“Bini Serka Mi, . . . i Lo Mi Refreská Boso”

Hóbennan Ku Ta Manera Gota di Serena Refreskante

SIN duda Hesukristu a referí tambe na su siguidónan mas yòn ora el a bisa: “Bini serka mi, . . . i lo mi refreská boso.” (Mateo 11:28, NW) Ora hende a kuminsá trese nan chikitinnan serka Hesus, su disipelnan a purba di stòp nan. Pero el a bisa nan: “Laga e muchanan bin serka mi; no stroba nan.” Hesus asta “a tuma [e muchanan] den su brasa i a bendishoná nan.” (Marko 10:14-16) Hesus a mustra bon kla ku e tabata gusta mucha.

Beibel ta konta di hòmber i muhénan yòn, i tambe di hóbennan i mucha chikitu ku tabata fiel i ku a pone bon ehèmpel den sirbi Dios. E buki di Salmo ta profetisá di “hóbennan” ku ta manera gota di serena. Tambe e ta papia di “yònkuman” i “bírgen” ku ta alabá e nòmber di Yehova.—Salmo 110:3; 148:12, 13.

Un Lugá pa Hóbennan Bria i Bai Dilanti

E komparashon ku gota di serena ta na su lugá, pasobra serena ta ligá ku abundansia i bendishon. (Génesis 27:28) Gota di serena ta suave i refreskante. Den e tempu aki di e presensia di Kristu, gran kantidat di hóben kristian ta ofresé nan mes boluntariamente i ansiosamente. Manera gota di serena refreskante, hopi mucha hòmber i mucha muhé ta sirbi Dios ku alegria i ta yuda nan kompañeronan di adorashon.—Salmo 71:17.

No ta otro hende so hóbennan kristian ta refreská; nan mes tambe ta haña refreskamentu den nan sirbishi. E organisashon di Dios ta perkurá un ambiente den kua nan por bria i bai dilanti. Dor di pega na normanan moral haltu, hóbennan tin un relashon íntimo ku Dios. (Salmo 119:9) Den e kongregashon tambe nan ta partisipá den aktividatnan saludabel i ta haña bon amigu. Eseinan ta faktornan ku ta kontribuí na un bida yen di satisfakshon i propósito.

‘Un Kurashon i un Refreskamentu’

Hóbennan kristian mes ta sinti ku nan ta manera gota di “serena”? Sera konosí ku Tania, un mucha muhé hopi aktivo den e kongregashon i ku ta dediká gososamente mas ku 70 ora pa luna den sirbishi. Kon e ta sinti su mes? “Mi ta sinti mi refreská i animá,” e ta bisa. “E echo ku mi por tin Yehova i su organisashon aki riba tera den mi bida ta ‘un kurashon i un refreskamentu’ pa mi.”—Proverbionan 3:8, NW.

Ariel, un otro sirbidó hóben ku ta traha tempu kompleto den sirbishi, ta  apresiá e nutrishon spiritual ku e ta risibí den e kongregashon. “Asistí na reunion di kongregashon, kongreso i asambleanan i alimentá mi mes na Yehova su mesa spiritual, realmente ta refreská mi spiritualmente,” e ta remarká. “Loke ta animá mi ta e echo ku mi sa ku na tur parti di mundu tin hende ta traha meskos ku mi.” E ta deskribí e fuente prinsipal di refreskamentu bisando: “Ta masha refreskante pa por tin Yehova komo amigu, spesialmente ora mi tende òf mira e efektonan teribel ku e sistema aki tin riba hende.”—Santiago 2:23.

Ku su 20 aña, Abishai ta sirbi komo evangelisadó di tempu kompleto i sirbidó ministerial den e kongregashon. E ta deskribí su eksperensia ku e palabranan aki: “Mi ta sinti mi refreská pasobra mi sa kon pa trata ku e hopi problemanan ku hóbennan ta enfrentá awe. E bèrdat di Beibel a yuda mi keda enfoká riba loke mi mester hasi pa por sirbi Yehova ku henter mi alma.”

Durante su promé añanan komo teenager, Antoine tabata gusta rabia. Un biaha el a dal un kolega di skol ku stul, i el a hinka un otro ku pòtlot. Antoine sigur no tabata un persona refreskante! Pero siñansa di Beibel a kambia su komportashon. Awor e tin 19 aña i ta sirbidó ministerial i sirbidó di tempu kompleto den kongregashon. E ta bisa: “Mi ta gradisí Yehova ku el a permití mi konos’é i yuda mi mira e nesesidat pa ehersé dominio propio i kambia mi bida. Di e manera aki, mi a evitá hopi problema.”

Otronan ta tuma nota dje aktitut refreskante di hóbennan kristian. Matteo ta un Testigu hóben na Italia. Su yùfrou di skol a disidí ku ken ku papia palabra malu den klas lo tin ku paga un but chikí. Algun tempu despues, e muchanan a pidi e yùfrou p’e kita e regla, pasobra nan a bisa ku “ta imposibel pa stòp di papia palabra malu.” Matteo ta splika: “Pero yùfrou a bisa ku esei no ta bèrdat, i el a usa ami, un Testigu di Yehova, komo ehèmpel, gabando mi dilanti henter e klas pasobra mi ‘lenga’ sí no ta sushi.”

Den un klas yen di mucha desobediente na Tailandia, e mener di skol a yama Racha di 11 aña pa bin para dilanti klas i a gab’é pa su komportashon, bisando: “Pakiko boso tur no ta sigui su ehèmpel? E ta hasi su bèst na skol i ta komportá su mes bon.” Anto el a bisa e studiantenan: “Mi kier sa ku boso tin ku bira Testigu di Yehova manera Racha pa boso drecha boso komportashon.”

Ta dushi pa mira míles di hóben kristian siña konosé Yehova mihó i hasi su boluntat. Hóbennan ekselente asina ta mustra hopi sabí pa nan edat. Dios por yuda nan haña éksito den nan bida aktual i tambe duna nan un futuro glorioso den e binidero mundu nobo. (1 Timoteo 4:8) Den e desierto spiritual dje mundu aktual yen di hóbennan disgustá i frustrá, nan ta forma un kontraste refreskante!