“Salbashon Ta di Yehova”

ORA tin un krísis nashonal òf tenshon internashonal, pueblo ta spera pa nan gobièrnu duna nan protekshon i siguridat. Gobièrnunan ta bini ku programanan pa haña respaldo di pueblo. I mas sintimentu di patriotismo e tipo di programanan aki fomentá, mas bibu i frekuente e seremonianan patriótiko ta bira.

Ora tin un emergensia nashonal, hopi bes e sintimentu fuerte di patriotismo ta duna pueblo un sentido di unidat i fortalesa i e por promové un spiritu di koperashon i un sintimentu síviko entre nan. Sin embargo, “patriotismo ta mes peligroso ku kualkier otro emoshon,” segun un artíkulo den The New York Times Magazine, pasobra “una bes e no ta bou di kòntròl mas, e por manifestá su mes den maneranan desagradabel i indeseabel.” Manifestashonnan di patriotismo por para bira aktonan ku ta trapa libertat sivil i religioso di sierto siudadanonan den un pais. Foral kristiannan berdadero ta haña nan bou di preshon pa bai kontra nan kreensianan. Kon nan ta komportá nan ora un ambiente asina ta reina den e mundu rònt di nan? Ki prinsipionan di Beibel ta yuda nan aktua ku komprendimentu profundo i mantené nan integridat na Dios?

“No Hinka Rudia Adorá Nan”

Sa sosodé ku e práktika di saludá bandera ta bira un ekspreshon popular di sintimentu patriótiko. Sin embargo, hopi bes bo ta haña representashon di kosnan den shelu, manera strea riba bandera. Nan sa tin tambe representashon di kosnan riba tera. Dios a mustra bon kla kiko e ta pensa tokante bùigmentu pa ophetonan asina ora el a duna su pueblo e prohibishon: “No traha ningun imágen grabá pa bo mes, ni nada semehante na loke tin ariba den shelu, ni abou riba tera, ni den e awa bou di tera. No [“hinka rudia,” Beibel na papiamentu koriente] adorá nan ni sirbi nan, pasobra ami, SEÑOR bo Dios, ta un Dios yalurs.”—Éksodo 20:4, 5.

Pero si bo saludá òf hinka rudia dilanti un bandera di estado, esei realmente ta violá e mandamentu pa duna Yehova Dios deboshon eksklusivo? Mester atmití sí ku e israelitanan di antigwedat tabatin nan “banderanan” òf emblemanan ku nan gruponan di tres tribu tabata usa ora nan tabata reuní den desierto. (Numbernan 2:1, 2) Komentando riba e palabranan hebreo pa e emblemanan ei, e Cyclopedia di McClintock i Strong ta bisa: “Sin embargo, niun di e palabranan aki no ta ekspresá e idea ku nos generalmente tin di un bandera.” Ademas, emblemanan di Israel no a ser konsiderá komo kosnan sagrado, ni no tabatin ningun seremonia konektá ku nan uso. Simplemente nan a sirbi komo un señal òf indikashon, esta, pa mustra e pueblo unda nan mester a reuní.

E imágennan di kerubin den e tabernakel i den e tèmpel di Sálomon a sirbi primordialmente komo un deskripshon di e kerubinnan selestial. (Éksodo 25:18; 26:1, 31, 33; 1 Reinan 6:23, 28, 29; Hebreonan 9:23, 24) E echo ku hende en general nunka tabatin akseso na e imágennan aki i ku hende no mester a adorá  angel, a mustra bon kla ku no mester a adorá e imágennan aki.—Kolosensenan 2:18; Revelashon 19:10; 22:8, 9.

Tuma por ehèmpel e estatua di un kolebra di bròns ku profeta Moises a traha durante e israelitanan su estadia temporal den desierto. E estatua òf imágen ei a sirbi komo un símbolo, i e tabatin un nifikashon profétiko. (Numbernan 21:4-9; Huan 3:14, 15) Nan no a ador’é ni us’é den nan adorashon. Sin embargo, siglonan despues dje tempu di Moises, e israelitanan a kuminsá adorá e mesun imágen ei di un manera inkorekto, i asta a kima sensia na dje. P’esei, Rei Ezekías di Huda a laga kibr’é na wèrki.—2 Reinan 18:1-4.

Banderanan nashonal tin djis un funshon práktiko? Kiko nan ta simbolisá? “Bandera ta e símbolo prinsipal di fe di nashonalismo i e opheto prinsipal di adorashon,” segun e outor J. Paul Williams. The Encyclopedia Americana ta bisa: “Bandera ta mes sagrado ku krus.” Bandera ta e símbolo di estado. P’esei, si bo bùig dilanti un bandera òf salud’é bo ta partisipá na un seremonia religioso ku ta duna adorashon na estado. Un akto asina ta atribuí salbashon na estado i no ta na armonia ku loke Beibel ta bisa tokante idolatria.

E Skritura ta bisa bon kla ku “Salbashon ta di [Yehova, NW].” (Salmo 3:8) No mester atribuí salbashon na institushonnan humano ni na nan símbolonan. Apòstel Pablo a spièrta su kompañeronan kristian: “Mi stimánan, hui for di idolatria.” (1 Korintionan 10:14) E promé kristiannan no a partisipá den aktonan di adorashon di estado. Den su buki Those About to Die (Esnan Ku Ta Serka di Muri), Daniel P. Mannix ta remarká: “Kristiannan a nenga di . . . hasi sakrifisio na e ‘genio’ (òf spiritu wardadó) di emperador [romano], un akto ku ta kasi meskos ku saludá bandera.” Esei ta e kaso awe tambe ku kristiannan berdadero. Dor ku nan ta duna Yehova deboshon eksklusivo, nan no ta saludá bandera di ningun nashon. Asina nan ta pone Dios na promé lugá, miéntras nan ta mustra rèspèt pa gobièrnu i su gobernantenan. Sí, nan ta rekonosé ku nan tin e responsabilidat di ser sumiso na e “outoridatnan ku ta goberná.” (Romanonan 13:1-7) Pero kiko ta e punto di bista bíbliko enkuanto kantikanan patriótiko, manera himno nashonal?

Kiko Ta un Himno Nashonal?

“Un himno nashonal ta un ekspreshon di sintimentunan patriótiko ku hopi bes ta inkluí un petishon na Dios pa su guia i protekshon pa e pueblo i nan gobernantenan,” segun The Encyclopedia Americana. Bon mirá, un himno nashonal ta un kantika òf orashon na fabor di un nashon. Generalmente e ta pidi bida largu i prosperidat material pa e nashon. Kristiannan berdadero mester tuma parti den e orashonnan emoshonal ei?

Profeta Yeremías a biba meimei di hende ku a pretendé di ta sirbi Dios. Sin embargo, Yehova a dun’é e mandato: “No hasi orashon pa e pueblo aki, no roga ni supliká pa nan, i no bin intersedé serka mi, pasobra mi no ta tende bo.” (Yeremías 7:16; 11:14; 14:11) Dikon Dios a duna Yeremías e mandato aki? Pasobra tabatin yen di hòrtamentu, asesinato, aktonan di adulterio, huramentu falsu i idolatria den e pueblo.—Yeremías 7:9.

Hesukristu a pone un ehèmpel ora el a bisa: “No ta pa mundu mi ta pidi, sino pa esnan ku bo a duna mi.” (Huan 17:9) Skritura ta bisa ku “henter mundu ta bou di kòntròl di e malbado” i ku mundu “ta pasa bai.” (1 Huan 2:17; 5:19) Siendo ku esei ta e kaso, kon kristiannan berdadero por resa konsientemente pa prosperidat i bida largu di un mundu asina?

Klaro ku no ta tur himno ta kontené petishon na Dios. “Himno nashonal sentimental por inkluí orashon pa e monarka, pa bataya òf rebelionnan importante p’e nashon . . . òf ekspreshon di sentimentunan patriótiko,” segun e Encyclopædia Britannica. Pero hende ku kier agradá Dios realmente por alegrá pa motibu di guera i revolushon ku tin na kualkier nashon? Relashoná ku adoradónan berdadero,  Isaías a profetisá: “Nan lo bati nan spadanan traha plug ku nan, i nan lo bati nan lansanan traha skèr-pa-snui ku nan.” (Isaías 2:4) Apòstel Pablo a skirbi: “Maske nos ta kana den karni, nos no ta batayá segun karni, pasobra e armanan ku nos ta batayá kuné no ta karnal.”—2 Korintionan 10:3, 4.

Hopi bes himnonan nashonal ta ekspresá sintimentunan di orguyo i superioridat nashonal. E punto di bista aki no ta kuadra ku loke Beibel ta bisa. Den su diskurso na Areópago, apòstel Pablo a bisa: “For di ún sanger [Yehova Dios] a traha tur nashon di hende pa biba riba henter mundu.” (Echonan 17:26) Apòstel Pedro a deklará: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.”—Echonan 10:34, 35.

Dor ku hopi kristian a komprendé loke Beibel ta bisa, nan ta tuma e desishon personal pa no partisipá den saludamentu di bandera ni den kantamentu di kantikanan patriótiko. Pero kon nan ta komportá nan mes ora nan haña nan konfrontá kara kara ku e kuestionnan aki?

Apstené ku Rèspèt

Den un intento pa fortalesé e unidat den su imperio, Rei Nabukodonosor di Babilonia di antigwedat a traha un inmenso imágen di oro riba e sabana di Dura. Despues el a organisá un seremonia di inougurashon na kua el a invitá su sátrapanan, prefektonan, gobernadónan, konseheronan i otro ofisialnan haltu. Ora músika a kuminsá tur hende ku a reuní einan mester a bùig i adorá e imágen. E tres hóbennan hebreo, Sadrak, Mesak i Abèdnego, tambe tabata entre esnan presente. Kon nan a mustra ku nan no ta partisipá den e seremonia religioso aki? Ora e músika a kuminsá i e otro hendenan a kai abou dilanti e imágen, e tres hebreonan a keda pará.—Daniel 3:1-12.

Awendia, hende sa saludá bandera ku brasa habrí òf ku man na kabes òf na nan kurason. Tin bes nan mester para den un posishon spesial. Na algun pais, muchanan na skol tin ku hinka rudia i sunchi e bandera. Kristiannan berdadero ta para ketu miéntras otronan ta saludá bandera, asina nan ta mustra ku nan ta respetá e okashon.

 Kiko si un seremonia di bandera ta ser dirigí di tal forma ku si bo djis para so, bo ta mustra ku bo ta partisipá? Suponé ku na un skol nan ta skohe un alumno pa representá henter skol, i é ta saludá e bandera ku ta kologá na palu parti pafó miéntras ku e otro alumnonan den klas mester para den un posishon atento manera sòldánan sa para. Den e kaso aki e solo echo ku bo ta lanta para ta mustra ku bo ta di akuerdo pa e alumno pará n’e palu di bandera sirbi komo bo representante personal pa saludá e bandera. Na e momentu ei e echo ku bo ta pará ta nifiká ku bo ta partisipá den e seremonia. Si esei ta e kaso, esnan ku kier djis mustra rèspèt mester keda sintá i mantené silensio. Pero kiko si e klas ta pará kaba ora un seremonia asina kuminsá? Den e kaso aki, e echo ku bo keda pará lo no indiká ku bo ta partisipá.

Suponé ku nan no ta pidi bo pa saludá e bandera pero pa djis ten’é, sea ta den un marcha, den klas òf otro kaminda, pa otronan por salud’é. E ora ei, en bes di ‘hui for di idolatria’ manera e Skritura ta manda, esaki realmente lo nifiká ku ta abo ta e sentro di e seremonia. E mesun kos ta konta pa partisipashon den marchanan patriótiko. Konsientemente kristiannan berdadero ta ninga di partisipá den esakinan pasobra si nan hasié, esei ta nifiká ku nan ta apoyá loke e marcha ta onra.

Por lo general ora un himno nashonal ta toka, tur loke un persona tin ku hasi p’e mustra ku e ta di akuerdo ku e letranan di e kantika ta dor di lanta para. Den e kasonan ei, kristiannan ta keda sinta. Sin embargo, si nan tabata pará kaba ora e himno nashonal kuminsá, nan no tin nodi kai sinta spesialmente pa esei. Esaki no ta meskos ku si nan a skohe pa lanta para spesialmente pa e himno. Di otro banda, si e grupo di persona tin ku lanta para i kanta, i un kristian djis lanta para pa mustra rèspèt pero sin ku e ta kanta, esaki lo no nifiká ku e ta partisipá na e seremonia.

 “Mantené un Bon Konsenshi”

Despues ku e salmista a mustra kon inútil ta pa rindi adorashon na opheto ku hende mes a traha, e ta bisa: “Esnan ku ta traha nan lo bira meskos ku nan, tur esnan ku ta konfia den nan.” (Salmo 115:4-8) Ta opvio anto ku kualkier empleo ku tin di haber ku trahamentu di ophetonan di adorashon, inkluso banderanan nashonal, ta inaseptabel pa adoradónan di Yehova. (1 Huan 5:21) Un kristian por hañ’é ku otro situashonnan na trabou ora e mustra nan respetuosamente ku e no ta adorá bandera ni loke e ta representá, sino Yehova so.

Por ehèmpel, un doño di trabou lo por pidi e trahadó pa subi i baha un bandera ku ta kologá na un edifisio. Ku e kristian ta hasi esei òf nò, ta dependé di kon e ta mira e sirkunstansianan. Si e hisamentu i bahamentu di bandera ta parti di un seremonia spesial, ku hende pará den un posishon atento òf ta saludá e bandera, e akto aki lo ta igual ku partisipá den e seremonia.

Di otro banda, si e hisamentu i bahamentu di bandera no ta bai kompañá ku seremonia, e aktonan aki lo ta meskos ku kumpli ku tareanan manera prepará e edifisio pa usa, habri i sera porta i bentana. Den e kasonan ei, e bandera ta djis un emblema di estado, i subi i bah’é ta un dje tareanan rutinario ku un kristian ta disidí personalmente tokante dje, a base di loke su konsenshi bíblikamente entrená ta indiká. (Galationan 6:5) E konsenshi di un persona lo por motiv’é pa pidi su supervisor pa laga un otro trahadó subi i baha e bandera. Un otro kristian lo por sinti ku su konsenshi ta pèrmitié anda ku e bandera basta ku no tin seremonia relashoná kuné. Sea kual sea e desishon, adoradónan berdadero mester “mantené un bon konsenshi” dilanti Dios.—1 Pedro 3:16.

Bíblikamente no tin ningun motibu pa no traha òf bai den edifisionan públiko, manera ofisinanan di gobièrnu i skolnan kaminda tin bandera nashonal kologá. Bo por haña bandera tambe riba stampia, plachi di number di outo i otro kosnan ku gobièrnu ta produsí. Si un persona usa e produktonan aki, esei no ta hasié outomátikamente un partisipante den aktonan religioso. Loke ta importante aki no ta e presensia di e bandera òf un réplika di dje, sino kon un persona ta trata kuné.

Hopi bes nan ta show bandera den bentana, riba porta, outo, lèsenar òf otro opheto. Tambe por kumpra paña ku emblema di bandera imprimí riba dje. Na algun pais lei no ta permití pa bisti paña asina. Asta si lei ta permitié, si un persona bisti nan, kiko esei lo indiká di su posishon pa ku mundu? Relashoná ku su siguidónan, Hesukristu a bisa: “Nan no ta di mundu, meskos ku ami no ta di mundu.” (Huan 17:16) Tambe nos no mester pasa por haltu di e efekto ku un akto asina lo por tin riba kompañeronan kreyente. E por molestiá konsenshi di algun hende? Lo e por suak nan determinashon pa para firme den fe? Pablo a konsehá kristiannan: “Aprobá e kosnan ku ta ekselente, pa ta sinsero i sin [“pone otronan trompeká,” NW].” (Filipensenan 1:10)

“Kariñoso ku Tur Hende”

Segun ku e kondishonnan di mundu ta bayendo atras den e “tempunan trabahoso” aki, ta parse ku e sintimentunan di patriotismo ta bira mas intenso. (2 Timoteo 3:1) No laga ningun hende ku ta stima Dios lubidá ku salbashon ta di Yehova so. E ta meresé deboshon eksklusivo. Ora ku a pidi e disipelnan di Hesus pa hasi algu ku no tabata na armonia ku e boluntat di Yehova, nan a bisa: “Nos mester obedesé Dios mas ku hende.”—Echonan 5:29.

Apòstel Pablo a skirbi: “I e sirbidó di Señor no mester ta pleitadó, ma kariñoso ku tur hende.” (2 Timoteo 2:24) Pues, kristiannan ta hasi esfuerso pa ta pasífiko, respetuoso i kariñoso, miéntras nan ta dependé riba nan konsenshi entrená bíblikamente pa tuma desishonnan personal relashoná ku saludamentu di bandera i kantamentu di himno nashonal.

[Plachi na página 23]

Disididu pero ku tur rèspèt, tres hebreo a skohe pa agradá Dios

[Plachi na página 24]

Kon un kristian mester aktua durante un seremonia patriótiko?