Historia di Bida

Bieu i Satisfecho

SEGUN E RELATO DI MURIEL SMITH

Un hende tabata bati masha duru na mi porta. Mi a kaba di yega kas pa kome mèrdia despues di a prediká henter mainta. Manera tabata mi kustumber, mi tabata herebé awa pa traha un kòp’i te i tabata kla pa rèk mi pia pa tuma mi mei ora di sosiegu. E hende tabata bati ku insistensia, i segun ku mi tabata kana bai porta, mi ta puntra mi mes ta ken por ta na porta n’e ora aki. Mi a haña sa umbe. E dos hòmbernan dilanti mi porta a introdusí nan mes komo polis. Nan a deklará ku nan a bini pa listra mi kas pa wak si mi tin literatura produsí dor di Testigunan di Yehova, un organisashon prohibí.

Dikon Testigunan di Yehova tabata prohibí na Oustralia, i kon bini mi a bira Testigu? Tur esei a kuminsá ku un regalo di mi mama na aña 1910, tempu mi tabatin 10 aña.

MI FAMIA tabata biba den un kas di palu den e bario Crows Nest, den nort di Sydney. Un dia mi a yega kas for di skol i a haña mi mama ta papia na porta ku un hòmber. Mi tabata kurioso pa sa ta ken e hòmber straño aki ta, bistí na bachi i ku un tas yen di buki. Mi a pidi despensa i a bai den kas. Sin embargo, un par di minüt despues Mama a yama mi. E di: “E hòmber aki tin poko buki masha interesante, i nan tur ta tokante e Skritura. Awor, komo ku djis aki bo ta hasi aña, bo por haña sea un shimis nobo òf e bukinan aki. Kua lo bo kier?”

 Mi a kontestá: “Am, Mami, mi kier e bukinan, danki.”

Asina na edat di dies aña, mi a haña e promé tres volúmennan di Studio dje Skritura, skirbí pa Charles Taze Russell. E hòmber na porta a splika mi mama ku lo e tin ku yuda mi komprendé e bukinan, ya ku probablemente nan lo ta muchu difísil pa mi. Mama a bisa ku gustosamente lo e hasi esei. Lamentablemente, Mama a muri djis despues di esaki. Tata a traha duru pa perkurá pa ami ku mi ruman hòmber i mi ruman muhé, pero tòg awor mi tabatin mas responsabilidat, i esakinan tabata parse demasiado pa mi. Riba dje tabatin un otro tragedia tras di porta.

Promé guera mundial a start na 1914, i apénas un aña despues nos tata stimá a ser matá. Awor ku nos a bira huérfano nan a manda mi ruman hòmber ku mi ruman muhé bai biba serka famia, i ami nan a manda na un internat katóliko. Tabatin biaha ku soledat tabata bati mi. Pero tòg mi ta gradisidu pa e chèns ku mi a haña di satisfasé mi amor pa músika, foral pa piano. Añanan a pasa, i mi a kaba skol. Na 1919 mi a kasa ku Roy Smith, un bendedó di instrumentonan musikal. Na 1920 nos a haña nos promé yu, i atrobe mi tabata apsorbá den e preokupashonnan di bida diario. Pero kiko a para di e bukinan aya?

Un Bisiña Ta Kompartí e Bèrdat Spiritual

Durante tur e añanan ei, unda ku mi a bai, e “bukinan di Beibel” a bai ku mi. Ounke nunka mi a ègt lesa nan, den mi kurason mi tabata sa ku e mensahe ku nan a kontené tabata importante. Anto un dia na final di añanan ’20, un di nos bisiñanan, Lil Bimson, a bin hasi bishita. Nos a bai den sala, kai sinta i bebe poko te.

Diripiente Lil a grita: “Ata bo tin e bukinan ei!”

“Kua bukinan?” mi a puntr’é, tur konfundí.

El a mustra riba e Studio dje Skritura ku tabatin den e kashi di buki. E dia ei Lil a fia nan, bai kas ku nan i a lesa nan ku smak. Su entusiasmo pa loke el a lesa pronto a bira masha bisto. Lil a buska mas literatura for di e Studiantenan di Beibel, manera Testigunan di Yehova tabata konosí e tempu ei. Ademas, e no por a keda sin konta nos tur e kosnan ku e tabata siña. Un di e bukinan ku el a haña tabata E Harpa di Dios, i poko despues e buki a bin para na mi kas. Mi karera den Yehova su sirbishi a kuminsá finalmente ora mi a traha tempu pa lesa e publikashon aki basá riba Beibel. Porfin, mi a haña kontesta riba preguntanan fundamental ku mi tabatin i ku mi iglesia no por a kontestá pa mi.

Afortunadamente, Roy a presta bon atenshon na e mensahe di Beibel, i nos tur dos a kuminsá studia Beibel ku masha smak. Promé ku esei Roy tabata miembro di mazòn. Awor nos famia tabata uní den adorashon berdadero, i dos bes pa siman un ruman hòmber tabata kondusí un studio di Beibel ku henter e famia. Nos a haña mas animashon ainda ora nos a kuminsá asistí na e reunionnan ku e Studiantenan di Beibel tabata tene. E lugá di reunion tabata un sala chikí na Sydney ku nan a hür den e bario di Newtown. E tempu ei tabatin ménos ku 400 Testigu den henter e pais, pues mayoria ruman mester a biaha un distansia hopi largu pa asistí na reunion.

 Pa nos famia asistí na reunion, nos mester a krusa Haf di Sydney regularmente. Promé ku nan a traha e Brùg di Haf di Sydney na 1932, nos mester a krusa kada biaha ku fèri ku ta transportá outo. Apesar ku e biahe aki a kosta tempu i plaka, nos tabata purba di no pèrdè ningun di e alimentonan spiritual ku Yehova tabata perkurá. E esfuerso ku nos a hasi pa bira firme den e bèrdat tabata bale la pena, ya ku segundo guera mundial a kuminsá menasá i e kuestion di neutralidat lo a bai afektá nos famia direktamente.

Un Tempu di Prueba i Bendishon

Prinsipio di añanan ’30 tabata un periodo eksitante pa mi ku mi famia. Mi a batisá na 1930, i na 1931 mi tabata presente na e kongreso memorabel kaminda nos tur a lanta para i bai di akuerdo pa adoptá e bunita nòmber Testigunan di Yehova. Ami ku Roy a hasi nos bèst pa kumpli ku nifikashon di e nòmber ei dor di partisipá den tur e métodonan i kampañanan di predikashon ku e organisashon tabata enkurashá. Por ehèmpel, na 1932 nos a partisipá den un kampaña spesial pa parti un foyeto chikí prepará pa e multitut di hendenan ku a bin mira apertura di e Brùg di Haf di Sydney. Un punto sobresaliente pa nos tabata e uso di outo ku ekipo di zonidu, i nos tabatin e privilegio di por a pone loutspiker riba nos outo di famia. Ku e teknologia aki, nos tabata laga Ruman Rutherford su diskursonan bíbliko grabá resoná den e kayanan di Sydney.

Sin embargo, kosnan tabata kambiando atrobe i bira mas i mas difísil. Pa 1932 e Gran Depreshon ekonómiko tabatin un impakto grandi riba Oustralia, p’esei ami ku Roy a disidí di simplifiká nos bida. Un manera ku nos a hasi esaki tabata dor di bai biba mas serka di e kongregashon, i asina nos a baha nos gastunan di biahe konsiderablemente. Pero preshon ekonómiko no tabata nada kompará ku e teror di Segundo Guera Mundial ku a kohe mundu den su gara.

Komo ku Testigunan di Yehova mundialmente ta obedesé Hesus su mandamentu pa nan no ta parti di mundu, nan a bira e blanko di persekushon, i Oustralia no tabata un eksepshon. Provoká pa e furia di guera, tabatin hende ku a tilda nos di ta komunista. E opositornan aki a pretendé ekibokadamente ku Testigunan di Yehova tabata usa e kuater emisoranan di radio ku nan tabatin na Oustralia pa manda mensahe pa e ehérsito hapones.

Ruman hòmbernan hóben ku nan a manda yama pa drenta den servisio militar a konfrontá hopi preshon pa komprometé nan fe. Mi ta kontentu di por bisa ku tur nos tres yu hòmbernan a para firme pa nan kreensianan i a mantené nan neutralidat. Nos yu hòmber mayó, Richard, a haña un sentensia di 18 luna di prizon. Nos di dos yu hòmber, Kevin, a logra haña dispensashon a base di ku servisio militar ta kontra su prinsipionan. Pero lamentablemente nos yu hòmber mas chikí, Stuart, a muri den un aksidente di motosaikel riba kaminda pa bai korte pa kompletá su defensa riba e kuestion di neutralidat. E tragedia aki tabata realmente duru. Pero nos a logra want’é dor di keda konsentrá riba e Reino i riba Yehova su promesa di un resurekshon.

Nan No A Haña e Berdadero Botin

Na yanüari 1941, gobièrnu a prohibí Testigunan di Yehova na Oustralia. Pero, meskos ku e apòstelnan di Hesus, ami ku Roy a obedesé Dios mas ku hende, i pa dos aña i mei nos a sigui prediká na skondí. Tabata durante e periodo aki ku e dos polisnan bistí na sivil, ku mi a menshoná den introdukshon, a bin bati na mi porta. Kiko a pasa?

Wèl, mi a invitá nan paden. Ora nan tabata drentando mi a puntra: “Mi por djis kaba di bebe mi kòp’i te promé ku boso listra e kas?” Sorprendentemente, nan a bai di akuerdo, i mi a bai den kushina pa resa na Yehova i ordená mi pensamentunan. Ora mi a bin bèk, un di e polisnan a drenta den e kuarto kaminda nos ta studia i a bai ku tur kos ku tabatin e logo di Watchtower riba dje, inkluso e literatura ku tabatin den mi tas di prediká i mi Beibel.

 Kaba el a puntra: “Bo tin sigur ku bo no tin ningun otro literatura skondí den kaha? Segun nos informashon, boso ta asistí na un reunion tur siman den un sala situá na fin di e kaya aki i boso ta hiba hopi literatura einan.”

Mi a kontestá: “Ta bèrdat, pero nan no ta einan awor.”

E di: “Sí, nos sa esei sra. Smith. Tambe nos sa ku e literatura ta wardá na kas di hende den henter e distrito.”

Den kamber di mi yu hòmber nan a haña sinku kaha di e foyeto chikí na ingles Libertat òf Katolisismo.

“Bo tin sigur ku bo no tin nada mas den garashi?” e polis a puntra.

“Nò, no tin nada eiden,” mi di.

Kaba el a habri un kashi den komedor. El a haña formularionan bashí ku nos tabata usa pa yena e rapòrt di kongregashon. El a bai ku esakinan anto a insistí pa wak den garashi.

“E ora ei pasa djaki,” mi di.

Nan a sigui mi i nos a bai pafó den garashi i despues di a kontrol’é, porfin nan a bai.

Wèl, e dos polisnan ei a kere ku nan a haña un tremendo botin ku e sinku kahanan ei! Sin embargo, nan a laga e berdadero botin atras. Pasobra den e tempu ei mi tabata sirbi komo sekretario di kongregashon, i mi tabatin lista ku nòmber di e publikadónan di kongregashon i otro informashon importante den kas. Ta bon ku e rumannan a spièrta nos pa ta prepará pa tal tipo di listramentu, i p’esei mi tabatin e dokumentonan ei bon skondé. Mi a hinka nan den ènvelòp i a pone nan den bòm di mi blekinan di te, suku i hariña. Tambe mi tabatin algun wardá den e kouchi di para, ku tabata pegá ku e garashi. Pues e polisnan a kana pasa banda di e informashon ku nan tabata buska.

Den Sirbishi di Tempu Kompleto

Pa 1947, nos yunan mas grandi ya tabatin nan mes famia. E ora ei ami ku Roy a disidí ku nos lo por kuminsá den sirbishi di tempu kompleto. Den zùit di Oustralia tabatin mester di predikadó, pues nos a bende nos kas i a kumpra un karavan ku nos a yama Mizpa, ku kier men “Toren di Vigilansia.” E estilo di bida aki a pèrmití nos prediká den áreanan hopi retirá. Hopi bes nos tabata traha den teritorio di kunuku ku no tabata asigná na ningun kongregashon. Mi tin masha grato rekuerdo di e tempu ei. Un di mi studionan tabata ku un señora hóben ku yama Beverly. Promé ku e por a progresá yega na boutismo, el a bandoná e área. Bo por imaginá kon kontentu mi a bira ora ku añanan despues un ruman muhé a bini serka mi na un kongreso i a bisa ku ta Beverly! Mi a sinti mi masha felis ku despues di tur e añanan ei mi por a mir’é ta sirbi Yehova huntu ku su kasá i yunan.

Na 1979 mi tabatin e privilegio di asistí na e Skol di Sirbishi di Pionero. Un di e kosnan ku nan a enfatisá na e skol ei tabata ku pa un persona por perseverá den e sirbishi di pionero, e mester tin un bon rutina di studio personal. Pa mi, esei ta un gran bèrdat. Studia, bai reunion i sirbishi tabata henter mi bida. Mi ta konsider’é un privilegio ku mi por a sirbi komo pionero regular pa mas ku 50 aña.

Luchando ku Problema di Salú

E último dékadanan aki sí mi a konfrontá algun desafio spesial. Na 1962 dòkter a haña sa  ku mi tin gloukoma, esta, preshon den wowo. E tempu ei mi bista a bai atras hopi lihé pasobra e tratamentu disponibel tabata poko limitá. Roy su salú tambe a bai atras, i na 1983 el a haña un atake selebral pisá ku a lag’é parsialmente paralisá i sin por papia. El a fayesé na 1986. El a duna mi hopi apoyo práktiko durante mi sirbishi di tempu kompleto, i mi ta sinti su falta hopi.

Apesar di e kontratempunan aki, mi a purba mantené un bon rutina spiritual. Mi a kumpra un outo fuerte ku ta pas pa sirbishi di vèlt den nos teritorio ku ta mitar kunuku, i ku yudansa di mi yu muhé Joyce mi a sigui ku mi sirbishi di pionero. Mi bista a sigui bai atras pokopoko te ora ku mi no por a wak mas ku un wowo. Dòkternan a pone un wowo di glas na su lugá. Pero ku vergrootglas i literatura lèter grandi ainda mi por a studia tres pa sinku ora pa dia, usando e tiki bista ku a keda den e otro wowo.

Studio personal semper tabata algu presioso pa mi. Pues bo por imaginá e shòk teribel ku mi a haña ora ku un atardi ku mi tabata studiando, diripiente mi no por a wak nada-nada. Tabata komo si fuera un hende a paga lus. Mi a pèrdè mi bista kompletamente. Kon mi a sigui studia? Wèl, maske mi ta basta surdu, mi ta dependé di e oudiokasètnan i di e sosten amoroso di mi famia pa mantené mi spiritualmente fuerte.

Perseverando te na Fin

Awor ku mi tin mas ku 100 aña, mi salú a sigui bai atras i mi tabatin ku baha man na mi aktividatnan. Tin biaha mi ta sinti mi un tiki pèrdí. De echo, awor ku mi no por mira nada-nada, tin biaha mi ta ègt pèrdí! Mi tin masha gana di kondusí algun studio di Beibel atrobe, pero manera mi salú ta awor akí, mi no por sali mas i bai buska nan. Na prinsipio esei a hasi mi deprimí, pero mi tabatin ku siña aseptá mi limitashonnan i keda kontentu ku loke mi por hasi. Esaki no tabata fásil. Sin embargo, ta un privilegio grandi ku tur luna mi por raportá e poko ora ku mi a dediká na papia tokante nos gran Dios, Yehova. Ora oportunidatnan presentá pa papia tokante Beibel mi ta probechá di nan, klaro usando takto sí. Por ehèmpel, ora verplegster, hende ku ta bende kos òf otronan bini na kas.

Un di mi bendishonnan ku ta duna mi mas satisfakshon ta di mira kuater generashon di mi famia ta adorá Yehova fielmente. Algun di nan a hasi esfuerso pa sirbi komo pionero na lugánan ku tin mas mester di predikadó, tambe tin ta sirbi komo ansiano òf sirbidó ministerial i na Bètel. Klaro ku meskos ku hopi hende di mi tempu, mi a ferwagt ku e fin di e sistema aki lo a yega hopi mas promé. Pero mi a mira un tremendo oumento durante e shete dékadanan ku mi a traha den sirbishi! Pa mi ta un gran satisfakshon di por tabata enbolbí den algu asina magnífiko.

E verplegsternan ku ta bishitá mi ta bisa ku mester ta mi fe ta tene mi na bida. Mi ta di akuerdo ku nan. Ser aktivo den e sirbishi di Yehova ta resultá den e mihó bida ku tin. Meskos ku Rei David, di bèrdat mi por bisa ku mi ta bieu i satisfecho.—1 Krónikanan 29:28.

(Ruman Muriel Smith a muri dia 1 di aprel 2002, den e tempu ku nos tabata finalisá e artíkulo aki. El a muri nèt un luna promé ku el a hasi 102 aña, i e tabata realmente un bon ehèmpel di fieldat i perseveransia.)

[Plachi na página 24]

Tempu mi tabatin rònt di sinku aña i na edat di 19 aña, ora ku mi a konosé mi kasá, Roy

[Plachi na página 26]

Nos outo i e karavan ku nos a yama Mizpa

[Plachi na página 27]

Ami ku mi kasá Roy, na 1971