Ki Ora Yehova Ta Bendishoná Esfuerso Sinsero?

“LAGA mi bai, pasobra dia ta bai habri.”

“Lo mi no laga bo bai si bo no bendishoná mi.”

“Kon ta bo nòmber?”

“Yakòb.”

“Bo nòmber lo no ta Yakòb mas, sino Israel; pasobra bo a lucha ku Dios i ku hende, i bo a vense.”—Génesis 32:26-28.

E kòmbersashon interesante ei a tuma lugá despues ku Yakòb a duna un demostrashon remarkabel di su agilidat atlétiko na edat di 97 aña. Ounke Beibel no ta deskribié komo un atleta, el a lucha man-na-man henter anochi ku un angel. Dikon? Pasobra Yakòb tabata masha preokupá pa e promesa ku Yehova a hasi na su antepasado, un promesa ku tabata parti di su herensia spiritual.

Hopi aña promé, Yakòb su ruman hòmber Esau a renunsiá su derecho di promé yu a kambio di un tayó di bonchi stobá. Awor Yakòb ta tende ku Esau ta na kaminda huntu ku 400 hòmber. Ta di komprendé ku Yakòb ta nervioso, i p’esei e kier pa Yehova dun’é un konfirmashon ku su famia lo prosperá den e tera na otro banda di Riu Yordan. Yakòb ta aktua desididu na armonia ku su orashon. E ta manda regalonan generoso pa Esau ku ta na kaminda. Tambe e ta tuma pasonan preventivo; e ta parti su kampamentu na dos i ta laga su kasánan i yunan krusa na e roi di Yabòk. Ku hopi esfuerso i lágrima, e ta fòrsa su mes mas ainda dor di lucha henter anochi ku un angel pa e por a ‘roga grasia’ pa su mes.—Oséas 12:4; Génesis 32:1-32.

Konsiderá un otro ehèmpel mas promé ku esei: Esun di Rakel, Yakòb su di dos kasá i esun mas stimá. Rakel ta bon na haltura ku Yehova a primintí di bendishoná Yakòb. Lea, ruman muhé di Rakel i promé kasá di Yakòb, ta ser bendishoná ku kuater yu hòmber miéntras ku Rakel ta keda steril. (Génesis 29:31-35) Pero en bes di sinta haña duele di su mes, Rakel ta sigui roga Yehova den orashon i ta aktua determiná na armonia ku su orashon. Meskos ku su antepasado Sara a hasi ku Agar, Rakel ta hiba su kriá Bilha pa Yakòb komo un esposa sekundario ya asina, manera Rakel ta ekspres’é: “Dor di dje  ami tambe por tin yu.” * Bilha ta haña dos yu hòmber ku Yakòb, esta, Dan i Nèftalí. Na Nèftalí su nasementu Rakel ta deklará kuantu esfuerso emoshonal el a hasi: “Ku gran lucha mi a lucha ku mi ruman, i di bèrdat mi a vense.” Rakel ta ser bendishoná mas ainda ora e mes haña dos yu hòmber, Yosef i Benjamin.—Génesis 30:1-8; 35:24.

Dikon Yehova a bendishoná e esfuersonan físiko i emoshonal di Yakòb ku Rakel? Pasobra nan a pone Yehova su boluntat na promé lugá i a apresiá nan herensia. Tambe nan a resa sinseramente pidi Yehova su bendishon den nan bida i a dal pasonan desisivo na armonia ku e boluntat di Dios i ku nan mes petishonnan.

Hopi hende awe, meskos ku Yakòb i Rakel, por duna testimonio ku si nos kier risibí Yehova su bendishon, nos mester hasi esfuerso diligente. Hopi bes nan esfuersonan ta bai kompañá ku lágrima, desanimashon i frustrashon. Elizabeth, un mama kristian, ta kòrda kuantu esfuerso sinsero e mester a hasi pa bolbe kuminsá asistí na reunionnan kristian despues di un ousensia largu. Esei tabata un tarea difísil p’e komo ku e tabatin sinku yu chikí, un kasá inkrédulo i un kareda di 30 kilometer pa kore ku outo p’e yega na e Salòn di Reino mas serka. El a bisa: “Mi tabatin mester di hopi disiplina propio pa mi por a bai reunion ku regularidat. Pero mi tabata sa ku esei ta bon pa mi i pa mi yunan. Esei a yuda nan mira ku e kaminda aki tabata bale la pena.” Yehova a bendishoná su esfuersonan. Di su tres yu hòmbernan ku ta aktivo den e kongregashon kristian, dos ta den sirbishi di tempu kompleto. Kontentu ku nan progreso spiritual, Elizabeth ta bisa: “Nan a krese spiritualmente bai laga mi.” Ki un bendishon pa su esfuerso sinsero!

Esfuerso Sinsero Ku Yehova Ta Bendishoná

Un kos ta sigur. Esfuerso sinsero i trabou duru ta duna rekompensa. Mas esfuerso nos hinka den un proyekto òf asignashon, mas satisfakshon nos lo risibí a kambio. Ta asina Yehova a traha nos. Rei Sálomon a skirbi: “Tur hende [mester] kome i bebe i mira e bon ku tin den tur su trabou—esaki ta e regalo di Dios.” (Eklesiástes 3:13; 5:18, 19) Pero pa nos risibí un bendishon di Dios, nos tin ku hasi sigur ku nos esfuersonan ta bon dirigí. Por ehèmpel, ta rasonabel pa ferwagt Yehova su bendishon ora asuntunan spiritual ta na di dos lugá den nos bida? Un kristian dediká por spera di risibí Yehova su aprobashon si e aseptá un trabou òf promoshon ku ta nifiká ku e mester pèrdè e reunionnan kristian, kaminda e ta haña asosiashon i instrukshon ku ta fortifiká su fe?—Hebreonan 10:23-25.

Si un hende traha duru henter su bida pa un karera di mundu òf pa prosperidat material—lagando kosnan spiritual un banda—esei no nesesariamente kier men ku lo e “mira e bon.” Hesus a deskribí e konsekuensianan di esfuerso mal dirigí den su komparashon di e sembradó. Hesus a splika ku e simia ku a wòrdu sembrá “meimei di mata di sumpiña ta e hende ku ta tende e palabra, i e preokupashonnan di e mundu aki i e engaño di rikesa ta hoga e palabra, i e ta keda sin duna fruta.” (Mateo  13:22) Pablo tambe a spièrta nos pa e mesun trampa i a agregá ku esnan ku sigui un rumbo materialista “ta kai den tentashon i den trampa i den hopi deseonan loko i dañino, kualnan ta hundi hende den ruina i destrukshon.” Kiko por yuda bo evitá tal estilo di bida spiritualmente dañino? Pablo a sigui bisa: ‘Hui pa e kosnan aki i no fiha bo speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.’—1 Timoteo 6:9, 11, 17.

No ta importá kuantu aña nos tin òf kuantu tempu nos tin ta sirbi Yehova; nos tur por benefisiá dor di imitá e esfuerso sinsero ku Yakòb i Rakel a demostrá. Den nan esfuerso pa haña Dios su aprobashon, nan nunka a lubidá nan herensia, ni maske kon spantoso òf frustrante nan sirkunstansia por tabata. Awe, e preshonnan i difikultatnan ku nos ta konfrontá por ta mesun spantoso, frustrante òf asta desanimante. E tentashon ta pa bandoná e lucha i bira un víktima mas di e atake di Satanas. Podisé Satanas ta usa kualkier un di e medionan ku e tin na su disposishon—sea ta dibertishon òf rekreo, deporte òf hòbi, karera òf prosperidat material—pa logra su propósito. Hopi bes e espektativanan por ta masha bunita pero masha poko bes nan ta ser realisá. Mayoria biaha esnan ku ser engañá òf tentá pa entregá na e aktividatnan ei ta ripará ku na final di kuenta nan ta keda desepshoná. Pero laga nos, meskos ku Yakòb i Rakel, kultivá e aktitut di un luchadó sinsero i vense e trampanan di Satanas.

Diabel tin masha gana di mira nos resigná i entregá, i pensa ku ‘esaki ta un kaso pèrdí. No tin solushon. No ta bale la pena purba.’ P’esei ta sumamente importante pa nos tur tene kuidou pa nos no desaroyá un aktitut di resignashon, pensando ku ‘niun hende stima mi’ i ‘Yehova a lubidá mi.’ Si nos entregá na pensamentunan asina, nos ta kaba ku nos mes. Esei lo no indiká ku nos a laga nos mannan kai i no ta sigui lucha te ora nos haña un bendishon? Kòrda, Yehova ta bendishoná nos esfuerso sinsero.

Sigui Lucha pa Yehova Su Bendishon

Nos bienestar spiritual ta dependé prinsipalmente di e echo ku nos ta komprendé dos bèrdat básiko ku tin di haber ku nos bida komo un sirbidó di Yehova. (1) No ta un hende so ta haña tur problema, malesa òf situashon difísil den bida, i (2) Yehova ta skucha e sklamashon di esnan ku sinseramente ta pidié yudansa i un bendishon.—Éksodo 3:7-10; Santiago 4:8, 10; 1 Pedro 5:8, 9.

No ta importá kon difísil bo sirkunstansia ta òf kon limitá bo ta sinti bo; no entregá na “e piká ku ta mara nos asina fásil,” esta, falta di fe. (Hebreonan 12:1) Sigui lucha te ora bo risibí un bendishon. Tene pasenshi, i kòrda riba Yakòb, kende na edat avansá a lucha henter anochi pa un bendishon. Meskos ku e kunukero ku ta sembra i kaba ta warda pa e tempu di kosecha, warda ku pasenshi pa Yehova bendishoná bo aktividat spiritual, maske kon limitá bo ta sinti ku bo aktividat ta. (Santiago 5:7, 8) I semper kòrda e palabranan di e salmista: “Esnan ku sembra ku awa na wowo lo kosechá ku gritu di alegria.” (Salmo 126:5; Galationan 6:9) Para firme, i keda den fila di e luchadónan.

[Nota]