“Boso Sa Dikon Mi A Trese Boso Plaka Bèk?”

‘MI TIN ègt hopi mester di poko plaka!’ Nana tabata pensa. E ta un mama soltero di tres yu hòmber i ta biba na Kaspi, Repúblika di Georgia. Un mainta su soño a bira realidat. El a haña 300 lari (ku ta ekivalente na 270 florin antiano) den besindario di warda di polis. No tabatin niun hende eibanda. Esaki tabata un suma hopi grandi di plaka. De echo, for di sinku aña pasá ku lari a bira e moneda nashonal, nunka Nana a yega di mira un papel di 100 lari. Komersiantenan lokal por traha añanan largu sin gana e suma ei.

‘Kiko mi ta hasi ku e plaka aki, si pa su motibu mi pèrdè mi fe, mi temor pa Dios i mi spiritualidat?’ Nana a pensa. El a kultivá e kualidatnan kristian ei, i asta a perseverá ora el a ser persiguí i batí kruelmente pa motibu di su fe.

Ora Nana tabata kana bai e warda di polis, el a mira sinku polis ta buska algu desesperadamente. El a komprendé ku ta e plaka nan tabata buska, p’esei el a bai serka nan i a puntra nan: “Boso a pèrdè algu?”

“Sí, sèn,” nan a kontestá.

“Kuantu?”

“Treshen lari!”

“M’a haña boso plaka,” Nana a bisa nan. Anto el a puntra nan: “Boso sa dikon mi a trese boso plaka bèk?” Nan no tabata sa.

“Pasobra mi ta un Testigu di Yehova. Si mi no tabata un Testigu, lo mi no a trese boso plaka bèk.”

E hefe di polis ku a pèrdè e plaka a duna Nana 20 lari komo rekompensa pa su kondukta onesto.

Masha lihé hende den henter e distrito di Kaspi a tende loke a pasa. E siguiente dia, un señora ku ta hasi limpiesa saliendo for di e warda di polis a bisa Nana: “[E hefe] semper sa tin boso literatura den su ofisina. Probablemente lo e bai apresiá boso literatura asta mas tantu.” Un agente polisial asta a bisa: “Si tur hende tabata Testigu di Yehova, ta ken lo a kometé krímen?”