Historia di Bida

Nos A Keda na Nos Asignashon

SEGUN E RELATO DI HERMANN BRUDER

Ta un kos a keda mi: sirbi sinku aña den e Legion Stranhero Franses òf bai un prizòn marokano. Laga mi splika kon bin mi a haña mi den e apuro aki.

MI A nase na Oppenau, Alemania, na 1911, apénas tres aña promé ku Promé Guera Mundial a kuminsá. Mi mayornan, Joseph i Frida Bruder, a haña 17 yu. Ami tabata e di 13 yu.

Un dje promé kosnan ku mi ta kòrda ta kon mi a wak un trupa militar ta marcha den e kaya prinsipal di nos pueblo natal. E zonidu rítmiko dje drùmbènt a trèk mi i mi a kana tras dje músikonan bai te na e stashon di trein pa mira Tata i otro hòmbernan na unifòrm militar subi trein. Ora e trein a kuminsá move, algun dje hende muhénan ku a keda atras a kuminsá yora. Un par di dia despues, nos pastor a duna un sermon largu den misa i menshoná nòmber di kuater hòmber ku a muri defendiendo nan patria. “Awor nan ta den shelu,” el a splika. Un señora pará banda di mi a kai flou.

Tata a haña keintura di tífùs tempu e tabata den e liña di bataya ruso. El a yega kas sumamente débil i kasi mesora nan a mand’é e hospital lokal. E pastor a rekomendá mi: “Bai n’e kapèl banda di santana i resa 50 Nos Tata i 50 Ave Maria. E ora ei bo tata lo bira bon.” Mi a sigui su konseho, pero e dia siguiente Tata a muri. Asta pa un hobensitu, guera tabata un eksperensia masha doloroso.

 Kon Mi A Haña e Bèrdat

Tabata masha difísil pa haña trabou na Alemania entre e dos gueranan. Pero despues ku mi a kaba skol na 1928, mi a logra haña un trabou komo hardinero na Basel, Suisa.

Meskos ku Tata, mi tabata un bon katóliko. Mi meta tabata pa mi sirbi komo mònik kapuchino na India. Ora mi ruman hòmber Richard, ku pa e tempu ei tabata un Testigu di Yehova, a tende di mi plannan, el a biaha bin Suisa spesialmente pa purba deskurashá mi. El a spièrta mi kontra e peliger di konfia den hende, spesialmente pastornan, i a animá mi pa lesa Beibel i konfia den dje so. Apesar di mi dudanan, mi a buska un Tèstamènt Nobo i a kuminsá les’é. Pokopoko pero sigur mi a bin realisá ku mi kreensianan no tabata kuadra ku siñansanan di Beibel.

Un djadumingu na 1933 ku mi tabata na kas di Richard na Alemania, el a introdusí mi na un pareha kasá ku tabata Testigu di Yehova. Ora nan a haña sa ku mi ta lesa Beibel, nan a duna mi un ehemplar di un foyeto titulá E Krísis. * Tabata kasi meianochi ora ku por fin mi a pone e foyeto ei un banda. Mi tabata konvensí ku mi a haña e bèrdat!

Testigunan di Yehova na Basel a duna mi dos volúmen di Estudio den e Skritura * huntu ku dos revista i otro buki. Loke mi a lesa a impreshoná mi i p’esei mi a tuma kontakto ku e pastor lokal i pidié kita mi nòmber for di e lista di miembronan di iglesia. E pastor a rabia pisá i a spièrta mi ku mi tabata den peliger di pèrdè mi fe. Pero esei sigur no tabata e kaso. Mas bien, pa promé bes den mi bida, mi a kuminsá kultivá e fe berdadero.

E rumannan na Basel tabata plania pa krusa frontera i bai prediká na Fransia e wikènt ei. Un di e rumannan a splika mi bondadosamente ku nan no a invitá mi pasobra ta kaba mi a kaba di kuminsá asosiá ku e kongregashon. Mi no a laga esei desanimá mi. Mi a ekspresá mi deseo firme di kuminsá prediká. Despues ku e ruman a konsultá ku un otro ansiano, el a duna mi un teritorio na Suisa. Djadumingu mainta trempan, mi a subi mi baiskel bai un pueblo chikitu pegá ku Basel, ku 4 buki, 28 revista i 20 foyeto den mi tas di sirbishi. Mayoria dje habitantenan tabata den misa ora mi a yega. Asina mes, pa 11’or, mi tas di sirbishi tabata blo bashí.

Ora mi a bisa e rumannan ku mi kier batisá, nan a papia serio ku mi i hasi mi preguntanan penetrante tokante e bèrdat. Nan selo i lealtat na Yehova i su organisashon a impreshoná mi. Komo ku tabata wenter, un ruman a batisá mi den un badkuip na kas di un ansiano. Mi ta kòrda kla e goso indeskriptibel i e forsa interno hopi grandi ku mi a sinti. Esei tabata na 1934.

Trabou na Hasienda di Reino

Na 1936, mi a tende ku Testigunan di Yehova a kumpra un pida tereno na Suisa. Mi a ofresé mi servisionan komo hardinero. Mi a keda hopi kontentu ora nan a invitá mi bin traha n’e Hasienda di Reino na Steffisburg, rònt di 30 kilometer for di Bern. Ki ora ku tabata posibel mi tabata yuda otronan tambe n’e hasienda ku nan trabounan. Bètel a siña mi e importansia di kultivá un spiritu di koperashon.

Un punto sobresaliente di mi añanan na Bètel tabata Ruman Rutherford su bishita n’e  hasienda na 1936. Ora el a mira e tamaño di nos tomatinan i kon produktivo e plantashonnan tabata, el a smail i ekspresá su satisfakshon. E tabata un ruman hopi stimá!

Un dia, despues ku mi tabatin apénas tres aña ta traha n’e kunuku, a bini un karta for di e sede mundial di Testigunan di Yehova na Merka ku a ser lesá na desayuno. E karta a enfatisá e urgensia di e trabou di prediká i a ekstendé un invitashon na ken ku a deseá di sirbi den stranheria komo pionero. Sin duda niun momentu, mi a ofresé mi mes komo boluntario. Mi asignashon a yega na mei 1939: Brazil!

E tempu ei mi tabata asistí n’e reunionnan n’e Kongregashon Thun, banda di Hasienda di Reino. Riba djadumingu, nos tabata bai prediká komo grupo den e serunan di Alpen, un biahe ku riba baiskel tabata tuma dos ora for di Thun. Margaritha Steiner tambe tabata den e grupo. Diripiente un idea a bini na mi mente: Hesus no a manda su disipelnan dos-dos? Ora mi a djis menshoná na Margaritha ku nan ta bai manda mi Brazil, e tambe a ekspresá su deseo pa sirbi kaminda e nesesidat tabata mas grandi. Nos a kasa dia 31 di yüli 1939.

Di Tránsito na un Lugá Inesperá

Nos a nabegá for di Le Havre, Fransia, na fin di ougùstùs 1939, rumbo pa Santos, Brazil. Tur e dòbel kabinanan tabata okupá kaba, di manera ku nos tabatin ku biaha den kabinanan separá. Durante e biahe, a drenta informe ku Gran Bretaña huntu ku Fransia a deklará guera kontra Alemania. Un grupo di 30 pasahero aleman a reakshoná dor di kuminsá kanta e himno nashonal aleman. Esaki a iritá e kapitan asina tantu ku el a kambia di kurso i bai mara na Safi, Maroko. E pasaheronan ku tabatin dokumento di biahe aleman a haña sinku minüt pa baha. Nos tambe tabata aden.

Polisnan a tene nos un dia na warda i despues a pèrta nos den un bùs bieu tur ròkòtòkò i hiba nos na un prizòn na Marrakech, rònt di 140 kilometer mas aleu. E dianan ku a sigui tabata hopi duru. Nos sèlnan tabata chòkchòk i skur. E tualèt ku tur hende mester a usa—un buraku den flur—tabata konstantemente verstòp. Nan a duna kada un di nos un paña di saku sushi pa drumi ariba, i anochi, djaka tabata kou na nos batat’i pia. Dos bes pa dia nos tabata haña poko kuminda den un bleki tur frusá.

Un ofisial di ehèrsito a splika mi ku mi por a haña mi libertat si mi a bai di akuerdo pa sirbi sinku aña den e Legion Stranhero Franses. Dor ku mi a nenga el a manda sera mi 24 ora den kashòt, un lugá manera un buraku pretu-pretu. Mi a pasa mayoria dje tempu ei, hasiendo orashon.

Despues di ocho dia, e outoridatnan di prizòn a laga mi topa Margaritha atrobe. E tabata masha flaku mes i tabata yora sin por stòp. Mi a hasi mi bèst pa anim’é. Nan a interogá nos i despues manda nos ku trein pa Casablanca, kaminda nan a laga Margaritha liber. Ami mes nan a manda na un kampamentu di prizòn na Port Lyautey (awor Kenitra), rònt di 180 kilometer leu. E kònsùl suiso a konsehá Margaritha pa bai Suisa bèk. Pero Margaritha tabata fiel na mi i el a nenga di bai sin mi. Durante e dos lunanan ku mi a keda na Port Lyautey, e tabata biaha bin for di Casablanca tur dia pa bishitá mi i trese kuminda pa mi.

Un aña anterior Testigunan di Yehova a saka un buki titulá Kreuzzug gegen das Christentum (Krusada Kontra Kristianismo) pa hala atenshon públiko n’e echo ku e Testigunan no tin nada di haber ku e régimen Nazi. Tempu ku mi tabata den e kampamentu di prizòn, e ofisina di sukursal di Testigunan di Yehova na Bern a skirbi e outoridatnan franses un karta i a manda e buki ei huntu kuné. Ku esei e rumannan kier a mustra ku nos no tabata nazista. Margaritha tambe a hasi un trabou elogiabel dor di bishitá outoridatnan di gobièrnu pa purba konvensé nan di nos inosensia. Finalmente, na fin di 1939, nan a duna nos pèrmit pa bandoná Maroko.

 Ta te despues ku nos a kohe rumbo pa Brazil atrobe nos a bin haña sa ku supmarinonan aleman tabata ataká barkunan riba ruta atlántiko i ku nos tabata un blanko prinsipal. Ounke nos barku Jamaique tabata un barku di karga, tabatin arma montá parti dilanti i patras dje boto. Durante dia, e kapitan tabata nabegá zigzag i tabata lansa bala ku eksplosivo kontinuamente. Anochi nos tabata paga tur lus pa evitá ku e alemannan ta haña nos. Ki un alivio nos a sinti ora ku finalmente nos a alkansá e haf di Santos, Brazil, dia 6 di febrüari 1940, mas ku sinku luna despues ku nos a sali Europa!

Bèk den Prizòn

Nos promé asignashon pa prediká tabata Montenegro, un pueblo den e estado sur di Brazil ku yama Rio Grande do Sul. Evidentemente outoridatnan di iglesia tabata bon na haltura di nos yegada. Despues ku nos tabatin apénas dos ora ta prediká, polis a arestá nos i konfiská nos kolekshon di disko ku ta kontené sermon di Beibel, tur nos literatura i asta nos tasnan trahá di kueru di kamel ku nos a kumpra na Maroko. Na warda di polis tabatin un pastor lokal i un pastor aleman ta warda nos. Nan tambe a skucha ora e hefe di polis tabata toka un dje diskursonan di Ruman Rutherford riba nos tokadisko, ku tambe e polis a konfiská. Ruman Rutherford sí tabata papia palabra kla! Ora el a yega na un parti ku a menshoná Vatikano, e pastor a bira kòrá-kòrá i lanta bai mesora.

Riba petishon di e obispu di Santa Maria, polisnan a hiba nos Pôrto Alegre, e stat kapital. Nan a laga Margaritha bai basta lihé i el a bai buska yudansa di e kònsùl di Suisa. E kònsùl a sugerí Margaritha pa bai Suisa bèk. Un bes mas el a nenga di bandoná mi. Semper Margaritha tabata un kompañera masha leal. Trinta dia despues nan a interogá mi i laga mi bai. E polis a duna nos un opshon: bandoná e estado den dies dia òf “karga e konsekuensianan.” Riba sugerensia di e sede na Brooklyn, nos a bai Rio de Janeiro.

“Lesa e Karchi Aki Por Fabor”

Apesar dje komienso desfaborabel aki den e teritorio brasileño, nos tabata masha kontentu! Al fin i al kabo, nos tabata na bida, un  biaha mas nos tasnan tabata yen di literatura, i nos por a prediká den henter e teritorio di Rio de Janeiro. Pero kon nos por a prediká ku e tiki portugues ku nos tabata sa? Pa medio di un karchi di testimonio. E promé palabranan portugues ku nos a siña pronunsiá den e trabou di prediká tabata “Por favor, leia este cartão” (“Lesa e karchi aki por fabor”). I e karchi a duna nos hopi éksito! Den un luna so, nos a repartí mas ku 1.000 buki. Hopi hende ku a aseptá nos literatura a aseptá e bèrdat despues. Pa ta franko, nos publikashonnan a duna un testimonio muchu mas efikas ku hamas nos mes lo por a duna. Esaki a graba den mi e importansia di laga hende interesá haña nos publikashonnan.

E tempu ei Rio de Janeiro tabata e kapital di Brazil, i spesialmente den ofisinanan di gobièrnu nan a risibí nos mensahe bon. Mi tabatin e privilegio di duna testimonio personalmente na e minister di finansa i e minister di defensa. Na e okashonnan aki, mi a mira evidensia kla di e manera ku Yehova su spiritu ta aktua.

Na un okashon ku nos tabata prediká riba un plenchi den sentro di Rio, mi a drenta e Palasio di Hustisia. Di un manera òf otro mi a haña mi mes den un sala rondoná pa hòmbernan bistí na pretu, meimei di loke a parse un seremonia di entiero. Mi a aserká un hòmber ku tabatin un aspekto impreshonante i entreg’é mi karchi di testimonio. Logá, no tabata un entiero. En realidat mi a interumpí un kaso di korte i mi tabata papiando ku e hues. Hariendo, el a hasi seña na e bewakernan pa nan keda trankil. El a aseptá na un manera amikal un ehemplar di e buki Yunan * i a duna un kontribushon. Ora mi tabata sali un dje bewakernan a mustra mi un aviso grandi riba porta: Proibida a entrada de pessoas estranhas (Prohibí pa Personanan No Outorisá).

Un otro tereno produktivo tabata e haf. Na un okashon mi a topa un nabegante ku a tuma algun publikashon promé ku el a bolbe pa laman. Despues mi a top’é na un asamblea. Henter su famia a aseptá e bèrdat, i e mes a progresá bastante. Esei a hasi nos masha kontentu.

Sin embargo, no ta tur kos a kana sin problema. Nos visa di seis luna a kaduká, i nos a kore rísiko di wòrdu deportá. Despues ku nos a skirbi e sede tokante nos situashon, nos a risibí un karta amoroso di Ruman Rutherford den kua el a animá nos pa perseverá i a duna sugerensia kiko pa hasi. Nos deseo tabata pa keda Brazil i ku yudansa di un abogado, finalmente nos a optené un visa permanente na 1945.

Un Asignashon di Hopi Aña

Sin embargo, promé ku esei, Jonathan, nos yu, a nase na 1941, Ruth na 1943 i Esther na 1945. Pa por a sòru pa nos famia kresiente, mi tabatin ku buska trabou. Margaritha a sigui den e aktividat di prediká tempu kompletu te ora nos di tres yu a nase.

For di prinsipio, nos a traha huntu komo famia den e trabou di prediká riba plenchi dje stat, den stashon di trein, riba kaya i den áreanan komersial. Djasabra anochi nos tabata  repartí Toren di Vigilansia i Spièrta! huntu komo famia, i e okashonnan aki a duna nos hopi goso.

Na kas, tur dia kada yu tabatin sierto trabou di hasi. Jonathan tabatin e tarea di limpia stof i kushina. E mucha muhénan tabata limpia frishidèr, bari kura i limpia nos sapatunan. Esaki a yuda nan siña organisá nan asuntunan i tuma inisiativa. Awe, nos yunan ta traha duru pa perkurá pa nan kas i nan pertinensianan, i esei ta hasi ami ku Margaritha masha kontentu.

Tambe nos a siña nos yunan komportá nan mes bon na reunion. Promé ku reunion kuminsá, nan tabata bebe un glas di awa i bai baño. Durante reunion, Jonathan tabata sinta na mi man robes, Ruth na mi man drechi, despues Margaritha i na man drechi di Margaritha, Ester. Esaki a yuda nan konsentrá i tuma alimento spiritual na un edat yòn.

Yehova a bendishoná nos esfuersonan. Ainda tur nos yunan ta sirbi Yehova fielmente i ta partisipá gososamente den e trabou di prediká. Aktualmente Jonathan ta sirbi komo ansiano den Kongregashon Novo Méier, Rio de Janeiro.

Pa 1970, ya tur nos yunan a kasa i bandoná kas, p’esei ami ku Margaritha a disidí di muda bai sirbi kaminda e nesesidat tabata mas grandi. E promé lugá ku nos a bai tabata Poços de Caldas, den e estado Minas Gerais, ku e tempu ei tabatin un grupo chikitu di 19 publikadó di Reino. Mi a sinti mi masha tristu ora mi a mira nan lugá di reunion pa promé bes—un kuarto den kèlder sin bentana i den hopi mal estado. Mesora nos a kuminsá buska un Salon di Reino mas adekuá i pronto nos a haña un bunita edifisio na un hopi bon sitio. Esei a hasi un gran diferensia! Kuater aña i mei despues, e kantidat di publikadó a oumentá te na 155 persona. Na 1989 nos a muda bai Araruama, na Rio de Janeiro, kaminda nos a sirbi pa nuebe aña. Durante e tempu aki nos a mira dos kongregashon nobo lanta.

Rekompensá pa A Keda na Nos Asignashon

Na 1998, problema di salú i e deseo pa ta serka nos yunan a pone ku nos a muda bai São Gonçalo, Rio de Janeiro. Ainda mi ta sirbi ei komo ansiano di kongregashon. Nos ta hasi nos bèst pa partisipá regularmente den e obra di prediká. Margaritha ta gusta duna testimonio na hende na un supermarket banda di kas, i e kongregashon tabatin e bondat di apartá algun teritorio banda di nos kas pa nos. Dor di esei ta mas fásil pa prediká segun nos salú ta permití.

Awor aki ami ku Margaritha tin mas ku 60 aña kaba ta sirbiendo Yehova. Nos a mira personalmente ku “ni prinsipadonan, ni kosnan presente, ni kosnan futuro, ni podernan, ni haltura, ni profundidat, ni ningun otro kos kreá, lo por separá nos for di e amor di Dios ku ta den Kristu Hesus nos Señor.” (Romanonan 8:38, 39) I tabata un gran plaser di por tabata testigu di e rekohementu di e “otro karnénan,” ku tin e maravioso speransa di bida eterno riba un tera perfekto, rondoná pa Dios su bunita kreashonnan! (Huan 10:16) Ora nos a yega na 1940, Rio de Janeiro tabatin apénas un kongregashon ku 28 publikadó. Awe tin mas ku 250 kongregashon i hopi mas ku 20.000 publikadó di Reino.

Tabatin okashon ku nos por a bai bèk Europa serka nos famianan. Pero nos asignashon for di Yehova ta aki na Brazil. Ki kontentu nos ta ku nos a keda na nos asignashon!

[Nota]

[Plachi na página 21]

Na Hasienda di Reino, Steffisburg, Suisa, na kabamentu di añanan ’30 (Ami ta te na man robes)

[Plachi na página 23]

Djis promé ku nos a kasa, 1939

[Plachi na página 23]

Casablanca den añanan ’40

[Plachi na página 23]

Predikando komo famia

[Plachi na página 24]

Partisipando regularmente den e ministerio awe