Interes den “Santunan” A Bolbe Lanta

“Bo ta kòrda ku un tempu nos tabata hartá di héroe? Ta parse ku esei no a afektá e 4,2 mion merikanonan ku a mira e entiero di Mama Teresa dia 13 di sèptèmber. For di dia ku el a muri dia 5 di sèptèmber, Vatikano a haña bòshi di petishon pa deklar’é ofisialmente komo santu. Masha poko hende ta duda ku esei lo tuma lugá.”—Sun-Sentinel, Merka, 3 Di Òktober 1997.

HOPI hende ta mira e obranan humanitario i di karidat dje misionero katóliko Mama Teresa komo un muestra di kiko kier men ser un berdadero santu. Otro religionnan tambe tin nan personahenan ku a hasi obranan grandi i digno di mérito. Pero, kisas niun di nan no ta ser rekonosé ofisialmente manera esnan ku Iglesia Katóliko Romano a kanonisá òf deklará komo santu.

Papa Huan Pablo II a kanonisá mas ku 450 persona durante su periodo komo papa. Esei ta mas ku e kantidat ku tur otro papa di siglo 20 huntu a yega di kanonisá. * Pakiko te ainda tin hende deboto na “santu,” ounke por lo general hopi di nan no ta muchu konosí den e katólikonan mes?

Lawrence Cunningham, teólogo di Universidat Notre Dame, ta splika: “E idea di ku lo tin santunan den e mundu aki ta lanta hende su interes. Eksistensia di santunan ta mustra ku te ainda hende por tin su méritonan den bida.” Ademas, ta reina e pensamentu ku e “santunan” tin akseso spesial na Dios, i ku dor di esei nan por intersedé bon pa hende na bida. Ora hende haña pertenensia òf restu humano di un “santu,” nan ta venerá esaki pasobra nan ta kere ku e supuesto santu ta emití poder.

E Katisashi dje Konsilio di Trent, publiká den siglo 16 pa konfirmá e doktrina katóliko, a dekretá: “Nos tin rason ora nos bisa ku e akto di onra e santunan ‘ku ta drumi den Señor,’ e akto di pidi nan pa nan intersedé pa nos, i e akto di venerá nan pertenensianan i shinishi sagrado, sigur no ta bayendo pèrdí. Mas bien, esakinan tin tendensia prinsipalmente di kontribuí n’e gloria di Dios. Na mesun tempu e speransa kristian ta ser animá i fortifiká, i e kristian mes ta bira ansioso pa imitá e birtut dje santunan.” (The Catechism of the Council of Trent, 1905) Kristiannan berdadero sigur kier hiba un bida di birtut, aserká Dios na e manera korekto i risibí su yudansa. (Santiago 4:7, 8) P’esei, segun e Palabra di Dios, ken ta e berdadero santunan? I ki papel nan ta hunga?

[Nota]