Felis Ku Nan A Siña Lesa!

NA ALGUN parti di Islanan Sálomon, kasi 80 porshento di esnan ku awor ta Testigu di Yehova tabatin ku lucha kontra analfabetismo. E problema ei tabata stroba nan di partisipá mas tantu na nan reunionnan semanal di kongregashon, i dor di esei mes tambe tabata mas difísil pa nan kompartí e bèrdat di Reino ku otronan. Di bèrdat ta posibel pa hende grandi ku nunka a yega di tene un pòtlot den nan man siña lesa?

Kasi tur kongregashon di Testigunan di Yehova na Islanan Sálomon a duna lès di lesa i skirbi usando e foyeto Apliká Bo Mes na Lesamentu i Skirbimentu, publiká dor di Testigunan di Yehova. E siguiente ehèmpelnan ta mustra kon e programa aki a yuda sentenáres di hende mehorá nan nivel di abilidat. I mas importante ainda, awor ku nan a siña lesa nan por duna testimonio mas mihó tokante nan fe.—1 Pedro 3:15.

Un misionero asigná pa traha ku un kongregashon ku mas di shen publikadó di Reino a nota ku mayoria di esnan presente na e studio bíbliko di E Toren di Vigilansia no tabatin un ehemplar personal dje revista, i kasi niun hende no tabata duna komentario. Dikon? Dor di analfabetismo. Ora e kongregashon a anunsiá ku lo tene un skol pa siña lesa i skirbi, e misionero a ofresé su mes gustosamente pa sirbi komo maestra. Promé, ta un par di studiante so a bini, pero pronto mas ku 40 hende di tur edat a kuminsá asistí.

Kiko tabata e resultado? E misionero ta konta: “Djis un poko tempu despues ku e skol a kuminsá, mi a bai marshe seis or di mainta pa kumpra kuminda pa e kas di misionero, i mi a topa un par dje studiantenan, asta mucha, ta bende koko i bèrdura. Pakiko? Pasobra nan tabata kier tin sèn pa kumpra pèn ku skref pa usa den e skol di lesamentu! Ademas, esnan  ku a partisipá den e skol a haña un motibu pa buska nan propio ehemplar di E Toren di Vigilansia.” E misionero ta sigui konta: “Awor, durante e Studio di Toren di Vigilansia ku e kongregashon, tur hende, grandi i chikí, ta partisipá, i e konsiderashon tin bida.” Un kos ku a hasi e misionero hopi kontentu ta ku kuater miembro dje klas a pidi pa nan sali den e trabou di prediká, pasobra nan a bisa ku nan “no tin miedu mas.”

Ademas di siña lesa i skirbi, e studiantenan tabatin mas efekto positivo tambe. Por ehèmpel, pa hopi aña e esposa inkrédulo di un Testigu tabata preokupá e kongregashon. E tabata tira hende ku piedra pa delaster un kos chikitu, i asta el a yega di ataká otro hende muhé ku pida palu. E biahanan ku e tabata bai e reunionnan kristian ku su kasá, e tabata hasi asina tantu yalurs ku e esposo a disidí di kuminsá usa brel di solo skur pa su kasá no akus’é di ta wak otro hende muhé.

Pero poko tempu despues ku e lèsnan a kuminsá, e señora a puntra pokopoko: “Mi tin mag di djòin e klas?” E kontesta tabata sí. For dje dia ei e no a faya ni un lès ni un reunion di kongregashon. El a traha duru pa siña lesa, i su adelanto tabata impreshonante. El a keda masha kontentu. E siguiente kos ku el a pidi tabata: “Mi tin mag di studia Beibel?” Gustosamente su kasá a kuminsá studia kuné, i e ta sigui progresá den su abilidat di lesa i skirbi i den su konosementu di Beibel.

Pa un hende di 50 aña ku nunka a yega di mishi ku un pòtlot, djis tene un pèn den su man i forma e lèternan di alfabèt por ta un opstákulo mes grandi ku un seru. Tin di nan ta saka blar na nan dede dor dje manera ku nan ta primi e pòtlot riba e papel den e promé tempunan ku nan ta siñando. Despues di vários siman luchando pa siña tene e pòtlot i kontrol’é, algun di nan ta grita ku un smail: “Mi por move mi man suave riba e papel!” E instruktornan tambe ta keda kontentu di mira e studiantenan progresá. Un di nan a bisa: “Dirigí un dje klasnan aki ta un gran goso, i hopi bes na final di un lès e studiantenan ta ekspresá nan apresio sinsero pa e perkurashon aki di Yehova ku aplouso.”

E Testigunan ku awor por lesa tambe ta alegrá huntu ku e misioneronan. Pakiko? Pasobra awor nan por usa nan abilidat di lesa i skirbi pa onra Yehova.

[Plachinan na página 8, 9]

Grandi i chikí ta apresiá e klasnan pa siña lesa i skirbi