Esfuersonan Ku Ta Promové Normanan Moral Haltu

Na final di aña 2001, e personanan ku tabata skucha e programa nashonal na Radio Mozambique a tende e siguiente anunsio:

“Presidente di Repúblika a bishitá e sukursal di Testigunan di Yehova na Maputo. El animá e kongregashon religioso aki pa intensifiká nan esfuersonan pa promové normanan moral haltu entre famianan i pa eduká adultonan mediante nan lèsnan di alfabetisashon. Rònt di 10.000 hende a benefisiá kaba di e lèsnan aki. Segun Presidente Chissano, e tipo di inisiativanan aki ta di elogiá. Nan ta duna un kontribushon balioso pa yuda komunidat solushoná problemanan di edukashon ku ainda ta eksistí den e pais aki.”

Despues di e anunsio, nan a pasa un grabashon parsial di e diskurso di e presidente ku a bisa lo siguiente: “Ta masha alentador pa mira kuantu hende ta interesá pa siña lesa i skirbi. Esaki ta mustra nos ku siudadanonan komun lo bai yuda nos baha e kantidat di hendenan ku no por lesa ni skirbi. P’esei, mi kier djis animá Testigunan di Yehova pa intensifiká nan programanan di alfabetisashon. E idioma no ta importante. Loke ta konta ta p’e hendenan por lesa i skirbi, pa nan por komuniká mas fásil i den futuro logra mas den enseñansa.”

Testigunan di Yehova na Mozambique ta duna lès di lesa i skirbi na 850 sitio den henter e pais pa e hendenan mes por lesa e Palabra di Dios. Ademas, tur siman nan ta kondusí mas o ménos 50.000 studio di Beibel grátis. Tur esaki ta parti di un programa edukashonal mundial di Beibel ku aktualmente ta tuma lugá den 235 pais. (Mateo 24:14) Abo tambe por benefisiá di e programa aki. Por fabor, sinti bo liber pa tuma kontakto ku Testigunan di Yehova den bo besindario.