Ora Superstishon Ta Kontrolá Bo Bida

BO TA kana dal den un hende ora bo ta sali kas. Bo ta dal bo dede di pia kontra un piedra. Un sierto tipo di para ta kanta den anochi. Bo ta soña e mesun soño kada bes. Pa hopi hende, e susesonan aki ta kos simpel ku no ta duna niun motibu pa preokupá. Pero pa sierto pueblonan na Wèst Áfrika, nan por ta señal, aviso òf mensahe di spiritu. Nan ta kere ku tin sea bon suerte òf problema na kaminda; dependé kiko e señal tabata, i kon nan a interpret’é.

Klaru ku no ta na Áfrika so tin superstishon. Na China i na e repúblikanan ku tabata forma parti di eks-Union Soviétiko, apesar ku e pueblo tin hopi aña ta biba ku ateismo komo nan kreensia ofisial, tòg lo bo keda strañá kuantu hende ainda a keda ku nan superstishonnan. Den mundu oksidental hopi hende ta lesa nan horoskop, tin miedu ora dia 13 kai riba un djabièrnè, i ta evitá pushi pretu. Algun pueblo ku ta biba serka di polo norte ta kere ku aurora borealis (un fenómeno di lus den shelu ku ta sosodé prinsipalmente rònt di polo norte) ta un señal di guera i pèst. Na India, AIDS ta ser plamá dor di koredónan di trùk ku ta kere ku nan tin ku tene relashon seksual riba dianan di hopi kalor pa tene nan kurpa fresku. Na Hapon, kobadónan di tùnel ta kere ku si un hende muhé drenta un tùnel promé ku e ta kla, e ta trese mala suerte. Den deporte profeshonal tambe tin hopi superstishon. Un hungadó di fòli asta a kere ku ta dor ku el a bisti mea pretu na lugá di mea blanku, su tim a gana vários wega tras di otro. Asina nos lo por sigui.

Kiko di abo? Bo tin un miedu sekreto ku bo no por splika? Tin un ‘kreensia, pensamentu òf kustumber ku ta afektá bo, maske no ta parse di tin niun splikashon lógiko p’e’? Ta asina un sierto ensiklopedia ta definí e palabra “superstishon.” Pues, bo kontesta por ta signifikativo.

Un hende ku ta laga superstishon afektá su desishonnan i su rutina di tur dia ta laga algu ku e no ta komprendé muchu bon kontrolá su bida. Ta sabí pa laga esei sosodé? Nos mester laga algu inkomprendibel i kisas asta malbado asina kontrolá nos? Kiko superstishon ta: Djis un ko’i kèns, òf un posibel peliger?