Hóbennan Ku Ta Stima e Bèrdat

“KON un hóben por tene su kaminda puru?” Esaki ta loke un salmista hebreo a puntra míles di aña pasá. (Salmo 119:9) Te awe ainda esei ta un bon pregunta, pasobra hóbennan ta enfrentá hopi problema den mundu. Hopi hóben a haña AIDS debí na un bida seksual parotin. Un di kada dos hende infektá ku e enfermedat mortal aki tin 15 pa 24 aña di edat. Uso di droga tambe ta hinka hóbennan den hopi problema, i ta pone ku hopi di nan ta muri promé ku tempu. E influensia di muzik baho, pelíkula, programa di televishon i vidio inmoral i violento, i pornografia riba Internet ta hasi hóbennan hopi daño mes. P’esei, e pregunta ku e skirbidó di salmo a hasi ta di gran interes pa hopi mayor i hóben di awendia.

E salmista a kontestá su mes pregunta dje siguiente manera: “Dor di mantené esei [su kaminda] segun bo palabra.” Sí, Beibel, e Palabra di Dios, ta ofresé hóbennan guia ekselente, i hopi di nan ta hañando éksito den bida dor ku nan ta sigui e guia ei. (Salmo 119:105) Laga nos wak un par di ehèmpel di hóbennan ku ta stima Dios i ku ta hasi nan esfuerso pa keda fuerte den sentido spiritual, apesar ku nan ta biba den un mundu materialista i loko pa plaser.

Apresio p’e Guia di Nan Mayornan

Jacob Emmanuel a traha un par di aña komo predikadó di tempu kompletu (pionero), promé ku el a bai sirbi na e sukursal di Testigunan di Yehova na Mèksiko. E ta kòrda ku apresio kon bini el a desaroyá e amor ku e tin pa e sirbishi di Dios: “Ounke tabatin sierto rumannan spiritual ku eksperensia ku mi a sera amistat kuné i ku a yuda mi hopi, ta mi mayornan tabata e influensia prinsipal riba mi. Nan a motivá mi pa stima e trabou di prediká. Na un manera suave nan a guia mi riba e kaminda korekto. Nunka mi no a sinti ku nan tabata pone preshon riba mi.”

David tin vários aña kaba den e sirbishi di tempu kompletu, i e ta kòrda ku e echo ku su mayornan a kuminsá sirbi komo pionero spesial tempu ku e i su ruman tabata chikitu, a hasi un gran impreshon riba dje. Despues ku su tata a muri, su mama a keda den e sirbishi di pionero spesial. Fuera di prediká e bon nobo, su mama a perkurá pa nan. David ta konta: “Nunka nan no a obligá mi traha pionero, pero nos a disfrutá asina tantu di traha pionero komo famia, ku e kompañerismo i e bon ambiente ku tin den e trabou a impulsá mi tambe pa drenta e trabou.” David ta bisa lo siguiente tokante e importansia di haña bon guia i atenshon serka mayornan: “Tur anochi mi mama tabata lesa historia pa nos for dje buki For di paradijs perdí te na paradijs recobrá. * E manera ku el a konta nos e historianan a habri nos apetit pa alimento spiritual.”

Apresio pa Reunionnan

Algun hóben tin difikultat pa sinti e balor di reunionnan kristian. Nan ta bai reunion dor ku nan mayornan ta bai ku nan. Maske ta asina, si nan no stòp di bai reunion, por yega e dia ku nan ta bin gusta e  reunionnan. Wak e ehèmpel di Alfredo. El a kuminsá den e sirbishi di tempu kompletu ku 11 aña di edat. E ta konta frankamente ku tempu e tabatin rònt di sinku aña, e tabata purba evitá di bai reunion pasobra e tabata haña soño, pero su mayornan no tabata lag’é drumi durante reunion. E ta bisa: “Segun ku mi a krese, pokopoko mi a haña mas interes den e reunionnan, i prinsipalmente ora mi a siña lesa i skirbi, pasobra e ora ei mi a kuminsá duna komentario ku mi mes palabra.”

Cintia, un mucha muhé di 17 aña ku ta sirbi komo pionero regular, ta konta kon bon asosiashon a yud’é siña stima e sirbishi di Dios. E ta bisa: “Dor ku mi tabatin un bon relashon ku e rumannan i mi tabata bai reunion regularmente, mi no a sinti falta di amigu di mundu ni di e aktividatnan ku hóbennan ta gusta, manera bai diskotèk. E komentario- i eksperensianan ku mi tabata tende na reunion a lanta den mi un deseo di duna Yehova tur loke mi tin. I komo ku mi ta sinti ku e mihó kos ku mi tin ta mi hubentut, mi a disidí di usa mi hubentut den su sirbishi.”

Sin embargo, e ta rekonosé esaki sí: “Un tempu, promé ku mi a batisá, mi tabata usa hùiswèrk òf otro aktividat di skol fásilmente komo èksküs pa keda sin bai reunion. Mi a keda sin bai vários reunion, i esaki a kuminsá afektá mi spiritualidat. Mi a kuminsá asosiá ku un mucha hòmber ku no tabata studia Beibel. Danki na Yehova ku mi a korigí mi rumbo na tempu.”

Un Desishon Personal

Ora puntra Pablo, otro hóben ku ta sirbi Yehova tempu kompletu, kiko segun e ta e kos mas importante pa yuda bo desaroyá amor pa e bèrdat di e Palabra di Dios, e ta kontestá: “Segun mi, tin dos kos: studio personal regular i selo pa e trabou di prediká. Mi ta masha gradisidu na mi mayornan ku nan a siña mi e bèrdat tokante Yehova, i den mi bista esei ta e mihó kos ku nan por a duna mi. Pero, mi mes mester ta konvensí di pa ki motibu mi ta stima Yehova, i pa mi por hasi esei mi tin ku konosé ‘e hanchura i e profundidat’ dje bèrdat di Beibel. Ta asina so nos ta bin sinti un anhelo pa Yehova su Palabra, lokual ta lanta den nos un deseo pa papia tokante dje; un deseo ku ta kima ‘manera kandela.’ Un selo asina pa e trabou di prediká lo yuda nos keda ku e apresio ku nos ta sinti pa e bèrdat.”—Efesionan 3:18; Yeremías 20:9.

Jacob Emmanuel, ku nos a menshoná kaba, tambe ta kòrda kon importante ta pa tuma un desishon personal pa sirbi Yehova. E ta konta ku nunka su mayornan no a insistí pa e batisá. “Segun mi, ta bon ku kos a bai asina, pasobra mi por mira e bon resultado. Por ehèmpel, algun dje hóbennan ku mi tabata asosiá kuné hopi, a disidí di batisá huntu. Maske ta bon ku nan a disidí di batisá, pa mi tabata bisto ku ta a base di emoshon un par di nan a tuma e desishon ei, i djis despues di nan boutismo nan selo pa aktividatnan di Reino a fria. Den mi  kaso, mi mayornan no a preshoná mi pa dediká mi mes na Yehova. E tabata un desishon personal.”

E Papel Ku Kongregashon Ta Hunga

Algun hóben a siña e bèrdat dje Palabra di Dios riba nan mes, sin yudansa di nan mayornan. Den un sirkunstansia asina, sin duda ta un reto pa siña hasi loke ta bon i perseverá den dje.

Noé ta kòrda kuantu e bèrdat a yud’é. For di tempu e tabata chikitu e tabata rabia lihé i bira violento. Ora el a kuminsá studia Beibel, tempu e tabatin 14 aña, su karakter a kuminsá drecha, i su mayornan, ku no tabata Testigu e tempu ei, a keda mashá kontentu. Segun ku Noé a progresá den sentido spiritual, e kier a usa su bida na un manera mas kompletu den Dios su sirbishi. Aktualmente e ta den sirbishi di tempu kompletu.

Alejandro tambe a kuminsá haña interes den e bèrdat kristian tempu e tabata hopi yòn, apesar ku su mayornan sí no tabatin interes. E ta ekspresá e apresio ku e ta sinti p’e bèrdat dje siguiente manera: “Mi a lanta den un famia katóliko tradishonal. Pero mas i mas mi a kuminsá simpatisá ku komunismo ateista, pasobra Iglesia no tabatin kontesta pa e preguntanan ku tabata molestiá mi for di tempu ku mi tabata chikitu. Yehova su organisashon a yuda mi gana konosementu di Dios. Esei a skapa mi bida literalmente, pasobra si mi no a studia Beibel, kasi sigur lo mi a kai den inmoralidat, alkoholismo òf droga. Kisas asta lo mi a drenta un grupo revolushonario, ku konsekuensia tristu.”

Kon un hóben por keda buska e bèrdat i keda firme den dje sin e apoyo di su mayornan? Di mes, ansianonan i otro rumannan den kongregashon ta hunga un papel hopi importante. Noé ta konta: “Nunka mi no a sinti mi mi so, pasobra semper Yehova tabata serka di mi. Ademas, mi tabatin apoyo di hopi ruman amoroso ku a bira mi tata, mi mama i mi rumannan spiritual.” Aktualmente e ta sirbi na Bètel i e ta usa su tempu den e sirbishi di Dios. Alejandro tambe ta konta: “Un kos ku semper lo mi keda gradisidu p’e ta ku mi tabatin e bendishon di forma parti di un kongregashon ku un kuerpo di ansiano ku a mustra interes amoroso den mi komo persona. Mi ta hopi kontentu pa esei, pasobra tempu mi a kuminsá studia Beibel ku 16 aña, e inkietutnan di hubentut tabata afektá mi tambe. E famianan den e kongregashon no a bandoná mi nunka. Semper tabatin un hende pa risibí mi ku hospitalidat, i kompartí ku mi su kas, su kuminda, pero tambe su kurason.” Aktualmente Alejandro tin mas ku 13 aña den sirbishi di tempu kompletu.

Tin hende ta pensa ku religion ta pa hende grandi so. Pero hopi hóben a siña e bèrdat di Beibel tempu ku nan tabata hopi yòn, i nan a bin stima Yehova i keda fiel na dje. E palabranan di David skirbí na Salmo 110:3 ta pas pa e hóbennan aki: “Bo pueblo lo pone su mes disponibel den e dia di bo poder; den e splendor di santidat, for di e matris di mardugá, bo hóbennan ta pa bo manera serena.”

Pa un hóben, ta un reto p’e siña e bèrdat i keda firme den dje. Ta dushi pa mira ku hopi hóben ta pega na Yehova su organisashon, bai reunion regularmente i studia Beibel ku diligensia. Asina nan a logra desaroyá un amor berdadero pa e Palabra di Dios i pa su sirbishi!—Salmo 119:15, 16.

[Nota]