Historia di Bida

“Lo Mi No Kambia Nada!”

SEGUN E RELATO DI GLADYS ALLEN

Tin bes hende sa puntra mi: “Si bo mester biba di nobo, kiko lo bo kambia?” Ami por kontestá nan frankamente: “Lo mi no kambia nada!” Laga mi splika dikon mi ta pensa asina.

DEN zomer di 1929, tempu mi tabatin dos aña di edat, algu maravioso a pasa ku mi tata, Matthew Allen. El a haña e foyeto chikitu Miónes na Bida Awor Lo No Muri Nunka!, publiká dor di Studiantenan Internashonal di Beibel, manera Testigunan di Yehova tabata konosí e tempu ei. Tata a kuminsá les’é ansiosamente. I despues di djis un par di página, el a grita: “Esaki ta e mihó kos ku mi a yega di lesa!”

Poko despues di esei Tata a haña otro publikashonnan di e Studiantenan di Beibel. Mesora el a kuminsá konta tur e bisiñanan loke e tabata siña. Sin embargo, den e área di kunuku kaminda nos tabata biba no tabatin kongregashon di Testigunan di Yehova. Dor ku Tata a mira ku asosashon kristian regular ta un nesesidat, na 1935 nos famia a muda bai Orangeville, Ontario, Kánada, pasobra einan tabatin un kongregashon.

E tempu ei, nan no tabata animá e muchanan tur biaha pa asistí na reunionnan di kongregashon; por lo general nan tabata keda pafó dje lugá di reunion i hunga te ora e adultonan kaba. Tata no a gusta esaki. El a pensa: “Si e reunionnan ta bon pa mi, nan ta bon pa mi yunan tambe.” Pues, ounke Tata tabata nobo n’e kongregashon, el a instruí mi ruman hòmber Bob, mi ruman muhénan Ella ku Ruby i ami pa djòin e adultonan na e reunionnan, i nos a hasi esei. No a dura mashá ku yunan di otro  Testigunan tambe a kuminsá sinta paden. Asistensia i partisipashon na e reunionnan a bira un parti hopi importante di nos bida.

Tata tabata stima Beibel i tabata un delisia pa tend’é konta historianan di Beibel na un manera bibu. Ku esakinan el a impreshoná nos kurasonnan hóben ku lèsnan vital , i ainda mi tin grato rekuerdo di esakinan. Un di nan ta ku Yehova ta bendishoná hende ku ta obedes’é.

Tambe Tata a siña nos usa Beibel pa defendé nos fe. E tabata train nos pa hasi esei dor di bisa den wega: “Mi ta kere ku ora mi muri, mi ta bai shelu. Awor boso proba mi ku no ta asina.” Ami ku Rubi tabata bai den e konkordansia i buska tekstonan ku nos por usa pa mustra ku e siñansa ei ta falsu. Despues ku nos a lesa e tekstonan ku nos a haña, Tata tabata bisa: “Interesante, pero ainda mi no ta konvensí.” Ata nos ta buska den konkordansia atrobe. Hopi bes esaki por a sigui pa oranan largu te ora ku Tata a keda satisfecho ku e kontestanan ku nos a dun’é. Esaki a pone ku ami ku Ruby tabata bon prepará pa splika nos kreensianan i defendé nos fe.

Mi A Vense Miedu di Hende

Apesar dje ekselente entrenamentu ku mi a risibí na kas i n’e reunionnan di kongregashon, mi tin ku atmití ku tin rasgonan dje bida kristian ku tabata un reto pa mi. Meskos ku hopi hóben, mi no tabata gusta pa ta diferente for di otronan, foral di mi kompañeronan di klas. Un dje promé pruebanan di mi fe tabatin di haber ku loke nos tabata yama marcha di informashon.

E idea tabata pa un grupo di ruman kana trankil dor dje kayanan prinsipal dje stat, ku bòrchi ku lema skirbí riba nan. Den nos pueblo di mas o ménos 3.000 habitante, tur hende tabata konosé otro. Durante un marcha di informashon mi tabata kana na final dje grupo ku un bòrchi ku a bisa: “Religion Ta un Trampa i un Froude.” Algun di mi kompañeronan di skol a mira mi i mesora nan a kuminsá kana mi tras i kanta e himno di Kánada: “Dios Salba Rei.” Kon mi a trata ku e asuntu aki? Mi a hasi orashon ferviente pa Dios duna mi forsa pa sigui den e marcha. Ora ku por fin e marcha a kaba, mi a kore bai Salon di Reino pa entregá mi bòrchi i bai kas. Sin embargo, e ruman na enkargo a bisa mi ku un otro marcha ta bai kuminsá i ku nan tabatin mester di un hende mas pa karga un bòrchi. Pues, mi a sali atrobe hasiendo orashon mas ferviente ku nunka. Sin embargo, e biaha aki mi koleganan di skol a kansa i nan a bai kas. Mi orashonnan pa yudansa a bira mas bien orashonnan di gradisimentu!—Proverbionan 3:5.

Sirbidónan di tempu kompleto semper tabata bon biní na nos kas. Nan tabata un grupo di hende felis i plasentero pa trata kuné. Te asina leu ku mi ta kòrda, mi mayornan semper a laga nos ku ta yu komprendé ku sirbishi di tempu kompleto ta e mihó karera ku nos por skohe.

Dor di nan animashon, mi a kuminsá mi karera den e sirbishi di tempu kompleto na 1945. Despues mi a djòin mi ruman muhé Ella, kende tabata traha pionero na Londen, Ontario. Einan mi a konosé un rasgo di sirbishi ku mi a pensa ku nunka lo mi por a hasi. E rumannan tabata bai di mesa pa mesa den e barnan lokal i ofresé e klientenan ehemplarnan di E Toren di Vigilansia  i Konsuelo (awor Spièrta!). Ta bon ku e trabou aki tabata tuma lugá riba djasabra atardi, asina ei mi tabatin henter un siman pa resa pidi Dios kurashi pa mi bai! Nò, e trabou ei no tabata fásil pa mi, pero el a duna hopi satisfakshon.

Di otro banda, tambe mi a siña kon pa laga edishonnan speshal di Konsuelo ku a trata e persekushon ku nos rumannan tabata konfrontá den kamponan di konsentrashon nazi. Nos a laga esakinan foral serka komersiantenan kanades importante, inkluso direktornan di empresanan grandi. Atraves di añanan mi a sinti ku Yehova semper ta apoyá nos, basta nos ta dependé riba dje pa haña fortalesa. Manera Tata tabata bisa, Yehova ta bendishoná hende ku ta obedes’é.

Mi A Aseptá e Invitashon pa Sirbi na Quebec

Dia 4 di yüli 1940, gobièrnu a prohibí e trabou di Testigunan di Yehova na Kánada. Despues nan a kita e prohibishon, pero nos a sigui haña nos ku persekushon den e provinsia katóliko romano Quebec. Pa hala atenshon riba e maltrato ku nos rumannan tabata risibí einan, nos a kuminsá un kampaña ku un tratado ku a denunsiá esei fuertemente. Tema dje tratado tabata Quebec Su Odio Ardiente Kontra Dios i Kristu i Libertat Ta un Bèrgwensa pa Kánada Kompleto. Nathan H. Knorr, miembro dje Kuerpo Gobernante di Testigunan di Yehova, a reuní ku sientos di pionero den e stat di Montreal pa splika nos ki konsekuensianan loke nos ta bai hasi lo por trese kuné. Ruman Knorr a bisa nos ku si nos bai di akuerdo pa partisipá den e kampaña, nos tin ku ferwagt ku nan lo arestá nos i sera nos den prizon. I ta esei mes a sosodé tambe! Durante e tempu ei, nan a arestá mi 15 biaha. Ora nos a sali den sirbishi di vèlt nos tabata hasi sigur di bai ku nos skeiru di djente i peña pa por si akaso nos mester a pasa anochi den prizon.

Na prinsipio nos tabata hasi gran parti di nos trabou anochi pa hala ménos atenshon posibel. Mi tabata bai ku un suministro èkstra di tratado den un tas ku mi a kologá na mi garganta bou di mi yas. Ora e tas tabata yen di tratado e tabata keda bòl i laga mi parse hende na estado. Esei a kumbiní mi ora mi a drenta un bus yen di hende pa bai un teritorio. Vários bes kabayeronan ku bon manera a lanta for di nan stul pa laga e señora “na estado” sinta.

Segun ku tempu tabata pasa, nos a kuminsá ku e trabou di plama tratado durante dia. Nos tabata laga tratado na tres òf kuater kas i despues nos tabata bai un otro teritorio. Generalmente e sistema aki tabata funshoná bon. Sin embargo, si un pastor dje parokia a haña sa ku nos tabata den e área, nos por a ferwagt problema. Na un okashon, un pastor a instigá un grupo di 50 pa 60 adulto i mucha pa tira nos ku tomati i webu. Nos a bai skonde den kas di un ruman muhé kristian kaminda nos a drumi anochi riba flur.

Na desèmber 1958 ami ku mi ruman muhé Ruby a kuminsá siña franses pasobra na Quebec tabatin un gran nesesidat pa pionero pa prediká na hende di abla franses. Despues di esei nos a ser asigná na vários área den e provinsia kaminda e hendenan tabata papia franses. Kada un asignashon tabata un eksperensia úniko. Tabatin un teritorio ku nos a bai di kas pa kas ocho ora pa dia pa dos aña largu, sin ku ningun hende a tende nos! E hendenan tabata djis bin wak ken ta na porta i despues sera nan kortinanan. Pero nos no a entregá. Awendia tin dos kongregashon floresiendo den e pueblo ei.

Yehova A Sostené Nos den Tur Manera

Nos a kuminsá traha pionero spesial na 1965. Un asignashon ku nos tabatin komo pionero spesial a yuda nos komprendé plenamente e palabranan di Pablo, registrá na 1 Timoteo 6:8, ku ta bisa: “Si nos tin kuminda i paña pa bisti, ku esakinan nos mester ta kontentu.” Nos mester a sigui un presupuesto estrikto pa nos por a kubri nos gastunan. P’esei nos tabata apartá e sèn pa paga verwarming, hür, koriente i kuminda. Ora nos kaba di kita tur eseinan nos ta keda ku 45 sèn pa gasta e resto dje luna si nos tabata kier.

Debí na nos fondonan limitá, nos por paga pa nos kas ta kayente pa solamente un par di ora  anochi. Pues, nos kamber nunka no tabata mas kayente ku 15° Celsius i hopi bes e tabata hopi mas friu. Un dia, yu hòmber di un studiante di Ruby a bin bishitá nos. Ora el a bai kas lo e mester a bisa su mama ku friu ta mata nos, pasobra desde e dia ei su mama tabata manda 18 florin tur luna pa nos kumpra zeta asina nos por a laga e verwarming keda sendé tur ora. Di ningun manera nos no a sinti falta di nada. Nos no tabata riku, pero semper nos tabatin e kosnan nesesario. Nos a konsiderá tur kos èkstra komo un bendishon. Ki sierto ta e palabranan di Salmo 37:25: “Nunka mi no a mira e hustu desampará, ni su desendientenan ta pidi pan”!

Apesar di e oposishon ku nos a konfrontá, mi tabatin e plaser di mira un kantidat di hende ku mi a studia Beibel kuné haña un konosementu dje bèrdat. Algun di nan a skohe e sirbishi di tempu kompleto komo nan karera, i esaki a duna mi un goso spesial.

Efrentando Pruebanan Nobo ku Éksito

Na 1970, Cornwall, Ontario, a bira nos asignashon nobo. Rònt di un aña despues ku nos a yega Cornwall, Mama a bira malu. Tata a muri na 1957, i bùrt pa bùrt ami ku mi ruman muhénan tabata kuida Mama te dia ku el a muri na 1972. Nos partnernan den e trabou di pionero spesial, Ella Lisitza i Ann Kowalenko, a yuda nos para firme i a apoyá nos ku hopi amor durante e tempu ei. Nan a perkurá pa nos studionan di Beibel i otro responsabilidatnan durante nos ousensia. E palabranan di Proverbionan 18:24: “Tin un amigu ku ta mas pegá ku un ruman,” ta masha sierto!

En bèrdat bida ta yen di reto. Pero ku Yehova su yudansa amoroso mi por a enfrentá nan. Ainda mi ta gosa di ta den e sirbishi di tempu kompleto. Bob, kende a muri na 1993, a traha mas ku 20 aña komo pionero, di esakinan el a traha 10 aña presioso huntu ku su kasá Doll. Mi ruman muhé mayó, Ella, ku a muri na òktober 1998, a traha pionero pa mas ku 30 aña i semper el a mantené su spiritu di pionero. Na 1991, dòkter a bisa mi otro ruman muhé Ruby ku e tin kanser. Tòg, el a usa su forsa limitá pa prediká e bon nobo. Tambe el a mantené su sentido di humor te e mainta di 26 di sèptèmber 1999, dia ku el a muri. Ounke mi no tin mi ruman muhénan mas, mi tin un famia di ruman  hòmber i muhé spiritual pa yuda mi mantené mi sentido di humor.

Si mi pensa riba e manera ku mi bida a bai, kiko lo mi kambia? Nunka mi no a kasa, pero mi a ser bendishoná ku mayornan amoroso, un ruman hòmber i ruman muhénan ku a pone e bèrdat na promé lugá den nan bida. Mi ta anhelá e tempu ku lo mi mira nan tur pronto ora nan resusitá. Ya kaba mi por sinti kon Tata ta primi mi den su brasa i mi por imaginá mi mama su lágrimanan ora nos ta duna otro un abraso fuerte. Ella, Ruby i Bob lo ta loko di alegria.

Miéntras tantu, mi ta desididu pa sigui usa e salú i energia ku mi a sobra pa duna onor i alabansa na Yehova. E sirbishi di pionero di tempu kompleto ta un bida maravioso i satisfasiente. Ta nèt manera e salmista a bisa relashoná ku esnan ku ta kana den e kamindanan di Yehova: “Lo bo ta felis i lo bai bo bon.”—Salmo 128:1, 2.

[Plachi na página 26]

Tata a stima Beibel i el a siña nos us’é pa defendé nos fe

[Plachi na página 28]

Di robes pa drechi: Ruby, ami, Bob, Ella, Mama i Tata na 1947

[Plachi na página 28]

Rei dilanti, di robes pa drechi: Ami, Ruby i Ella na un Kongreso di Distrito, 1998