Na Ken Bo Mester Ta Leal?

“Nos patria: . . . Mare semper e tin rason; pero ku òf sin rason, nos patria e ta keda.”—Stephen Decatur, ofisial di marina merikano, 1779-1820.

HOPI hende ta haña ku lealtat inkondishonal na nan pais ta nan obligashon di mas sagrado. Otronan lo adaptá e palabranan di Stephen Decatur i bisa: ‘Mi religion, mare semper e tin rason; pero ku òf sin rason, mi religion e ta keda.’

Si nos ta realístiko, ta e lugá kaminda nos a nase ta determiná kua pais òf religion ta eksigí nos lealtat. Pero ken nos mester ta leal na dje ta un asuntu muchu importante pa nos lag’é den man di kasualidat. Sin embargo, kuestioná e ideanan ku nos a lanta kuné tokante ken òf kiko nos mester ta leal na dje ta algu ku ta eksigí kurashi, i e por ta un reto.

Un Tèst di Lealtat

Un señora ku a krese na Zambia ta bisa: “For di mucha mi ta un hende religioso. Orashon tur dia dilanti e altar di mi famia, selebrashon di dianan religioso i baimentu di tèmpel regularmente  tabata parti di mi kriansa. Mi religion i mi adorashon tabata parti di mi kultura, di mi komunidat i di mi bida di famia.”

Sin embargo, komo adolesente el a kuminsá studia Beibel ku Testigunan di Yehova, i poko tempu despues el a disidí di kambia di religion. E kos aki tabata un akto di deslealtat?

Zlatko a krese na Bosnia, i el a bringa temporalmente den e konflikto ku su pais tabata aden. E tambe a kuminsá studia Beibel ku Testigunan di Yehova. Awor e no ta dispuesto di lanta arma kontra niun hende. Ta desleal e ta?

E manera ku bo ta kontestá e preguntanan aki ta dependé di bo punto di bista. E señora ku nos a menshoná anteriormente ta bisa: “Den mi komunidat, kambia di religion tabata un kos imperdonabel. Nan a mir’é komo un akto di deslealtat i un traishon kontra bo famia i bo komunidat.” Zlatko su èks-kompañeronan militar tambe tabata haña ku ken ku no kier bringa na nan banda ta un traidor. Pero tantu e señora ei komo Zlatko ta haña ku ta un lealtat superior a motivá nan akshon: lealtat na Dios. Ta importante pa nos sa kon Dios ta mira esnan ku kier ta leal na dje.

Berdadero Lealtat —Un Ekspreshon di Amor

Rei David a bisa Yehova Dios: “Ku un persona leal lo bo aktua den lealtat.” (2 Samuel 22:26, NW) E palabra hebreo tradusí aki komo “lealtat” ta transmití e idea di bondat motivá dor di amor ku ta pega na algu òf na un hende te ora e kumpli ku su propósito pa e kos òf e hende ei. Yehova ta pega su mes amorosamente na esnan ku ta leal na dje, manera un mama ku su yu na pechu. Yehova a bisa su sirbidónan leal na Israel di antigwedat: “Un muhé por lubidá su yu ku e ta kria na pechu, i no tene kompashon ku e yu di su mondongo? Esakinan por lubidá, ma ami sí lo no lubidá bo.” (Isaías 49:15) Esnan ku ta dispuesto di pone lealtat na Dios promé ku tur otro kos por ta sigur ku lo e kuida nan ku amor.

Nos ta leal na Yehova debí ku nos ta stim’é. E amor ei ta motivá un hende pa stima loke Yehova ta stima, i odia e kosnan malbado ku Yehova ta odia. (Salmo 97:10) Ya ku Yehova su kualidat prinsipal ta amor, lealtat na Dios ta yuda un hende pa e no trata otronan ku falta di amor. (1 Huan 4:8) Pues, si lealtat na Dios ta motivá un hende pa kambia di kreensia religioso, esei no kier men ku e no ta stima su famia mas.

Lealtat na Dios —Un Influensia Positivo

Asin’akí e señora di Zambia ku nos a menshoná ariba ta splika dikon el a kambia di religion: “Dor di studia Beibel mi a bin konosé Yehova komo e úniko Dios berdadero, i mi a desaroyá un relashon personal kuné. Yehova ta diferente for di tur e diosnan ku mi tabata adorá. E ta perfektamente balansá den su amor, hustisia, sabiduria i poder. Ya ku Yehova ta eksigí deboshon eksklusivo, mi tabatin ku bandoná e otro diosnan.

Mi mayornan tabata bisa mi kada bes ku nan tabata hopi malkontentu ku mi, i ku mi a laga nan na kaya. Esei tabata difísil pa mi, pasobra aprobashon di mi mayornan tabata hopi importante pa mi. Pero segun ku mi a haña mas i mas konosementu dje bèrdatnan di Beibel, mi a komprendé ku ta un kos so mi por a hasi. Mi no por a bira lomba pa Yehova.

Skohe pa ta leal na Yehova en bes di na tradishonnan religioso no kier men ku mi no ta leal na mi famia. Mi ta hasi mi bèst pa mustra nan ku palabra i akshon ku mi ta komprendé kon nan ta sinti. Pero si mi no ta leal na Yehova, lo mi por stroba mi famia di siña konos’é, i esei sí lo ta un falta di lealtat.”

 Asina tambe, si pa motibu di un hende su lealtat na Dios e kier keda neutral den asuntunan polítiko i no lanta arma kontra otro hende, esei no kier men ku e ta un traidor. Zlatko ta splika su akshonnan asin’akí: “Maske mi a ser lantá supuestamente komo kristian, mi a kasa ku un hende di otro kreensia. Ora guera a kuminsá, tur dos banda a eksigí mi lealtat. Nan a obligá mi skohe na ki banda lo mi bringa. Mi a bringa den guera tres aña i mei. Ku tempu, ami ku mi kasá a hui bai Kroasia, i einan nos a topa Testigunan di Yehova.

Nos estudio di Beibel a laga nos mira ku ta na Yehova nos mester ta leal promé ku tur otro kos, i ku e kier pa nos stima nos próhimo sin importá di ki religion òf ki rasa nan ta. Awor ami ku mi kasá ta uní adorando Yehova, i mi a siña ku mi no por ta leal na Dios i bringa kontra mi próhimo.”

Lealtat Formá a Base di Konosementu Eksakto

Ya ku Yehova ta nos Kreadó, nos lealtat na dje ta mas importante ku lealtat na kualkier otro kos. (Revelashon 4:11) Sin embargo, ta konosementu eksakto tin ku forma nos lealtat na Dios pa e no daña bira un forsa fanátiko i destruktivo. Beibel ta animá nos: ‘Boso wòrdu renobá den e spiritu di boso mente, i bisti e hende nobo, ku a wòrdu kreá segun Dios den santidat [“lealtat,” NW] berdadero.’ (Efesionan 4:23, 24) E hòmber famoso ku a skirbi e palabranan inspirá ei tabatin e kurashi pa kuestioná e ideanan di lealtat ku el a ser kriá kuné. E investigashon ku el a hasi a pone ku un transformashon positivo a tuma lugá ku su personalidat.

Sí, Saulo a enfrentá un tèst di su lealtat meskos ku hopi hende den nos tempu. Saulo a lanta den e tradishonnan estrikto di su famia, i e tabata konosí pa su lealtat na e religion ku el a nase aden. Lealtat na su kousa a asta hib’é na kometé aktonan violento kontra esnan ku no tabata di akuerdo ku su punto di bista. Saulo tabata bon konosí komo un hende ku tabata invadí kas di kristiannan i lastra nan bai kuné pa risibí kastigu i asta morto.—Echonan 22:3-5; Filipensenan 3:4-6.

Pero una bes ku Saulo a haña konosementu eksakto di Beibel, el a hasi loke hopi di su pareunan lo no a ni pensa di hasi. El a kambia di religion. Saulo, ku despues a bira konosí komo apòstel Pablo, a skohe pa ta leal na Dios i no na tradishon. Lealtat na Dios basá riba konosementu eksakto a motivá Saulo pa kambia su komportashon destruktivo i fanátiko di ántes, anto bira un persona tolerante, amoroso i ku a promové loke ta bon.

Pakiko Nos Mester Ta Leal?

Si nos permití Dios su normanan forma nos sentido di lealtat, nos lo saka benefisionan bisto. Por ehèmpel, un informe di 1999 di e Instituto Oustraliano di Estudionan Relashoná ku Bida di Famia a bisa ku dos dje kosnan fundamental ku ta kontribuí na matrimonio  duradero i ku ta duna satisfakshon ta “konfiansa i fieldat . . . [i] un sentido di spiritualidat.” E mesun estudio a yega na e konklushon ku “ora un matrimonio ta stabil i ta duna satisfakshon” e hòmber- i muhénan ta mas kontentu, mas salú, i nan ta biba mas largu. Ademas, matrimonionan stabil ta duna mucha mas chèns di gosa di un bida felis.

Den e mundu insigur ku nos ta biba aden awendia, lealtat ta manera un bui salbabida mará na un barku di reskate. Si e “landadó” no ta leal na nada, ola i bientu lo bent’é p’aki i p’aya. Pero si e pone su lealtat n’e kaminda robes, ta komo si fuera e ta tene na un salbabida ku ta mará na un barku ku ta senk. Meskos ku a pasa ku Saulo, su lealtat por lastr’é hiba na un proseder destruktivo. Sin embargo, lealtat na Yehova, basá riba konosementu eksakto, ta un salbabida ku por duna nos stabilidat i hiba nos na salbashon.—Efesionan 4:13-15.

Yehova ta primintí lo siguiente na esnan ku ta leal na dje: “SEÑOR ta stima hustisia i no ta bandoná su santunan [“lealnan,” NW]. Nan ta keda preservá pa semper.” (Salmo 37:28) Pronto Yehova lo trese tur hende leal na dje den un paradeis kaminda nan lo disfrutá di libertat for di pena i doló, i lo gosa di relashonnan duradero, liber di bareranan religioso i polítiko.—Revelashon 7:9, 14; 21:3, 4.

Awor aki mes kaba, miónes di hende rònt mundu a diskubrí ku ta lealtat na Yehova so ta trese berdadero felisidat. Pakiko no laga Testigunan di Yehova yuda bo saminá bo punto di bista tokante lealtat ku yudansa dje bèrdat di Beibel? Beibel ta bisa nos: “Saminá boso mes pa wak si boso ta den e fe; saminá boso mes!”—2 Korintionan 13:5.

Nos tin mester di kurashi pa nos kuestioná nos religion i puntra nos mes dikon nos ta leal na dje, pero e rekompensa por bal e esfuerso si dor di esei bo ta hala mas serka di Yehova Dios. E señora ku nos a menshoná anteriormente ta ekspresá e sintimentunan di hopi hende ora e bisa: “Mi a siña ku ser leal na Yehova i su normanan ta yuda nos pa ta balansá den e manera ku nos ta trata ku nos famia, i nos ta bira mihó miembro di nos komunidat. Ni maske kon difísil e pruebanan ta, si nos ta leal na Yehova, semper e lo ta leal na nos.”

[Plachi na página 6]

Konosementu eksakto a motivá Saulo pa kambia loke e tabata leal na dje

[Plachi na página 7]

Pakiko no saminá loke bo ta leal na dje den lus dje bèrdat di Beibel?

[Plachinan Rekonosementu na página 4]

Churchill, ariba na man robes: potrèt di U.S. National Archives; Joseph Göbbels, te na man drechi: Library of Congress