awa.” Segun e obra franses Larousse du XXe Siècle (Paris, 1928), “e promé kristiannan a batisá dor di bai den awa tur kaminda ku tabatin awa.” I e buki After Jesus—The Triumph of Christianity ta remarká: “Den su forma mas básiko, [boutismo] a eksigí p’e kandidato hasi un konfeshon di su fe, i despues baha kompleto bou di awa den nòmber di Hesus.”
25. Kiko nos lo konsiderá den e siguiente artíkulo?
25 E puntonan menshoná anteriormente relashoná ku kreensia- i práktikanan basá riba Beibel dje promé kristiannan ta djis algun ehèmpel. Nos lo por menshoná mas punto riba kua nan kreensianan i esnan di Testigunan di Yehova ta kuadra. Den e siguiente artíkulo nos lo konsiderá mas maneranan pa identifiká esnan ku ta siñando hende e bèrdat.
Kon Lo Bo Kontestá?
• Ki klase di adorashon Dios ta eksigí?
• Kon e bèrdat a bira realidat pa medio di Hesukristu?
• Kiko ta e bèrdat tokante alma i morto?
• Kon e boutismo kristian ta ser efektuá, i ki rekisito kandidatonan di boutismo mester kumpli kuné?
[Preguntanan di Estudio]
[Plachi na página 16]
Hesus a bisa Pilato: ‘Mi a bini pa duna testimonio di e bèrdat’
[Plachi na página 17]
Bo por splika pakiko Hesus a bisa: ‘Ami ta e bèrdat’?
[Plachi na página 18]
Kiko ta e bèrdat tokante boutismo kristian?