Yehova Ta Bendishoná i Protehá Hende Obediente

“Esun ku skucha mi lo biba konfiadamente, i lo biba trankil, sin miedu di maldat.”—PROVERBIONAN 1:33.

1, 2. Dikon ta importante pa nos obedesé Dios? Duna un ehèmpel.

UN PAR di puitu chikitu, tur na lana hel, ta kana piki kuminda den yerba. Nan ta asina konsentrá, ku nan no sa mes ku tin un warawara ta bula rònt den laira. Diripiente e mama ta saka un zonidu skèrpi di atvertensia i ta span su alanan. E puitunan ta kore bai serka dje, i den kuestion di un par di sekònde nan ta safe skondí bou di su ala. E warawara ta legumai su atake. * Ki lès nos por saka? Ku obedensia ta skapa bida!

² E lès aki ta importante spesialmente pa kristiannan djawe, pasobra Satanas ta hasiendo tur esfuerso posibel p’e gara e pueblo di Dios komo su víktima. (Revelashon 12:9, 12, 17) Su meta ta pa kaba ku nos spiritualidat, pa asina nos pèrdè Yehova su aprobashon i nos chèns di biba pa semper. (1 Pedro 5:8) Pero si nos keda serka di Dios i reakshoná asina ku e duna nos guia pa medio di su Palabra i organisashon, nos por tin sigur ku lo e kuida nos. Un skirbidó di salmo a bisa: “E lo kubri bo ku su plumanan, i bou di su alanan lo bo buska refugio.”—Salmo 91:4.

Un Nashon Desobediente Ta Bira Víktima

3. Kiko e desobedensia konstante di Israel a hiba na dje?

³ Tanten ku e nashon di Israel a obedesé Yehova, nan tabata benefisiá regularmente di su kuido atento. Pero kada bes e pueblo tabata bandoná nan Kreadó i akudí na dios di palu i piedra, “kosnan bano ku no ta di probecho ni ta libra.” (1 Samuel 12:21) Despues ku e nashon tabatin siglonan ta rebeldiá kontra Dios, nan a desviá asina tantu, bira asina apóstata, ku no tabatin moda di hasi mas. P’esei Hesus a lamentá: “O Yerúsalèm, Yerúsalèm, abo ku ta mata e profetanan i ta piedra esnan ku ta wòrdu mandá serka dje! Kuantu biaha mi no tabata kier a hunta bo yunan, manera un galiña ta hunta su puitunan bou di su alanan, i boso no tabata kier. Mira, boso kas ta keda desolá pa boso!”—Mateo 23:37, 38.

4. Kon a bira bisto na aña 70 di nos era ku Yehova a bandoná Yerúsalèm?

⁴ Na aña 70 di nos era a bira bisto na un manera hopi tristu ku Yehova a desolá òf bandoná Israel rebelde. E aña ei e ehérsito romano a baha riba Yerúsalèm, ku nan emblemanan ku imágen di águila tené na haltu, i a kousa un masakre teribel. N’e okashon ei e stat tabata yen di hende ku a bini pa selebrá Pasku Hudiu. Apesar di tur nan sakrifisionan, nan no a logra gana Dios su fabor. Loke a pasa tabata  un rekordatorio trágiko di loke Samuel a bisa Saul e rei desobediente: “Akaso SEÑOR tin mes tantu delisia den ofrendanan kimá i sakrifisionan ku den obedensia na e bos di SEÑOR? Mira, obedesé ta mihó ku sakrifisio, i skucha ta mihó ku vèt di karné chubatu.”—1 Samuel 15:22.

5. Ki klase di obedensia Yehova kier di nos, i kon nos por sa ku e tipo di obedensia ei ta posibel?

⁵ Maske Yehova ta para ariba pa nos obedes’é, e ta bon konsiente sí ku nos ta hende imperfekto, i ku nos tin limitashon. (Salmo 130:3, 4) Loke e kier di nos ta pa nos ta sinsero di kurason, i pa nos obedes’é dor ku nos tin fe, amor i temor di dje, un temor sano di no kier desagrad’é. (Deuteronomio 10:12, 13; Proverbionan 16:6; Isaías 43:10; Mikéas 6:8; Romanonan 6:17) Un ‘nubia grandi di testigu’ ku a biba promé ku e era kristian a mustra ku ta posibel pa obedesé Dios dje manera ei, pasobra nan a keda íntegro apesar ku nan a enfrentá pruebanan masha grandi, i asta morto. (Hebreonan 11:36, 37; 12:1) Nan a hasi Yehova su kurason masha kontentu! (Proverbionan 27:11) Pero tabatin otronan ku no a keda obediente, maske promé nan tabata fiel. Un di nan ta Rei Yoas di antiguo Huda.

Mal Amistat A Hiba un Rei na Ruina

6, 7. Ki klase di rei Yoas tabata tanten ku Yoiada tabata na bida?

⁶ Komo beibi, Rei Yoas (òf Yehoas) a skapa na wowo di angua di ser asesiná. Ora Yoas a kumpli shete aña di edat, ku kurashi Sumo Saserdote Yoiada (òf Yehoiada) a sak’é for di skondí i hasié rei. Debí ku Yoiada, un hòmber ku temor di Dios, a aktua komo Yoas su tata i konsehero, e gobernante hóben aki “a hasi bon den bista di SEÑOR tur e dianan di e saserdote Yoiada.”—2 Krónikanan 22:10–23:1, 11; 24:1, 2.

⁷ Un dje bon kosnan ku Yoas a hasi ta di renobá e tèmpel di Yehova. Tradukshon di Mundu Nobo ta bisa ku e kos ei tabata “pegá ku kurason di Yoas.” El a kòrda Sumo Saserdote Yoiada ku mester a kolektá e impuesto di tèmpel ‘ku Moises a imponé,’ for di Huda i Yerúsalèm pa finansiá e trabou di reparashon. Pues, ta parse ku Yoiada a logra animá e hóben rei pa studia e Lei di Dios i obedes’é. Komo resultado, e trabou riba e tèmpel i e artíkulonan di uso dje tèmpel a kaba den poko tempu.—2 Krónikanan 24:4, 6, 13, 14; Deuteronomio 17:18.

8. (a) Kiko tabata e kos prinsipal ku a hiba na Yoas su kaida spiritual? (b) Na kiko e desobedensia dje rei a hib’é?

⁸ Lamentablemente, Yoas su obedensia na Yehova no a dura. Dikon? E Palabra di Dios ta splika nos: “Ma despues di morto di Yoiada e ofisialnan di Huda a bin i a bùig dilanti di rei, i rei a skucha nan. I nan a bandoná e kas di SEÑOR, e Dios di nan tatanan, i a sirbi e imágennan di Asera i e ídolonan; asina furia a bin riba Huda i Yerúsalèm pa motibu di e kulpa di nan aki.” E mal influensia dje ofisialnan di Huda a pone e rei stòp di skucha Dios su profetanan. Un di e profetanan aki tabata Zakarías, yu di Yoiada. Ku kurashi el a skual tantu Yoas komo e pueblo pa nan desobedensia. Na lugá di repentí, Yoas a laga nan piedra Zakarías mata. Esta un hòmber desobediente i sin heful Yoas a bira! Anto tur esaki ta debí ku el a sukumbí na e mal influensia dje hendenan ku e  tabata anda kuné!—2 Krónikanan 24:17-22; 1 Korintionan 15:33.

9. Kon e fin di Yoas i e ofisialnan ta enfatisá e bobedat di desobedesé Yehova?

⁹ Kon a bai ku Yoas i e ofisialnan malbado ku el a anda kuné, despues ku nan a bandoná Yehova? Un forsa militar di Siria, djis “un kantidat chikitu di hòmber,” a invadí Huda i “a destruí tur e ofisialnan di e pueblo for di meimei di e pueblo.” Ademas e invasornan a obligá e rei entregá su mes pertenensianan, i tambe e oro i e plata dje tèmpel. Yoas a skapa, pero el a keda un hòmber kibrá i enfermo. Poko tempu despues, algun di su mes sirbidónan a konspirá kontra dje i asesin’é. (2 Krónikanan 24:23-25; 2 Reinan 12:17, 18) E palabranan di Yehova na Israel ta un gran bèrdat: “Si bo no obedesé SEÑOR bo Dios pa perkurá di kumpli ku tur su mandamentunan i su statutonan . . . , e maldishonnan aki lo bin riba bo i alkansá bo”!—Deuteronomio 28:15.

Obedensia A Skapa un Sekretario

10, 11. (a) Dikon ta bon pa nos reflekshoná riba loke Yehova a konsehá Baruk? (b) Kiko Yehova a konsehá Baruk?

¹⁰ Bo sa sinti bo desanimá debí ku poko hende ku bo topa den e sirbishi kristian ta mustra interes den e bon nobo? Bo sa sinti un tiki envidia di hende bon pará ku ta hiba un bida di plaser? Si ta asina, reflekshoná riba Baruk e sekretario di Yeremías, i riba e konseho amoroso ku Yehova a dun’é.

¹¹ Baruk tabata den e proseso di skirbi un mensahe profétiko ora ku Yehova a dirigí su atenshon na dje mes. Dikon? Debí ku Baruk a kuminsá lamentá su suerte den bida i deseá algu mihó ku su privilegio speshal di sirbishi na Dios. Yehova a nota e kambio di aktitut aki den Baruk i el a dun’é un konseho kla pero bondadoso. El a bis’é: “Bo ta buska kosnan grandi pa bo mes? No buska eseinan; pasobra mira, mi ta bai trese desaster riba tur karni, . . . ma lo mi duna bo bo bida komo botin, na tur lugá ku bo bai.”—Yeremías 36:4; 45:5.

12. Dikon nos no mester buska “kosnan grandi” pa nos mes den e mundu aktual?

¹² Ora bo lesa e palabranan ku Yehova a dirigí na Baruk, bo por sinti e interes profundo ku Dios tabatin pa e bon hòmber aki ku a sirbié ku fieldat i kurashi huntu ku Yeremías? Awe tambe Yehova tin interes profundo den kristiannan ku ta sinti e tentashon di bai tras di loke den nan bista por parse un bida mas dushi den e sistema di kosnan aki. Felismente, hopi di nan a reakshoná bon, meskos ku Baruk, ora rumannan spiritual responsabel a konsehá nan. (Lukas 15:4-7) Sí, laga nos tur mira bon kla ku no tin futuro pa hende ku ta buska “kosnan grandi” pa nan mes den e mundu aki. Pa di promé, hende asina no ta logra haña berdadero felisidat. Pero e kos di mas pió ta ku pronto nan lo pasa bai huntu ku e mundu aki i tur su deseonan egoista.—Mateo 6:19, 20; 1 Huan 2:15-17.

13. Ki lès di humildat nos por saka for dje relato di Baruk?

¹³ E relato di Baruk ta siña nos un lès di humildat tambe. Ripará ku Yehova no a konsehá Baruk direktamente; el a usa Yeremías, i Baruk lo mester a konosé Yeremías su imperfekshonnan i su kosnan straño. (Yeremías 45:1, 2) Tòg Baruk no a laga orguyo domin’é. El a mira humildemente ta ken en realidat tabata konseh’é: Yehova. (2 Krónikanan 26:3, 4, 16; Proverbionan 18:12; 19:20) P’esei, si nos ‘dal un paso robes promé ku nos realisá esei,’ i nos risibí e konseho ku nos tin mester for dje Palabra di Dios, laga nos imitá Baruk su madures, su manera spiritual di komprendé kos i su humildat.—Galationan 6:1, NW.

14. Dikon ta bon pa nos obedesé esnan ku ta dirigí nos?

¹⁴ Ora nos tin un aktitut humilde asina, esei ta yuda esnan ku ta duna nos konseho tambe. Hebreonan 13:17 ta bisa: “Obedesé boso lidernan [literalmente na griego, “esnan ku ta dirigí boso”] i someté boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i  no ku tristesa, pasobra esaki lo no ta bentahoso pa boso.” Kuantu bes ansianonan no ta aserká Yehova fervientemente den orashon pa pidié duna nan e kurashi, e sabiduria i e takto ku nan tin mester pa por kumpli ku e parti difísil aki di nan trabou di kuida e karnénan! Laga nos “rekonosé hòmbernan asina.”—1 Korintionan 16:18.

15. (a) Kon Yeremías a mustra ku e tabatin konfiansa den Baruk? (b) Kon Baruk a ser rekompensá dor ku el a obedesé humildemente?

¹⁵ Nos sa ku Baruk a ahustá su manera di pensa, pasobra despues Yeremías a dun’é un tarea hopi difísil: e mester a bai n’e tèmpel anto lesa na bos haltu e mensahe di huisio ku e mes a skirbi for di boka di Yeremías. Baruk a obedesé? Sí, el a hasi “konforme tur loke profeta Yeremías a orden’é.” Asta el a lesa e mesun mensahe ei pa e ofisialnan di Yerúsalèm tambe, algu ku sin duda a eksigí hopi kurashi. (Yeremías 36:1-6, 8, 14, 15) Imaginá bo kon gradisidu Baruk lo tabata un 18 aña despues ora e babilonionan a vense e stat, i Yehova a ten’é na bida dor ku el a skucha Yehova su spièrtamentu i a stòp di buska “kosnan grandi” pa su mes.—Yeremías 39:1, 2, 11, 12; 43:6.

Obedensia Durante Sitiamentu di un Stat Ta Skapa Bida

16. Kon Yehova a mustra kompashon pa e hudiunan na Yerúsalèm durante e sitiamentu babilóniko na aña 607 promé ku Era Komun?

¹⁶ E kompashon ku Dios ta sinti pa hende obediente tabata bisto un biaha mas ora e fin di Yerúsalèm a yega na aña 607 promé ku Era Komun. Ora ku e sitiamentu tabata den su etapa mas intenso, Yehova a bisa e hudiunan: “Mira, mi ta pone bo dilanti e kaminda di bida i e kaminda di morto. Esun ku keda den e stat aki lo muri pa medio di spada, hamber i pèst; ma esun ku sali i entregá su mes na e kaldeonan ku ta ataká boso lo biba, i e lo tin su mes bida komo botin.” (Yeremías 21:8, 9) Apesar ku e habitantenan di Yerúsalèm a meresé destrukshon, Yehova a mustra kompashon pa esnan ku a obedes’é, asta na e último momentu krusial ei. *

17. (a) Den ki dos sentido Yeremías su obedensia tabata na prueba ora Yehova a mand’é bisa e hudiunan sitiá pa nan ‘entregá nan mes na e kaldeonan’? (b)  Kon nos por saka probecho for di Yeremías su ehèmpel di obedensia ku kurashi?

¹⁷ No tin duda ku Yeremías mes tambe mester tabata obediente pa el a bisa e hudiunan entregá nan mes. Pa kuminsá, e tabatin selo pa e nòmber di Dios. E no tabata kier p’e enemigunan difamá Dios su nòmber ora nan pretendé ku ta nan ídolonan sin bida a duna nan viktoria. (Yeremías 50:2, 11; Lamentashonnan 2:16) Ademas, Yeremías tabata sa ku e tabata poniendo su mes bida na peliger dor di manda e pueblo entregá nan mes, pasobra hopi hende lo a  mira loke el a bisa komo un traishon. Tòg e no a pèrdè kurashi. El a papia e deklarashonnan di Yehova obedientemente. (Yeremías 38:4, 17, 18) Nos tambe ta hiba un mensahe impopular, meskos ku Yeremías. Hende a despresiá Hesus pa motibu dje mesun mensahe ei. (Isaías 53:3; Mateo 24:9) P’esei, laga nos no sinti “temor pa hende.” Laga nos mustra kurashi i obedesé Yehova i konfia kompletamente den dje, meskos ku Yeremías.—Proverbionan 29:25.

Obedensia Ora Gòg Ataká

18. Ki tèst di obedensia Yehova su sirbidónan ta bai enfrentá den futuro?

¹⁸ Pronto henter Satanas su mundu malbado lo ser destruí den un “gran tribulashon” sin presedente. (Mateo 24:21) Sin duda, tantu promé komo durante e gran tribulashon, e pueblo di Dios lo pasa den tèstnan grandi di nan fe i nan obedensia. Beibel ta bisa nos por ehèmpel ku Satanas, den su papel di “Gòg di tera di Magòg” lo lansa un atake total kontra Yehova su sirbidónan. E ta bai mobilisá forsanan militar ku Beibel ta deskribí komo “un ehérsito poderoso . . . , manera un nubia ku ta tapa tera.” (Ezekiel 38:2, 14-16) Yehova ta habri su “alanan” pa protehá hende obediente, i e pueblo di Dios, den minoria i sin niun arma, lo buska refugio bou di nan.

19, 20. (a) Dikon tabata importante p’e israelitanan na Laman Kòrá ta obediente? (b)  Kon nos por saka benefisio awe dor di meditá ku orashon riba e relato di Laman Kòrá?

¹⁹ E situashon aki ta pone nos kòrda tempu ku Israel a sali for di Egipto. Despues ku Yehova a dal Egipto ku dies plaga devastador, el a guia su pueblo n’e Tera Primintí, pero no via e kaminda di mas kòrtiku. El a hiba nan Laman Kòrá, kaminda lo tabata fásil pa hinka nan den un skina i ataká nan. For di un punto di bista militar, e desishon ei a parse masha malu. Si abo tabat’ei, lo bo a obedesé e palabra di Yehova duná via Moises i marcha bai Laman Kòrá ku pleno konfiansa, maske bo tabata sa ku e Tera Primintí a keda den otro direkshon?—Éksodo 14:1-4.

²⁰ Ora nos lesa Éksodo kapítulo 14 nos ta mira kon Yehova a libra su pueblo den un demostrashon impreshonante di poder. Relatonan asina por fortalesé nos fe hopi si nos tuma tempu pa studia nan i meditá riba nan! (2 Pedro 2:9) Na su turno, un fe fuerte ta fortalesé nos pa obedesé Yehova asta ora loke e ta pidi di nos ta parse di bai kontra lógika humano. (Proverbionan 3:5, 6) P’esei, puntra bo mes: ‘Mi ta traha duru pa fortifiká mi fe dor di studia Beibel diligentemente, hasi orashon, meditá i asosiá regularmente ku e pueblo di Dios?’—Hebreonan 10:24, 25; 12:1-3.

Obedensia Ta Duna Speransa

21. Ki bendishonnan esnan ku obedesé Yehova ta haña awor i den futuro?

²¹ Ora ku obedensia na Yehova ta karakterisá hende su bida, nan ta mira kumplimentu di Proverbionan 1:33 for di awor. E ta bisa: “Esun ku skucha mi [ku obedensia] lo biba konfiadamente, i lo biba trankil, sin miedu di maldat.” E palabranan di konsuelo aki lo kumpli na un manera maravioso durante e dia di vengansa di  Yehova ku ta na kaminda! De echo, Hesus a bisa su disipelnan: “Ora ku e kosnan aki kuminsá tuma lugá, wak ariba i lanta boso kabes, pasobra boso redenshon ta yegando serka.” (Lukas 21:28) Klaramente, ta esnan ku ta obediente na Dios so lo tin e konfiansa pa hasi loke e palabranan aki ta bisa.—Mateo 7:21.

22. (a) Ki otro motibu Yehova su pueblo tin pa konfi’é? (b)  Ki asuntunan nos siguiente artíkulo lo trata?

²² Otro kos ku ta duna nan konfiansa ta ku “SEÑOR Dios no ta hasi nada, sin ku e revelá su konseho sekreto na su sirbidónan, e profetanan.” (Ámos 3:7) Awendia Yehova no ta inspirá profeta manera den pasado. En bes di esei el a apuntá un grupo ku ta sirbi komo esklabo fiel, pa nan duna su hendenan di kas kuminda spiritual na ora. (Mateo 24:45-47) P’esei ta masha importante pa nos ta kla pa obedesé e “esklabo” aki. Manera nos siguiente artíkulo lo mustra, e obedensia ei ta reflehá nos aktitut pa Hesus tambe, kende ta shon òf doño dje “esklabo.” Ta é ‘nashonnan lo obedesé.’—Génesis 49:10.

[Nota]

Bo Ta Kòrda?

• Kiko e desobedensia konstante di Israel a hiba na dje?

• Kon e hendenan ku Rei Yoas a anda kuné a influensi’é, tantu ora e tabata hóben komo despues?

• Ki lèsnan nos por siña for di Baruk?

• Dikon Yehova su pueblo obediente no tin nodi sinti miedu segun ku e mundu aktual ta yega su fin?

[Preguntanan di Estudio]

[Plachi na página 13]

Bou di guia di Yoiada, e hóben Yoas a obedesé Yehova

[Plachi na página 15]

Mal amistat a influensiá Yoas pa laga mata e profeta di Dios

[Plachi na página 16]

Abo lo a obedesé Yehova i bira testigu di su poder impreshonante di salba?