‘Bira Sabí pa Restu di Bo Bida’

“Mayoria hende ta usa nan promé añanan di bida pa hasi nan último añanan di bida infelis.” Asina Jean de La Bruyère, un eskritor franses di siglo 17 a bisa. En bèrdat, un hóben indesiso lo por keda totobiá pa aktua, i despues sinti su mes malkontentu i desilushoná. Di otro banda, un hóben tèrko por persistí den un proseder bobo i despues pèrdè tur su goso den bida ora e ta mas grandi. Tantu esun ku a keda sin hasi bon komo esun ku a hasi malu lo por haña su mes ta yora malai despues.

Kon hóbennan por evitá un futuro asina? E Palabra di Dios ta konsehá hóbennan ku ta indesiso: “Kòrda . . . riba bo Kreadó den e dianan di bo hubentut, promé ku e dianan malu bin i e añanan yega serka, di kualnan lo bo bisa: ‘Mi no tin goso den nan.’” (Eklesiástes 12:1) Si bo ta un hóben, dal paso positivo pa siña tokante “bo Kreadó” awor ku bo ta yòn.

Ma kon Beibel ta yuda hóbennan evitá e lokura di hubentut? E ta bisa: “Skucha konseho i aseptá disiplina, pa bo por ta sabí pa restu di bo bida.” (Proverbionan 19:20) Tambe Beibel ta mustra klaramente ku esnan ku ta rechasá e sabiduria di Dios dor di neglish’é òf rebeldiá den nan hubentut, òf na kualkier edat, ta haña nan ku e frutanan amargo. (Proverbionan 13:18) Di otro banda, esnan ku ta hasi kaso di instrukshonnan divino lo haña “dianan largu, bida largu i pas,” un bida di plaser i satisfakshon.—Proverbionan 3:2.