Kon Abilidat di Pensa Por Protehá Bo?

OLANAN haltu ta un bista bunita i impreshonante, pero pa marinero nan ta nifiká peliger. E awanan haltu ei por kosta nan nan bida.

Den un manera similar, sirbidónan di Dios kisas ta haña nan kada bes ku mas preshon ku ta menasá di hundi nan. Podisé bo a ripará ku ola tras ola di prueba i tentashon ta baha pisá riba kristiannan. Ta sigur ku bo kier kontrarestá nan na un manera desididu, ya ku bo kier evitá di noufragá den sentido spiritual. (1 Timoteo 1:19) Abilidat di pensa ta un parti importante di bo defensa. Kiko e ta, i kon nos ta hañ’é?

E palabra hebreo tradusí komo “abilidat di pensa,” mezim·máh, ta bini for di un palabra básiko ku ta nifiká “planea òf traha kòmplòt.” (Proverbionan 1:4, NW) Pues, algun vershon di Beibel ta tradusí mezim·máh komo “prudensia,” “diskreshon” òf “pre-vishon.” Eruditonan bíbliko Jamieson, Fausset i Brown ta deskribí mezim·máh komo un “koutela ku ta yuda bo skapa di maldat, i haña kos bon.” Esaki kier men ku nos ta tene kuenta ku e konsekuensia ku nos akshonnan por tin riba término kòrtiku i tambe término largu. Si nos tin abilidat di pensa, nos lo konsiderá kuidadosamente ki alternativanan nos tin promé ku nos aktua, spesialmente ora di tuma desishonnan importante.

Ora un hende ku abilidat di pensa ta bai tuma desishon relashoná ku futuro òf ku su situashon aktual, e ta analisá promé kua ta e posibel peligernan òf trampanan ku tin. Una bes el a identifiká e posibel peligernan, e ta planea kon e por evitá nan, teniendo kuenta ku e influensia di su ambiente i amistatnan. Di e manera ei e por traha un plan di akshon ku lo trese bon resultado, podisé asta Dios su bendishon. Laga nos konsiderá algun ehèmpel práktiko pa ilustrá e proseso aki.

Evitá e Trampa di Inmoralidat Seksual

Ora un boto ta nabegá kontra bientu fuerte, e ta topa ku ola grandi kontra dje. Si e marineronan no kòrta e olanan kontrali bon, e boto por bòltu.

Nos ta konfrontá un situashon similar, ya ku nos ta biba den un mundu opseshoná ku sèks. Tur dia, olanan di idea- i imágennan sensual ta bin riba nos. Nos no por ignorá e efekto ku nan por tin riba nos deseonan seksual normal. Nos tin ku usa nos abilidat di pensa i konfrontá e tentashon na un manera desididu en bes di djis drif bai den situashonnan peligroso.

Por ehèmpel, hende hòmber kristian hopi bes ta traha huntu ku otro hòmbernan ku tin masha tiki rèspèt pa hende muhé i ku ta konsiderá hende muhé simplemente komo un opheto seksual. Tur nan kòmbersashonnan ta kaba na chistenan opseno i den dòbel sentido. E ambiente aki ku tempu lo por hinka ideanan inmoral den mente di un kristian.

 Un muhé kristian kisas tambe tin ku traha pafó di kas i pues por hañ’é ku difikultat. Podisé e ta traha huntu ku hende hòmber i hende muhé ku no tin mesun normanan moral kuné. Talbes un di su koleganan maskulino ta mustra interes den dje. Na prinsipio, kisas e hòmber ta trat’é lif, i asta ta respet’é pa su punto di bista religioso. E hòmber su atenshon persistente i e echo ku tur ora nan ta huntu lo por lanta den e ruman muhé kristian un deseo pa un amistat mas íntimo.

Komo kristian, kon abilidat di pensa òf diskreshon por yuda nos den sirkunstansianan asina? Promé, e por spièrta nos kontra e peligernan spiritual, i di dos, e por motivá nos pa planea e manera korekto pa aktua. (Proverbionan 3:21-23) Den kasonan manera esnan menshoná aki, nos tin ku laga nos koleganan komprendé bon kla ku nos normanan ta diferente debí na nos kreensianan basá riba Beibel. (1 Korintionan 6:18) Nos abla i kondukta por konfirmá esaki. Fuera di esei, kisas nos lo tin ku limitá nos trato ku sierto koleganan.

Pero situashonnan ku por hiba na inmoralidat no ta limitá na nos lugá di trabou. Nan por surgi tambe ora un pareha kasá permití problema debilitá nan union. Un sirbidó biahero a komentá: “Un matrimonio no ta kibra diripiente. E pareha pokopoko ta habri for di otro emoshonalmente. Kasi nan no ta papia ku otro ni pasa tempu huntu. Kisas nan ta bai kore tras di kosnan material pa yena e bashí den nan matrimonio. I komo ku kasi nan no ta duna otro kòmplimènt, nan por sinti nan atraí na otro personanan di sekso opuesto.”

E ruman eksperensiá aki a sigui bisa: “Periódikamente, parehanan kasá tin ku tuma tempu pa papia tokante nan matrimonio pa wak si tin algu ta dañando nan relashon ku otro. Nan mester planea kon nan por studia, hasi orashon i prediká huntu. Nan lo benefisiá mashá si nan papia ku otro ‘den kas, riba kaminda, ora nan ta bai drumi i ora nan lanta,’ meskos ku mayornan i yunan ta hasi.”—Deuteronomio 6:7-9.

Kon pa Trata ku Komportashon Ku No Ta Kristian

Fuera di yuda nos konfrontá tentashonnan moral ku éksito, abilidat di pensa por yuda nos trata tambe ku problema ku nos rumannan kristian. Ora bientu ta supla den direkshon ku e boto ta nabegá, esei ta produsí ola ku ta push’é dilanti. E olanan ei por hisa e parti patras di e boto i mand’é di banda. Esaki ta pone ku e ora ei e olanan ta bin dal den banda di e boto ku e posibilidat di daña e boto.

Nos tambe por ta kore riesgo ku ta bini for di un direkshon inesperá. Nos ta sirbi Yehova “den ún akuerdo” huntu ku hopi rumannan kristian fiel. (Sofonías 3:9) Si un di nan ta aktua den un manera ku no ta kristian, esei por parse manera un abusu di konfiansa i por kousa nos hopi sufrimentu. Kon abilidat di pensa lo por prevení nos di bira desbalansá i sinti nos demasiado ofendí?

Kòrda ku “no tin ningun hende ku no ta peka.” (1 Reinan 8:46) P’esei nos no mester keda sorprendí ku de bes en kuando un ruman kristian ta iritá nos òf ofendé nos. Sabiendo esaki, nos por prepará pa algu asina i meditá riba e manera ku nos lo mester reakshoná. Kon apòstel Pablo a reakshoná ora algun di su rumannan kristian a papia malu di dje i ku menospresio? En bes di pèrdè su balansa spiritual, el a konkluí ku tabata hopi mas importante pa gana Yehova su aprobashon ku esun di hende. (2 Korintionan 10:10-18) Si nos tin un aktitut asina esei lo evitá ku nos ta reakshoná muchu purá ora un hende hasi nos algu.

Ta kasi meskos ku ora bo dal bo dede. Ora esaki sosodé, nos ta pasa un par di minüt sin por pensa kla. Pero despues ku e doló fria, nos por rasoná i aktua normal atrobe. Wèl, asina tambe nos no mester reakshoná mesora riba un remarke òf akshon ku no ta bondadoso. Mas bien, para un ratu i pensa riba e konsekuensianan di un represaya deskabeyá.

Malcolm, un misionero di hopi aña, ta splika kiko e ta hasi ora e sintié ofendí. “Mi promé stap ta pa pasa dor di un lista di pregunta: Mi ta  rabiá ku e ruman aki pasobra nos personalidatnan ta kompletamente diferente? Loke el a bisa ta realmente importante? Ta e echo ku mi ta sufri di malaria tin un efekto riba mi nervionan i ta hasi mi mas krepchi? Lo mi tin un otro opinion di e asuntu despues di un par di ora?” Manera Malcolm a deskubrí, hopi bes e desakuerdo no ta importante i por ser pasá por haltu. *

Malcolm ta agregá: “De bes en kuando, apesar di tur mi esfuersonan pa resolvé un situashon, e otro ruman no ta keda ku un aktitut amigabel. Mi ta purba pa no laga esaki molestiá mi. Una bes mi a hasi tur loke mi por, mi ta wak e asuntu den un otro manera. Mentalmente mi ta pone e asuntu un banda komo algu ku lo ser resolvé di mes segun tempu ta pasa en bes di algu ku ami mester resolvé personalmente. Lo mi no laga e kos ei perhudiká mi spiritualmente ni afektá mi relashon ku Yehova ni ku mi rumannan.”

Meskos ku Malcolm, nos no mester laga e mal komportashon di un persona molestiá nos di mas. Den tur kongregashon tin hopi ruman dushi i fiel. Ta un plaser pa kana den e kaminda kristian “huntu” ku nan. (Filipensenan 1:27) Un kos mas ku por yuda nos wak e asuntu den un perspektiva korekto ta di kòrda ku nos tin e apoyo amoroso di nos Tata selestial.—Salmo 23:1-3; Proverbionan 5:1, 2; 8:12.

No Stima e Kosnan di Mundu

Abilidat di pensa por yuda nos konfrontá un otro preshon sutil. Tin biaha bientu ta manda e olanan den banda di e boto. Ora wer ta normal, e olanan ei pokopoko por desviá e barku for di su rumbo. Pero durante un tormenta, ola biniendo di banda por pone e boto bòltu.

 Asina tambe, si nos entregá na e preshon pa gosa di tur loke e mundu malbado tin di ofresé, e estilo di bida materialista aki por desviá nos for di nos rumbo den sentido spiritual. (2 Timoteo 4:10) Si nos no frena nos amor pa mundu, esei ku tempu por pone nos bandoná nos rumbo kristian kompletamente. (1 Huan 2:15) Kon abilidat di pensa por yuda nos ku esaki?

Na promé lugá, lo e yuda nos kalkulá kiko presis ta e peligernan ku nos por konfrontá. Mundu ta usa tur triki imaginabel pa tenta nos pa kumpra su kosnan. Konstantemente e ta promové henter un pakete ku supuestamente tur hende mester tin: e estilo di bida di hende riku, di hende fasinante i atraktivo i di hende aparentemente “eksitoso.” (1 Huan 2:16) Propaganda ta primintí nos e atmirashon i aprobashon di tur hende, foral di nos pareunan i bisiñanan. Abilidat di pensa lo yuda nos kontrarestá e propaganda aki. Lo e kòrda nos di e importansia di keda “liber di amor pa plaka,” ya ku Yehova a primintí ku ‘nunka lo e no bandoná nos.’—Hebreonan 13:5.

Na di dos lugá, abilidat di pensa lo prevení nos di sigui esnan ku a “desviá for di e bèrdat.” (2 Timoteo 2:18) Ta masha difísil pa kontradisí hende ku nos tabata gusta i konfia. (1 Korintionan 15:12, 32-34) Asta si ta na un grado masha limitá nos ta ser influensiá dor di esnan ku a bandoná e rumbo kristian, esei lo por stroba nos progreso spiritual i ku tempu hinka nos den peliger. Nos lo ta meskos ku un barku ku a desviá solamente ún grado for di su rumbo korekto. Riba un biahe largu, e desviashon chikitu ei por pone e barku keda sin yega su destinu.—Hebreonan 3:12.

Abilidat di pensa por yuda nos sa presis den ki kondishon spiritual nos ta awor i den ki kondishon nos lo ta probablemente den futuro. Kisas nos ta rekonosé ku nos mester partisipá mas plenamente den aktividatnan kristian. (Hebreonan 6:11, 12) Tende kon un Testigu hóben a usa su abilidat di pensa pa yud’é sigui metanan spiritual: “Mi tabatin e chèns di haña un karera den periodismo. Esaki a atraé mi mashá, pero mi a kòrda riba e versíkulo den Beibel ku ta bisa ku ‘e mundu ta pasa bai,’ miéntras ku ‘esun ku hasi e boluntat di Dios ta permanesé pa semper.’ (1 Huan 2:17) Mi a rasoná ku e manera ku mi ta biba mester reflehá loke mi ta kere. Mi mayornan a bandoná e fe kristian, i mi no kier a sigui nan ehèmpel. P’esei mi a disidí di hiba un bida ku un propósito i a inskribí den e trabou di tempu kompleto komo pionero regular. Despues di kuater aña yen di satisfakshon, mi ta konvensí ku mi a tuma e desishon korekto.”

Kon pa Konfrontá Tormenta Spiritual ku Éksito

Dikon ta urgente pa nos usa nos abilidat di pensa awe? Marineronan mester ta alerta pa señalnan di peliger, spesialmente ora forma un tormenta. Si wer bira friu lihé i bientu lanta, nan ta tapa i mara tur kos i prepará pa lo pió. Di un manera similar, nos tin ku prepará pa preshonnan di gran intensidat segun ku e mal sistema aki ta aserká su fin. Mundu su norma- i balornan moral ta desintegrá, i ‘hendenan malbado ta bai di malu pa pió.’ (2 Timoteo 3:13) Meskos ku marineronan ta skucha pronóstikonan di tempu ku regularidat, asina tambe nos tin ku hasi kaso di e spièrtamentunan profétiko di e Palabra inspirá di Dios.—Salmo 19:7-11.

Ora nos ta usa abilidat di pensa, nos ta apliká e konosementu ku ta hiba na bida eterno. (Huan 17:3) Nos por antisipá problema i disidí kon pa superá nan. Di e manera ei nos lo prepará nos mes firmemente pa nos no ser desviá for di e rumbo kristian, i nos por pone “un bon fundeshi pa futuro” dor di fiha metanan spiritual i purba alkansá nan.—1 Timoteo 6:19.

Si nos mantené sabiduria práktiko i abilidat di pensa, nos lo no tin nodi “tene miedu di desaster inesperá.” (Proverbionan 3:21, 25, 26) Mas bien nos por haña konsuelo den Dios su promesa: “Pasobra sabiduria lo bin den bo kurason, i konosementu lo ta agradabel na bo alma. Diskreshon [“abilidat di pensa,” NW] lo warda bo.”—Proverbionan 2:10, 11.

[Nota]

[Plachi na página 23]

Komunikashon regular ta fortifiká un matrimonio