Mundu Su Manera Trosí di Mira Lealtat

UN DJABIÈRNÈ anochi na Tel Aviv, Israel, un mucha hòmber a djòin un grupo di hóben ku tabata warda pafó di un klup nokturno. Un ratu despues un eksploshon teribel a bula e grupo for di otro.

Dje manera ei, otro atakante suisida a entregá su bida, i kita bida di 19 otro hóben violentamente. Despues un asistente médiko a bisa reporteronan: “Tabatin parti di kurpa plamá tur kaminda. Tur tabata hóben; asina yòn. Ta e esena di mas horibel ku mi a yega di mira.”

Thurstan Brewin a skirbi den The Lancet ku “ta nèt e kualidatnan ku hende ta atmirá, manera por ehèmpel lealtat . . . , por yuda guera kuminsá, i pone ku ta mas difísil pa para nan.” Sí, henter historia humano ta manchá ku matansanan sangriento kometé den nòmber di lealtat: e krusadanan di kristiandat òf e masakrenan organisá di Alemania nazi ta djis dos ehèmpel.

Mas i Mas Víktima di Deslealtat

Niun hende no por nenga ku lealtat fanátiko por ta destruktivo, pero falta di lealtat tambe por kousa sosiedat hopi daño. Segun un dikshonario, ser leal ta nifiká ser fiel na un persona òf un kousa, i esei ta enserá ku bo no ta bandoná bo posishon ni traishoná bo kousa apesar di tentashon. Ounke mayoria hende ta bisa ku nan ta atmirá hende leal asina, tin un gran falta di lealtat den sosiedat humano asta na e nivel di mas básiko: den famia. Sifranan di divorsio a subi drástikamente komo resultado dje énfasis ku hende ta pone riba satisfakshon personal, e strès i ansiedat di bida diario, i e infieldat seksual ku a bira asina komun. I meskos ku tabata e kaso ku e eksploshon di bòm na Tel Aviv, hopi bes ta hóbennan ta e víktimanan inosente.

Segun un estudio: “Hopi bes, edukashon di mucha ta ser perhudiká dor di e instabilidat familiar ku divorsio, separashon i kriansa dor di un solo mayor ta trese kuné.” Prinsipalmente mucha hòmber ku ta biba serka nan mama so tin chèns di kai atras na skol, kometé suisidio òf kai den krímen hubenil. Kada aña, un mion mucha na Merka tin ku pasa den divorsio di nan mayornan, i mitar di tur mucha den e pais ei ku nase den un matrimonio tin hopi chèns di bira víktima di divorsio promé ku nan kumpli 18 aña. Sifranan ta mustra ku e situashon ta mes tristu pa hopi hóben na otro parti di mundu.

Lealtat—Un Norma Muchu Haltu?

E manera ku e sentido di lealtat tradishonal ta disparsé aktualmente ta pone e palabranan  di Rei David parse mas apropiado ku nunka: “Yuda, SEÑOR, pasobra no tin hende deboto [“leal,” NW] mas; pasobra e fielnan ta disparsé for di meimei di e yunan di hende.” (Salmo 12:1) Kiko ta okashoná e falta di lealtat ku nos ta mira tur kaminda? Roger Rosenblatt a skirbi e siguiente komentario den e revista Time: “Lealtat ta un norma hopi bunita, pero den naturalesa di hende tin simplemente muchu hopi temor, falta di konfiansa propio, oportunismo i ambishon pa bo spera pa nos komo hende suak por kumpli ku un norma asina.” Den un deskripshon dje tempu ku nos ta biba aden, Beibel ta hasi un deklarashon masha franko: “Hende lo ta stimadó di nan mes . . . impio [“desleal,” NW], sin amor.”—2 Timoteo 3:1-5.

Ya ku lealtat òf falta di lealtat tin un influensia asina grandi riba loke hende ta pensa i hasi, nos lo por puntra nos mes: ‘Ken realmente ta meresé nos lealtat?’ Wak kiko e siguiente artíkulo tin di bisa riba e pregunta aki.

[Rekonosementu pa Potrèt na página 3]

Potrèt ariba: © AFP/CORBIS