Abo Lo Mantené Bo Integridat?

KUANTU mòfi a muri ayera? Niun hende no sa, i probablemente masha tiki hende lo ta interesá pa sa; ta masha hopi para tin. Sin embargo, Yehova sí ta interesá. Refiriendo na e paranan aki aparentemente insignifikante, Hesus a bisa su disipelnan: “Ni un di nan lo no kai na suela si no ta e boluntat di boso Tata.” Anto el a agregá: “No tene miedu; boso bal mas ku un kantidat di mòfi.”—Mateo 10:29, 31.

Despues e disipelnan a komprendé mas mihó kuantu balor nan tabatin pa Yehova. Un di nan, apòstel Huan, a skirbi: “Pa medio di esaki e amor di Dios a wòrdu manifestá den nos, ku Dios a manda su Yu unigénito den mundu pa nos por a biba pa medio di dje.” (1 Huan 4:9) Yehova no solamente a perkurá e reskate, sino tambe a sigurá kada un di su sirbidónan: “Nunka lo mi no bandoná bo, i nunka lo mi no laga bo desampará.”—Hebreonan 13:5.

Ta bisto anto ku e amor ku Yehova tin pa su pueblo ta firme. Pero, ta surgi e pregunta: ‘Nos ta asina pegá na Yehova ku nunka nos lo bandon’é?’

Satanas Ta Purba Kibra Nos Integridat

Ora Yehova a hala Satanas su atenshon na Job su bida di integridat, Satanas a kontestá: “Akaso Job no tin motibu pa respetá Dios?” (Job 1:9, Beibel na papiamentu koriente) El a insinuá ku hende lo keda leal na Dios tanten ku esei ta kumbiní nan. Si esaki ta bèrdat, anto tur kristian lo kibra nan integridat na Dios ora nan haña nan ku un tentashon sufisiente grandi.

Den Job su kaso, Satanas na promé instante a pretendé ku si Job pèrdè su propiedatnan mas stimá, lo e no keda leal na Dios. (Job 1:10, 11) Ora a resultá ku e kalumnia aki tabata falsu, Satanas a alegá: “Un hende ta dispuesto na sakrifiká tur kos kon tal di salba su bida.” (Job 2:4, BPK) Ounke loke Satanas a bisa ta bèrdat den kaso di algun hende, Job sí a nenga di kibra su integridat. E registro históriko ta konfirmá esaki. (Job 27:5; 42:10-17) Abo su lealtat ta meskos ku di Job? Òf lo bo laga Satanas kibra bo integridat? Pensa riba bo mes segun ku nos ta eksaminá algun bèrdat ku ta toka tur kristian.

Segun apòstel Pablo, berdadero lealtat kristian por ta masha fuerte. El a skirbi: “Mi ta konvensí ku ni morto, ni bida, . . . ni kosnan presente, ni kosnan futuro, . . . ni ningun otro kos kreá, lo por separá nos for di e amor di Dios ku ta den Kristu Hesus nos Señor.” (Romanonan 8:38, 39) Nos por tin mesun konvikshon si nos amor pa Yehova ta fuerte. Un amor asina ta un laso fuerte ku ni morto no por vense.

Si nos tin un relashon asina ku Dios, nunka nos lo puntra: ‘Aki un par di aña, lo mi ta  sirbiendo Yehova ainda?’ E insiguridat ei ta indiká ku nos lealtat na Dios ta dependé di loke lo por sosodé ku nos den transkurso di nos bida. Berdadero integridat no ta ser afektá dor di sirkunstansianan eksterno. E ta dependé di ki klase di persona nos ta di paden. (2 Korintionan 4:16-18) Si nos stima Yehova ku henter nos kurason, nunka nos lo lag’é na kaya.—Mateo 22:37; 1 Korintionan 13:8.

Sin embargo, nos tin ku kòrda ku Satanas konstantemente ta buska manera pa kibra nos integridat. Kisas e ta purba tenta nos pa entregá na deseonan di karni òf na preshon di nos pareunan, òf pa laga kualkier sorto di kontratempu òf difikultat pone nos bandoná e bèrdat. E mundu separá for di Dios ta Satanas su aliado prinsipal den e atake aki, ounke nos propio imperfekshonnan ta hasi Satanas su tarea mas fásil. (Romanonan 7:19, 20; 1 Huan 2:16) Pero na otro banda, nos tin vários bentaha den e bataya aki, i un di esnan prinsipal ta ku Satanas su trikinan no ta deskonosí pa nos.—2 Korintionan 2:11.

Kiko ta Satanas su trikinan? Pablo ta deskribí nan den su karta na e efesionan komo “trampanan,” òf “plannan engañoso.” (Efesionan 6:11; BPK) Satanas ta pone trampa astuto den nos kaminda pa kibra nos integridat. Afortunadamente, nos por rekonosé e plannan engañoso aki, ya ku e Palabra di Dios ta deskribí e métodonan ku Diabel ta usa. Satanas su intentonan pa kaba ku e integridat di Hesus i di Job ta ilustrá algun di e maneranan ku e ta buska pa kibra nos integridat kristian.

Satanas No Por A Kibra Hesus Su Integridat

Na prinsipio di Hesus su ministerio, Satanas tabatin e tribilidat di tenta e Yu di Dios dor di ret’é pa kombertí un piedra den pan. Esta tramposo! Hesus tabatin 40 dia sin kome, i sin duda e tabatin hopi hamber. (Lukas 4:2, 3) Satanas tabata kier pa Hesus satisfasé su deseo natural mesora, na un manera kontrali na e boluntat di Yehova. Awe ta meskos. Mundu su propaganda ta persuadí nos pa satisfasé nos deseonan mesora, sin pensa mashá riba e konsekuensianan. E mensahe ta: ‘Bo meresé esei awor,’ òf simplemente: ‘Dal bai numa!’

Si Hesus a satisfasé su hamber sin pensa riba e konsekuensianan, Satanas lo a logra su meta di laga Hesus kibra su integridat. Pero Hesus tabata wak kon pa agradá Yehova, i el a kontestá firmemente: “Ta pará skirbí: ‘Hende lo no biba di pan so.’”—Lukas 4:4; Mateo 4:4.

E ora ei Satanas a kambia di táktika. El a sita un teksto for di e Skritura (for di kua Hesus mes a kaba di sita), i a dun’é un aplikashon robes. Diabel a invitá Hesus pa benta su kurpa for di e punta mas haltu di tèmpel. Segun Satanas: ‘Un angel lo warda bo.’ Hesus no tabatin intenshon di eksigí protekshon milagroso for di su Tata djis pa hala atenshon na su mes. Hesus a bis’é: “No tenta SEÑOR bo Dios.”—Mateo 4:5-7; Lukas 4:9-12.

 E último táktika ku Satanas a usa tabata mas direkto. El a purba sera un dil ku Hesus dor di ofres’é henter e mundu i su gloria a kambio di un solo akto di adorashon. Esei tabata kasi tur loke Satanas tabatin pa ofresé. Pero kon Hesus por a hasi un akto di adorashon dilanti e enemigu prinsipal di su Tata? Hamas di su bida! Hesus a kontestá: “Señor, bo Dios, so bo mester adorá i t’e so bo mester sirbi.”—Mateo 4:8-11, BPK; Lukas 4:5-8.

Despues ku e tres intentonan ei di Satanas a frakasá, el “a lag’é pa un tempu.” (Lukas 4:13) Esaki ta indiká ku konstantemente Satanas tabata buska un chèns pa tèst Hesus su integridat. Un bon oportunidat a presentá un dos aña i mei despues ora Hesus a kuminsá prepará su disipelnan pa su morto binidero. Apòstel Pedro a bisa: “Dios libra, Señor! Esaki nunka lo no sosodé ku bo.”—Mateo 16:21, 22.

Hesus lo a bai tras di tal konseho bon intenshoná pero ekiboká, djis pasobra el a bini di un di su disipelnan? Hesus mesora a rekonosé ku e palabranan ei a reflehá e deseo di Satanas, no di Yehova. Kristu a respondé ku firmesa: “Kita for di mi dilanti, Satanas! Bo ta un piedra di trompeká pa mi; pasobra bo no tin bo pensamentu riba e kosnan di Dios, sino riba esnan di hende.”—Mateo 16:23.

Debí na Hesus su amor konstante pa Yehova, Satanas no por a kibra su integridat. Nada ku Diabel por a ofresé, niun prueba ni maske kon severo, por a debilitá Hesus su lealtat na su Tata selestial. Nos lo ta mesun determiná ora nos ta den sirkunstansianan ku ta hasié difísil pa nos mantené nos integridat? E ehèmpel di Job lo yuda nos komprendé e desafionan ku nos lo por konfrontá.

Lealtat Ora Nos Ta Konfrontá Kontratempu

Manera Job a deskubrí, un ora pa otro nos tur por haña nos ku kontratempu òf kalamidat. Job tabata un hòmber felismente kasá ku dies yu i tabatin un estilo di bida sano ku a tene kuenta ku asuntunan spiritual. (Job 1:5) Pero sin ku Job tabata sa, su integridat na Dios a bira un kontroversia den e korte selestial, i Satanas a buska tur manera pa kibra su integridat.

Rápidamente, Job a pèrdè su rikesa material. (Job 1:14-17) Apesar di esei Job su integridat a wanta e prueba pasobra nunka el a pone su konfiansa den plaka. Kòrdando e tempu ku e tabata riku, Job a bisa: “Si mi a pone mi konfiansa den oro, . . . si mi a gaba, pasobra mi rikesa tabata grandi, . . . esaki tambe lo tabata un inikidat ku mester a wòrdu husgá, pasobra lo mi a nenga e Dios aya riba.”—Job 31:24, 25, 28.

Awe tambe ta posibel pa nos pèrdè kasi tur kos di un dia pa otro. Un komersiante Testigu di Yehova a ser estafá di un suma masha grandi di plaka, kedando kasi plan barí. E ta atmití frankamente: “M’a hera di haña un atake di kurason. De echo, mi ta kere ku si no tabata pa mi relashon ku Dios, lo mi a haña un ataka. Sin embargo, e eksperensia aki a pone mi realisá ku balornan spiritual no tabata na promé lugá den mi bida. E sensashon di gana hopi plaka tabatin tendensia di tapa tur otro kos.” Djei padilanti e Testigu aki a redusí su aktividat di negoshi na un mínimo, i e ta sirbi regularmente komo un pionero ousiliar, dedikando 50 ora òf mas pa luna den e sirbishi kristian. Sin embargo, tin otro problema ku ta asta mas devastador ku pèrdè bo propiedatnan material.

Apénas Job a kaba di bin bei di e notisia ku el a pèrdè tur su rikesa, ku ata nan ta bin bis’é ku su dies yunan a muri. Pero tòg el a insistí: “Bendishoná sea e nòmber di SEÑOR.” (Job 1:18-21) Nos lo mantené nos integridat si diripiente nos pèrdè vários miembro di nos famia? Francisco, un superintendente kristian na Spaña, a pèrdè su dos yunan den un aksidente trágiko di bus. El a haña konsuelo dor di hala mas serka di Yehova i oumentá su aktividat den e sirbishi kristian.

 Asta despues di e shòk di a pèrdè su yunan, Job su kalvario no a kaba. Satanas a dal e ku un malesa repugnante i doloroso. Na e momentu ei, Job a risibí mal konseho di su esposa. El a bisa Job: “Maldishoná Dios i muri!” Job no a hasi kaso di su konseho, i e no “a peka ku su lepnan.” (Job 2:9, 10) Job su integridat no a dependé di e apoyo di su famia, sino di su relashon personal ku Yehova.

Flora, kende su esposo i yu mayó a bandoná e kaminda kristian mas ku dies aña pasá, ta komprendé kon Job lo mester a sinti. E ta atmití: “Ora ku diripiente bo pèrdè e apoyo di bo famia, esei por ta troumátiko. Pero mi tabata sa ku lo mi no a haña felisidat pafó di Yehova su organisashon. P’esei mi a para firme i a pone Yehova na promé lugá miéntras ku mi a hasi esfuerso pa sigui ser un bon esposa i mama. Mi tabata hasi orashon konstantemente, i Yehova a fortalesé mi. Mi ta un persona felis pasobra, apesar di mi kasá su oposishon fuerte, mi a siña dependé kompletamente riba Yehova.”

Satanas su siguiente triki pa kibra Job su integridat a enbolbé tres di su kompañeronan. (Job 2:11-13) Lo mester tabata hopi doloroso p’e ora nan a kuminsá kritik’é. Si el a aseptá nan argumentunan, lo el a pèrdè konfiansa den Yehova Dios. Nan konseho desanimante lo por a kibra su moral i su integridat, i asina Satanas su triki lo a logra su meta.

Pero en bes di esei, Job a insistí: “Te na mi morto lo mi no bandoná mi integridat.” (Job 27:5) E no a bisa: ‘Lo mi no laga boso kibra mi integridat!’ Job tabata sa ku su integridat a dependé di e mes i di su amor pa Yehova.

Un Triki Bieu pa Kapturá Víktima Nobo

Te ainda Satanas ta usa mal konseho òf komentarionan ku ta reflehá falta di konsiderashon di parti di amigunan i rumannan den fe. Desanimashon ku ta bini di paden di e kongregashon por debilitá nos moral mas fásilmente ku persekushon ku ta bini di pafó di e kongregashon. Un ansiano kristian ku ántes a bringa den guera komo sòldá, a kompará e kombate den guera ku e doló ku el a sufri debí na palabra- i akshonnan di algun ruman kristian ku a reflehá un falta di konsiderashon. El a bisa di e komportashon di e rumannan: “Ta e kos di mas difísil ku mi a yega di pasa aden.”

For di un otro ángulo, nos lo por ta asina rabiá ku e imperfekshonnan di nos rumannan den fe ku nos ta stòp di papia ku algun di nan òf asta ta kuminsá falta reunionnan kristian. N’e momentu ei ta parse ku e kuestion mas importante ta pa aliviá nos doló. Pero lo ta masha lamentabel si nos wak e asuntu asina i permití nos poseshon di mas presioso—nos relashon ku Yehova—ser debilitá dor di loke otro hende ta bisa òf hasi. Si nos permití esei sosodé, nos lo ta birando víktima di un di Satanas su trikinan masha bieu.

Klaro ku nos ta spera normanan haltu den e kongregashon kristian. Pero si nos ta ferwagt mas di loke ta rasonabel for di nos rumannan ku ainda ta imperfekto, nos sigur lo keda desapuntá. Na kontraste, Yehova ta realístiko den loke e ta ferwagt di su sirbidónan. Si nos imitá su ehèmpel, nos lo ta prepará pa soportá nan imperfekshonnan. (Efesionan 4:2, 32) Apòstel Pablo a duna e konseho aki: “Boso por rabia sí, ma no peka ora boso rabia ni no bai drumi rabiá. No duna diabel niun chèns!”—Efesionan 4:26, 27, BPK.

Manera Beibel ta mustra bon kla, Satanas ta usa un variedat grandi di triki pa buska manera di kibra un kristian su integridat. Algun di su trikinan ta atraé e karni pekaminoso, otronan ta kousa doló. Pero for di loke nos a kaba di konsiderá, bo por mira dikon nunka e no mester gara bo for di base. Ku bo amor pa Dios firme den bo kurason, sea desididu pa proba ku Diabel ta un mentiroso i hasi Yehova su kurason kontentu. (Proverbionan 27:11; Huan 8:44) Kòrda, no laga niun prueba ku bini riba nos, pa kiko ku esei por ta, kibra nos integridat komo kristian berdadero.