Pregunta di Lektor

Abel tabata sa ku e mester a hasi un sakrifisio di bestia pa e haña Dios su aprobashon?

E relato bíbliko ku ta konta kon Kain ku Abel a hasi nan ofrenda ta masha kòrtiku. Na Génesis 4:3-5 nos ta lesa: “A sosodé ku den kurso di tempu Kain a hiba un ofrenda di fruta di e tera pa SEÑOR. Anto Abel, di su parti, tambe a hiba for di e proménan ku a nase di su krio di bestia chikitu i di nan vèt. I SEÑOR a apresiá Abel i su ofrenda, ma Kain i su ofrenda e no a apresiá.”

Beibel no ta bisa ku promé ku e suseso aki Yehova a duna informashon spesífiko tokante sakrifisio ni tokante ki tipo di sakrifisio e ta aseptá. Pues, Kain ku Abel aparentemente a hasi nan ofrenda kompletamente di nan propio boluntat i manera nan a pensa ta bon. Nan no tabatin akseso na e Paradeis ku originalmente tabata e hogar di nan mayornan; nan a kuminsá sinti e efektonan di piká; i nan tabata separá for di Dios. Den nan kondishon pekaminoso i lamentabel, nan mester a sinti un gran nesesidat di akudí na Dios pa yudansa. E echo ku nan a ofresé Dios un regalo probablemente tabata un gesto boluntario pa nan haña Dios su aprobashon.

E resultado tabata ku Dios a aseptá Abel su ofrenda, pero di Kain nò. Dikon? Ta pasobra Abel a ofresé e kosnan korekto i Kain nò? Nos no tin sigur si e tipo di ofrenda tabatin algu di hasi ku esei, ya ku Dios no a bisa ningun di nan dos kiko tabata aseptabel i kiko nò. Probablemente tur dos tipo tabata aseptabel. Bou di e Lei ku despues di tempu Yehova a duna e nashon di Israel, sakrifisionan aseptabel no a konsistí solamente di bestia òf di partinan di bestia, sino tambe di grano di roster, bohí di maishi, hariña fini, produktonan hòrná i biña. (Levítiko 6:19-23; 7:11-13; 23:10-13) Evidentemente, no ta solamente loke e sakrifisionan di Kain ku Abel a kontené a pone Dios aseptá un i rechasá e otro.—Kompará ku Isaías 1:11; Ámos 5:22.

Siglonan despues, apòstel Pablo a deklará: “Pa medio di fe Abel a ofresé na Dios un mihó sakrifisio ku Kain, dor di kual el a optené e testimonio ku e tabata hustu, ora Dios a duna testimonio di su regalonan.” (Hebreonan 11:4) Pues, tabata debí na Abel su fe ku Dios a rekonos’é komo un persona hustu. Pero fe den kiko? Fe den Yehova su promesa ku lo e perkurá e Simia ku lo ‘heridá kabes di e kolebra’ i restorá e pas i perfekshon ku humanidat a disfrutá di dje na prinsipio. Kisas ta e deklarashon ku e Simia lo ser ‘heridá na su hilchi’ a pone Abel rasoná ku un sakrifisio ku a enserá dramamentu di sanger tabata nesesario. (Génesis 3:15) Sin embargo, echo ta ku ta Abel su ekspreshon di fe a hasi su sakrifisio ‘un mihó sakrifisio ku di Kain.’

Asina tambe, Kain no a ser rechasá pasobra el a ofresé e tipo di sakrifisio robes, sino pasobra e no tabatin fe. I su akshonnan a mustra esei. Yehova a bisa Kain bon kla: “Si bo hasi bon, lo bo no wòrdu aseptá?” (Génesis 4:7) Dios no a rechasá Kain pasobra e tabata malkontentu ku su ofrenda. Mas bien, Dios a rechasá Kain “pasobra su obranan tabata malu,” obranan marká pa yalusí, odio i finalmente asesinato.—1 Huan 3:12.