Unda Tur Bisiña A Keda?

“Sosiedat moderno no sa kiko ta bisiña.”—Benjamin Disraeli, polítiko ingles di siglo 19.

KUBANONAN di edat tin un manera úniko pa promové nan bienestar: kontakto den bario, òf círculos de abuelos (grupo di grandinan), manera nan ta yama nan. Segun un informe di 1997, rònt di 1 di kada 5 kubano di mas edat ta forma parti di e gruponan ei, den kua nan ta haña kompañerismo, apoyo i yudansa práktiko pa mantené un bida salú. “Ki ora ku dòkter di kas di un bario mester di yudansa ku un kampaña di vakunashon,” segun e revista World-Health, “ta serka e círculos de abuelos nan ta haña personanan ku ta dispuesto i kla pa yuda.”

Pero lamentablemente, den mayoria parti di mundu ya no tin un komunidat den bario ku tin interes den hende. Tuma por ehèmpel e kaso trágiko di Wolfgang Dircks, kende tabata biba den un kompleho di apartamento na wèst Europa. Algun aña pasá, The Canberra Times a informá ku ounke e 17 famianan ku tabata kompartí e mesun edifisio di apartamento ku Wolfgang a ripará ku e no tabata sali kas, “ningun di nan a disidí di bai buska su drechi.” Ora e propietario a presentá finalmente, “el a deskubrí un skelèt sintá dilanti televishon.” Riba skochi di e skelèt tabatin un buki di programa di televishon habrí ku fecha di 5 di desèmber 1993. Wolfgang tabatin sinku aña morto. Esaki ta un testimonio tristu di e falta di interes ku bisiñanan tin den otro! Nada straño ku un kolumnista a deklará den The New York Times Magazine ku su bario, meskos ku hopi otro, a bira “un komunidat di hende straño.” Esaki ta e kaso den bo área tambe?

Ta bèrdat ku tin algun komunidat den áreanan di kunuku kaminda ainda bisiñanan ta hopi amigabel ku otro, i tambe algun komunidat den stat kaminda e bisiñanan ta purba mustra mas interes den otro. Tòg, hopi habitante di stat ta sinti nan isolá i vulnerabel den nan mes besindario. Nan ta skonde tras di e murayanan di anonimato i no kier pa hende sa nan drechi. Kon asina?

 Tras di Murayanan di Anonimato

Klaro ku mayoria di nos tin bisiña ku ta biba pegá ku nos. Refleho di e lus di televishon, sombra ku ta move visiblemente dor di bentana, lusnan ku ta sende i paga, zonido di outo ku ta yega i bai, stap di pia den gang, yabi ku ta sera i habri porta, tur ta señalnan ku e bario ta “na bida.” Sin embargo, tur sintimentu ku bisiñanan ègt mester di otro ta disparsé ora hende ku ta biba pegá ku otro no kier pa ningun hende sa nan drechi òf ta ignorá otro den e bida drùk di tur dia. Hende por sinti ku nan no tin nodi mete ku bisiña i ku nan no tin kuenta ni rason di duna nan. E korant oustraliano Herald Sun ta atmití: “Dor ku hende ta mas anónimo (niun hende no sa nan drechi) den nan besindario direkto, nan ta sinti ku nan komunidat no por stroba nan di hasi nada. Awor ta mas fásil pa ignorá òf ekskluí hende ku bo no ta gusta mashá.”

E desaroyo aki no ta un sorpresa. Den un mundu kaminda hende ta “stimadó di nan mes,” komunidat ta kosechando e konsekuensianan di e bida egoista ku hopi hende ta hiba. (2 Timoteo 3:2) E resultado ta ku hopi hende ta sinti ku nan ta so i alehá for di otronan. I ora hende alehá for di otro, esei ta trese deskonfiansa, spesialmente ora krímen i violensia ta pone e komunidat na peliger. Deskonfiansa, na su turno, ta pone hende pèrdè kompashon pa otro.

Sea kual sea e situashon den bo bario, sin duda lo bo ta di akuerdo ku bon bisiña ta trese hopi benefisio pa un komunidat. Ora hende ta traha riba un meta komun, nan por logra hopi. Bon bisiña por ta un bendishon tambe. E siguiente artíkulo lo mustra kon.