“Resistí Diabel”
“Resistí Diabel”
“Resistí Diabel i e lo hui for di boso.”—SANTIAGO 4:7.
1. Kon nos por deskribí e mundu aktual, i dikon e ungínan i nan kompañeronan mester ta masha alerta?
“DIOS a disparsé, ma Diabel a keda.” E palabranan ei di e eskritor franses André Malraux ta pas bon pa e mundu ku nos ta biba aden, ya ku e obranan di hende sigur ta reflehá mas e mañanan di Diabel ku e boluntat di Dios. Satanas ta hiba hende den mal kaminda usando “tur poder i señalnan i maravianan falsu, i ku tur e engaño di inikidat pa esnan ku ta peresé.” (2 Tesalonisensenan 2:9, 10) Sin embargo, den e “último dianan” aki Satanas ta konsentrá tur su esfuerso riba Dios su sirbidónan dediká, i e ta bringa kontra kristiannan ungí “kendenan ta warda e mandamentunan di Dios i tin e [“trabou di duna,” NW] testimonio di Hesukristu.” (2 Timoteo 3:1; Revelashon 12:9, 17) E kristiannan ungí aki, huntu ku nan kompañeronan ku tin e speransa di biba riba tera, mester ta masha alerta.
2. Kon Satanas a gaña Eva ku astusia, i ki temor apòstel Pablo a ekspresá?
2 Satanas ta un gañadó di marka mayor. Usando un kolebra komo kapa, el a gaña Eva. El a laga Eva kere ku e por a haña mas felisidat si e aktua independiente di Dios. (Génesis 3:1-6) Un kuater mil aña despues, apòstel Pablo a ekspresá e temor di ku kisas e kristiannan ungí na Korinto lo bira víktima di Satanas su mañanan. Pablo a skirbi: “Mi tin miedu ku, meskos ku e kolebra a gaña Eva ku su astusia, boso mentenan lo wòrdu desviá for di e deboshon simpel i puru na Kristu.” (2 Korintionan 11:3) Satanas ta bruha hende su mente i ta trose nan manera di pensa. Meskos ku el a gaña Eva ku astusia, e por pone kristiannan rasoná robes i kere ku nan felisidat ta dependé di algu ku Yehova i su Yu ta desaprobá.
3. Yehova ta perkurá ki tipo di protekshon kontra Diabel?
3 Nos por kompará Satanas ku un yagdó di para ku ta pone trampa pa kohe víktimanan ku no ta sospechá di nada. Pa evitá e trampanan di Satanas, nos tin ku “biba bou di e protekshon di e Haltísimo,” esta, e protekshon ku Yehova ta perkurá pa esnan ku ta rekonosé den tur loke nan hasi, ku ta Yehova ta e gobernante supremo. (Salmo 91:1-3) Nos tin mester di tur e protekshon ku Dios ta duna mediante su Palabra, su spiritu santu i su organisashon pa asina nos “por para firme kontra e trampanan di Diabel.” (Efesionan 6:11) E palabra griego pa “trampanan” por ser tradusí tambe komo “maña” òf “triki.” No tin duda ku Diabel ta usa hopi triki i maña den su intento pa gara e sirbidónan di Yehova.
Trampanan Ku Satanas A Pone pa e Promé Kristiannan
4. Den ki tipo di ambiente e promé kristiannan tabata biba?
4 Kristiannan ku a biba den e promé dos siglonan di nos era tabata biba na momentu ku e Imperio Romano tabata den su tempu di gloria. E Pax Romana (Pas Romano) a yuda komersio floresé. I e prosperidat aki a trese hopi tempu liber pa e klase sosial na mando. E gobernantenan a sòru pa e pueblo tin hopi dibertishon disponibel ya asina nan lo no a rebeldiá. Durante algun periodo, tabatin mes tantu dia di fiesta ku dia di trabou. Pa distraí e hendenan, e lidernan a usa fondonan públiko pa tene e pueblo su barika yen i kurason kontentu.
5, 6. (a) Dikon tabata inapropiá pa kristiannan frekuentá e teatro- i anfiteatronan romano? (b) Ki triki Satanas a usa, i kon kristiannan por a evit’é?
5 E situashon aki a forma un peliger pa e promé kristiannan? Wèl, a base di e spièrtamentunan ku eskritornan ku a biba djis despues di e apòstelnan a skirbi (manera por ehèmpel Tertuliano), nos por saka afó ku mayoria aktividat di tempu liber di e temporada ei a representá un peliger moral i spiritual pa kristiannan berdadero. Pa kuminsá, mayoria fiesta i weganan públiko a ser tené na onor di diosnan pagano. (2 Korintionan 6:14-18) Na e teatronan, asta hopi di e obranan klásiko tabata sea masha inmoral òf masha violento, yen di dramamentu di sanger. Despues di tempu, e públiko a pèrdè smak den e obranan klásiko i nan a ser remplasá pa shownan di mímika masha inmoral mes. Historiadó Jérôme Carcopino ta bisa den su buki Daily Life in Ancient Rome (Bida Diario den Antiguo Roma): “Den e obranan teatral aki nan a permití e aktrisnan kita blo sunú . . . Nan a drama sanger na abundansia. . . . [E aktuashon] a reflehá práktikanan seksual innatural ekstremo ku ya a bira masha komun pa mayoria hende den e kapital. E presentashonnan ei no a duna nan asko, pasobra ya pa hopi tempu e matansanan horibel di e anfiteatro a hasi nan sin heful i a korumpí nan instintonan.”—Mateo 5:27, 28.
6 Den e anfiteatronan, gladiador a bringa kontra otro te na morto òf nan a bringa kontra bestia salbahe, sea nan a mata e bestianan òf e bestianan a mata nan. Kriminalnan kondená a ser bentá pa bestia feros i, despues di tempu hopi kristian tambe. Asta den e promé siglonan ei, Satanas su triki tabata pa pone hende pèrdè nan repudio kontra inmoralidat i violensia te ora ku e kosnan ei a bira algu normal i e pueblo mes tabata eksigí nan. E úniko manera pa evitá e trampa ei tabata dor di keda leu di teatro i anfiteatro.—1 Korintionan 15:32, 33.
7, 8. (a) Dikon lo no tabata sabí pa un kristian bai wak kareda di garoshi? (b) Kon Satanas por a usa e bañonan romano pa kohe kristiannan den trampa?
7 E romanonan tabata tene karedanan di garoshi den stadionnan masha grandi. Esei sin duda tabata masha eksitante, pero inaseptabel pa e kristiannan ya ku hopi bes e multitut a bira violento. Un eskritor di siglo 3 a informá ku algun di e hendenan den tribuna tabata bringa ku otro, i Carcopino ta bisa ku “astrólogo i prostituta tabatin nan negoshi” den e gangnan bou di e stadion. Ta bisto ku e stadion romano no tabata un lugá pa kristian bishitá.—1 Korintionan 6:9, 10.
8 Kiko di e famoso bañonan romano? Un kos ta sigur, no tabatin nada malu den baña pa tene kurpa limpi. Pero hopi di e bañonan romano tabata fasilidatnan masha grandi ku tabatin entre otro kambernan pa masashi, salanan pa hasi deporte, pa hunga wega di plaka i lugánan pa kome i bebe. Ounke teorétikamente tabatin oranan spesífiko pa sea hòmber òf muhé usa e bañonan, hopi bes nan a permití ámbos sekso baña huntu. Clemente di Alehandria a skirbi: “E bañonan ta habrí pa tur hende sin distinshon, hòmber ku muhé; i ei nan ta kita sunú pa entregá na libertinahe.” Pues, Satanas fásilmente por a usa un establesimentu públiko aseptabel komo un trampa pa kristiannan. Esnan sabí no a bai lugánan asina.
9. Kua ta e trampanan ku e promé kristiannan mester a evitá?
9 Wega di plaka tabata un pasatempu popular den e pueblo ora e Imperio Romano tabata den su gloria. E promé kristiannan por a evitá e gèmbelmentu ku tabata tuma lugá na e karedanan di garoshi dor di djis keda sin bai einan. Na un eskala chikí tambe nan tabatin wega di plaka den kambernan patras na lugánan di hospedá i den bar. Hungadónan tabata bèt riba e kantidat di piedra òf wesu ku ta par òf ku no ta par den man di e otro hungadó. Wega di plaka a duna e hendenan su bida mas zjeitu, pasobra esei a ofresé nan e speransa di gana plaka fásil. (Efesionan 5:5) Ademas, hopi bes e mucha muhénan ku tabata sirbi den e barnan ei tabata prostituta, oumentando e peliger di inmoralidat seksual. Esakinan tabata algun di e trampanan ku Satanas a pone pa kristiannan ku a biba den e statnan di e Imperio Romano. E situashon ta hopi diferente awe?
E Trampanan di Satanas Awe
10. Kon e situashon awe ta parse e situashon ku tabata reina den e Imperio Romano?
10 En general, Satanas su trikinan no a kambia despues di tur e siglonan aki. Pa “Satanas no tuma bentaha” riba e kristiannan ku a biba den e stat inmoral di Korinto, apòstel Pablo a duna nan konseho fuerte. El a bisa: “[Satanas] su trikinan no ta deskonosí pa nos.” (2 Korintionan 2:11) Den hopi pais desaroyá, e situashon awe ta kasi meskos ku esun ku a reina durante e tempu di gloria di e Imperio Romano. Hopi hende awe tin mas tempu liber ku nunka. Loterianan di estado ta duna asta hende pober un rayo di speransa. Tin un abundansia di dibertishon barata pa okupá e hendenan su mente kuné. Stadionnan di deporte ta yen-yen, hende ta bèt, multitutnan sa bira violento i hopi bes hungadónan tambe. Músika degradá ta den hende su orea tur ora, i shownan masha inmoral ta ser presentá riba esenario di teatro i tambe riba pantaya di sine i televishon. Den algun pais, ta popular pa hòmber ku muhé baña huntu den souna i fuentenan di awa kayente, pa no papia mes di landamentu sunú na algun playa. Meskos ku den e promé siglonan di kristianismo, Satanas ta purba tenta e sirbidónan di Dios mediante aktividatnan mundano den tempu liber.
11. Ki trampanan tin den e deseo pa relahá i disfrutá di tempu liber?
11 Den un mundu kaminda strès ta komun, ta normal pa sinti ku bo mester relahá bo mes òf haña un kambio di aktividat. Sin embargo, meskos ku e bañonan romano tabatin rasgonan ku a forma un posibel peliger pa e kristiannan di promé, algun resort i lugá di pasa fakansi a resultá di ta un trampa ku Satanas a usa pa hiba kristiannan djawe na inmoralidat òf bebementu di mas. Pablo a skirbi e kristiannan na Korinto: “No laga hende gaña boso: ‘Mal kompania ta daña bon kustumber.’ Usa boso sano huisio manera mester ta, i stòp di hasi piká; pasobra algun no tin konosementu di Dios.”—1 Korintionan 15:33, 34.
12. Kua ta algun triki ku Satanas ta usa pa gara e sirbidónan di Yehova djawe?
12 Nos a mira den e kaso di Eva kon Satanas a usa astusia pa bruha su pensamentu. (2 Korintionan 11:3) Awe, un di e trampanan di Diabel ta pa pone kristiannan pensa ku si nan bai mas leu posibel den purba mustra hende ku Testigunan di Yehova ta meskos ku otro hende, nan lo logra atraé algun na e bèrdat kristian. Pero tin biaha nan ta bai muchu leu i nèt lo kontrario ta sosodé. (Hageo 2:12-14) Un otro triki di Satanas ta di duna kristiannan dediká, tantu hóben komo adulto, e kurashi pa hiba un bida dòbel i “hasi spiritu santu di Dios tristu.” (Efesionan 4:30) Tin kristian ku a kai den e trampa aki dor di hasi mal uso di Internet.
13. Ki trampa kamuflá ta un di e mañanan di Diabel, i ki konseho den Proverbionan ta na su lugá aki?
13 Un otro trampa di Satanas ta práktikanan sobrenatural kamuflá. Un kristian berdadero lo no mete deliberadamente den satanismo òf spiritismo. Sin embargo, algun kristian sin ripará ta baha nan vigilansia ora ta trata di wak pelíkula i serinan na televishon, hunga weganan di vidio i asta lesa buki pa mucha i comics ku ta enfatisá violensia òf práktikanan sobrenatural. Nos mester evitá tur kos ku ta bai den direkshon di kosnan sobrenatural. E proverbio sabí ta bisa: “Sumpiña i trampa ta den kaminda di e hende pèrvèrso; esun ku ta warda su alma lo keda leu di nan.” (Proverbionan 22:5) Siendo ku Satanas ta “e dios di e mundu aki,” kualkier kos ku ta masha popular lo por tin un di su trampanan skondí den dje.—2 Korintionan 4:4; 1 Huan 2:15, 16.
Hesus A Resistí Diabel
14. Kon Hesus a resistí e promé tentashon di Diabel?
14 Hesus a pone un ekselente ehèmpel di resistí Diabel i pon’é hui. Despues ku Hesus a batisá i a yuna pa 40 dia, Satanas a bai tent’é. (Mateo 4:1-11) Su promé tentashon a purba probechá di e hamber natural ku Hesus tabatin despues di e yunamentu. Satanas a invitá Hesus pa hasi su promé milager pa satisfasé un deseo físiko. Sitando Deuteronomio 8:3, Hesus a nenga di usa su poder na un manera egoista i a pone alimento spiritual promé ku kuminda físiko.
15. (a) Ki deseo natural Satanas a probechá di dje pa tenta Hesus? (b) Kua ta un di Diabel su mañanan prinsipal kontra e sirbidónan di Dios djawe, i kon nos por resistié?
15 Un punto interesante relashoná ku e tentashon aki ta ku Diabel no a purba laga Hesus kometé un piká seksual. Den e kaso aki, hamber a parse di ta e deseo físiko mas fuerte pa usa pa tenta Hesus, ya ku hamber di mes ta pone bo anhelá kuminda. Ki tentashon Diabel ta usa pa desviá e pueblo di Dios awe? Nan ta hopi i variá, pero tentashonnan seksual ta un di e mañanan prinsipal ku e ta usa den su intento pa kibra e integridat di Yehova su pueblo. Dor di imitá Hesus, nos por resistí Diabel i su tentashonnan. Meskos ku Hesus a derotá Satanas su intentonan pa konvens’é dor di kòrda riba tekstonan bíbliko apropiá, nos tambe por kòrda riba tekstonan manera Génesis 39:9 i 1 Korintionan 6:18 ora nos ta konfrontá tentashon.
16. (a) Kon Satanas a tenta Hesus pa di dos biaha? (b) Den ki maneranan Satanas lo por purba tenta nos pa pone Yehova na prueba?
16 Siguientemente Diabel a reta Hesus pa bula for di e muraya di tèmpel i wak si Dios lo por a proteh’é mediante su angelnan. Sitando Deuteronomio 6:16, Hesus a nenga di tenta òf pone su Tata na prueba. Podisé Satanas no ta tenta nos pa bula for di un muraya di tèmpel, pero sí e por tenta nos pa pone Yehova na prueba. Nos ta sinti e tentashon pa wak te kon leu nos por imitá estilonan mundano den nos bistí i peñá sin ser spièrtá? Nos ta ser tentá pa partisipá den dibertishon dudoso? Si ta asina, anto kisas nos ta poniendo Yehova na prueba. Si nos tin e inklinashonnan ei, na lugá di hui for di nos, Satanas lo keda banda di nos, purbando konstantemente pa tenta nos pa bai kontra Dios huntu kuné.
17. (a) Kon Diabel a tenta Hesus pa di tres biaha? (b) Kon Santiago 4:7 por resultá sierto den nos kaso?
17 Ora Satanas a ofresé Hesus tur e reinonan di mundu a kambio di un solo akto di adorashon, Hesus a bolbe resistié dor di sita un teksto bíbliko i tuma un posishon firme na banda di e adorashon eksklusivo di su Tata. (Deuteronomio 5:9; 6:13; 10:20) Talbes Satanas no ta ofresé nos e reinonan di mundu, pero konstantemente e ta tenta nos ku e gloria di kosnan material, asta ku e speransa di un pida reino personal. Nos ta reakshoná meskos ku Hesus, dunando nos deboshon eksklusivo na Yehova? Si ta asina, loke a pasa ku Hesus lo pasa ku nos. E relato di Mateo ta bisa: “E ora ei Diabel a lag’é.” (Mateo 4:11) Satanas lo laga nos si nos tuma un posishon firme kontra dje dor di kòrda riba prinsipionan bíbliko apropiá i pone nan na práktika. Disipel Santiago a skirbi: “Resistí Diabel i e lo hui for di boso.” (Santiago 4:7) Un kristian a skirbi e sukursal di Testigunan di Yehova na Fransia: “Di bèrdat Satanas ta astuto. Apesar di tur mi bon intenshonnan, ta difísil pa mi dominá mi sintimentunan i mi deseonan. No opstante, ku kurashi, pasenshi i riba tur kos, ku e yudansa di Yehova, mi a logra mantené mi integridat i tene duru na e bèrdat.”
Kompletamente Ekipá pa Resistí Diabel
18. Ki armadura spiritual ta ekipá nos pa resistí Diabel?
18 Yehova a perkurá un armadura kompletu pa nos, pa nos por “para firme kontra e trampanan di Diabel.” (Efesionan 6:11-18) Nos amor pa e bèrdat lo faha nos hep, es desir, prepará nos pa aktividat kristian. Nos determinashon pa tene na Yehova su normanan hustu lo ta manera un korasa ku ta protehá nos kurason. Si nos pianan ta bistí ku e evangelio òf bon nobo, nos lo partisipá ku regularidat den e trabou di prediká i esaki lo fortalesé i protehá nos spiritualmente. Nos fe fuerte lo ta manera un eskudo grandi ku ta protehá nos kontra “e flechanan sendí di e malbado,” su atakenan i tentashonnan astuto. Nos speransa sigur den e kumplimentu di Yehova su promesanan lo ta manera un hèlm ku ta protehá nos pensamentunan i ta duna nos pas mental. (Filipensenan 4:7) Si nos bira eksperto den manehá e Palabra di Dios, lo e ta manera un spada ku nos por usa pa libra hende di ta katibu spiritual di Satanas. Tambe nos lo por usa e spada pa defendé nos mes, meskos ku Hesus a hasi ora Satanas a tent’é.
19. Fuera di “resistí Diabel,” kiko mas ta nesesario?
19 Si nos keda bistí ku e “armadura kompletu di Dios” aki i sigui hasi orashon kontinuamente, nos por tin sigur di Yehova su protekshon ora Satanas ataká nos. (Huan 17:15; 1 Korintionan 10:13) Pero Santiago a mustra ku “resistí Diabel” so no ta basta. Mas ku tur kos, nos tin ku ‘someté nos na Dios,’ kende ta perkurá pa nos. (Santiago 4:7, 8) Den e siguiente artíkulo nos lo trata kon nos por hasi esaki.
Kon Lo Bo Kontestá?
• Kua ta e trampanan di Satanas ku e kristiannan di promé mester a evitá?
• Kua ta e mañanan ku Satanas ta usa awe pa purba gara sirbidónan di Yehova?
• Kon Hesus a resistí e tentashonnan di Diabel?
• Kua ta e armadura spiritual ku ta yuda nos resistí Diabel?
[Preguntanan di Estudio]
[Plachi na página 8, 9]
Hesus a resistí Diabel firmemente
[Plachi na página 10]
Kristiannan di promé siglo a rechasá dibertishon violento i inmoral
[Rekonosementu]
The Complete Encyclopedia of Illustration/J. G. Heck