Kon Nos Mester Konsiderá Prueba?

PRUEBA i mas prueba! Tur hende ta haña nan ku prueba. Nan por bini dor di diferensia di personalidat, difikultat ekonómiko, problema ku salú, tentashon, preshon di pareu pa hasi loke ta malu, persekushon, desafionan kontra nos posishon neutral òf dor di idolatria i hopi otro kos. Sea kual sea e prueba ku nos ta haña nos kuné, hopi bes nan ta kousa hopi ansiedat. Kon nos por trata ku nan ku éksito? E pruebanan aki ta benefisiá nos di un òf otro manera?

Nos Mihó Apoyo

Ounke Rei David di antigwedat a hañ’é ku yen di prueba den su bida, tòg el a muri fiel. Kon bin e por a wanta nan? El a señalá na e fuente di su fortalesa ora el a bisa: “SEÑOR ta mi Wardadó, lo mi no tin falta di nada.” Anto el a sigui bisa: “Maske mi kana den e vaye di sombra di morto, mi no tin miedu di maldat, pasobra abo ta ku mi; bo bara i bo garoti ta konsolá mi.” (Salmo 23:1, 4) Sí, Yehova ta un fuente di apoyo ku no ta kaba nunka. El a guia David atraves di tempunan di angustia, i e ta kla prepará pa hasi meskos pa nos ora ku esei ta nesesario.

Kon nos por haña Yehova su apoyo? Beibel ta mustra kon, ora e ta bisa: “Purba i mira ku SEÑOR ta bon.” (Salmo 34:8) Esei ta un invitashon bondadoso, pero kiko e ta enserá? E ta un animashon pa sirbi Yehova i armonisá nos bida kompletamente ku su boluntat. Un estilo di bida asina ta nifiká ku nos mester entregá un poko di nos libertat, esta, hasi sakrifisio. Den algun kaso esaki por hiba asta na prueba—persekushon i sufrimentu. Sin embargo, esnan ku di henter kurason ta aseptá Yehova su invitashon nunka lo no sinti duele ku nan a hasié. Yehova lo trata nan hopi bon. Lo e guia nan i perkurá pa nan spiritualmente. Ora nan haña nan ku prueba, lo e sostené nan mediante su Palabra, su spiritu santu i e kongregashon kristian. I ku tempu lo e rekompensá nan ku bida eterno.—Salmo 23:6; 25:9; Isaías 30:21; Romanonan 15:5.

Esnan ku ta tuma e desishon krusial aki pa sirbi Yehova i ku ta pega na nan desishon ta ripará ku Yehova ta kumpli ku tur su  promesanan. Esei tambe tabata e eksperensia di e israelitanan ku a sigui Hosué i a drenta e Tera Primintí. Una bes nan a krusa Riu Yòrdan, nan mester a wanta prueba, bringa bataya i siña lèsnan doloroso. Pero e generashon ei a resultá di ta mas fiel ku nan tatanan ku a sali for di Egipto i muri den desierto. P’esei Yehova a apoyá e personanan fiel aki, i relashoná ku nan estado na fin dje bida di Hosué, Beibel ta bisa: “SEÑOR a duna nan sosiegu na tur banda, konforme tur loke el a hura na nan tatanan . . . Ni un di e bon promesanan ku SEÑOR a hasi na e kas di Israel no a faya; tur a keda kumplí.” (Hosué 21:44, 45) Esei tambe por ta e kaso ku nos si nos dependé kompletamente riba Yehova ora nos ta bou di prueba i den tur otro sirkunstansia.

Kiko por debilitá nos konfiansa den Yehova? Hesus a señalá na un kos ora el a bisa: “Ningun hende no por sirbi dos shon . . . Boso no por sirbi Dios i Rikesa.” (Mateo 6:24) Si nos tin konfiansa den Yehova, nos lo no buska siguridat kaminda mayoria hende di mundu ta busk’é, esta, den kosnan material. Hesus a konsehá su siguidónan: “Ma buska promé e reino di Dios i Su hustisia, i tur e kosnan aki [kosnan material nesesario] lo wòrdu añadí na boso.” (Mateo 6:33) Un kristian ku tin un punto di bista balansá di kosnan material i ta pone e Reino di Dios na promé lugá den su bida ta tuma e desishon korekto. (Eklesiástes 7:12) Klaro ku lo e tin ku paga un preis pa esei. Lo e tin ku sakrifiká algun kos material. Pero lo e kosechá hopi rekompensa. I Yehova lo apoy’é.—Isaías 48:17, 18.

Loke Nos Por Siña di Prueba

Ta klaro ku e echo ku nos ta ‘purba i mira ku Yehova ta bon’ no ta protehá nos di kosnan inesperá den bida; ni e no ta protehá nos kompletamente di e atakenan di Satanas i su representantenan humano. (Eklesiástes 9:11) Komo resultado di esei, por sosodé ku e sinseridat i determinashon di un kristian ta ser poné na prueba. Dikon Yehova ta pèrmití su adoradónan pasa den e pruebanan ei? Apòstel Pedro a duna un motibu ora el a skirbi: “Pa un tempu kòrtiku, si ta nesesario, boso a wòrdu afligí pa medio di vários prueba, pa e prueba di boso fe, ku ta mas presioso ku oro ku ta peresé, ounke ku e ta wòrdu probá dor di kandela, lo por resultá den alabansa i gloria i onor ora Hesukristu wòrdu revelá.” (1 Pedro 1:6, 7) Sí, prueba ta pèrmití nos demostrá e kalidat di nos fe i amor pa Yehova. Tambe nan ta yuda duna un kontesta na e reproche- i akusashonnan di Satanas e Diabel.—Proverbionan 27:11; Revelashon 12:10.

Tambe prueba ta yuda nos kultivá otro kualidatnan kristian. Konsiderá por ehèmpel, e palabranan di e salmista ku a bisa: “[Yehova] ta atendé e hende humilde; ma e hende orguyoso e ta konosé djaleu.” (Salmo 138:6) Hopi di nos no ta humilde di naturalesa, pero prueba por yuda nos kultivá e kualidat nesesario ei. Kòrda e okashon den e tempu di Moises ora ku algun israelita a fada di kome mana siman tras siman, luna tras luna. Aparentemente esei tabata un prueba pa nan, ounke ta Yehova mes a manda mana milagrosamente pa nan. Ki propósito e prueba aki tabatin? Moises a bisa nan: “Den desierto [Yehova] a alimentá bo ku mana . . . pa e humiá bo i pa e pone bo na prueba.”—Deuteronomio 8:16.

Asina tambe nos humildat por ser poné na prueba. Kon asina? Wèl, kon nos ta reakshoná ora ku bin ahustenan den e organisashon di  Yehova? (Isaías 60:17) Nos ta apoyá e trabou di prediká i siña di henter nos kurason? (Mateo 24:14; 28:19, 20) Nos ta ansioso pa aseptá e splikashonnan dje bèrdat di Beibel ku “e esklabo fiel i prudente” ta pèrkurá? (Mateo 24:45-47; Proverbionan 4:18) Nos ta resistí e tentashon pa tin e aparatonan di mas moderno, e pañanan di último moda òf e último modelo di outo? Un persona modesto por kontestá e preguntanan ei ku un sí.—1 Pedro 1:14-16; 2 Pedro 3:11.

Prueba por yuda nos desaroyá asta un otro kualidat: pèrseveransia. Disipel Santiago a bisa: “Konsiderá esaki komo puru goso, mi rumannan, ora boso haña boso mes den diferente pruebanan, sabiendo ku e prueba di boso fe ta produsí pèrseveransia.” (Santiago 1:2, 3) Ora nos dependé kompletamente riba Yehova pa wanta un prueba tras di otro, esaki lo yuda nos kultivá firmesa, konstansia i integridat. E ta fortales’é nos pa resistí e futuro atakenan di Satanas, e dios rabiá di e mundu aki.—1 Pedro 5:8-10; 1 Huan 5:19; Revelashon 12:12.

Mantené un Punto di Bista Korekto di Prueba

Tempu ku Hesukristu e Yu perfekto di Dios, tabata riba tera, el a konfrontá hopi prueba i a kosechá tambe hopi benefisio dor ku el a wanta nan. Pablo a skirbi ku Hesus “a siña obedensia dor di e kosnan ku el a sufri.” (Hebreonan 5:8) Hesus su lealtat te na morto a trese alabansa pa Yehova su nòmber i a hasi posibel ku e por a ofresé e balor di su bida humano perfekto komo un reskate pa humanidat. Esaki a habri kaminda pa esnan ku ehersé fe den Hesus por tin e speransa di bida eterno. (Huan 3:16) Dor ku Hesus a wanta su pruebanan fielmente, awor e ta nos Sumosaserdote i Rei entronisá.—Hebreonan 7:26-28; 12:2.

Kiko di nos? Nos lealtat apesar di prueba tambe ta trese hopi benefisio. Relashoná ku esnan ku tin speransa selestial, Beibel ta bisa: “Bendishoná ta un hende ku ta perseverá den prueba; pasobra una bes ku el a pasa e prueba, e lo risibí e korona di bida, ku Señor a primintí na esnan ku ta stim’é.” (Santiago 1:12) Hende ku tin speransa pa biba riba tera tin e siguransa ku si nan wanta fielmente, nan lo heredá bida eterno den paradeis riba tera. (Revelashon 21:3-6) I mas importante ainda, nan perseveransia fiel lo trese alabansa p’e nòmber di Yehova.

Segun ku nos ta sigui e pasonan di Hesus, nos por tin konfiansa ku tur e pruebanan òf tentashonnan ku nos haña nos kun’é den e sistema di kosnan aki, ta kosnan ku nos por logra trata kuné. (1 Korintionan 10:13; 1 Pedro 2:21) Kon asina? Dor di dependé riba Yehova, kende ta duna hende ku ta dependé riba dje “poder supremo.” (2 Korintionan 4:7) Laga nos tin e mesun konvikshon ku Job, kende asta ora e tabata bou di prueba severo a konfirmá su konfiansa den Dios, bisando: “Ora ku e kaba di pone mi na prueba, lo mi sali manera oro.”—Job 23:10.

[Plachi na página 31]

Hesus su lealtat bou di prueba a trese alabansa pa Yehova su nòmber. Nos lealtat tambe por