“Mi A Duna Boso un Ehèmpel”

“Pa e tempu aki ya boso mester tabata maestronan kaba.”—HEBREONAN 5:12.

1. Dikon ta natural pa e palabranan na Hebreonan 5:12 pone un kristian preokupá un tiki?

BO TA preokupá un tiki tokante bo mes ora bo lesa e palabranan inspirá dje teksto prinsipal di nos lès? Si ta asina, bo no ta bo so. Komo siguidó di Kristu, nos sa ku nos mester ta maestro. (Mateo 28:19, 20) Nos sa ku e tempu ku nos ta biba aden ta pone ku ta urgente pa nos siña hende lo mihó ku nos por. I nos sa ku loke nos siña nan por asta nifiká bida òf morto! (1 Timoteo 4:16) P’esei, ta natural pa nos puntra nos mes: ‘Mi ta un maestro manera lo mi mester ta? Kon mi por bira un mihó maestro?’

2, 3. (a) Kon un maestro a splika kiko ta nesesario pa instruí hende bon? (b) Ki ehèmpel Hesus a laga atras pa nos relashoná ku siñamentu?

² Pero e preokupashon ei no tin nodi desanimá nos. Si nos ta pensa ku nos abilidat di instruí hende ta dependé di sierto téknikanan ku nos mester siña, kisas en bèrdat nos lo por desanimá ora nos pensa ku nos tin ku bira mihó maestro. Pero pa nos siña hende bon, nos tin mester di algu muchu mas importante ku téknika. Wak kiko un maestro ku eksperensia a skirbi den un buki riba e tema aki: “Ku bo ta instruí hende bon òf nò, no ta dependé di e téknika ni e estilo ku bo usa, ni di bo plannan ni di loke bo hasi. . . . Siña hende tin di haber na promé lugá ku amor.” Klaro ku e maestro aki no a papia for di un punto di bista religioso. Sin embargo, loke e ta bisa por konta asta mas tantu pa e tipo di siñamentu ku nos komo kristiannan ta duna. Dikon?

³ Nos Ehèmpel di un maestro ta nada ménos ku Hesukristu, kende a bisa su siguidónan: “Mi a duna boso un ehèmpel.” (Huan 13:15) Ei e tabata papiando dje ehèmpel di humildat ku el a duna. Pero definitivamente, e trabou prinsipal ku el a hasi komo hende riba tera, esta, e trabou di siña hende e bon nobo dje Reino di Dios, tambe a forma parti dje ehèmpel ku Hesus a laga atras pa nos. (Lukas 4:43) Awor, si bo mester skohe un solo palabra pa deskribí e ministerio di Hesus, kasi sigur lo bo skohe e palabra “amor,” no ta asina? (Kolosensenan 1:15; 1 Huan 4:8) E amor ku Hesus tabatin pa su Tata selestial Yehova tabata na promé lugá. (Huan 14:31) Pero komo maestro, Hesus a mustra amor den dos otro manera mas. El a stima e bèrdatnan ku e tabata siña, i el a stima e hendenan ku e tabata siña. Laga nos konsentrá un tiki mas riba e dos aspektonan aki dje ehèmpel ku el a laga pa nos.

Un Amor for di Hopi Tempu pa e Bèrdatnan di Dios

4. Kon Hesus a desaroyá amor pa e siñansanan di Yehova?

⁴ E aktitut ku un maestro tin tokante e tema ku e ta siña por tin hopi influensia riba e kalidat  di su siñamentu. Si e ta indiferente, asta djis un tiki so, kasi sigur su alumnonan lo nota esei, i nan tambe lo bira indiferente. Hesus no a sinti niun tiki indiferensia pa e bèrdatnan presioso ku el a siña hende tokante Yehova i Su Reino. Hesus a sinti un amor profundo pa e tema ku e tabata siña hende. E amor ei a desaroyá for di tempu ku e mes a siña e bèrdatnan ei komo alumno. Durante tur e míles di añanan ku e Yu unigénito a eksistí promé ku el a bira un ser humano, semper e tabata ansioso pa siña. Isaías 50:4 i 5 ta kontené e palabranan apropiá aki: “Señor DIOS a duna mi un lenga ku a wòrdu siñá, pa mi sa kon pa sostené ku palabra esun ku ta kansá. E ta spièrta mi mainta tras mainta; e ta spièrta mi orea pa tende manera un ku ta wòrdu siñá. Señor DIOS a habri mi orea; mi no tabata desobedesido, ni mi no a hala atras.”

5, 6. (a) Aparentemente, kiko Hesus a eksperimentá ora el a batisá, i ki efekto esei tabatin riba dje? (b) Ki diferensia skèrpi tin den e manera ku Hesus a usa e Palabra di Dios, i e manera ku Satanas a us’é?

⁵ Tempu ku e tabata krese komo ser humano riba tera, Hesus a sigui stima e sabiduria di Dios. (Lukas 2:52) Despues, na su boutismo, el a eksperimentá algu úniko. Segun Lukas 3:21, “shelu a habri.” Parse ku ta n’e momentu ei Hesus a rekuperá memoria di su eksistensia promé ku el a bini na tera komo hende. Despues el a pasa 40 dia ta yuna den desierto. Lo e mester a disfrutá mashá di meditá riba tur e biahanan ku Yehova a instruyé den shelu. Pero djis despues di esei su amor pa e bèrdatnan di Dios a ser poné na prueba.

⁶ Ora Hesus tabata kansá i hambrá, Satanas a buska moda di hink’é den tentashon. Wak ki un diferensia grandi tabatin entre e dos yunan di Dios ei! Tur dos a sita e Skritura Hebreo, pero kada un ku un aktitut kompletamente diferente. Satanas a trose e Palabra di Dios. Sin niun tiki rèspèt, el a us’é pa su propio metanan egoista. Tur loke e rebelde ei a sinti pa e bèrdatnan di Dios ta despresio. Di otro banda, ora Hesus a sita e Skritura, su amor p’e a keda bisto. El a usa e Palabra di Dios kuidadosamente kada bes ku el a duna kontesta. Hesus a eksistí hopi promé ku e palabranan inspirá ei a ser skirbí pa di promé bes, i sin embargo el a respetá nan profundamente. Nan tabata bèrdatnan presioso di su Tata selestial! El a bisa Satanas ku Yehova su palabranan tabata asta mas importante ku kuminda. (Mateo 4:1-11) Sí, Hesus a stima tur e bèrdatnan ku Yehova a siñ’é. Pero kon el a mustra e amor ei den su trabou komo maestro?

Amor pa e Bèrdatnan Ku El A Siña Hende

7. Dikon Hesus no a inventá su propio siñansanan?

⁷ Semper e amor ku Hesus tabatin pa loke el a siña hende tabata bisto. Nos tin ku kòrda ku, kon ku bai bin, lo e por a bini ku algun idea propio. E tabatin masha hopi konosementu i sabiduria. (Kolosensenan 2:3) Sin embargo, el a keda kòrda su skuchadónan kada bes ku loke e tabata siña nan no a bini di dje mes, sino di su Tata selestial. (Huan 7:16; 8:28; 12:49; 14:10) E tabata stima Dios su bèrdatnan muchu hopi pa e pone su propio ideanan na nan lugá.

8. Kon Hesus a duna un ehèmpel for di komienso di su ministerio pa nos dependé riba e Palabra di Dios?

⁸ For di ora ku Hesus a kuminsá ku su ministerio públiko el a pone un ehèmpel. Nota kon el a deklará na e pueblo di Dios pa di promé bes ku é ta e Mesias primintí. Kiko el a hasi? El a djis blo dilanti un multitut, proklamá ku e ta Kristu, anto hasi milager espektakular pa proba nan loke el a bisa? Nò. El a bai snoa, kaminda e pueblo di Dios tabatin kustumber di lesa e Skritura. Ei el a lesa e profesia na Isaías 61:1 i 2 na bos haltu, i a splika nan ku e bèrdatnan profétiko aki a kumpli riba dje. (Lukas 4:16-22) E kantidat di milager ku el a efektuá a yuda proba ku e tabatin Yehova su apoyo. Pero semper ta riba e Palabra di Dios el a dependé den su siñamentu.

9. Kon Hesus a mustra amor leal pa e Palabra di Dios den e manera ku el a trata ku e fariseonan?

⁹ Ora opositornan religioso a reta Hesus, e no a bai pusta ku nan pa wak ken ta mas sabí, maske lo e mester por a gana nan fásilmente den un kompetensia asina. En bes di esei el a laga e Palabra di Dios mustra ku nan tabata robes. Kòrda  por ehèmpel loke a sosodé ora e fariseonan a akusá e siguidónan di Hesus di violá e lei di sabat dor ku nan a piki un par di tapushi di grano i kome nan na kaminda. Hesus a kontestá nan: “Boso no a lesa kiko David a hasi ora ku é ku esnan ku tabata huntu kuné a haña hamber?” (Mateo 12:1-5) Klaro ku e hòmbernan ei, hustu den nan mes bista, lo mester a lesa e relato inspirá ei na 1 Samuel 21:1-6. Pero maske nan a les’é, nan a keda sin kapta un lès importante ku e relato a kontené. Hesus sí no a djis lesa e relato. El a meditá riba dje i a tuma su mensahe na pechu. El a stima e prinsipionan ku Yehova a duna den e parti ei dje Skritura. Pues, el a usa e relato ei i tambe un ehèmpel for dje Lei di Moises pa revelá ku e spiritu dje Lei ta rasonabel. I Hesus su amor leal a motiv’é tambe pa defendé e Palabra di Dios kontra tur esfuerso di lidernan religioso pa tros’é i us’é pa nan propio metanan, òf pa tap’é bou di un seru di tradishon humano.

10. Kon Hesus a kumpli ku e profesianan tokante e manera ekselente ku e Mesias lo a siña?

¹⁰ Dor di e amor ku Hesus tabatin pa e tema di su siñansa, nunka e no a siña hende na un manera laf ni steif. Profesianan inspirá a duna di komprendé ku lo tin ‘grasia riba lep’ dje Mesias, i ku lo e papia “palabranan bunita.” (Salmo 45:2; Génesis 49:21) Hesus a kumpli ku e profesianan ei dor di presentá su mensahe na un manera interesante i bibu, usando “palabranan agradabel” pa siña e bèrdatnan ku el a stima asina tantu. (Lukas 4:22) Sin duda, bo por a mira su entusiasmo den su kara, i su wowonan lo a bria ku interes bibu den loke e tabata siñando. Lo mester tabata masha dushi pa skuch’é, i esei ta un ekselente ehèmpel pa nos imitá ora di papia ku otro hende tokante loke nos a siña!

11. Dikon nunka Hesus su abilidat komo maestro no a pon’é bira arogante?

¹¹ Hesus a bira arogante dor dje komprendementu inmenso ku e tabatin di bèrdatnan di Dios, i e bon abilidat ku e tabatin di papia? Esei ta loke ta sosodé hopi bes ku maestronan humano. Pero tene na mente ku Hesus tabatin un sabiduria ku a reflehá temor di Dios. E tipo di sabiduria ei no ta duna bo chèns di bira orguyoso, pasobra “sabiduria ta serka e humildenan.” (Proverbionan 11:2) I tabatin algu mas ku no a laga Hesus bira ni orguyoso ni arogante.

Hesus A Stima e Hendenan Ku El A Siña

12. Kon Hesus a mustra ku e no tabata kier pa su siguidónan tin miedu di dje?

¹² Semper e amor profundo ku Hesus tabatin pa hende a keda bisto ora el a siña nan. Nunka Hesus su manera di siña no a laga hende sinti nan inferior, manera sa ta e kaso ku hende orguyoso. (Eklesiástes 8:9) Despues ku Pedro a mira un dje milagernan di Hesus, el a keda asina pasmá ku el a tira su kurpa abou na pia di Hesus. Pero Hesus no tabata kier pa su siguidónan tin miedu di dje. Bondadosamente el a bisa Pedro: “No tene miedu,” i despues el a kont’é tokante e trabou emoshonante di hasi disipel ku Pedro tabata bai tuma parti den dje. (Lukas 5:8-10) Hesus tabata kier pa su disipelnan ser motivá dor di nan propio amor pa e bèrdatnan presioso tokante Dios, i no dor ku nan tin miedu di nan instruktor.

13, 14. Den ki maneranan Hesus a demostrá empatia pa hende?

¹³ E amor ku Hesus tabatin p’e pueblo ku el a siña a keda bisto tambe dor ku e tabatin empatia,  esta, ku el a sinti pa nan. “Ora ku el a mira e multitutnan, el a sinti kompashon pa nan, pasobra nan tabata kansá i plamá, manera karné sin wardadó.” (Mateo 9:36) El a sinti duele dje situashon tristu ku nan tabata aden, i a sintié motivá pa yuda nan.

¹⁴ Ripará kon Hesus a mustra empatia na un otro okashon. Ora un hende muhé ku un fluho di sanger a bai serka dje den un multitut i mishi ku rant di su paña, el a kura milagrosamente. Hesus a sinti poder sali for di dje, pero e no a mira ta ken a kura. El a insistí pa sa ta ken e muhé ta. Pakiko? No pa kritik’é pasobra el a kibra e Lei òf e reglanan dje eskribanan i e fariseonan, manera kisas e señora tabata teme. Mas bien, el a bis’é: “Mi yu, bo fe a salba bo; bai na pas i sea kurá di bo aflikshon.” (Marko 5:25-34) Wak kuantu empatia el a mustra den su palabranan. E no a djis bis’é: “Sea kurá.” El a bis’é: “Sea kurá di bo aflikshon.” E palabra ku Marko a usa aki pa “aflikshon” por nifiká literalmente “sota,” un sistema di zuip hende ku nan tabata usa komo tortura. Asina Hesus a rekonosé ku e señora su enfermedat a pon’é sufri hopi, kisas asta di doló físiko i emoshonal fuerte. Hesus a sinti p’e.

15, 16. Ki insidentenan den Hesus su ministerio ta mustra ku el a enfoká riba hende su bon kualidatnan?

¹⁵ Un otro manera ku Hesus a mustra ku el a stima hende ta dor di konsentrá riba nan bon kualidatnan. Wak kiko a pasa ora el a topa Nataniel, ku despues a bira apòstel. “Hesus a mira Nataniel ta bin serka dje i a bisa di dje: ‘Ata un berdadero israelita, den kende no tin mentira!’” Hesus a wak milagrosamente den Nataniel su kurason, i a haña sa hopi kos tokante dje. Klaro ku Nataniel no tabata perfekto. E tabatin su faltanan meskos ku nos tur. De echo, ora nan a papi’é di Hesus el a hasi un komentario basta brutu: “Por sali algu bon for di Názarèt?” (Huan 1:45-51) Sin embargo, di tur e kosnan ku Hesus por a bisa tokante Nataniel, el a skohe pa enfoká riba algu positivo: ku e tabata un hòmber onesto.

¹⁶ Meskos, ora un ofisial di ehérsito, ku kisas tabata un romano pagano, a yega serka i pidi Hesus pa kura su esklabo enfermo, Hesus tabata sa ku e sòldá ei tabatin su faltanan. Un ofisial di ehérsito dje tempu ei mester tabatin yen di akto violento, dramamentu di sanger i adorashon falsu den su pasado. Tòg Hesus a enfoká riba algu bon: e hòmber su fe tabata remarkabel. (Mateo 8:5-13) Despues, ora Hesus a papia ku e malechor kologá riba e staka di tormento banda di dje, na lugá di zundra e hòmber pa su pasado komo kriminal, Hesus a anim’é ku un speransa pa futuro. (Lukas 23:43) Hesus tabata sa bon-bon ku si bo adoptá un aktitut negativo i krítiko tokante hende, ta desanimá so bo por desanimá nan. Sin duda, su esfuerso pa mira bon kualidat den hende a animá hopi hende pa bira asta mihó persona.

Dispuesto pa Sirbi Hende

17, 18. Kon e echo ku Hesus a aseptá e enkargo pa bini na tera a mustra ku e tabata dispuesto pa sirbi hende?

¹⁷ Otro evidensia fuerte dje amor ku Hesus tabatin pa e hendenan ku el a siña ta ku e tabata dispuesto pa sirbi nan. Promé ku e Yu di Dios a bini na tera komo hende, semper el a sinti kariño pa humanidat. (Proverbionan 8:30, 31) Komo Yehova su “Palabra” òf bosero, kisas el a yega di atendé ku hende na vários okashon.  (Huan 1:1) Pero el a “bandoná su mes gloria, tumando forma di un sirbidó” entre otro ku e meta di por instruí humanidat na un manera mas direkto. Sí, el a bai laga su puesto den shelu. (Filipensenan 2:7; 2 Korintionan 8:9) Tempu Hesus tabata riba tera e no a spera pa hende kana su tras pa sirbié. Al kontrario, el a bisa: “E Yu di hende no a bin pa wòrdu sirbí, ma pa sirbi, i pa duna su bida komo preis di reskate pa hopi.” (Mateo 20:28) Hesus a kumpli ku e palabranan ei den tur sentido.

¹⁸ Humildemente Hesus a traha pa satisfasé nesesidat di esnan ku el a instruí, i a gasta su mes gustosamente na nan fabor. El a biaha na pia bai-bin dor dje Tera Primintí, kanando sientos di kilometer den su giranan di predikashon, den un esfuerso pa alkansá mas tantu hende posibel. Hesus a keda humilde i aserkabel, no manera e fariseonan i eskribanan orguyoso. Tur sorto di hende, dignatario, sòldá, abogado, hende muhé, mucha, hende pober, hende malu i asta hende ku sosiedat a rechasá, tabata aserk’é ku entusiasmo i sin miedu. Maske Hesus tabata perfekto, ta hende e tabata, i e tabata kansa i sinti hamber. Pero asta ora e tabata kansá, òf tabatin mester di sosiegu òf un ratu ketu pa hasi orashon, e tabata pone nesesidat di otronan promé ku di su mes.—Marko 1:35-39.

19. Kon Hesus tabata un ehèmpel den trata su disipelnan ku humildat, pasenshi i bondat?

¹⁹ Hesus tabata mes dispuesto pa sirbi su propio disipelnan tambe. El a hasi esei dor di instruí nan ku bondat i ku pasenshi. Maske nan a tarda pa kapta sentido di algun lès hopi importante, e no a entregá, ni pèrdè pasenshi, ni papia malu ku nan. El a keda buska mas manera pa laga nan komprendé loke e kier a bisa nan. Por ehèmpel, djis pensa kuantu biaha e disipelnan a pleita tokante kua di nan tabata esun mas grandi. Bes tras bes, i asta riba e anochi promé ku su ehekushon, Hesus a keda buska maneranan nobo pa siña nan trata otro ku humildat. Den e asuntu di humildat, meskos ku den tur otro kos, Hesus tabatin tur bon motibu pa bisa nan: “Mi a duna boso un ehèmpel.”—Huan 13:5-15; Mateo 20:25; Marko 9:34-37.

20. Den ki sentido Hesus su método di siña hende tabata diferente for dje fariseonan, i dikon e método ei tabata efikas?

²⁰ Paga tinu ku Hesus no a djis bisa e disipelnan e ehèmpel; el a ‘duna nan un ehèmpel.’ El a siña nan dor di ser un ehèmpel pa nan. E no a asumí un aktitut di superioridat i papia ku nan komo hende inferior, komo si fuera e sí no tabatin nodi hasi e kosnan ku e tabata manda nan hasi. Esei ta loke e fariseonan tabata hasi. Hesus a bisa ku “nan ta papia, ma nan no ta hasi.” (Mateo 23:3) Humildemente Hesus a mustra su alumnonan eksaktamente ta kiko su siñansanan kier men dor di hasi nan, dor di pone nan na práktika. P’esei, ora el a bisa su siguidónan pa nan hiba un bida simpel sin muchu komplikashon materialista, nan no tabatin nodi spekulá ta kiko e tabata kier men. Nan por a mira su palabranan komo un realidat: “Zoro tin kueba i para di shelu tin nèshi, ma e Yu di hende no tin ningun lugá pa pone su kabes.” (Mateo 8:20) Hesus a sirbi su disipelnan humildemente dor di pone un ehèmpel pa nan.

21. Kiko nos lo trata den nos siguiente artíkulo?

²¹ Definitivamente, Hesus tabata e Maestro di mas grandi ku mundu a yega di konosé! E amor ku e tabatin pa e kosnan ku el a siña i e amor ku e tabatin pa e hendenan ku el a siña tabata bisto pa tur hende sinsero ku a mir’é i tend’é. I nos awendia ku ta studia e ehèmpel ku el a laga atras tambe ta mira e amor ei bon kla. Pero kon nos por imitá e ehèmpel perfekto di Kristu? E siguiente artíkulo lo trata e pregunta ei.

Kon Lo Bo Kontestá?

• Kiko ta e kos di mas importante pa nos por siña hende bon? I ken tabata un ehèmpel di esei?

• Den ki maneranan Hesus a mustra ku el a stima e bèrdatnan ku e tabata siña hende?

• Kon Hesus a mustra ku el a stima e hendenan ku e tabata siña?

• Kua ta algun ehèmpel ku ta mustra nos ku Hesus tabata humildemente dispuesto pa sirbi esnan ku el a siña?

[Preguntanan di Estudio]

[Plachi na página 12]

Kon Hesus a mustra ku el a stima e prinsipionan den e Palabra di Dios?