Yehova Ta Perkurá pa Bo

“Tirando tur boso preokupashon riba [Dios], pasobra e ta perkurá pa boso.”—1 PEDRO 5:7.

1. Den ki aspekto importante Yehova i Satanas ta kompletamente kontrario di otro?

YEHOVA i Satanas ta kompletamente kontrario di otro. Ken ku ta sinti su mes atraí na Yehova por solamente sinti asko di Diabel. E Encyclopædia Britannica (1970) ta indiká e kontraste aki. E ta bisa relashoná ku e aktividatnan di Satanas ku ta ser deskribí den e buki bíbliko di Job: ‘Satanas su mishon ta pa kana pariba-pabou riba tera en buska di aktonan òf personanan ku e por akusá di maldat; su funshon pues ta lo kontrario di e “wowo di SEÑOR,” ku ta move bai bin riba henter e tera pa e por sostené tur loke ta bon (2 Kró. 16:9). Satanas no ta gusta niun tiki ku hende ta mustra bondat inegoista na otro i e ta pone nan na prueba pa esei. Ta Dios mes ta permití Satanas hasi esaki pero bou di Dios su outoridat i kontròl i denter di e límitenan ku Dios ta pone.’ Sí, esta un kontraste grandi!—Job 1:6-12; 2:1-7.

2, 3. (a) Kon loke a pasa ku Job ta un bon ehèmpel di e nifikashon di e palabra “Diabel”? (b) Kon Beibel ta mustra ku Satanas ta sigui akusá e sirbidónan di Yehova riba tera?

² E palabra “Diabel” ta bini di un palabra griego ku ta nifiká “akusadó falsu,” “kalumniadó.” E buki di Job ta revelá ku Satanas a akusá Yehova su fiel sirbidó Job di ta sirbi Dios pa motibu di interes personal. El a  bisa: “Ta pòrnada Job ta teme Dios?” (Job 1:9) E relato ta sigui mustra ku apesar di su pruebanan, Job a hala mas serka Yehova. (Job 10:9, 12; 12:9, 10; 19:25; 27:5; 28:28) Despues di tur su sufrimentu, el a bisa Dios: “Ta tende mi a tende di bo, ma awor mi wowo ta mira bo.”—Job 42:5.

³ Satanas a stòp di akusá Dios su sirbidónan fiel ku a biba for di tempu di Job en adelante? Nò. E buki di Revelashon ta mustra ku den e tempu di fin aki, Satanas ta sigui akusá e rumannan ungí di Kristu i sigur tambe nan kompañeronan fiel. (2 Timoteo 3:12; Revelashon 12:10, 17) P’esei ta nesesario pa nos tur komo kristian berdadero someté nos mes na nos Dios amoroso Yehova. Nos mester sirbié motivá pa un amor profundo i asina demostrá ku e akusashon di Satanas ta falsu. Asina nos lo hasi Yehova su kurason kontentu.—Proverbionan 27:11.

Yehova Ta Buska Manera pa Yuda Nos

4, 5. (a) Na kontraste ku Satanas, kiko Yehova ta buska riba tera? (b) Pa nos por risibí Yehova su aprobashon, kiko nos mester hasi?

⁴ Diabel ta kana pariba-pabou riba tera en buska di ken e por akusá i devorá. (Job 1:7, 9; 1 Pedro 5:8) Na kontraste, Yehova ta buska manera pa yuda esnan ku tin mester di su forsa. Profeta Hanani a bisa Rei Asa: “Wowo di SEÑOR ta move bai bin dor di henter tera, pa e por sostené fuertemente esnan ku nan kurason ta kompletamente di dje.” (2 Krónikanan 16:9) Ki un gran diferensia entre Satanas su inspekshon malisioso i Yehova su kuido amoroso!

⁵ Yehova no ta spioná nos p’e tuma nota di delaster un fayo ku nos hasi. E salmista a skirbi: “Si abo, SEÑOR, tuma inikidatnan na kuenta, o Señor, ken lo por a keda para?” (Salmo 130:3) E kontesta indirekto ta: niun hende lo por keda para. (Eklesiástes 7:20) Si nos hala serka Yehova ku un kurason kompletu, su wowonan lo ta riba nos, no pa kondená nos, sino pa opservá nos esfuersonan i pa kontestá nos orashonnan pa yudansa i pordon. Apòstel Pedro a skirbi: “E wowonan di SEÑOR ta riba e hustunan, i su oreanan ta atento pa skucha nan orashon, ma e kara di SEÑOR ta kontra esnan ku ta hasi malu.”—1 Pedro 3:12.

6. Kon e kaso di David ta un konsuelo i alabes un atvertensia pa nos?

⁶ David tabata imperfekto i el a peka gravemente. (2 Samuel 12:7-9) Pero el a deshogá su kurason dilanti Yehova i a hala serka dje den orashon ferviente. (Salmo 51:1-12, título riba e Salmo) Yehova a skucha su orashon i a pordon’é, maske David a karga konsekuensianan desagradabel di su piká. (2 Samuel 12:10-14) Esaki mester ta un konsuelo i alabes un atvertensia pa nos. Ta un konsuelo pa sa ku Yehova ta dispuesto pa pordoná nos erornan si di bèrdat nos repentí, pero ta bon pa para ketu i realisá nos mes ku piká hopi bes ta trese konsekuensianan serio. (Galationan 6:7-9) Si nos kier hala serka Yehova, nos tin ku keda mas leu posibel for di tur loke ta desagrad’é.—Salmo 97:10.

Yehova Ta Hala Su Pueblo Serka Dje

7. Ki klase di hende Yehova ta buska, i kon e ta hala nan serka dje?

⁷ David a skirbi den un di su salmonan: “Ounke SEÑOR ta halsá, tòg e ta atendé e hende humilde; ma e hende orguyoso e ta konosé djaleu.” (Salmo 138:6) Asina tambe un otro salmo ta bisa: “Ken ta manera SEÑOR nos Dios, kende ta sintá riba trono den haltura, kende ta humiá su mes pa mira e kosnan ku ta den shelu i riba tera? E ta lanta hende pober for di stòf.” (Salmo 113:5-7) Sí, e Kreadó todopoderoso di universo ta humiá su mes pa wak riba tera, i su wowonan ta mira “hende humilde,” “hende pober,” hende ku ta “suspirá i keha pa motibu di tur e abominashonnan ku ta wòrdu hasí.” (Ezekiel 9:4) Yehova ta hala e hendenan ei na dje mediante su Yu. Hesus a bisa tempu ku e tabata riba  tera: “Ni un hende no por bin serka mi, si no ta e Tata ku a manda mi a hal’é . . . Ni un hende no por bin serka mi, si esaki no ta duná na dje di e Tata.”—Huan 6:44, 65.

8, 9. (a) Dikon nos tur tin ku bini na Hesus? (b) Kiko ta asina remarkabel di e areglo di reskate?

⁸ Si bo wak bon, tur hende lo mester bini serka Hesus i pone fe den e sakrifisio di reskate pasobra nan a nase pekadó, alehá for di Dios. (Huan 3:36) Nan mester rekonsiliá ku Dios. (2 Korintionan 5:20) Dios no a warda pa hende pekadó bin rog’é pa hasi un areglo pa nan por sera pas kuné. Apòstel Pablo a skirbi: “Dios ta demostrá su mes amor pa ku nos den esaki, ku tempu nos tabata pekadó ainda, Kristu a muri pa nos. . . . Pasobra si tempu ku nos tabata enemigu, nos a wòrdu rekonsiliá ku Dios dor di morto di su Yu, kuantu mas, siendo rekonsiliá, nos lo ta salbá pa medio di su bida.”—Romanonan 5:8, 10.

⁹ Apòstel Huan a konfirmá e bèrdat sublime aki ku Dios ta rekonsiliá hende kuné, ora el a skirbi: “Pa medio di esaki e amor di Dios a wòrdu manifestá den nos, ku Dios a manda su Yu unigénito den mundu pa nos por a biba pa medio di dje. Den esaki amor ta konsistí, no ku ta nos a stima Dios, ma ku ta el a stima nos i a manda su Yu pa ta e propisiashon [òf, rekonsiliashon] pa nos pikánan.” (1 Huan 4:9, 10) Ta Dios a dal e promé paso, no hende. Bo no ta sinti bo atraí na un Dios ku a mustra asina tantu amor pa nos komo hende, siendo no solamente “pekadó” sino asta “enemigu”?—Huan 3:16.

Nos Tin Ku Buska Yehova

10, 11. (a) Kiko nos tin ku hasi pa buska Yehova? (b) Kon nos mester mira e sistema di kosnan di Satanas?

¹⁰ Ta klaru ku Yehova no ta obligá nos bini serka dje. Ta nos tin ku busk’é; na moda di papia ‘fula i realmente hañ’é, maske e no ta leu di kada un di nos.’ (Echonan 17:27) Nos tin ku rekonosé ku Yehova tin derecho di eksigí nos sumishon. Disipel Santiago a skirbi: “P’esei, someté boso na Dios. Resistí Diabel i e lo hui for di boso. Hala serka Dios i e lo hala serka boso. Limpia boso mannan, boso pekadónan; i purifiká boso kurason, boso di kurason dòbel.” (Santiago 4:7, 8) Nos no mester vasilá pa tuma un posishon firme kontra Diabel i na fabor di Yehova.

¹¹ Esaki ta nifiká ku nos ta distansiá nos mes for di Satanas su sistema di kosnan malbado. Santiago a skirbi tambe: “Boso no sa ku amistat ku mundu ta enemistat pa ku Dios? P’esei, ken ku kier ta amigu di mundu ta hasi su mes enemigu di Dios.” (Santiago 4:4) Di lo kontrario tambe, si nos kier ta amigu di Yehova, nos tin ku ferwagt ku e mundu di Satanas lo odia nos.—Huan 15:19; 1 Huan 3:13.

12. (a) Ki palabranan di konsuelo David a skirbi? (b) Ki atvertensia Yehova a duna mediante profeta Azarías?

¹² Ora Satanas su mundu ta bai kontra nos den un òf otro manera, nos tin ku aserká Yehova den orashon i pidi su yudansa. David, kende Yehova a reskatá masha hopi biaha, a skirbi e palabranan aki ku ta konsolá nos: “SEÑOR ta serka di tur esnan ku ta sklama na dje, serka di tur esnan ku ta sklama na dje den  bèrdat. E lo kumpli ku e deseo di esnan ku ta tem’é; tambe e lo tende nan sklamashon i lo salba nan. SEÑOR ta warda tur ku ta stim’é, ma tur e malbadonan e lo destruí.” (Salmo 145:18-20) E salmo aki ta mustra ku Yehova por salba nos individualmente ora ku nos ta pasa den prueba i ku lo e salba su pueblo kolektivamente ora di e “gran tribulashon.” (Revelashon 7:14) Yehova lo keda serka nos si nos keda serka dje. Guiá pa “e spiritu di Dios,” profeta Azarías a deklará loke nos por konsiderá komo un bèrdat general: “SEÑOR ta ku boso ora boso ta kuné. I si boso busk’é, e lo laga boso hañ’é; ma si boso bandon’é, e lo bandoná boso.”—2 Krónikanan 15:1, 2.

Yehova Mester Ta Real pa Nos

13. Kon nos por mustra ku Yehova ta real pa nos?

¹³ Apòstel Pablo a skirbi di Moises ku “el a keda firme, komo si fuera e tabata mira Esun ku ta invisibel.” (Hebreonan 11:27) Naturalmente Moises nunka no a ègt mira Yehova. (Éksodo 33:20) Pero Yehova tabata asina real p’e ku tabata komo si fuera el a mir’é. Asina tambe, despues ku Job a pasa su pruebanan, su wowonan di fe a mira Yehova mas kla, komo un Dios ku ta permití su sirbidónan fiel pasa dor di prueba pero ku nunka no ta bandoná nan. (Job 42:5) Beibel ta bisa di Enok i Noe ku nan “a kana ku Dios.” Nan a hasi esaki dor di buska maneranan pa agradá Dios i obedes’é. (Génesis 5:22-24; 6:9, 22; Hebreonan 11:5, 7) Si Yehova ta mes real pa nos ku e tabata pa Enok, Noe, Job i Moises, nos lo tuma nota di dje òf “rekonos’é” den tur nos kamindanan, i lo e ‘dirigí nos bereanan.’—Proverbionan 3:5, 6.

14. Kiko ta nifiká “pega” na Yehova?

¹⁴ Djis promé ku e israelitanan a drenta e  Tera Primintí, Moises a konsehá nan: “Boso mester sigui SEÑOR boso Dios i tin temor p’e; i boso mester warda su mandamentunan, skucha su bos, sirbié i pega na dje.” (Deuteronomio 13:4) Nan mester a sigui Yehova, tem’é, obedes’é i pega na dje. Relashoná ku e palabra tradusí den e versíkulo aki komo “pega,” un eksperto bíbliko ta bisa ku “e lenguahe ta indiká un relashon mashá será i íntimo.” E salmista a deklará: “E komunion íntimo di SEÑOR ta ku esnan ku ta tem’é.” (Salmo 25:14) Nos por tin e relashon presioso i será aki ku Yehova si e ta real pa nos i si nos stim’é asina tantu ku nos tin miedu di desagrad’é den kualkier manera.—Salmo 19:9-14.

Bo Ta Konsiente di Yehova Su Kuido?

15, 16. (a) Kon Salmo 34 ta mustra ku Yehova ta perkurá pa nos? (b) Kiko nos tin ku hasi si nos tin problema pa kòrda e bon kosnan ku Yehova a hasi pa nos?

¹⁵ Un di e mañanan di Satanas ta di purba pone nos pèrdè for di bista e echo ku nos Dios Yehova konstantemente ta perkurá pa su sirbidónan fiel. Rei David di Israel tabata bon konsiente di Yehova su kuido protektivo asta ora el a konfrontá un situashon sumamente peligroso. Ora David a hañ’é obligá ta hunga loko dilanti di Rei Akis di Gat, el a kompon’é un kantika, un salmo masha bunita, ku a inkluí e ekspreshon aki di fe: “O engrandesé SEÑOR ku mi, i laga nos halsa su nòmber huntu. Mi a buska SEÑOR, i el a kontestá mi, i a libra mi for di tur mi temornan. E angel di SEÑOR ta kampa rònt di esnan ku ta tem’é, i ta reskatá nan. O purba i mira ku SEÑOR ta bon; bendishoná ta e hende ku ta tuma refugio den dje! SEÑOR ta serka di e hende di kurason kibrá, i ta salba esnan di spiritu abatí. Hopi ta e aflikshonnan di e hustu, ma SEÑOR ta libr’é for di nan tur.”—Salmo 34:3, 4, 7, 8, 18, 19; 1 Samuel 21:10-15.

¹⁶ Abo ta konvensí di Yehova su poder di salba? Bo ta konsiente di e protekshon ku su  angelnan ta brinda nos? Bo mes a yega di purba i mira ku Yehova ta bon? Kua tabata e último biaha ku bo tabata hopi konsiente ku Yehova a hasi bon pa bo? Purba kòrda. Tabata e biaha ku bo a bishitá e último kas den sirbishi, ora ku bo tabata sinti ku bo no por mas, anto nèt e ora ei bo a haña un kòmbersashon masha dushi ku e doño di kas? Bo a kòrda yama Yehova danki ku el a duna bo nèt e èkstra forsa ku bo tabatin mester i ku el a bendishoná bo? (2 Korintionan 4:7) Di otro banda, kisas bo tin problema pa kòrda un sierto kos bon ku Yehova a hasi pa bo. Podisé bo tin ku bai bèk un siman, un luna, un aña òf mas atras? Si esei ta e kaso, pakiko no hasi un esfuerso konsiente pa hala mas serka Yehova i purba mira kon e ta guia bo i dirigí bo? Apòstel Pedro a konsehá kristiannan: “Humiá boso mes . . . bou di e man poderoso di Dios . . . tirando tur boso preokupashon riba dje, pasobra e ta perkurá pa boso.” (1 Pedro 5:6, 7) Sí, lo bo keda sorprendí kuantu Yehova ta perkurá pa bo!—Salmo 73:28.

Sigui Buska Yehova

17. Kiko nos mester hasi pa nos por sigui buska Yehova?

¹⁷ Mantené nos relashon ku Yehova mester ta algu ku nos ta traha riba dje kontinuamente. Hesus a bisa den orashon na su Tata: “Esaki ta bida eterno, ku nan por konosé bo, e úniko Dios berdadero, i Hesukristu, kende bo a manda.” (Huan 17:3) Siña konosé Yehova i su Yu ta rekerí esfuerso kontinuo di nos parti. Nos tin mester di e yudansa di orashon i spiritu santu pa komprendé “e profundidatnan di Dios.” (1 Korintionan 2:10; Lukas 11:13) Tambe nos tin mester di guia di “e esklabo fiel i prudente” pa alimentá nos mente ku kuminda spiritual “na su debido tempu.” (Mateo 24:45) Mediante e kanal ei, Yehova a konsehá nos pa lesa su Palabra tur dia, asistí na nos reunionnan kristian regularmente i partisipá di henter kurason den e trabou di prediká ‘e evangelio di e reino.’ (Mateo 24:14) Di e maneranan ei nos lo sigui buska nos Dios amoroso Yehova.

18, 19. (a) Kiko nos mester ta desididu pa hasi? (b) Si nos resistí Diabel i sigui buska Yehova, kon nos lo ser bendishoná?

¹⁸ Satanas ta hasi tur loke ta na su alkanse pa trese persekushon, oposishon i preshon for di tur skina riba e pueblo di Yehova. E ta purba desbaratá nos pas i daña nos bon relashon ku Yehova. E no kier pa nos sigui ku nos trabou di buska hende di kurason onrado i yuda nan bini na Yehova su banda di e kuestion di ku si Dios tin derecho di goberná komo esun supremo di universo. Pero nos mester ta desididu pa keda fiel na Yehova, ku e konfiansa ku lo e libra nos for di e malbado. Si nos laga e Palabra di Dios guia nos i nos keda aktivo ku su organisashon visibel, nos por tin sigur ku semper Yehova lo t’ei pa apoyá nos.—Isaías 41:8-13.

¹⁹ P’esei laga nos tur resistí Diabel i su mañanan firmemente, i semper keda buska nos Dios stimá Yehova, kende lo no keda sin ‘fortalesé nos.’ (1 Pedro 5:8-11) Asina nos lo ‘konservá nos mes den e amor di Dios, sperando ku gran antisipashon e miserikòrdia di nos Señor Hesukristu pa bida eterno.’—Hudas 21.

Kon Lo Bo Kontestá?

• Kiko e palabra “Diabel” ta nifiká, i dikon e meresé e nòmber ei?

• Kon e manera ku Yehova ta opservá e habitantenan di tera ta diferente for di esun di Diabel?

• Dikon un persona mester aseptá e reskate p’e aserká Yehova?

• Kiko ta nifiká “pega” na Yehova, i kon nos por sigui busk’é?

[Preguntanan di Estudio]

[Plachi na página 15]

Apesar di su pruebanan, Job a bin komprendé ku Yehova a perkurá p’e

[Plachinan na página 16, 17]

Si nos lesa Beibel tur dia, asistí regularmente na reunionnan kristian i partisipá ku selo den e trabou di prediká, nos lo keda kòrda ku Yehova ta perkurá pa nos