Un Medaya di Rekonosementu pa un Salòn di Reino
Informe di Proklamadónan di Reino
Un Medaya di Rekonosementu pa un Salòn di Reino
MINISTERIO di Medio Ambiente di Finlandia a deklará aña 2000 komo “Aña di Diseño di Hardin.” Un dje organisadónan a deklará ku e “meta di hasi diseño di hardin [landscaping] e tema di aña ta pa kòrda nos tur kuantu influensia un ambiente bèrdè tin riba nos bida di tur dia i riba nos bienestar.”
Dia 12 di yanüari 2001, sukursal di Testigunan di Yehova na Finlandia a risibí un karta di e Asosiashon Finlandes di Industria di Diseño di Hardin. E karta a splika ku e Salon di Reino di Testigunan di Yehova na Tikkurila a risibí un di e medayanan p’e tema di aña debí na e diseño hopi bunita dje hardin, i debí ku e ta asina bon tené. E karta a bisa tambe ku “e aparensia general dje tereno, tantu den zomer komo den wenter, ta agradabel, bunita i di un kalidat haltu.”
Testigunan di Yehova a risibí e medaya durante un evento na kua 400 profeshonal i hende di negoshi a asistí na Hotèl Rosendahl na Tampere, Finlandia. E Asosiashon Finlandes di Industria di Diseño di Hardin a saka un komunikado di prensa tambe, ku a bisa: “Na vários parti di nos pais, i kasi sin eksepshon, Salonnan di Reino di Testigunan di Yehova ta masha bunita diseñá. Ta difísil pa un hende ku pasa banda di nan keda sin atmirá e manera ku nan ta kuida nan kurá. E Salòn di Reino na Tikkurila ta un ehèmpel di un hardin magnífiko den tur sentido. E edifisio i e tereno grandi ta kombiná bon pa transmití un sentido di trankilidat i òrdu.”
Tin 233 Salon di Reino na Finlandia, i hopi di nan tin hardin mashá bunita. Pero loke ta hasi e lugánan aki bunita mes, ta ku nan ta sentronan di adorashon berdadero i di edukashon bíbliko. Mas ku seis mion Testigu di Yehova rònt mundu ta stima nan Salon di Reino, sea ku e tin hopi komodidat òf e ta humilde. Ta p’esei nan ta asina dispuesto pa kuid’é ku amor i atenshon. Porta di e Salonnan di Reino den bo komunidat ta habrí pa tur hende!