Nan Ta Sigui Kana den e Bèrdat
Nan Ta Sigui Kana den e Bèrdat
“No tin goso mas grandi pa mi ku di tende ku mi yunan ta kana den e bèrdat.”—3 HUAN 4.
1. Riba kiko “e bèrdat di e evangelio” ta enfoká?
YEHOVA ta aprobá solamente esnan ku ta ador’é “den spiritu i bèrdat.” (Huan 4:24) Nan ta obedesé e bèrdat dor di aseptá e totalidat di siñansanan kristian ku ta basá riba e Palabra di Dios. Tal “bèrdat di e evangelio” ta enfoká riba Hesukristu i e vindikashon di Yehova su gobernashon supremo pa medio di e Reino. (Galationan 2:14) Dios ta pèrmití “un influensia di eror” pasa riba esnan ku ta preferá falsedat. Pero pa hende por haña salbashon nan mester tin fe den e evangelio i kana den e bèrdat.—2 Tesalonisensenan 2:9-12; Efesionan 1:13, 14.
2. Pa ki motibu apòstel Huan tabata spesialmente gradisidu i ki relashon a eksistí entre e i Gayo?
2 Proklamadónan di Reino ta “kolaboradónan pa e bèrdat.” Meskos ku apòstel Huan i su amigu Gayo, nan ta pega firme n’e bèrdat i ta kana den dje. Ta riba Gayo Huan tabata pensa ora el a skirbi: “No tin goso mas grandi pa mi ku di tende ku mi yunan ta kana den e bèrdat.” (3 Huan 3-8) Asta si no ta e biehitu Huan mes a trese Gayo den e bèrdat, debí n’e edat avansá, e madures kristian i e kariño paternal dje apòstel, tabata na su lugá pa mira e hòmber aparentemente mas yòn aki komo un di Huan su yunan spiritual.
E Bèrdat i Adorashon Kristian
3. Pa ki propósito e promé kristiannan a tene reunion i ki benefisio esei a trese?
3 Pa siña e bèrdat, e promé kristiannan a reuní komo kongregashon, hopi bes den kasnan privá. (Romanonan 16:3-5) Di e forma ei nan a risibí animashon i a stimulá otro pa stima i hasi bon obra. (Hebreonan 10:24, 25) Relashoná ku esnan ku den siglonan mas despues a afirmá di ta kristian, Tertuliano (rònt di aña 155 pa despues di 220 Era Komun) a skirbi: “Nos ta reuní pa lesa e bukinan di Dios . . . Ku e palabranan santu ei nos ta alimentá nos fe, nos ta lanta nos speransa, nos ta konfirmá nos konfiansa.”—Apology, kapítulo 39.
4. Ki papel kantamentu a hunga den reunionnan kristian?
4 Ku tur probabilidat nan tabata kanta durante e reunionnan kristian dje tempu ei. (Efesionan 5:19; Kolosensenan 3:16) Profesor Henry Chadwick ta skirbi ku e analista di siglo 2, Selso, a haña e kantikanan kantá pa esnan ku a afirmá di ta kristian “asina bunita ku el a kunsumí p’e manera ku esakinan a afektá su emoshonnan.” Chadwick ta agregá: “Clemente di Alehandria ta e promé eskritor kristian ku a analisá ki klase di músika ta adekuá pa kristiannan usa. E ta bisa ku nan no mester ta e sorto di músika ligá ku baile erótiko.” (The Early Church, página 274-5) Meskos ku e promé kristiannan aparentemente a kanta ora nan a reuní huntu, asina Testigunan di Yehova hopi bes ta kanta kantikanan ku letra basá riba Beibel ku ta alabá Dios i e Reino.
5. (a) Ken a duna guia spiritual den e kongregashonnan kristian di promé siglo? (b) Kon kristiannan berdadero a apliká e palabranan di Hesus skirbí na Mateo 23:8 i 9?
5 Den e kongregashonnan kristian di promé siglo, esnan ku tabata siña otro hende e bèrdat tabata e ansianonan, anto sirbidónan ministerial tabata yuda nan kompañeronan di adorashon den vários manera. (Filipensenan 1:1) Un kuerpo gobernante ku a dependé riba e Palabra di Dios i spiritu santu a duna guia spiritual. (Echonan 15:6, 23-31) Nan no tabata usa títulonan religioso, pasobra Hesus a manda su disipelnan: “Boso no mester wòrdu yamá rabi, pasobra ta un ta boso maestro, i boso tur ta ruman. I no yama ningun hende riba tera boso tata, pasobra ta un ta boso Tata, Esun ku ta den shelu.” (Mateo 23:8, 9) Pa loke ta trata e puntonan aki i hopi otro mas, e promé kristiannan i e Testigunan di Yehova ta pará riba mesun liña.
Persiguí dor ku Nan A Prediká e Bèrdat
6, 7. Ounke e kristiannan berdadero a proklamá un mensahe di pas, kon nan a ser tratá?
6 Ounke e promé kristiannan a proklamá e mensahe pasífiko di Reino, nan, meskos ku Hesus, tambe a ser persiguí. (Huan 15:20; 17:14) Historiadó John L. von Mosheim a yama e kristiannan di promé siglo “un grupo di hòmber ku e karakter di mas inofensivo ku por tin, i ku nunka a kana ku un deseo òf pensamentu malisioso di hasi daño kontra estado.” Dr. Mosheim a bisa ku loke a “molestiá e romanonan tabata ku e kristiannan a adorá Dios na un manera simpel, sin nada ku a parse e ritonan sagrado di otro pueblo.” El a agregá: “Nan no tabatin sakrifisio, ni tèmpel, ni imágen, ni orákulo ni órden saserdotal; i esaki tabata sufisiente pa trese riba nan e reproche di un multitut ignorante ku a imaginá nan ku un religion no por laga di tin e kosnan aki. Di manera ku hende a mira e kristiannan komo un sorto di ateista; i, pa lei romano, hende kulpabel di ateismo tabata un pèst pa komunidat.”
7 Saserdote-, artesano- i otronan ku tabata gana nan pan di kada dia ku práktikanan di idolatria a instigá pueblo pa lanta kontra e kristiannan ku no a partisipá den e práktikanan aki. (Echonan 19:23-40; 1 Korintionan 10:14) Tertuliano a skirbi: “Nan ta kere ku ta e kristiannan ta kousante di tur desaster di Estado, di tur kalamidat den e pueblo. Si Riu Tiber subi yega muraya dje stat, si Riu Nilo no subi pa muha e kunukunan di kultivo, si no yobe, si tin un temblor, si tin hamber, si tin un plaga, mesora ta sali e gritu: ‘Tira e kristiannan pa leon!’” Sea kual sea e konsekuensianan, kristiannan berdadero ta ‘warda nan di ídolo.’—1 Huan 5:21.
E Bèrdat i Práktikanan Religioso
8. Pakiko esnan ku ta kana den e bèrdat no ta selebrá Pasku?
8 Esnan ku ta kana den e bèrdat ta evitá práktikanan no-bíbliko pasobra ‘lus no tin partisipashon ku skuridat.’ (2 Korintionan 6:14-18) Por ehèmpel, nan no ta selebrá Pasku di Nasementu, ku mundu ta selebrá dia 25 di desèmber. The World Book Encyclopedia ta rekonosé ku “niun hende no sa e fecha eksakto ku Kristu a nase.” The Encyclopedia Americana (edishon di 1956) ta bisa: “Saturnalia, un fiesta romano ku nan a selebrá meimei di desèmber, a bira e modelo pa hopi dje kustumbernan di fiesta di Pasku.” M’Clintock and Strong’s Cyclopædia ta remarká: “No ta Dios a manda hende selebrá Pasku, ni e no ta den T[èstamènt] N[obo].” I e buki Daily Life in the Time of Jesus ta remarká: “Tounan di bestia . . . tabata pasa wenter bou di dak; i for dje echo aki so kaba bo por mira ku e fecha tradishonal pa Pasku den wenter no por ta korekto, ya ku e Evangelio ta bisa ku e wardadónan tabata den kunuku habrí.”—Lukas 2:8-11.
9. Pakiko sirbidónan di Yehova di pasado i dje tempu aktual a evitá selebrashonnan di Pasku di Resurekshon?
9 Pasku di Resurekshon supuestamente ta rekordá e resurekshon di Kristu, pero fuentenan konfiabel ta konekt’é ku adorashon falsu. The Westminster Dictionary of the Bible ta bisa ku Pasku di Resurekshon tabata “originalmente e festival di primavera na onor di e diosa teutóniko di lus i primavera konosí den e anglosahonnan komo ‘Eastre,’” of ‘Eostre.’ Sea kual sea, Encyclopædia Britannica (edishon 11) ta deklará: “No tin ningun indikashon di fiesta di Pasku di Resurekshon den Tèstamènt Nobo.” Pasku di Resurekshon no tabata un fiesta ku e promé kristiannan a selebrá, i e pueblo di Yehova djawe no ta selebr’é tampoko.
10. Kiko Hesus a manda pa selebrá, i ken ta kumpli ku esei korektamente?
10 Hesus no a manda su siguidónan rekordá ni su nasementu ni su resurekshon, pero sí el a instituí e Konmemorashon di su morto komo sakrifisio. (Romanonan 5:8) Sí, esaki ta e úniko evenemento ku el a manda su disipelnan selebrá. (Lukas 22:19, 20) Te ainda Testigunan di Yehova ta selebrá e evenemento anual aki, yamá tambe Sena di Señor.—1 Korintionan 11:20-26.
E Bèrdat Ta Ser Deklará na Tur Parti di Tera
11, 12. Kon esnan ku ta kana den e bèrdat semper a apoyá nan aktividat di prediká?
11 Pa esnan ku konosé e bèrdat ta un onor di por dediká nan tempu, energia i otro rekursonan n’e obra di prediká e bon nobo. (Marko 13:10) Donashonnan boluntario a sostené e trabou di prediká di e promé kristiannan. (2 Korintionan 8:12; 9:7) Tertuliano a skirbi: “Asta si tin un tipo di kaha di plaka, no ta plaka di entrada e tin den dje, komo si fuera religion ta un negoshi. Tur hende ta trese un biaha pa luna, òf ki ora ku e ta deseá, i solamente si e ta deseá, i si e por, un suma modesto; pasobra niun hende no ta obligá; ta un ofrenda boluntario e ta.”—Apology, kapítulo 39.
12 E obra mundial di Testigunan di Yehova di prediká e Reino tambe ta ser apoyá pa donashonnan boluntario. Ademas di Testigunan, personanan gradisidu ku ta mustra interes den e bèrdat tambe ta apoyá e aktividat aki ku nan kontribushonnan. Aki tambe tin un similaridat entre e promé kristiannan i Testigunan di Yehova.
E Bèrdat i Kondukta Personal
13. Pa loke ta nan kondukta, Testigunan di Yehova ta hasi kaso di ki konseho di Pedro?
13 E promé kristiannan ku a kana den e bèrdat a kumpli ku e konseho di apòstel Pedro: “Laga boso kondukta ta ekselente meimei di e paganonan, asina ku ora nan kalumniá boso komo malechor, nan por, pa medio di boso bon obranan ku nan ta opservá, glorifiká Dios den e dia di bishitashon.” (1 Pedro 2:12) Testigunan di Yehova ta tuma e palabranan ei mashá na pechu.
14. Kiko ta kristiannan su punto di bista di entretenimentu inmoral?
14 Asta despues ku apostasia a hasi su entrada, esnan ku tabata kristian pa nòmber a evitá aktividatnan inmoral. W.D. Killen, profesor di historia eklesiástiko, a skirbi: “Den siglo 2 i 3, den tur stat grandi teaternan a sirbi komo sentro di atrakshon; por lo general e aktornan tabata personanan masha inmoral i semper nan aktuashon tabata dirigí pa satisfasé e apetit pa kos degenerá dje époka ei. . . . Tur kristian berdadero a mira teater ku asko. . . . Nan a keda leu for di su kosnan opseno; i su súplikanan konstante n’e dios i diosanan di paganismo tabata un insulto kontra nan konvikshonnan religioso.” (The Ancient Church, página 318-19) Hesus su siguidónan berdadero djawe tambe ta evitá e formanan opseno i moralmente degradá di entretenimentu.—Efesionan 5:3-5.
E Bèrdat i “e Outoridatnan Ku Ta Goberná”
15, 16. Ken ta “e outoridatnan ku ta goberná,” i kon esnan ku ta kana den e bèrdat ta mira nan?
15 Apesar dje bon kondukta di e promé kristiannan, mayoria emperador romano tabatin un punto di bista inkorekto di nan. Historiadó E. G. Hardy ta bisa ku e emperadornan a mira nan komo “fanátikonan un poko despresiabel.” E kartanan ku Gobernadó Plinio e Menor di Bitinia i Emperador Trahano a skirbi pa otro ta mustra ku por lo general e gobernantenan no tabata muchu bon na altura kiko realmente ta kristianismo. Kon kristiannan ta mira Estado?
16 Meskos ku e promé siguidónan di Hesus, Testigunan di Yehova ta den un sumishon relativo na “e outoridatnan ku ta goberná.” (Romanonan 13:1-7) Si un eksigensia humano ta na konflikto ku e boluntat di Dios, nan ta tuma e siguiente posishon: “Nos mester obedesé Dios mas ku hende.” (Echonan 5:29) E buki After Jesus—The Triumph of Christianity ta bisa: “Ounke kristiannan no a partisipá den adorashon di emperador, nan no tabata bochinchero i nan religion, ounke e tabata straño i tin biaha ofensivo for dje punto di bista pagano, no a representá niun menasa real p’e imperio.”
17. (a) Ki gobièrnu e promé kristiannan a apoyá? (b) Kon e siguidónan berdadero di Kristu a apliká e palabranan di Isaías 2:4 den nan bida?
17 E promé kristiannan a promové e Reino di Dios, meskos ku e patriarkanan Abraham, Isak i Yakòb a ehersé fe den e stat primintí “di kual Dios ta e arkitekto i konstruktor.” (Hebreonan 11:8-10) Meskos ku nan Doño, Hesus su disipelnan ‘no tabata parti di mundu.’ (Huan 17:14-16) I pa loke ta guera i konflikto humano, nan a buska pas dor di “bati nan spadanan traha plug ku nan.” (Isaías 2:4) Den un komentario ku profesor di historia di iglesia Geoffrey F. Nuttall a duna, e ta menshoná un paralelo interesante: “E aktitut dje promé kristiannan pa ku guera tabata meskos ku di e hendenan ku ta yama nan mes Testigunan di Yehova, maske nos no tin muchu gana di atmití esei.”
18. Pakiko niun gobièrnu no tin motibu pa tene miedu di Testigunan di Yehova?
18 Komo individuonan neutral sumiso na “outoridatnan ku ta goberná,” e promé kristiannan no tabata un menasa pa ningun entidat polítiko, i Testigunan di Yehova tampoko. “Bo mester tin un mente basta será i lokamente deskonfiá pa kere ku Testigunan di Yehova ta representá un menasa pa kualkier régimen polítiko,” un editorial norteamerikano a skirbi. “Nan ta mes òf mas obediente na gobièrnu i amante di pas ku kualke otro grupo religioso.” Outoridatnan bon-informá sa ku nan no tin nodi tene miedu di Testigunan di Yehova.
19. Enkuanto belasting, kiko nos por bisa di e promé kristiannan i e Testigunan di Yehova?
19 Un manera den kua e promé kristiannan a mustra rèspèt pa “e outoridatnan ku ta goberná” ta dor di paga nan belasting. Ora Hustino Martir a skirbi e Emperador Romano Antonino Pio (138-161 E.K.), el a bisa ku e kristiannan tabata “mas dispuesto” pa paga nan belasting “ku tur otro hende.” (First Apology, kapítulo 17) I Tertuliano a bisa e gobernantenan romano ku nan kobradónan di belasting tabatin un “debe di gratitut n’e kristiannan” pa e echo ku nan a paga nan belasting na un manera konsiensial. (Apology, kapítulo 42) Kristiannan a benefisiá di e Pax Romana, òf Pas Romano, ku su órden i lei, su kamindanan den bon estado i e biahamentu riba laman relativamente safe. Nan a rekonosé ku nan tabata debe sosiedat, p’esei nan a obedesé e palabranan di Hesus: “Duna Sésar loke ta di Sésar, i Dios loke ta di Dios.” (Marko 12:17) Awe e pueblo di Yehova ta sigui e konseho aki i a risibí elogio pa nan onestidat, manera den pagamentu di belasting.—Hebreonan 13:18.
E Bèrdat—Un Laso di Union
20, 21. Pa loke ta un hermandat pasífiko, kiko nos por bisa di tantu e promé kristiannan komo di Testigunan di Yehova dje tempu aktual?
20 Pa motibu ku e promé kristiannan a kana den e bèrdat, nan tabata uní den un hermandat pasífiko, meskos ku Testigunan di Yehova ta awe. (Echonan 10:34, 35) Un karta ku The Moscow Times a publiká a bisa: “[Testigunan di Yehova] ta bon konosí komo personanan amigabel, bondadoso i mansu ku ta masha fásil pa trata kuné, ku nunka ta pone preshon riba otro hende i ku semper ta buska pas den nan relashon ku otro hende . . . No tin praktikante di soborno, buraché ni drogadikto den nan, i e motibu ta masha simpel: Nan simplemente ta purba laga nan konvikshonnan basá riba Beibel guia nan den tur loke nan ta bisa òf hasi. Si tur hende na mundu purba por lo ménos biba segun Beibel manera Testigunan di Yehova ta hasi, nos mundu kruel lo ta kompletamente diferente.”
21 Encyclopedia of Early Christianity ta deklará: “E iglesia di kuminsamentu a mira su mes komo un komunidat nobo den kua gruponan ku un tempu tabata enemigu di otro, manera hudiu i pagano, por a biba huntu na pas ku otro.” Testigunan di Yehova tambe ta un hermandat internashonal amante di pas—un berdadero sosiedat humano nobo. (Efesionan 2:11-18; 1 Pedro 5:9; 2 Pedro 3:13) Ora e alto hefe di siguridat di e Tereno di Ekshibishon di Pretoria na Suráfrika a mira kon Testigunan di tur rasa a reuní pasífikamente komo delegado di kongreso, el a bisa: “Tur hende tabata i ta kortes. Nan tin bon manera di papia ku otro, i nan a manifestá un bunita aktitut den e último par di dianan. Tur esaki ta duna testimonio dje kaliber haltu di e miembronan di boso sosiedat, i ku tur ta biba huntu manera un famia felis.”
E Rekompensanan di Siña Otro Hende e Bèrdat
22. Kiko ta sosodiendo aktualmente pa motibu ku kristiannan a manifestá e bèrdat?
22 Dor di nan kondukta i aktividat di prediká, Pablo i otro kristiannan a ‘manifestá e bèrdat.’ (2 Korintionan 4:2) Bo no ta di akuerdo ku Testigunan di Yehova ta hasiendo meskos i ta siñando tur nashon e bèrdat? Rònt mundu mas i mas hende ta aseptá adorashon berdadero i ta basha bai na “e seru di e kas di SEÑOR.” (Isaías 2:2, 3) Tur aña míles ta ser batisá pa simbolisá nan dedikashon na Dios, loke ta resultá den formashon di hopi kongregashon nobo.
23. Kon abo ta mira esnan ku ta siña tur nashon e bèrdat?
23 Ounke e sirbidónan di Yehova ta bini di vários rasa i rango sosial, nan ta uní den adorashon berdadero. E amor ku nan ta desplegá ta identifiká nan komo disipel di Hesus. (Huan 13:35) Abo por mira ku en bèrdat ‘Dios ta meimei di nan’? (1 Korintionan 14:25) Bo ta apoyá esnan ku ta siña tur nashon e bèrdat? Si ta asina, sigui demostrá bo gratitut duradero pa e bèrdat i risibí e privilegio di kana den dje pa semper.
Kon Lo Bo Kontestá?
• Den asuntunan di adorashon, ki similaridat tin entre e promé kristiannan i Testigunan di Yehova?
• Kiko ta e úniko evenementu religioso ku esnan ku ta kana den e bèrdat ta selebrá?
• Ken ta “e outoridatnan ku ta goberná,” i kon kristiannan ta mira nan?
• Den ki sentido e bèrdat ta un laso di union?
[Preguntanan di Estudio]
[Plachi na página 21]
Semper reunionnan kristian tabata un bendishon pa esnan ku ta kana den e bèrdat
[Plachinan na página 23]
Hesus a manda su siguidónan konmemorá su morto komo sakrifisio
[Plachi na página 24]
Meskos ku e promé kristiannan, Testigunan di Yehova ta mustra rèspèt pa “e outoridatnan ku ta goberná”