“Paga Muchu Mas Atenshon”

“Nos mester paga muchu mas atenshon na loke nos a tende, pa nos no apartá nos for di e kaminda.”—HEBREONAN 2:1.

1. Ilustrá kon ora hende laga kosnan distraé nan, esaki por kousa desaster.

AKSIDENTE di outo ta kosta bida di rònt di 37.000 hende pa aña na Merka so. Ekspertonan ta bisa ku por a evitá hopi di e mortonan aki si e konduktornan a paga mas tinu riba kaminda. Algun outomobilista ta laga indikashonnan riba kaminda i bòrchi di propaganda òf uso di telefòn selular kita nan atenshon. Tambe tin esnan ku ta kome i bebe den outo segun ku nan ta manehá esaki. Tur e situashonnan aki ta mustra ku ora hende laga otro kosnan distraé nan, esaki por kousa desaster.

2, 3. Ki spièrtamentu Pablo a duna e kristiannan hebreo, i pakiko su konseho tabata na su lugá?

² Kasi 2.000 aña promé ku hende a inventá outo, apòstel Pablo a identifiká un tipo di distraishon ku a bira desastroso pa algun kristian hebreo. Pablo a enfatisá ku e Hesukristu resusitá a haña un posishon superior ku tur e angelnan, pasobra el a sinta na e man drechi di Dios. E tempu ei e apòstel a bisa: “Pa e motibu aki nos mester paga muchu mas atenshon na loke nos a tende, pa nos no apartá nos for di e kaminda.”—Hebreonan 2:1.

³ Pakiko e kristiannan hebreo mester a ‘paga muchu mas atenshon na loke nan a tende’ tokante Hesus? Esei ta pasobra a pasa kasi 30 aña kaba desde ku Hesus a bandoná tera. Den e ousensia di nan Maestro, algun kristian hebreo a kuminsá drif bai for dje fe berdadero. Nan a laga hudaismo, nan forma bieu di adorá Dios, distraé nan.

Nan Mester A Paga Muchu Mas Atenshon

4. Pakiko algun kristian hebreo lo a sinti nan tentá pa bai bèk den hudaismo?

⁴ Pakiko un kristian lo a sintié tentá pa bai bèk den hudaismo? Wèl, e sistema di adorashon bou di e Lei tabatin di haber ku kosnan konkreto. Hende por a mira e saserdotenan i sinti e holó di sakrifisionan kimá. Pero den algun sentido, kristianismo tabata bastante diferente. E kristiannan tabatin un Sumo Saserdote, Hesukristu, pero pa trinta aña kaba e no tabata riba tera. (Hebreonan 4:14) Nan tabatin un tèmpel, pero su lugá santu tabata den shelu mes. (Hebreonan 9:24) Distinto dje sirkumsishon físiko bou di e Lei, sirkumsishon kristian tabata “esun di kurason, segun e spiritu.”  (Romanonan 2:29) P’esei, p’e kristiannan hebreo, kristianismo a kuminsá parse algu apstrakto, sin muchu kos konkretamente visibel.

5. Kon Pablo a mustra ku e sistema di adorashon ku Hesus a instituí tabata superior na esun bou di e Lei?

⁵ E kristiannan hebreo tabatin ku realisá algu masha signifikativo tokante e sistema di adorashon ku Kristu a instituí. E tabata basá mas riba fe ku riba bista, i tòg e tabata superior na e Lei ku a ser duná pa medio di profeta Moises. Pablo a skirbi: “Si e sprengumentu di sanger di kabritu i toro i di e shinishi di un bisé muhé, riba esnan ku a wòrdu kontaminá, ta santifiká pa purifikashon di e karni, kuantu mas e sanger di Kristu, kende, pa medio di e spiritu eterno, a ofresé su mes sin defekto na Dios, lo purifiká boso konsenshi di obranan morto pa sirbi e Dios bibu?” (Hebreonan 9:13, 14) Sí, e pordon ku nan por a haña a base di fe den e sakrifisio di reskate di Hesukristu ta masha superior den hopi sentido na esun ku e hudiunan por a haña pa medio di sakrifisio ofresé bou di e Lei.—Hebreonan 7:26-28.

6, 7. (a) Ki situashon a pone ku a bira urgente p’e kristiannan hebreo ‘paga muchu mas atenshon na loke nan a tende’? (b) Ora Pablo a skirbi su karta n’e hebreonan, kuantu tempu mas a keda Yerúsalèm? (Mira nota na pia di página.)

⁶ Tabatin un motibu mas pakiko e kristiannan hebreo mester a presta hopi atenshon na e kosnan ku nan a tende tokante Hesus. Hesus a profetisá ku Yerúsalèm lo a ser destruí. El a bisa: “E dianan lo bin pa bo ku bo enemigunan lo lanta un baluarte rònt di bo, i rondoná bo i sera bo aden di tur banda, i basha bo abou na suela i bo yunan denter di bo, i nan lo no laga den bo ni un piedra riba otro, pasobra bo no a kòrda e tempu ku Dios a bishitá bo.”—Lukas 19:43, 44.

⁷ Na ki tempu esaki lo a sosodé? Hesus no a revelá ni e dia ni e ora. Mas bien, el a duna e instrukshon aki: “Ora boso mira Yerúsalèm rondoná dor di ehérsitonan, rekonosé anto ku su desolashon ta serka. E ora ei laga esnan ku ta na Hudea hui bai na e serunan, i laga esnan ku ta meimei di e stat sali bai, i no laga esnan ku ta den kunuku bai den stat.” (Lukas 21:20, 21) Durante e 30 añanan despues ku Hesus a papia e palabranan ei, algun kristian den Yerúsalèm a pèrdè nan sentido di urgensia i a laga otro kosnan distraé nan. Ta komo si fuera nan a kita nan tinu for di kaya. Si nan no a kambia nan manera di pensa, nan lo a sufri un desaster sigur. Sea ku nan a pensa esei òf nò, e destrukshon di Yerúsalèm tabata tra’i porta! *  Tabata di spera ku e konseho di Pablo lo a lanta e kristiannan den Yerúsalèm for di nan soño spiritual.

Kon pa “Paga Muchu Mas Atenshon” Awe

8. Pakiko nos tin ku “paga muchu mas atenshon” na e bèrdatnan di e Palabra di Dios?

⁸ Meskos ku e kristiannan di promé siglo, nos tin ku “paga muchu mas atenshon” na e bèrdatnan di e Palabra di Dios. Pakiko? Pasobra nos tambe ta enfrentá un binidero destrukshon, no solamente di un nashon, sino di henter un sistema di kosnan. (Revelashon 11:18; 16:14, 16) Klaro ku nos no sa e dia ni ora eksakto ku Yehova lo tuma e akshon aki. (Mateo 24:36) No opstante, nos ta testigu okular di e kumplimentu di profesia bíbliko ku ta indiká klaramente ku nos ta bibando den “e último dianan.” (2 Timoteo 3:1-5) P’esei, nos mester vigilá kontra tur loke ku por distraé nos. Nos tin ku presta atenshon na e Palabra di Dios i mantené un sentido skèrpi di urgensia. Ta solamente dor di hasi esei, nos lo por “skapa di tur e kosnan aki ku ta bai tuma lugá.”—Lukas 21:36.

9, 10. (a) Kon nos por mustra ku nos ta atento pa kosnan spiritual? (b) Den ki sentido e palabra di Dios ta ‘un lampi pa nos pia’ i ‘un lus pa nos kaminda’?

⁹ Den e tempu krusial aki, kon nos por mustra ku nos ta pagando “muchu mas atenshon” na kosnan spiritual? Un manera ta dor di asistí ku regularidat na reunion, asamblea i kongreso kristian. Tambe nos mester ta studiantenan diligente di Beibel pa asina nos por hala serka di su Outor, Yehova. (Santiago 4:8) Si nos gana konosementu di Yehova mediante studio personal i reunion, nos lo ta manera e salmista ku a bisa Dios: “Bo palabra ta un lampi pa mi pia i un lus pa mi kaminda.”—Salmo 119:105.

¹⁰ Beibel ta sirbi komo ‘un lus pa nos kaminda’ ora e ta konta nos di Dios su propósito pa futuro. Tambe e ta ‘un lampi pa nos pia.’ Ku otro palabra, e por yuda nos dal nos siguiente paso ora nos ta enfrentá problemanan difísil di bida. P’e motibu ei ta vital pa nos “paga muchu mas atenshon” ora nos ta reuní pa risibí instrukshon huntu ku nos rumannan i ora nos ta lesa e Palabra di Dios personalmente. E informashon ku nos ta haña lo yuda nos tuma desishon sabí i benefisioso ku ta agradá Yehova i hasi su kurason kontentu. (Proverbionan 27:11; Isaías 48:17) Kon nos por oumentá nos kapasidat di konsentrashon ora nos ta na reunion i durante e oranan di nos studio personal pa asina nos saka e mayor benefisio for di e perkurashonnan spiritual di Dios?

Kon pa Konsentrá Mihó na Reunion

11. Pakiko tin biaha no ta fásil pa presta atenshon na reunionnan kristian?

¹¹ Tin biaha no ta fásil pa presta atenshon na reunionnan kristian. Nos mente por distraé fásilmente, tal bes dor di un baby ku ta yora òf un hende ku ta kana yega lat i buska lugá pa sinta. Despues di un dia largu di trabou, nos por ta simplemente kansá. Podisé e oradó ku ta papia riba plataforma no ta esun di mas elokuente, i promé ku nos realisá, ata nos mente a drif bai—kisas nos ta asta kabishá! E informashon ku ta ser presentá ta vital, p’esei nos mester hasi esfuerso pa por konsentrá mihó na reunion di kongregashon. Pero kon nos por hasi esaki?

12. Kiko ta pone ku ta bira mas fásil pa presta atenshon na reunion?

¹² Por lo general, ta mas fásil pa presta atenshon na reunion ora nos ta bon prepará. Pues, pakiko no apartá tempu pa pensa adelantá riba e informashon ku lo ser konsiderá? Ta tuma nos apénas un par di minüt pa dia pa lesa i meditá riba un parti di e kapítulonan asigná pa e lesamentu semanal di Beibel. Ku un poko planeamentu nos por saka tempu tambe pa prepará p’e Studio di Buki di Kongregashon i e Studio di Toren di Vigilansia. No ta importá ki ora nos ta skohe, pero un kos ta sigur: Preparashon lo yuda nos presta atenshon na e informashon ku ta ser konsiderá n’e reunionnan di kongregashon.

13. Kiko lo por yuda nos mantené nos konsentrashon riba e informashon ku ta ser konsiderá na reunion?

 ¹³ Ademas di ta bon prepará, algun ruman ta haña ku nan ta mas atento na reunion ora nan ta sinta mas dilanti den Salon di Reino. Otro kosnan ku por evitá ku nos mente ta drif bai ta ora nos ta mantené nos bista riba e oradó, ora nos ta sigui e lesamentu di teksto den nos mes Beibel i ora nos ta tuma nota. Sin embargo, un kurason prepará ta muchu mas importante ku kualkier téknika di konsentrashon en partikular. Nos tin ku komprendé e propósito di nos reunimentu huntu. Nos ta reuní ku nos rumannan prinsipalmente pa adorá Yehova. (Salmo 26:12; Lukas 2:36, 37) E reunionnan ta un medio importante pa risibí alimentashon spiritual. (Mateo 24:45-47) Ademas, nan ta duna nos oportunidat pa “stimulá otro pa stima i hasi bon obra.”—Hebreonan 10:24, 25.

14. Kiko realmente ta hasi un reunion fruktífero?

¹⁴ Algun di nos lo por tin tendensia di husga e kalidat di un reunion a base di e kapasidat di esnan ku ta instruí. Podisé ta si e oradónan ta hopi kapas, nos ta bisa ku e reunion tabata bon. Pero si na nos pareser nan manera di siña no tabata na nivel, nos tin chèns di kambia di opinion. Ta bèrdat ku e rumannan ku ta duna parti mester hasi nan bèst pa usa arte di siña i spesialmente pa alkansá kurason. (1 Timoteo 4:16) Pero nos ku ta skucha no mester bira demasiado krítiko. E kapasidat di esnan ku ta instruí ta importante, pero esei no ta e úniko faktor ku ta kontribuí na un reunion fruktífero. Bo no ta di akuerdo ku nos interes prinsipal mester ta, no riba kon bon e oradó ta duna su diskurso, sino riba kon bon nos ta skucha? Ora nos ta asistí na reunion i ta presta atenshon na loke ta ser presentá, nos ta adorando Dios na armonia ku su boluntat. Esei ta loke ta hasi e reunion fruktífero. Si nos ta anhelá pa gana e konosementu di  Dios, nos lo benefisiá di e reunionnan sin importá e kapasidat di e oradó. (Proverbionan 2:1-5) Laga nos hasi tur nos posibel anto pa ta determiná pa “paga muchu mas atenshon” na nos reunionnan.

Benefisiá Plenamente di Studio Personal

15. Kon studio i meditashon por benefisiá nos?

¹⁵ Dor di presta “muchu mas atenshon” durante nos studio personal di Beibel i meditashon riba loke nos a studia, nos ta saka hopi benefisio. E tempu ku nos ta lesa i reflekshoná riba Beibel i publikashonnan kristian lo duna nos oportunidatnan presioso pa inkulká e bèrdatnan di e Palabra di Dios den nos kurason. Esaki, na su turno, lo tin un efekto profundo riba e manera ku nos ta pensa i aktua. Sí, lo e yuda nos haña delisia den hasi e boluntat di Yehova. (Salmo 1:2; 40:8) P’esei, nos tin ku desaroyá nos kapasidat di konsentrá pa esei por benefisiá nos ora nos ta studia. Kosnan ta distraé nos fásilmente! Interupshonnan menor manera un yamada di telefòn òf un zonido por pone nos pèrdè nos konsentrashon. Òf podisé nos no ta hende ku por konsentrá muchu ora tras di otro. Tal bes nos ta kai sinta ku bon intenshon di alimentá nos mes spiritualmente, pero promé ku nos realisá, nos mente a drif bai. Kon nos por “paga muchu mas atenshon” durante studio personal di e Palabra di Dios?

16. (a) Pakiko ta importante pa nos traha un orario pa studio personal? (b) Kon abo a traha tempu pa studia e Palabra di Dios?

¹⁶ Ta bon pa traha un orario i skohe un ambiente faborabel p’e studio. Mayoria di nos tin masha poko tempu. Nos bida drùk di tur dia ta lastra nos manera un strom fuerte di awa ta lastra un taki fini. Realmente, na moda di papia, nos tin ku lucha kontra e koriente i buska un isla chikitu di trankilidat. Nos no por djis warda te ora un oportunidat pa studia presentá su mes. Apòstel Pablo a bisa ku nos mester ‘kumpra tempu oportuno.’ P’esei, nos tin ku kontrolá e situashon dor di traha tempu pa studia. (Efesionan 5:15, 16, NW) Algun ta apartá un periodo kòrtiku parti mainta ora lo tin ménos distraishon. Otronan ta haña ku parti anochi ta duna nan un mihó oportunidat. E punto ta ku nos no mag ignorá e nesesidat vital pa gana konosementu eksakto di Dios i di su Yu. (Huan 17:3) P’esei, laga nos saka tempu pa studio personal anto pega n’e oranan ku nos a programá.

17. Kiko ta meditashon, i kon e por benefisiá nos?

¹⁷ Algu masha importante ta meditashon, esta, e proseso di reflekshoná riba loke nos a siña dor di nos studio. E ta yuda nos hisa e pensamentunan di Dios for di e enk i papel i hink’é den nos kurason. Meditashon ta yuda nos mira kon nos por apliká konseho di Beibel pa asina nos bira ‘kumplidó di e palabra, i no solamente tendedó.’ (Santiago 1:22-25) Ademas, meditashon ta yuda nos hala mas serka Yehova, pasobra e ta permití nos reflekshoná riba su kualidatnan i e manera ku nan ta resaltá den e informashon ku ta ser konsiderá durante periodonan di studio.

18. Ki kondishon ta nesesario pa meditashon efikas?

¹⁸ Pa nos saka pleno benefisio di studio i meditashon, nos tin ku wak pa nos mente no distraé. Pa por traha lugá pa kapta informashon nobo ora nos ta meditá, nos tin ku evitá di laga e preokupashonnan di tur dia distraé nos. Pa bo meditá bo mester tin tempu i bo mester ta so, pero ki refreskante e alimento spiritual i e awanan di e bèrdat hañá den e Palabra di Dios ta!

19. (a) Relashoná ku studio personal, kiko a yuda algun ruman konsentrá pa un tempu mas largu? (b) Kiko mester ta nos aktitut pa ku studio, i ki benefisionan nos por saka for di e aktividat importante aki?

 ¹⁹ Kiko nos por hasi si nos no por konsentrá pa un tempu largu i nos mente kuminsá drif bai djis despues ku nos kuminsá studia? Algun a haña ku nan por mehorá nan kapasidat di konsentrá ora nan ta studia dor di kuminsá ku periodonan mas kòrtiku di studio i hasi esakinan gradualmente mas largu. Nos meta mester ta pa dediká sufisiente tempu pa studia en bes di pasa purá-purá riba e informashon. Nos tin ku kultivá un interes bibu den e tema ku nos ta studiando. I nos por bai mas a fondo dor di hasi investigashon den e kantidat inmenso di informashon ku e klase di esklabo fiel i diskreto a perkurá. E benefisionan di skrudiñá “e profundidatnan di Dios” ta grandi. (1 Korintionan 2:10) Dor di hasi esei nos por oumentá nos konosementu di Dios i desaroyá nos mente. (Hebreonan 5:14) Si nos ta studiantenan diligente di e Palabra di Dios, nos tambe lo ta “kapas pa siña otro hende.”—2 Timoteo 2:2.

20. Kon nos por kultivá i mantené un relashon íntimo ku Yehova Dios?

²⁰ Asistensia na reunion kristian i studia Beibel personalmente lo yuda nos hopi pa kultivá i mantené un relashon íntimo ku Yehova. Aparentemente, esei tabata e kaso ku e salmista ku a bisa Dios: “O kuantu mi ta stima Bo lei! E ta mi meditashon henter dia.” (Salmo 119:97) Laga nos hasi tur nos posibel anto pa asistí ku regularidat na reunion, asamblea i kongresonan. I laga nos saka tempu pa studia Beibel i meditá riba dje. Ora nos ta “paga muchu mas atenshon” na e Palabra di Dios nos lo haña un gran bendishon.

[Nota]

Bo Ta Kòrda?

• Pakiko algun kristian hebreo a drif bai for dje berdadero fe?

• Kon nos por keda atento na reunionnan kristian?

• Kiko lo yuda nos benefisiá di studia Beibel personalmente i meditá riba dje?

[Preguntanan di Estudio]

[Plachi na página 11]

E kristiannan hebreo mester tabata alerta p’e destrukshon di Yerúsalèm ku tabata tra’i porta

[Plachi na página 13]

Mayornan por yuda nan yunan benefisiá di reunionnan kristian