Sigui Praktiká e Kosnan Ku Boso A Siña

“E kosnan ku boso a siña i a risibí i a tende i a mira den mi, praktiká e kosnan aki; i e Dios di pas lo ta ku boso.”—FILIPENSENAN 4:9.

1, 2. Por lo general, Beibel ta ehersé influensia riba bida di hende ku ta konsiderá nan mes religioso? Splika.

“RELIGION Ta Ganando Tereno, Pero Moralidat Ta Pèrdiendo Tereno.” Esaki tabata e titular den e boletin di notisia Emerging Trends ku a resumí e resultadonan di un enkuesta tené rònt Merka. Aparentemente, n’e pais ei tabatin un oumento den e kantidat di hende ku ta bai misa i ku ta bisa ku religion ta okupá un lugá importante den nan bida. Sin embargo, e informe ta bisa: “Apesar di e sifranan impreshonante aki, hopi merikano ta duda fuertemente ku religion tin muchu influensia riba bida di hende i sosiedat en general.”

² No ta den un pais so tin e situashon aki. Rònt mundu, hopi hende ku ta bisa ku nan ta aseptá Beibel i ku nan ta religioso no ta laga e Skritura ehersé un berdadero influensia den nan bida. (2 Timoteo 3:5) “Ainda nos tin hopi rèspèt pa Beibel,” kabes di un grupo di investigashon a deklará, “pero ègt dediká tempu na dje i les’é, studi’é i aplik’é sí ta un kos di pasado.”

3. (a) Ki influensia Beibel tin riba esnan ku bira kristian berdadero? (b) Kon e siguidónan di Hesus ta apliká e konseho di Pablo skirbí na Filipensenan 4:9?

 ³ Sin embargo, serka kristiannan berdadero, e situashon ta diferente. E echo ku nan a apliká konseho for dje Palabra di Dios a trese un kambio den nan manera di pensa i kondukta. I mesora otro hende ta mira e personalidat nobo ku nan ta manifestá. (Kolosensenan 3:5-10) Pa siguidónan di Hesus, Beibel no ta un buki ku ta para kue stòf riba rèki. Al kontrario, apòstel Pablo a bisa kristiannan na Filípos: “E kosnan ku boso a siña i a risibí i a tende i a mira den mi, praktiká e kosnan aki; i e Dios di pas lo ta ku boso.” (Filipensenan 4:9) Kristiannan no ta djis aseptá e bèrdat di e Palabra di Dios. Nan ta praktiká tambe loke nan ta siña. Nan ta apliká konseho di Beibel kontinuamente den famia, na trabou, den e kongregashon i den tur otro área di bida.

4. Pakiko no ta fásil pa pone e leinan di Dios na práktika?

⁴ No ta fásil pa pone e lei i prinsipionan di Dios na práktika. Nos ta biba den un mundu ku ta bou di poder di Satanas e Diabel, kende Beibel ta yama “e dios di e mundu aki.” (2 Korintionan 4:4; 1 Huan 5:19) P’esei, ta esensial pa vigilá kontra kualkier kos ku por stroba nos di hiba un bida ku ta manifestá integridat na Yehova Dios. Kon nos por mantené nos integridat?

Pega na “e Ehèmpel di Palabranan Sano”

5. Kiko e deklarashon di Hesus, ‘sigui mi tur dia’ ta enserá?

⁵ Praktiká loke nos a siña ta enserá entre otro sostené adorashon berdadero lealmente, apesar di oposishon di parti di inkrédulonan. Awante ta rekerí esfuerso. Hesus a bisa: “Si un hende kier bin mi tras, lagu’é nenga su mes i hisa su [staka] tur dia i sigui mi.” (Lukas 9:23) Hesus no a bisa ku nos mester siguié solamente un siman, un luna òf un aña. Mas bien, el a bisa: “Tur dia.” Su palabranan ta indiká ku ser disipel di dje no ta nifiká dediká djis un par di aña di nos bida na religion. Sostené e adorashon berdadero lealmente ta nifiká wanta fielmente den e estilo di bida ku nos a skohe, maske kiko sosodé. Kon nos por hasi esei?

6. Kiko ta e ehèmpel òf patronchi di palabra sano ku e kristiannan di promé siglo a siña for di Pablo?

⁶ Pablo a hasi un apelashon na su kolaboradó Timoteo: “Retené e ehèmpel di palabranan sano ku bo a tende for di mi, den e fe i amor, kuanan ta den Kristu Hesus.” (2 Timoteo 1:13) Kiko Pablo tabata kier men? E palabra griego tradusí aki komo “ehèmpel” (“patronchi,” NW) ta referí literalmente na skèts di un artista. Ounke e falta hopi detaye ainda, un skèts asina tin liñanan bon marká ku ta permití esun ku ta wak e haña un idea general ta kiko e ta. Meskos tambe, e patronchi di e bèrdat ku Pablo a siña Timoteo i otro hende no tabata diseñá pa duna kontesta spesífiko riba tur pregunta ku por presentá. Pero, e kolekshon di siñansa aki ta duna sufisiente guia—meskos ku un skèts— pa hende di kurason onrado por persibí loke Yehova ta eksigí di nan. Klaro ku pa agradá Dios, nan lo tin ku sigui retené e ehèmpel di e bèrdat dor di praktiká loke nan ta siña.

7. Kon kristiannan por pega na e patronchi di palabranan sano?

⁷ Den e promé siglo, personanan manera Himeneo, Alehandro i Fileto tabata promové ideanan ku no tabata kuadra ku “e ehèmpel di palabranan sano.” (1 Timoteo 1:18-20; 2 Timoteo 2:16, 17) Kon e kristiannan di promé por a evitá ku e apóstatanan ei ta engañá nan? Dor di studia e skritura inspirá kuidadosamente i aplik’é den nan bida. Esnan ku a sigui e ehèmpel di Pablo i otro sirbidó fiel por a rekonosé i rechasá kualkier kos ku no a kuadra ku e patronchi di e bèrdat ku nan a siña. (Filipensenan 3:17; Hebreonan 5:14) En bes di tin “un opseshon enkuanto preguntanan kontroversial i pleitamentu tokante di palabra,” nan a sigui move padilanti den nan estilo di bida  positivo di deboshon na Dios. (1 Timoteo 6:3-6) Nos ta hasi meskos ora nos ta sigui apliká e bèrdatnan ku nos a siña. Ora nos mira kon miónes di hende ku ta sirbi Yehova rònt mundu ta pega na e patronchi di e bèrdat di Beibel ku nan a siña, esei ta fortalesé nos.—1 Tesalonisensenan 1:2-5.

Rechasá “Fábula”

8. (a) Kon Satanas ta buska manera pa kaba ku nos fe awe? (b) Ki spièrtamentu Pablo a duna na 2 Timoteo 4:3 i 4?

⁸ Satanas ta purba kibra nos integridat dor di sembra duda tokante loke nos a ser siñá. Awe, meskos ku den e promé siglo, apóstatanan i otro hende ta buska manera di kaba ku e fe di personanan inosente. (Galationan 2:4; 5:7, 8) Tin bes nan ta usa medionan di komunikashon pa plama informashon trosé òf asta mentira flagrante tokante e métodonan ku e pueblo di Yehova ta usa i tambe nan motivashonnan. Pablo a spièrta ku algun hende lo ser alehá for di e bèrdat. El a skirbi: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende, i lo bira nan orea for di e bèrdat, i lo bolbe na fábula.”—2 Timoteo 4:3, 4.

9. Kiko Pablo lo tabatin na mente ora el a referí na “fábula”?

⁹ En bes di retené e ehèmpel di palabra sano, “fábula” a intrigá algun hende. Kiko e fábulanan aki tabata? Tal bes Pablo tabatin na mente leyendanan imaginario, manera esnan ku a aparesé den e buki apókrifo di Tobiás. * Fábulanan lo a inkluí tambe rumornan sensashonal basá riba spekulashon. Anto, tambe algun hende—“pa satisfasé nan mes deseonan”—por a ser engañá mentalmente pa esnan ku a respaldá un punto di bista permisivo di e normanan di Dios òf ku a kritiká esnan ku a hiba delantera den e kongregashon. (3 Huan 9, 10; Hudas 4) Sea kual sea e piedranan di trompeká, aparentemente algun hende a preferá fábula en bes di e bèrdatnan di e Palabra di Dios. No a tarda muchu ku nan a stòp di praktiká e kosnan ku nan a siña, i esaki a perhudiká nan mes den sentido spiritual.—2 Pedro 3:15, 16.

10. Kiko ta algun fábula di e tempu aktual, i kon Huan a mustra ku nos tin ku tene masha kuidou?

¹⁰ Nos por evitá di haña nos ku fábula awe, si nos ta selektivo i ta wak bon kiko nos ta skucha i kiko nos ta lesa. Por ehèmpel, hopi bes medionan di komunikashon ta promové inmoralidat. Hopi hende ta na fabor di agnostisismo i ateismo abierto. Krítikonan ta ridikulisá e idea ku Beibel ta inspirá pa Dios. I e  apóstatanan moderno ta sigui purba sembra simia di duda pa debilitá e fe di kristiannan. Relashoná ku e mesun tipo di peliger ku profetanan falsu a presentá den e promé siglo, apòstel Huan a spièrta: “Stimánan, no kere tur spiritu, ma pone e spiritunan na prueba pa mira si nan ta bin di Dios, pasobra hopi profeta falsu a sali bai den mundu.” (1 Huan 4:1) Pues nos tin ku tene masha kuidou.

11. Den ki manera nos por saminá nos mes i mira si nos ta den e fe?

¹¹ En konekshon ku esaki, Pablo a skirbi: “Saminá boso mes pa wak si boso ta den e fe.” (2 Korintionan 13:5) E apòstel a hasi un yamada pa nos saminá nos mes pa determiná si nos ta pegando na henter e kolekshon di kreensianan kristian. Si nos oreanan ta gusta skucha esnan ku ta kritiká, nos tin ku eksaminá nos mes huntu ku orashon. (Salmo 139:23, 24) Nos ta inkliná na kritiká òf buska fayo den Yehova su sirbidónan? Si ta asina, pakiko? E akshonnan òf palabranan di un persona a ofendé nos? Si ta asina, nos ta manteniendo kosnan den nan perspektiva korekto? Kualkier tribulashon ku nos ta enfrentá den e sistema di kosnan aki ta temporal. (2 Korintionan 4:17) Asta si nos haña nos ku prueba den e kongregashon, pakiko nos mester stòp di sirbi Dios? Si tin algu ta molestiá nos, no ta muchu mas mihó pa hasi tur nos posibel pa resolvé e asuntu anto laga kosnan den man di Yehova?—Salmo 4:4; Proverbionan 3:5, 6; Efesionan 4:26.

12. Ki bon ehèmpel e bereanonan a pone pa nos?

¹² En bes di ta krítiko, laga nos mantené un punto di bista spiritual saludabel di e informashon ku nos ta risibí mediante studio personal i reunionnan di kongregashon. (1 Korintionan 2:14, 15) I en bes di duda den e Palabra di Dios, ta hopi mas sabí pa nos tin e aktitut dje bereanonan di promé siglo ku a investigá e Skritura kuidadosamente! (Echonan 17:10, 11) Laga nos kumpli ku loke nos a siña dor di rechasá fábula i pega na e bèrdat.

13. Kon nos por ta plamando fábula sin ku nos sa?

¹³ Tin un otro tipo di fábula ku nos tin ku tene masha kuidou kuné. Tin masha hopi kuenta sensashonal ta sirkulá, hopi bes via e-mail. Ta sabí pa paga tinu ku kuentanan asina, spesialmente ora nos no konosé e fuente original dje informashon. Asta ora e eksperensia òf historia a bini di un ruman ku tin bon reputashon, podisé e mes ta di otro hende el a haña e detayenan. P’esei ta importante pa tene kuidou ku ripití òf manda kuentanan pa otro hende sin a verifiká esakinan promé. Nos sigur lo no kier ripití mitonan engañoso òf “fábulanan profano i di muhé bieu.” (1 Timoteo 4:7) Siendo ku nos tin un obligashon tambe pa papia e bèrdat ku otro, ta sabí di nos parti pa evitá tur loke por pone nos papia falsedat ku otro hende sin ku nos sa.—Efesionan 4:25.

 Esnan Ku Ta Praktiká e Bèrdat Ta Benefisiá

14. Ki benefisionan nos ta haña ora nos ta praktiká e kosnan ku nos a siña for di e Palabra di Dios?

¹⁴ Ora nos ta praktiká loke nos ta siña mediante un studio personal di Beibel i di reunionnan kristian nos ta haña hopi benefisio. Por ehèmpel, nos lo por ripará ku nos relashon ku esnan ku ta ligá ku nos den fe ta mehorá. (Galationan 6:10) Ora nos ta apliká prinsipionan bíbliko nos mes ta haña un mihó genio. (Salmo 19:8) Ademas, dor di praktiká loke nos ta siña, nos ta “dòrna e doktrina di Dios” i e chèns ta grandi ku nos ta atraé otro hende na e adorashon berdadero.—Tito 2:6-10.

15. (a) Kon un hóben a tuma un kurashi pa duna testimonio na skol? (b) Kiko bo a siña for di e eksperensia aki?

¹⁵ Entre e Testigunan di Yehova tin hopi hóben ku ta praktiká loke nan a siña mediante studio personal di Beibel i publikashonnan kristian i tambe dor di ta presente regularmente na reunionnan di kongregashon. Nan kondukta ekselente ta un gran testimonio pa maestronan i nan koleganan na skol. (1 Pedro 2:12) Tuma por ehèmpel e kaso di Leslie, un hobensita di 13 aña di edat na Merka. E ta atmití ku normalmente tabata hopi difísil p’e papia ku e muchanan di su skol tokante su fe, pero un dia kosnan a kambia. “E klas tabata papia tokante kon hende ta purba bende bo un kos. Un mucha muhé a hisa dede i menshoná Testigu di Yehova komo ehèmpel.” Komo un Testigu, kon Leslie a reakshoná? “Mi a defendé mi fe,” e ta bisa, “ku mi tin sigur a sorprendé tur hende, ya ku por lo general na skol mi ta ketu.” Kiko tabata e resultado di Leslie su kurashi? “Mi por a laga un foyeto i un tratado ku e studiante, ya ku e tabatin mas pregunta,” Leslie ta bisa. Ora hóbennan ku ta praktiká loke nan a siña ta tuma un kurashi pa duna testimonio na skol, nan ta hasi Yehova kontentu!—Proverbionan 27:11; Hebreonan 6:10.

16. Kon e Skol di Ministerio Teokrátiko a benefisiá un Testigu hóben?

¹⁶ Un otro ehèmpel ta esun di Elizabeth. Ku su shete aña di edat i durante tur su añanan na skol básiko, e hobensita aki tabata invitá su mener i yùfrounan di skol na Salon di Reino ki ora ku e tabatin un asignashon den e Skol di Ministerio Teokrátiko. Si un di nan no por a bini, Elizabeth tabata keda despues di skol i presentá e diskurso pa e mener òf yùfrou. Den su último aña di skol sekundario, Elizabeth a skirbi un rapòrt di dies página riba e benefisionan di e Skol di Ministerio Teokrátiko i a hasi un presentashon dilanti un pènel di kuater mener ku yùfrou. Tambe nan a invit’é pa duna un parti manera e sa duna den e Skol di Ministerio Teokrátiko, pa kua el a skohe e tema: “Pakiko Dios Ta Permití Maldat?” Elizabeth a benefisiá di e programa di edukashon ku Testigunan di Yehova ta sigui den e Skol di Ministerio Teokrátiko. E ta apénas un dje hopi hóbennan kristian ku ta trese alabansa na Yehova dor di praktiká e kosnan ku nan ta siña for di su Palabra.

17, 18. (a) Ki konseho Beibel ta duna relashoná ku onrades? (b) Ki bon efekto e kondukta onrado di un Testigu di Yehova tabatin riba un hòmber?

¹⁷ Beibel ta spièrta kristiannan pa komportá  nan mes onradamente den tur kos. (Hebreonan 13:18) Falta di onrades por daña nos relashon ku otro hende, i pió ainda, ku Yehova mes. (Proverbionan 12:22) Nos kondukta konfiabel ta duna evidensia ku nos ta praktikando e kosnan ku nos a siña, i esei ta pone hopi hende haña muchu mas rèspèt pa Testigunan di Yehova.

¹⁸ Tuma por ehèmpel e eksperensia di un militar ku yama Phillip. El a pèrdè un chèk firmá sin montante yená i no a realisá esaki sino te ora un hende a mand’é bèk p’e via pòst. Ta un Testigu di Yehova a haña e chèk, i el a debolb’é na su doño ku un nota ku ta bisa ku ta su kreensianan religioso a motiv’é p’e hasi esei. Phillip a keda babuká. “Nan por a hòrta 16.000 florin for di mi!” el a bisa. Na un otro okashon nan a hòrta su sombré den misa i esei a lag’é keda desapuntá. Aparentemente, ta un konosí di dje a kue su sombré, miéntras ku ta un hende straño a debolbé un chèk ku tabata bal míles di florin! En bèrdat, kristiannan onesto ta trese onor pa Yehova Dios!

Sigui Praktiká Loke Boso A Siña

19, 20. Ki benefisio nos ta haña ora nos ta aktua na armonia ku e kosnan bíbliko ku nos ta siña?

¹⁹ Esnan ku ta praktiká loke nan a siña for di e Palabra di Dios ta kosechá masha hopi benefisio. Disipel Santiago a skirbi: “Esun ku fiha su bista riba e lei perfekto, e lei di libertat, i ta permanesé den dje, sin bira un tendedó lubidadó, sino un kumplidó bèrdadero, e hende aki lo ta bendishoná den loke e ta hasi.” (Santiago 1:25) Efektivamente, si nos aktua na armonia ku e kosnan bíbliko ku nos siña, nos lo tin berdadero felisidat i nos lo ta mas kapas pa enfrentá e preshonnan di bida. Mas ku tur kos, nos lo tin e bendishon di Yehova i e posibilidat di biba pa semper!—Proverbionan 10:22; 1 Timoteo 6:6.

²⁰ Laga nos hasi tur nos posibel anto pa sigui dediká nos mes na studia e Palabra di Dios. Reuní regularmente ku adoradónan di Yehova i presta atenshon na e informashon ku ta ser presentá na reunionnan kristian. Apliká loke bo siña, sigui praktik’é i “e Dios di pas lo ta ku boso.”—Filipensenan 4:9.

[Nota]

Bo Ta Kòrda?

• Kiko ta “e ehèmpel di palabranan sano,” i kon nos por reten’é?

• Ki “fábula” nos tin ku rechasá?

• Ki benefisionan tin pa esnan ku ta praktiká e kosnan ku nan ta siña for di e Palabra di Dios?

[Preguntanan di Estudio]

[Plachi na página 17]

Kon e promé kristiannan por a evitá ku e apóstatanan a desviá nan?

[Plachi na página 18]

Medionan di komunikashon, Internet i apóstatanan moderno por sembra simia di duda den nos

[Plachi na página 19]

No ta sabí pa sirkulá informenan sin verifiká nan promé

[Plachi na página 20]

Na trabou, na skol i otro kaminda Testigunan di Yehova ta apliká loke nan ta lesa den e Palabra di Dios