Kon Kristiannan Ta Mira Selo i Yalusí?

BEIBEL ta animá nos komo kristian pa “aspirá na amor,” i e ta bisa ku ‘amor no ta yalurs.’ (1 Korintionan 13:4; 14:1) Tambe Beibel ta bisa nos ku Yehova “ta un Dios yalurs” i e ta manda nos ser “imitadónan di Dios.” (Éksodo 34:14; Efesionan 5:1) Pues anto, kiko ta e posishon kristian relashoná ku yalusí i selo?

E idioma hebreo i griego ta usa e mesun palabra pa “yalusí” i “selo.” E solo palabra aki (na hebreo, qinah; na griego, zelos) tin hopi diferente nifikashon. Nan por tin sea un konotashon positivo òf negativo, dependiendo di e manera ku usa nan. Por ehèmpel, e palabra hebreo por nifiká “insistí riba deboshon eksklusivo; no ta tolerá rivalidat; selo; selo ferviente; lealtat na normanan hustu; yalusí; kudishá loke otro hende tin òf kudishá nan posishon; envidia.” E palabra griego korespondiente tin kasi mesun nifikashon. E palabranan aki por referí na un emoshon desbalansá i ekiboká pa ku un supuesto rival òf pa ku un persona ku supuestamente tin un bentaha. (Proverbionan 27:4) Tambe nan por referí na un kualidat positivo ku Dios ta duna hende: e deseo di kier protehá un ser kerí kontra daño. (2 Korintionan 11:2) Papiamentu ta usa dos palabra distinto pa deskribí e sintimentunan aki: selo i yalusí.

E Ehèmpel Supremo

Yehova ta pone e ehèmpel supremo di selo korekto. Su motibunan ta puru i limpi, impulsá pa e deseo di protehá su pueblo di daño spiritual i moral. El a bisa di su pueblo antiguo, figurativamente yamá Síon: “Mi ta masha yalurs pa Síon, sí, ku gran furia mi ta yalurs p’e.” (Zakarías 8:2) Meskos ku un tata amoroso ta semper alerta pa protehá su yunan di daño, asina Yehova ta alerta pa protehá su sirbidónan di daño físiko i spiritual.

Pa protehá su pueblo, Yehova a perkurá su Palabra, Beibel. Den Beibel tin hopi animashon pa nan kana na un manera sabí, i tambe yen di ehèmpel di esnan ku a hasié. Na Isaías 48:17 nos ta lesa: “Ami ta SEÑOR bo Dios, kende ta siña bo, pa bo prosperá, kende ta guia bo den e kaminda ku bo mester kana.” Ki un gran konsuelo pa sa ku su selo ta motiv’é pa kuida nos i vigilá nos! Si Yehova no tabatin e selo positivo aki, nos lo a sufri tur tipo di daño debí na nos falta di eksperensia. P’esei un kos ta sigur, Yehova su ekspreshonnan di selo no ta egoista.

Pues anto, kiko ta hasi e diferensia entre selo ku ta agradá Dios i yalusí? Pa haña sa, laga nos konsiderá e ehèmpel di Miriam i esun di Fínehas. Tuma nota ta kiko a motivá nan.

Miriam i Fínehas

Miriam tabata e ruman muhé mayó di Moises ku Aròn, e lidernan di Israel durante e Éksodo. Tempu ku e israelitanan tabata den desierto, Miriam a bira yalurs riba su ruman hòmber Moises. E relato bíbliko ta bisa: “Anto Miriam i Aròn a papia kontra Moises pa motibu di e muhé kusita ku el a kasa kuné . . . I nan a bisa: ‘Ta pa medio di Moises so SEÑOR a papia anto? E no a papia pa medio di nos tambe?’”  Parse ku Miriam ta esun ku a bini ku e idea pa lanta kontra Moises, pasobra Yehova a straf Miriam pa su falta di rèspèt—i no Aròn—ku un lepra ku a dura un siman largu.—Numbernan 12:1-15.

Kiko a pone Miriam lanta kontra Moises? Tabata su preokupashon pa adorashon berdadero i un deseo pa protehá e otro israelitanan for di daño? Evidentemente nò. Ta parse ku Miriam a permití un mal deseo pa mas prestigio i outoridat lanta den su kurason. Komo profeta den Israel, el a haña hopi rèspèt serka e pueblo, foral serka e hende muhénan. Ta é a dirigí nan ku músika i kantamentu despues di Israel su salbashon milagroso na Laman Kòrá. Pero awor Miriam kisas lo a bira muchu preokupá ku e ta bai pèrdè un poko di su prominensia debí na su supuesto rival, e esposa di Moises. Motivá pa envidia, el a instigá e papiamentu kontra Moises, esun nombrá pa Yehova.—Éksodo 15:1, 20, 21.

Fínehas (òf Finees) di otro banda tabatin un motibu diferente pa su akshon. Djis promé ku e nashon di Israel a drenta e Tera Primintí, nan tabata kamper riba e Sabana di Moab i muhénan moabita i madianita a sedusí hopi hòmber israelita pa kometé inmoralidat i idolatria. Pa limpia e kampamentu i para Yehova su rabia ardiente, e huesnan di Israel a haña e instrukshon pa mata tur e hòmbernan ku a desviá. Zimri, un kabesante di e tribu di Simeon, deskaradamente a trese e muhé madianita Kozbi den e kampamentu pa propósitonan inmoral, “den bista di henter e kongregashon di e yunan di Israel.” Fínehas a aktua desididu. Motivá dor di selo pa Yehova su adorashon i e deseo di mantené e puresa moral di e kampamentu, el a ehekutá e fornikadónan den nan tènt. El a ser elogiá pasobra e tabata “seloso,” es desir, pasobra e “no a tolerá ningun rivalidat” pa ku Yehova. Fínehas su akshon rápido a para e plaga di kastigu ku ya kaba a mata 24.000 persona, i Yehova a rekompens’é ku e aliansa ku pa tempu indefiní e saserdosio lo keda pa su desendientenan.—Numbernan 25:4-13; NW.

Kiko tabata e diferensia entre e dos ekspreshonnan aki di e mesun kualidat segun e idioma original di Beibel? Miriam a aktua kontra su ruman hòmber debí na yalusí egoista, miéntras ku Fínehas a ehekutá hustisia a base di su selo pa agradá Dios. Sa tin okashon ku meskos ku Fínehas, nos mester sinti nos mes obligá na ekspresá nos opinion frankamente òf tuma un akshon na defensa di Yehova su nòmber, su adorashon i su pueblo.

Selo Motivá òf Basá Riba Ideanan Robes

Pero ta posibel pa nos sinti selo motivá òf basá riba ideanan robes? Sí. Esaki tabata en general e kaso ku e hudiunan di promé siglo. Nan a protehá e Lei ku Dios a duna, i tambe nan tradishonnan selosamente. Den nan intento pa protehá e Lei, nan a forma un sinfin di regla i restrikshon detayá ku a bira un karga pisá pa e pueblo. (Mateo 23:4) Nan no tabata por òf no tabata kier a rekonosé ku awor Dios a remplasá e Lei di Moises ku e realidat ku e Lei ei a simbolisá. I nan selo a motivá nan  ekibokadamente pa baha nan rabia deskontrolá riba e siguidónan di Hesukristu. Apòstel Pablo, kende tambe un tempu tabata masha seloso pa e Lei, a mustra ku hende ku tabata defendé e Lei tabatin “un selo pa Dios, ma no segun konosementu.”—Romanonan 10:2; Galationan 1:14.

Asta hopi di e hudiunan ku a bira kristian tabatin difikultat pa libra nan mes di e selo eksagerá aki pa e Lei. Despues di su di tres gira komo misionero, Pablo a duna un informe na e kuerpo gobernante di promé siglo tokante e kombertimentu di e nashonnan. Na e tempu ei míles di hudiu kristian tabata “yen di selo pa e Lei.” (Echonan 21:20) Esaki tabata hopi aña despues ku e kuerpo gobernante a disidí ku kristiannan ku ántes tabata paganu no tin nodi hasi sirkumsishon. Kuestionnan relashoná ku e wardamentu di Lei ainda tabata kousa pleitu den e kongregashon. (Echonan 15:1, 2, 28, 29; Galationan 4:9, 10; 5:7-12) Komo ku algun hudiu kristian no tabata komprendé plenamente kon Yehova a trata ku su pueblo awor, nan tabata insistí riba nan propio opinionnan i a kritiká otronan.—Kolosensenan 2:17; Hebreonan 10:1.

Pues anto nos tambe tin ku evitá e trampa di purba protehá nos propio ideanan faborito òf maneranan di hasi kos ku no ta firmemente basá riba e Palabra di Dios. Ta mihó nos aseptá e komprendementunan nobo i mehorá di e Palabra di Dios ku ta bini mediante e kanal ku Yehova ta usa awe.

Sea Seloso pa Yehova

Sin embargo, selo ku ta agradá Dios tin su lugá den adorashon berdadero. Ora nos tin e tendensia di ta demasiado preokupá ku nos reputashon òf ku nos derechi, e tipo di selo ei ta dirigí nos atenshon na Yehova. E ta motivá nos pa buska maneranan pa deklará e bèrdat tokante dje i defendé su kamindanan i su pueblo.

Akiko, un sirbidó di tempu kompletu di Testigunan di Yehova, a ser rechasá na mal òrdu dor di un doño di kas ku tabatin ideanan eróneo tokante Dios su lei pa ku sanger. Ku takto Akiko a defendé e Palabra di Dios, i asta el a menshoná e komplikashonnan i problemanan médiko konektá ku transfushon di sanger. Motivá pa un deseo ferviente pa papia tokante Yehova, el a kambia di tópiko i kuminsá papia riba loke el a ripará tabata e motibu básiko di e señora su opheshonnan: e señora no a kere ku ta eksistí un Kreadó. Akiko a rasoná ku e señora riba e manera ku kreashon ta apoyá e kreensia den un Kreadó. Akiko su defensa yen di kurashi no solamente a kita e prehuisionan infundá di e señora sino tambe a hiba na un studio di Beibel kuné. Awe e doño di kas ei ku na promé instante tabata rabiá, ta un alabadó di Yehova.

Selo pa adorashon berdadero ta motivá nos pa ta alerta i probechá di oportunidatnan pa papia tokante nos fe i defendé esaki na trabou, na skol, den tienda i ora nos ta biaha. Midori, por ehèmpel, no ta pèrdè niun chèns di papia tokante su fe ku su koleganan. Un kolega di  40 i piku aña a bisa ku e no kier tin nada di haber ku Testigunan di Yehova. Despues, durante un otro kòmbersashon, e señora a keha ku su yu muhé a desaroyá un mal karakter. Midori a mustra e señora e buki Loke hovenan sa puntra—Contesta práctica, * i el a ofres’é pa hasi un areglo pa studia e buki ku e yu muhé. Nan a kuminsá studia, pero e mama no tabata djòin e studio. Midori a disidí di laga e señora wak e vidio Testigonan di Jehova—E Organisacion Tras dje Nomber. * Esaki a kita hopi di e impreshonnan robes ku e tabatin. Loke el a mira a konmové bastante i el a bisa: “Mi kier ta manera Testigunan di Yehova,” anto el a djòin su yu muhé den su studio di Beibel.

Den e kongregashon kristian tambe mester tin e selo positivo aki. E ta promové un ambiente kaluroso di amor i interes i ta motivá nos pa resistí influensianan ku ta kousa divishon i ku lo por perhudiká nos rumannan, kosnan manera hasimentu di redu i pensamentunan apóstata. Selo ta impulsá nos pa apoyá e desishonnan di e ansianonan, kende de bes en kuando ta haña ku mester reprendé hende ku hasi malu. (1 Korintionan 5:11-13; 1 Timoteo 5:20) Ora Pablo a skirbi tokante su sintimentu di yalurs pa kompañeronan den e kongregashon di Korinto, el a bisa: “Mi ta yalurs pa boso ku un yalursheit di Dios; pasobra mi a komprometé boso ku ún esposo, pa mi por presentá boso na Kristu komo un bírgen puru.” (2 Korintionan 11:2) Asina tambe nos selo òf yalursheit ta motivá nos pa hasi tur loke nos por pa protehá e puresa di doktrina, i tambe e puresa moral i spiritual di tur ruman den kongregashon.

Sí, selo ku e motibu korekto—selo ku ta agradá Dios—tin un influensia sano riba otro hende. E ta trese Yehova su aprobashon i mester ta un di e kualidatnan ku bo ta haña den kristiannan djawe.—Huan 2:17.

[Nota]

[Plachinan na página 29]

Fínehas su akshon tabata basá riba selo pa Dios

[Plachinan na página 30]

Evitá e trampa di selo basá riba ideanan robes

[Plachinan na página 31]

Selo pa Dios ta motivá nos pa kompartí nos fe i apresiá nos hermandat