Pregunta di Lektor

Ta malu pa hunga plaka ora ta trata di sumanan chikí so?

E Palabra di Dios no ta papia spesífikamente di wega di plaka, pero sí e ta duna sufisiente detaye pa mustra ku tur wega di plaka ta bai kontra prinsipionan bíbliko. * Por ehèmpel, kasi tur hende ta rekonosé ku wega di plaka ta hasi hende haragan golos. E echo ei so kaba ta un punto importante pa kristiannan pasobra Beibel ta bisa ku hende ku ta “golos pa plaka” lo no heredá e Reino di Dios. Tambe e ta mustra ku golosidat ta un forma di idolatria.—1 Korintionan 6:9, 10; Kolosensenan 3:5.

Tambe wega di plaka ta stimulá egoismo i un spiritu kompetitivo insaludabel, un deseo fuerte pa gana. Apòstel Pablo a spièrta kontra e kosnan ei ora el a skirbi: “Laga nos no bira egoista, instigando kompetensia un ku otro, envidiando otro.” (Galationan 5:26, NW) Ademas, wega di plaka ta stimulá algun hende pa stèns riba suerte, i nan ta bai tras di superstishon. Hende ku ta gèmbel ta desaroyá tur tipo di superstishon ku e speransa di por haña suerte. Nan ta pone nos kòrda e israelitanan infiel ku tabata “pone mesa pa [e dios di] Fortuna, i ku [tabata] yena kopa ku biña mesklá pa [e dios di] Destino.”—Isaías 65:11.

Kisas algun hende ta rasoná ku si nan ta hunga karta mes pa sumanan chikí serka un konosí òf bon amigu, esaki ta djis un dibertishon inosente. Podisé un hende ku ta hunga pa sumanan chikí no ta mira su mes komo haragan, egoista, kompetidó òf superstisioso. Pero ki efekto su gèmbelmentu por tin riba esnan ku e ta gèmbel kuné? Hopi hende ku a bira adikto na wega di plaka a kuminsá dor di pusta sumanan chikí ‘djis pa prèt.’ (Lukas 16:10) Un dibertishon ku a parse inosente a bira un problema hopi serio den nan kaso.

Esei ta spesialmente e kaso ora ta trata di mucha. Hopi mucha a sinti e sensashon di gèmbel i gana un suma chikí i despues nan a ser tentá pa bai pa sumanan mas grandi. (1 Timoteo 6:10) Un estudio di hopi aña ku e Komishon di Arizona pa Adikshon na Wega di Plaka a publiká na Merka ta konfirmá ku hopi adikto na wega di plaka a kuminsá hunga for di yòn. Nan tabata “pusta montantenan chikí riba evenementonan deportivo òf wega di karta ku amigu òf famia.” Un otro rapòrt ta bisa ku “mucha ta kuminsá hunga plaka na kas. Por lo general nan ta kuminsá ku wega di karta ku famia i amigu.” E rapòrt ta agregá ku “trinta porshento di mucha ku ta gèmbel a kuminsá hasi esei promé ku nan a kumpli diesun aña.” Hopi teenager ku ta gèmbel ta finansiá nan adikshon ku krímen òf inmoralidat, segun e estudio E Pakiko Tin Demasiado Wega di Plaka—Malesa i Problema di Esnan Ku Ta Gèmbel. Ki un konsekuensia trágiko pa algu ku na prinsipio a parse masha inofensivo!

Siendo ku nos ta biba den un mundu ku tin asina tantu trampa i tentashon kaba, pakiko eksponé nos mes innesesariamente na unu mas? (Proverbionan 27:12) Wega di plaka—ku òf sin e yunan presente, pa sumanan chikí òf grandi—ta pone nos bienestar spiritual na peliger i p’esei nos tin ku evit’é. Ta mas konsehabel pa kristiannan ku ta gusta hunga karta òf otro weganan pa dibertishon djis tene skor riba papel òf hunga e wega djis pa pasa un ratu kontentu sin tene skor mes. Kristiannan sabí ku tin nan bienestar spiritual na pechu i tambe esun di nan amigu i famia ta evitá e práktika di hunga plaka. Nan no ta gèmbel ni pa sumanan chikí.

[Nota]