Desaroyá Obedensia Segun Ku e Fin Ta Yega Serka

‘Nashonnan lo obedesé Silo.’—GÉNESIS 49:10.

1. (a) Den pasado, si bo kier a obedesé Yehova, kiko esei a nifiká hopi bes? (b) Kua profesia tokante obedensia Yakòb a ekspresá?

DEN pasado, hopi bes tabata asina ku si bo kier a obedesé Yehova bo mester a obedesé su representantenan. Entre e representantenan aki tabatin angel, patriarka, hues, saserdote, profeta i rei. Beibel a asta yama e trono dje reinan di Israel e trono di Yehova. (1 Krónikanan 29:23) Pero lamentablemente, hopi dje gobernantenan di Israel a desobedesé Dios i a trese kalamidat riba nan mes i nan pueblo. Tòg Yehova no a laga hende leal na dje sin speransa. El a konsolá nan ku e promesa di nombra un Rei ku lo ta inkapas pa bira korupto, i ku hende hustu lo obedesé ku gustu. (Isaías 9:6, 7) Ora e patriarka Yakòb tabata riba su kama di morto el a profetisá tokante e gobernante binidero aki. El a bisa: “E sèpter lo no kita for di Huda, ni e bara di gobernadó for di meimei di su pia, te ora Silo bin, i nashonnan lo obedes’é.”—Génesis 49:10.

2. Kiko

² “Silo” ta un ekspreshon hebreo ku ta nifiká “Esun di Ken E Ta,” òf “Esun na Ken E Ta Pertenesé.” Pues, loke Silo tabata bai heredá ta nada ménos ku e derecho di goberná (ku ta loke e sèpter, òf baston di rei, a simbolisá) i e poder di manda (loke e bara di gobernadó a  representá). Ademas, su gobernashon real lo no tabata riba e desendientenan di Yakòb so, sino riba tur ‘nashon.’ Esaki ta kuadra ku loke Yehova a primintí Abraham: “Bo desendientenan lo poseé e porta di nan enemigunan. I den bo desendientenan [literalmente, simia] tur e nashonnan di e tera lo ta bendishoná.” (Génesis 22:17, 18) Na aña 29 di nos era Yehova a konfirmá ken e simia aki ta, ora el a ungi Hesus di Názarèt ku spiritu santu.—Lukas 3:21-23, 34; Galationan 3:16.

E Promé Reino di Hesus

3. Ki gobièrnu Hesus a risibí ora el a subi na shelu?

³ Ora Hesus a subi na shelu e no a kuminsá goberná mesora riba e nashonnan di mundu. (Salmo 110:1) Pero tòg el a risibí un “reino” i súpditonan ku a obedes’é. Apòstel Pablo a identifiká e reino ei ora el a skirbi: “[Dios] a libra nos [kristiannan ungí ku spiritu] di e poder di skuridat, i a trasladá nos pa e reino di su Yu stimá.” (Kolosensenan 1:13) Dios a kuminsá libra nan na Pentekòste di aña 33 di nos era, ora el a drama spiritu santu riba e siguidónan fiel di Hesus.—Echonan 2:1-4; 1 Pedro 2:9.

4. Kon e promé disipelnan di Hesus a mustra ku nan tabata obediente, i kon Hesus a yama nan komo grupo?

⁴ Komo “embahadornan pa Kristu,” obedientemente e disipelnan ungí ku spiritu a kuminsá rekohé mas hende pa bira “konsiudadano” ku nan den e reino spiritual ei. (2 Korintionan 5:20; Efesionan 2:19; Echonan 1:8) Ademas, pa nan por tin e aprobashon di nan Rei Hesukristu, nan mester a keda “perfektamente uní den e mesun mente i den e mesun opinion.” (1 Korintionan 1:10) Komo grupo nan a forma “e esklabo fiel i prudente,” un grupo ku ta hasi trabou di un enkargado òf mayordomo fiel.—Mateo 24:45; Lukas 12:42.

Bendishoná dor Ku Nan A Obedesé Dios Su “Mayordomo”

5. Kon Yehova a instruí su pueblo for di antigwedat?

⁵ Semper Yehova a sòru pa su pueblo tin maestro. Por ehèmpel, despues ku e hudiunan a bolbe for di Babilonia, Èsdras ku un par di otro hòmber kapasitá a hasi mas ku djis lesa e Lei di Dios p’e pueblo; nan a “splika” e lei i a ‘duna e nifikashon, pa nan komprendé’ e Palabra di Dios.—Nehemías 8:8.

6, 7. Kon e grupo esklabo a perkurá kuminda spiritual na ora pa medio di su Kuerpo Gobernante, i dikon ta korekto pa nos ta sumiso na e grupo esklabo?

⁶ Na aña 49 di nos era, ora un kuestion a lanta tokante sirkumsishon, e kuerpo gobernante dje grupo esklabo dje tempu ei a trata e asuntu ku orashon i a yega na un konklushon basá riba Beibel. Ora  nan a anunsiá via karta kiko nan a disidí, e kongregashonnan a obedesé e guia ku nan a risibí, i nan a disfrutá di hopi bendishon for di Dios. (Echonan 15:6-15, 22-29; 16:4, 5) Den nos tempu tambe e esklabo fiel a aklará sierto asuntunan importante pa medio di su Kuerpo Gobernante; por ehèmpel tokante e posishon neutral di un kristian, santidat di sanger i uso di droga i tabako. (Isaías 2:4; Echonan 21:25; 2 Korintionan 7:1) Yehova a bendishoná su pueblo debí ku nan a obedesé su Palabra i e esklabo fiel.

⁷ Dor di someté nan mes na e grupo esklabo, Dios su pueblo ta mustra ku nan ta sumiso na nan Doño Hesukristu tambe. Den nos tempu e sumishon ei ta asta mas signifikativo, pasobra manera e profesia ku Yakòb a duna riba su kama di morto a indiká, awor Hesus su outoridat ta mas amplio.

Silo Ta Bira Gobernante Legítimo di Tera

8. Kon i na ki tempu e outoridat di Kristu a ser ampliá?

⁸ E profesia di Yakòb a bisa ku ‘nashonnan lo obedesé Silo.’ Klaramente anto, no ta riba Israel spiritual so Kristu lo a goberná. Kiko su gobernashon lo a abarká? Revelashon 11:15 ta kontestá: “E reino di mundu a bira e reino di nos Señor, i di su Kristu; i e lo reina pa semper i semper.” Beibel ta revelá ku Hesus a risibí e outoridat ei despues di “shete periodo di tempu” profétiko, “e tempunan di e paganonan,” ku a terminá na aña 1914. * (Daniel 4:16, 17; Lukas 21:24) N’e aña ei Kristu su “presensia” invisibel komo Rei Mesiániko a kuminsá, i a yega e tempu pa e sali ‘goberná meimei di su enemigunan.’—Mateo 24:3, NW; Salmo 110:2.

9. Kiko Hesus a hasi ora el a risibí su Reino, i ki efekto indirekto esei tabatin riba humanidat, i spesialmente riba su disipelnan?

⁹ E promé kos ku Hesus a hasi despues ku el a risibí poder di rei tabata di tira Satanas, kende ta desobedensia en persona, “abou riba tera” huntu ku su demoñonan. For dje tempu ei padilanti e mal spiritunan aki a trese kalamidat riba humanidat manera nunka promé. Na mes momentu nan a yuda krea un ambiente den kua no ta fásil pa obedesé Yehova. (Revelashon 12:7-12; 2 Timoteo 3:1-5) De echo, e ophetivo prinsipal di Satanas su guera spiritual ta Yehova su ungínan, esnan ku “ta warda e mandamentunan di Dios i tin e testimonio di Hesukristu,” huntu ku nan kompañeronan e “otro karnénan.”—Revelashon 12:17; Huan 10:16.

10. Kumplimentu di kua profesianan di Beibel ta garantisá nos ku e guera spiritual di Satanas kontra kristiannan berdadero lo frakasá?

¹⁰ Pero Satanas ta kondená na frakaso, pasobra esaki ta “e dia di Señor,” i nada no por stroba Hesus di kompletá su ‘konkista.’ (Revelashon 1:10; 6:2) Entre otro lo e perkurá pa e seyamentu final dje 144.000 israelita spiritual tuma lugá. Tambe lo e protehá “un multitut  grandi ku ningun hende no por a konta, di tur nashon i tur tribu i pueblo i lenga.” (Revelashon 7:1-4, 9, 14-16) Pero un diferensia ku tin entre nan i nan kompañeronan ungí ta, ku ta riba tera e multitut grandi lo bai sirbi Hesus komo su pueblo obediente. (Daniel 7:13, 14) E solo echo ku nan a aparesé riba panorama mundial ya ta un evidensia konkreto di ku Silo ta gobernando kaba riba “e reino di mundu.”—Revelashon 11:15.

Awor Ta Tempu pa ‘Obedesé e Bon Nobo’

11, 12. (a) Ken so lo sobrebibí e fin dje sistema mundial aktual? (b) Hende ku apsorbá “e spiritu di mundu” ta desaroyá ki tipo di personalidat?

¹¹ Tur hende ku kier haña bida eterno mester siña obedesé, pasobra Beibel ta mustra bon kla ku “esnan ku no konosé Dios i . . . esnan ku no ta obedesé e evangelio [òf, bon nobo] di nos Señor Hesus” lo no sobrebibí Dios su dia di vengansa. (2 Tesalonisensenan 1:8) Pero debí na e ambiente malbado i e spiritu di rebeldia ku ta reina aktualmente kontra e leinan i prinsipionan di Beibel, no ta fásil pa obedesé e bon nobo.

¹² Beibel ta yama e aktitut di rebeldia aki kontra Dios “e spiritu di mundu.” (1 Korintionan 2:12) Den un karta pa e kristiannan di promé siglo na Efeso apòstel Pablo a deskribí e efekto dje spiritu aki, bisando: “Boso tabata kana ántes segun e kurso di e mundu aki, segun e prens di e poder di laira, di e spiritu ku ta obra awor den e yunan di desobedensia. Nos tur tambe tabata biba ántes meimei di nan, den e pashonnan di nos karni, kumpliendo ku e deseonan di karni i di mente, i tabata di naturalesa yunan di furia, meskos ku e otronan.”—Efesionan 2:2, 3.

13. Kon kristiannan por tin éksito den resistí e spiritu di mundu, i ki bon resultado esei ta duna?

¹³ Ta bon ku e kristiannan di Efeso no a keda esklabo dje spiritu di desobedensia ei. Nò, nan a bira yu obediente di Dios dor di someté nan mes na su spiritu i a kosechá su fruta sano i abundante. (Galationan 5:22, 23) Awe tambe e spiritu di Dios, e forsa mas poderoso di universo, ta yudando miónes di hende bira obediente na Yehova, i komo resultado nan por tin “e siguransa kompleto di speransa te na fin.”—Hebreonan 6:11; Zakarías 4:6.

14. Kon Hesus a spièrta tur kristian ku ta biba den e último dianan tokante algun kos spesífiko ku lo a tèst nan obedensia?

¹⁴ Tene na mente tambe ku nos tin e apoyo poderoso di Silo, kende huntu ku su Tata lo no laga niun enemigu, ni demoño ni hende, tèst nos obedensia mas di loke nos por soportá. (1 Korintionan 10:13) De echo, Hesus a yuda nos den nos guera spiritual dor di deskribí vários problema ku nos lo a bin enfrentá awor durante e último dianan. El a hasi esei via shete karta ku el a duna nos den un vishon ku apòstel Huan a risibí. (Revelashon 1:10, 11) Sin duda, e konsehonan ku nan ta kontené tabata vital pa e kristiannan dje tempu ayá, pero nan ta konta prinsipalmente durante “e dia di Señor” ku a kuminsá na 1914. P’esei, ta bon pa nos presta atenshon na e mensahenan ei! *

Evitá Indiferensia, Inmoralidat i Materialismo

15. Pakiko nos mester paga tinu pa nos no ser afektá dor dje mesun problema ku a afektá e kongregashon na Efeso, i kon nos por hasi esei? (2 Pedro 1:5-8)

¹⁵ E promé karta di Hesus tabata pa e kongregashon na Efeso. Hesus a kuminsá na elogiá e kongregashon pa su perseveransia, i despues el a bisa nan: “Ma mi tin esaki kontra bo, ku bo a bandoná bo promé amor.” (Revelashon 2:1-4) Awendia tambe tin kristian ku ántes tabatin selo, pero ku a pèrdè e amor ferviente ku nan tabatin pa Dios. Esei por suak un hende su relashon ku Dios, i p’esei mester tuma medida lihé. Kon e por rebibá e amor ei? Dor di studia Beibel, asistí na reunion, hasi orashon i meditá  ku regularidat. (1 Huan 5:3) Ta bèrdat ku tur esaki ta eksigí esfuerso òf “diligensia,” pero e ta bale la pena sigur. (2 Pedro 1:5-8) Si bo eksaminá bo mes ku frankesa i mira ku bo amor a fria, korigí e problema aki lihé, manera Hesus a animá nos ku urgensia: “Kòrda for di unda bo a kai, i repentí i hasi e obranan ku bo tabata hasi promé.”—Revelashon 2:5.

16. Ki influensianan a eksistí den e kongregashonnan na Pérgamo i Tiatira ku a pone nan spiritualidat na peliger, i dikon loke Hesus a bisa nan ta bon pa nos awe?

¹⁶ Hesus a elogiá e kristiannan na Pérgamo i Tiatira pa nan integridat, nan perseveransia i nan selo. (Revelashon 2:12, 13, 18, 19) Pero nan tabata bou di influensia di un par di hende ku tabata manifestá e aktitut malbado di Balam i Yezabèl, kendenan a korumpí Israel di antigwedat dor di influensiá e nashon pa kometé inmoralidat seksual i adorá Baal. (Numbernan 31:16; 1 Reinan 16:30, 31; Revelashon 2:14, 16, 20-23) Pero, kiko di nos tempu, “e dia di Señor”? Nos por detektá e mesun tipo di influensia ei awe tambe? Sí, pasobra ta inmoralidat ta e motibu prinsipal di ekspulshon den e pueblo di Dios. P’esei mes ta hopi importante pa nos evitá di asosiá ku ken ku por korumpí nos moralmente, sea nan ta den kongregashon òf pafó! (1 Korintionan 5:9-11; 15:33) Hende ku kier ta súpdito obediente di Silo ta evitá tur tipo di dibertishon kuestionabel i pornografia, sea riba papel òf via Internet.—Ámos 5:15; Mateo 5:28, 29.

17. Ki punto di bista i aktitut e kristiannan na Sárdis i Laodisea tabatin, pero kiko Hesus a pensa di nan kondishon spiritual?

¹⁷ Ku eksepshon di un par di persona so, e kongregashon di Sárdis no a risibí ningun elogio. E tabatin “e nòmber di ta bibu,” esta, e tabata parse bibu. Pero indiferensia spiritual a poderá di dje asina tantu ku den bista di Hesus e tabata “morto.” Pa nan, obedesé e bon nobo tabata práktikamente djis un formalidat. Esta un denunsia fuerte! (Revelashon 3:1-3) E kongregashon na Laodisea su situashon no tabata muchu diferente. Nan tabata broma ku nan rikesa material, bisando: “Mi ta riku,” pero den bista di Kristu nan tabata “deplorabel i miserabel, pober, siegu i sunú.”—Revelashon 3:14-17.

18. Kon nos por evitá di bira spiritualmente lou den bista di Dios?

¹⁸ Awendia, algun kristian ku ántes tabata fiel tambe a kai den e mesun forma di desobedensia. Kisas nan a laga e spiritu di mundu baha e sentido di urgensia ku nan tabatin  den bida, i pone nan desaroyá un aktitut spiritualmente lou pa loke ta studio di Beibel, orashon, reunionnan kristian i predikashon. (2 Pedro 3:3, 4, 11, 12) Ta sumamente importante pa nan obedesé Kristu i invertí den rikesa spiritual. Sí, nan tin ku “kumpra serka [Kristu] oro refiná den kandela”! (Revelashon 3:18) Ser riku den e sentido berdadero ei kier men entre otro kos ku nos ta ‘riku den bon obra, generoso i dispuesto pa kompartí.’ Si nos invertí den e rekursonan spiritual presioso aki, nos lo ‘montoná pa nos mes e tesoro di un bon fundeshi pa futuro, pa nos gara loke ta e bida berdadero.’—1 Timoteo 6:17-19.

Elogiá pa Nan Obedensia

19. Ki elogio i animashon Hesus a duna e kristiannan na Smirna i Filadelfia?

¹⁹ E kongregashonnan na Smirna i Filadelfia ta resaltá komo ehèmpelnan di obedensia, pasobra Hesus no tabatin ningun motibu pa korigí nan den su kartanan. El a bisa esnan na Smirna: “Mi konosé bo tribulashon i bo pobresa, sin embargo, bo ta riku.” (Revelashon 2:9) Esaki ta nèt kontrali ku e kristiannan na Laodisea ku a broma ku nan rikesa mundano, siendo ku den sentido spiritual nan tabata pober! Klaru ku Diabel no a keda kontentu di mira niun hende mustra fieldat i obedensia na Kristu. P’esei Hesus a spièrta nan: “No tene miedu di loke bo ta bai sufri. Mira, Diabel ta bai tira algun di boso den prizòn, pa boso wòrdu poné na prueba, i boso lo sufri tribulashon dies dia largu. Sea fiel te na morto i lo mi duna bo e korona di bida.” (Revelashon 2:10) Meskos Hesus a elogiá e kristiannan di Filadelfia, bisando: “[Bo] a warda mi palabra [esta, obedesé mi], i no a nenga mi nòmber. Mi ta bin pronto; tene firme na loke bo tin, pa ni un hende no kita bo korona.”—Revelashon 3:8, 11.

20. Kon miónes di hende awe a warda e palabra di Hesus, i apesar di ki sirkunstansianan?

²⁰ Den e “dia di Señor,” ku a kuminsá na 1914, un resto fiel i nan kompañeronan, e miónes di otro karnénan ku tin awor, tambe a warda e palabra di Hesus dor di kumpli ku nan ministerio selosamente i mantené nan integridat firmemente. Algun di nan a sufri debí ku nan a obedesé Kristu, meskos ku nan rumannan den promé siglo. Hende a asta sera algun di nan den prizòn i kampo di konsentrashon. Otronan a warda Hesus su palabra dor di tene nan ‘wowo simpel’ apesar ku nan ta rondoná pa rikesa i golosidat. (Mateo 6:22, 23, NW) Sí, den tur situashon i tur sirkunstansia, kristiannan berdadero ta sigui hasi Yehova su kurason kontentu ku nan obedensia.—Proverbionan 27:11.

21. (a) Ki obligashon spiritual e grupo esklabo lo sigui kumpli kuné? (b)  Kon nos por mustra ku di bèrdat nos kier obedesé Silo?

²¹ Segun ku e gran tribulashon ta yega serka, “e esklabo fiel i prudente” ta keda ku e determinashon di no komprometé nan obedensia na Kristu nan Doño. P’esei, entre otro kos, nan ta sigui prepará alimento spiritual na ora pa e kas di Dios. Pues, laga nos sigui mustra apresio pa Yehova su maravioso organisashon teokrátiko, i tur loke e ta perkurá pa nos. Asina nos ta mustra ku nos ta sumiso na Silo, kende lo rekompensá henter su pueblo obediente ku bida eterno.—Mateo 24:45-47; 25:40; Huan 5:22-24.

[Nota]

“Silo” ta nifiká, i riba ken Silo lo a ehersé gobernashon real?

Bo Ta Kòrda?

• Ki papel Hesus tin, di akuerdo ku loke Yakòb a profetisá riba su kama di morto?

• Kon nos por mustra ku nos ta rekonosé ku Hesus ta Silo, i kua spiritu nos mester evitá?

• Ki konseho apropiá pa nos tempu tin den e kartanan na e shete kongregashonnan di Revelashon?

• Den ki maneranan nos por imitá e kristiannan dje kongregashonnan di Smirna i Filadelfia di antigwedat?

[Preguntanan di Estudio]

[Plachi na página 18]

Yehova ta bendishoná su pueblo debí ku nan ta obedesé e “mayordomo” fiel

[Plachi na página 19]

Debí na e influensia di Satanas, no ta fásil pa obedesé Dios

[Plachi na página 21]

Un relashon fuerte ku Yehova ta yuda nos obedes’é