Bo Ta Kòrda?

Bo a disfrutá di e edishonnan resien di E Toren di Vigilansia? Wèl, wak si bo por kontestá e siguiente preguntanan:

• Kiko ta empatia, i dikon kristiannan mester kultiv’é?

Empatia ta e abilidat di pone nos mes den sapatu di un otro hende, por ehèmpel, dor di sinti e doló ku un otro persona ta sinti. Beibel ta konsehá kristiannan pa mustra ‘kompashon ku otro, stima manera ruman, i sea miserikòrdioso.’ (1 Pedro 3:8) Yehova a duna nos un ehèmpel di mustra empatia pa asina nos por imit’é. (Salmo 103:14; Zakarías 2:8) Nos por bira mas atento pa mustra empatia na otro hende dor di skucha, opservá i usa nos imaginashon.—15/4, página 24-6.

• Pa haña berdadero felisidat, dikon kurashon spiritual mester bini promé ku e solushon final di tur desabilidat físiko?

Hopi hende físikamente sano ta infelis, yen di problema. Na kontraste, hopi kristian ku awe tin desabilidat físiko ta sirbi Yehova masha felis di nan. Esnan ku benefisiá di kurashon spiritual tin e chèns di eksperensiá eliminashon di tur desabilidat físiko den e mundu nobo.—1/5, página 6-7.

• Dikon Hebreonan 12:16 ta pone Esau den mesun kategoria ku un hende inmoral?

E relato bíbliko ta mustra ku Esau a desplegá un mentalidat ku a konsentrá riba rekompensa inmediato i un falta di apresio pa kos sagrado. Si awe un hende permití e tipo di mentalidat ei desaroyá den dje, esaki lo por hiba na piká serio, manera inmoralidat seksual.—1/5, página 10-11.

• Ken Tertuliano tabata, i pa kiko e ta famoso?

E tabata un eskritor i teólogo ku a biba den siglo 2 i 3 di nos era. E ta famoso pa e kantidat di obranan literario ku el a skirbi na defensa di kristianismo pa nòmber. Segun ku e tabata duna su defensa, el a introdusí ideanan i konseptonan filosófiko ku a pone e base pa doktrinanan robes manera Trinidat.—15/5, página 29-31.

• Dikon genétika no ta kompletamente responsabel pa malesa, komportashon i morto di hende?

Sientífikonan a konkluí ku aparentemente tin un kousa genétiko pa vários malesa humano, i tin ta kere ku nos komportashon ta ser determiná dor di nos genenan. Sin embargo, Beibel ta duna nos un bista di hende su orígen, inkluso kon bini humanidat ta sufri di piká i imperfekshon. Ounke nos genenan kisas ta hunga un papel den forma nos personalidat, nos imperfekshon i nos ambiente tambe tin un gran influensia.—1/6, página 9-11.

• Kon un fragmento di papiro ku nan a haña na Oxyrhynchus, Egipto, ta aklará e uso di e nòmber di Dios?

E fragmento aki di Job 42:11 i 12 di e vershon griego Septuaginta ta kontené e Tetragramaton (e kuater lèternan hebreo di e nòmber di Dios). Esaki ta mas prueba ku e nòmber di Dios na hebreo a aparesé den e Septuaginta, e tradukshon di Beibel for di kua e eskritornan di e Skritura Griego Kristian a sita hopi bes.—1/6, página 30.

• E espektákulonan violento i mortal di gladiadó di e Imperio Romano a ser kompará ku kua deportenan moderno ku hende ta gusta wak?

Un ekshibishon resien den e Koliseo di Roma, Italia, a mustra ku tin paralelo moderno. Eseinan a bira bisto den e vários vidio clipnan di pelea di toro, bòkseo profeshonal, kareda di outo i motosaikel, i disturbio bou di fanátikonan ku ta lanta kontra otro na otro eventonan deportivo moderno. E promé kristiannan a tuma na pechu ku Yehova no stima violensia ni hende violento, i p’esei kristiannan djawe tampoko no mester stima nan. (Salmo 11:5)—15/6, página 29.

• Segun ku nos ta hasi esfuerso pa bira maestronan efikas, kiko nos por siña for di e ehèmpel di Èsdras?

Èsdras 7:10 ta enfatisá kuater kos ku Èsdras a hasi, kosnan ku nos por hasi esfuerso pa imitá. E teksto ta bisa: “Esdras a [1] dediká su kurason [2] pa studia e lei di SEÑOR i [3] pa pon’é na práktika, i [4] pa siña e hendenan di Israel su statutonan i ordenansanan.”—1/7, página 20.

• Den ki dos situashon ta apropiá pa un hende muhé kristian mara òf tapa su kabes?

Unu ta den situashonnan ku ta surgi na kas. Ora e mara su kabes e ta mustra ku e ta rekonosé ku su esposo ta responsabel pa hiba delantera den hasi orashon i duna instrukshon bíbliko. E otro ta den aktividatnan di kongregashon, kaminda e ta mustra ku e ta rekonosé ku ta hende hòmber batisá tin e outorisashon bíbliko pa siña i dirigí. (1 Korintionan 11:3-10)—15/7, página 26-7.

• Dikon kristiannan ta rekonosé ku yoga ta enserá mas ku simplemente ehersisio i ku e ta peligroso?

E meta di yoga komo disiplina ta pa yuda un persona uni ku un spiritu sobrehumano. Kontrario na Dios su instrukshon, yoga ta enserá para tur pensamentu spontáneo. (Romanonan 12:1, 2) Yoga por eksponé un persona na e peligernan di spiritismo i kosnan sobrenatural. (Deuteronomio 18:10, 11)—1/8, página 20-2.