Konosementu Eksakto di Dios Ta Duna Konsuelo

TIN hende tin problema pa komprendé loke Beibel ta bisa tokante e amor i e miserikòrdia di Dios. Nan ta puntra: Si Dios kier kaba ku maldat, e sa kon pa hasié i e tin e poder pa hasié, anto dikon ainda tin tantu maldat? Loke nan no por kaba di komprendé ta kon e tres kosnan aki por kuadra ku otro: (1) Dios ta todopoderoso, (2) Dios tin amor i bondat i (3) kos teribel ta sigui sosodé. Nan ta rasoná ku, ya ku e di tres punto ta un echo, anto por lo ménos un dje promé dosnan mester ta falsu. Nan ta pensa ku sea Dios no por kaba ku maldat, òf e no ta interesá pa hasié.

Un par di dia despues di e destrukshon di World Trade Center na New York, un lider religioso prominente na Merka a bisa: “Den mi bida, sentenáres di hende a yega di puntra mi dikon Dios ta permití tragedia i sufrimentu. Pa mi ta franko mi mester bisa ku ni pa mi mes mi no a logra haña un kontesta ku mi por ta satisfecho kuné.”

Reakshonando riba e komentario aki, un profesor di teologia a skirbi ku el a keda impreshoná ku “e bon teologia” ku e lider religioso ei a prediká. Tambe el a apoyá e punto di bista di un erudito ku a skirbi: “Nos no por komprendé sufrimentu pasobra nos no por komprendé Dios.” Pero, di bèrdat nos no por komprendé dikon Dios ta permití maldat?

Orígen di Maldat

Maske lidernan religioso por pretendé otro kos, echo ta ku Beibel no ta krea e impreshon ku nos no por komprendé dikon Dios ta permití maldat. Pa nos por komprendé e kuestion di pakiko maldat ta eksistí, ta esensial pa nos realisá ku Yehova no a krea mundu ku maldat. El a krea e promé pareha humano perfekto, sin piká. Yehova a wak su obra di kreashon i a haña ku e tabata “masha bon.” (Génesis 1:26, 31) Su propósito tabata pa Adam ku Eva rèk e Paradeis di Eden te ora e kubri henter mundu, i pa nan yen’é ku hende felis bou dje protekshon di su soberania amoroso.—Isaías 45:18.

Maldat a kuminsá dor di un kriatura spiritual ku na prinsipio tabata fiel na Dios, pero ku despues a kuminsá deseá di risibí adorashon. (Santiago 1:14, 15) Su rebeldia a sali na kla riba tera na momentu ku el a influensiá e promé pareha humano pa nan tambe oponé Dios huntu kuné. Na lugá di obedesé Dios su instrukshon bon kla pa no kome ni mishi ku e fruta dje palu di konosementu di bon i malu, Adam ku Eva a kohe fruta for dje palu i kom’é. (Génesis 3:1-6) No solamente nan a desobedesé Dios, pero nan a mustra tambe ku nan kier a biba independiente di dje.

 Un Kuestion Moral

E rebelion den Eden aki a lanta un kuestion moral ku ta di importansia pa henter universo. E rebeldenan ei a kuestioná ku Yehova ta goberná su kriaturanan korektamente. E Kreadó tabatin derecho di eksigí pa hende obedes’é den tur kos? Hende lo por biba mihó si nan aktua independiente?

Yehova a trata ku e desafio aki di su moda di goberná na un manera ku a mustra ku su amor, su hustisia, su sabiduria i su poder ta den balansa perfekto. E por a usa su poder pa kaba ku e rebelion mesora. Esei asta lo por a parse hustu, pasobra e tabatin derecho di hasié. Pero esei lo no a resolvé e kuestionnan moral ku a lanta. Di otro banda, Dios lo por a djis ignorá e piká. Den bista di algun hende djawe, esei lo por tabata un muestra di amor. Pero e opshon aki tampoko lo no a yuda aklará si loke Satanas a pretendé ta bèrdat òf nò, esta, ku hende lo biba mihó si nan goberná nan mes. Ademas, si Dios a djis ignorá e piká, esei lo no a animá mas persona pa desviá for di Yehova su kaminda? E resultado lo ta ku kreashon lo keda sufri pa semper.

Den su sabiduria, Yehova a permití hende hasi kos na nan mes manera pa un tempu. Ounke esei a nifiká ku e mester a permití maldat sigui eksistí pa un tempu, el a hasié pa hende haña chèns di mustra si nan por goberná nan mes ku éksito sin tin ku dependé riba Dios i disidiendo pa nan mes kiko ta bon i malu. Kiko tabata e resultado? Guera, inhustisia, opreshon i sufrimentu a karakterisá henter historia humano. E frakaso total dje rebelion kontra Yehova lo mustra unabes pa semper ku e kuestionnan ku a lanta den Eden ta falsu.

Entretantu, Dios a mustra nos su amor dor di manda su Yu Hesukristu, ku a entregá su bida humano komo un sakrifisio di reskate. Danki na esaki, hende obediente por libra for dje kondena di piká i morto ku a bini dor ku Adam a desobedesé Dios. E reskate a  habri e kaminda pa bida eterno pa tur hende ku ehersé fe den Hesus.—Huan 3:16.

Ta un konsuelo pa sa ku Yehova ta garantisá nos ku hende lo no sigui sufri pa semper. Segun un skirbidó di salmo: “Aki poko tempu e malbado lo no t’ei mas; maske kuantu bo buska su lugá, e lo no t’ei. Ma e humildenan lo heredá e tera, i lo deleitá nan mes den pas abundante.”—Salmo 37:10, 11.

Un Futuro Sigur i Felis

E profesianan di Beibel ku ta kumpli ta mustra ku e tempu pa Dios trese un fin na enfermedat, tristesa i morto ta serka. Wak ki un bista maravioso di futuro apòstel Huan a risibí den un vishon. El a skirbi: “Mi a mira un shelu nobo i un tera nobo; pasobra e promé shelu i e promé tera a pasa, i laman no tabata eksistí mas. . . . I Dios mes lo ta meimei di [humanidat], i e lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” I pa enfatisá ku e promesanan aki ta digno di konfiansa, Huan a ser bisá: “Skirbi, pasobra e palabranan aki ta fiel i berdadero.”—Revelashon 21:1-5.

Kiko di e míles di miónes di hende inosente ku a muri for di tempu ku e rebelion a tuma lugá den Eden? Yehova a primintí ku lo e lanta hende ku aktualmente ta drumí den morto. Apòstel Pablo a bisa ku e tin speransa den Dios ku “siguramente lo tin un resurekshon di tantu e hustunan komo e malbadonan.” (Echonan 24:15) Nan lo haña chèns di biba den un mundu kaminda ‘hustisia ta biba.’—2 Pedro 3:13.

Meskos ku un tata amoroso ta permití su yu pasa den un operashon doloroso si e sa ku lo tin benefisio duradero, Yehova tambe a laga humanidat biba temporalmente ku maldat riba tera. Sin embargo, un eternidat di bendishon ta spera tur hende ku ta trata na hasi Dios su boluntat. Pablo a splika ku “kreashon a wòrdu sometí na banidat, no di su mes boluntat, ma pa motibu di esun ku a somet’é, den speransa ku e kreashon mes tambe lo wòrdu librá for di su sklabitut na korupshon pa drenta den e libertat glorioso di e yunan di Dios.”—Romanonan 8:20, 21.

Esaki sí ta notisia, anto un bon notisia, no manera e kosnan ku nos ta mira na televishon i lesa di dje den korant. E ta e mihó notisia ku tin, i e ta bini dje “Dios di tur konsuelo,” ku tin berdadero interes den nos.—2 Korintionan 1:3.

[Plachi na página 6]

Tempu a mustra ku hende no por goberná nan mes ku éksito sin Dios

[Rekonosementu]

Famia di Somalia: UN PHOTO 159849/M. GRANT; bòm atómiko: USAF photo; kampo di konsentrashon: U.S. National Archives photo