Kon Nos Por Laga Nos Dianan Konta den Bista di Yehova?

“Ayera entre salimentu i bahamentu di solo, a pèrdè dos ora di oro, kada un tabatin 60 minüt di djamanta. No tin rekompensa pa esun ku por haña nan pasobra nan a bai pèrdí pa semper!”—Lydia H. Sigourney, un eskritor merikano (1791-1865).

TA PARSE ku nos bida ta kòrtiku i ku e dianan ta pasa masha lihé. Salmista David a meditá riba kon kòrtiku bida ta, i esaki a motiv’é pa pidi den orashon: “SEÑOR, laga mi sa mi fin i kuantu mi dianan ta; lagami sa kon pasahero mi ta. Ata, bo a hasi mi dianan manera un span di man, i mi edat ta manera nada den bo bista.” David kier a biba di un manera ku ta agradá Dios, tantu ku palabra komo ku akshon. Mustrando ku e ta dependé riba Dios el a bisa: “Mi speransa ta den bo.” (Salmo 39:4, 5, 7) Yehova a skuch’é. I di bèrdat el a evaluá David su aktividatnan i a rekompens’é di akuerdo ku esei.

Ta masha fásil pa nos keda okupá tur momento di dia i atrapá den un bida ku ta pasa lihé i ku ta yen di aktividat. Esaki por hasi nos anshá, foral ora nos tin hopi kos di hasi i ta parse ku nos no tin sufisiente tempu. Nos ta interesá meskos ku David pa hiba un estilo di bida ku Dios ta aprobá? No tin duda, Yehova ta mira nos i e ta eksaminá nos kada un kuidadosamente. Jòb un hòmber ku a teme Dios a rekonosé rònt di 3.600 aña pasá ku Yehova a mira su kamindanan i a konta tur su pasonan. Jòb a hasi e pregunta retóriko: “Ora ku e yama mi pa duna kuenta, kiko lo mi kontest’é?” (Jòb 31:4-6, 14) Pa nos dianan por konta den bista di Dios, nos tin ku pone prioridatnan spiritual, obedesé su mandamentunan i usa nos tempu na un manera sabí. Laga nos wak e asuntunan aki un tiki mas djaserka.

Hasi Asuntunan Spiritual Nos Interes Prinsipal

E Skritura inspirá korektamente ta urgi nos pa pone prioridatnan spiritual ora e ta bisa: “Distinguí loke ta importante di bèrdè.” Kiko ta e kosnan importante aki? E kontesta tin di haber ku “mas i mas konosementu i bon komprondementu.” (Filipensenan 1:9, 10, Beibel na papiamentu koriente) Pa nos por gana konosementu di e propósito di Yehova, nos tin ku usa nos tempu bon. Sin embargo, si nos hasi asuntunan spiritual nos interes primario, esei sigur lo duna nos un bida yen di rekompensa i satisfakshon.

Apòstel Pablo ta rekordá nos pa sigui “purba diserní loke ta agradá Señor.” Pa nos por diserní nos tin ku eksaminá nos propio motivashon- i deseonan di kurason. E apòstel ta sigui: “Buska pa konosé boluntat di Señor.” (Efesionan 5:10, 17 BPK) Awor, kiko ta agradá Yehova òf ta aseptabel p’e? Un proverbio bíbliko ta kontestá: “E prinsipio di sabiduria ta: Atkirí sabiduria; i riba tur kos, atkirí komprondementu; hals’é, i é lo halsa bo.” (Proverbionan 4:7, 8) Yehova ta keda kontentu ku hende ku ta atkerí i ehersé  sabiduria divino. (Proverbionan 23:15) Loke ta hasi e klase di sabiduria aki bunita ta e echo ku ningun hende no por kit’é for di nos ni destruyé. En realidat, e ta bira un protekshon kontra ‘e kaminda di maldat, i for di e hendenan ku ta papia kosnan perverso.’—Proverbionan 2:10-15.

P’esei anto, ta masha sabí pa nos resistí kualkier tendensia di adoptá un aktitut di indiferensia pa ku kosnan spiritual! Nos mester kultivá apresio pa e dichonan di Yehova i un temor saludabel p’e. (Proverbionan 23:17, 18) Maske nos por haña un disposishon mental asina na kualkier tempu den bida, ta mihó pa establesé e patronchi korekto aki i imprimí prinsipionan di Beibel den nos personalidat durante nos hubentut. E rei sabí Sálomon a bisa: “Kòrda tambe riba bo Kreadó den e dianan di bo hubentut.”—Eklesiástes 12:1.

E manera mas íntimo pa kultivá un apresio pa Yehova ta dor di hasi orashon na dje tur dia. David a rekonosé e importansia di konfia den Yehova, pasobra el a roga: “Tende mi orashon, o SEÑOR, i skucha mi sklamashon; no keda ketu pa mi lágrimanan.” (Salmo 39:12) Nos relashon ku Yehova ta asina íntimo ku de bes en kuando e ta asta pone nos yora? Sí, mas nos papia ku Yehova tokante nos asuntunan íntimo di kurason i meditá riba su Palabra, mas e ta hala serka nos.—Santiago 4:8.

Siña Obedesé

Moises tabata un otro hòmber di fe ku a rekonosé ku nos mester dependé riba Dios. Meskos ku David, Moises por a mira ku bida ta yen di problema. P’esei el a pidi Dios mustr’é ‘kon pa konta su dianan, pa e por presentá na Yehova un kurason yen di sabiduria.’ (Salmo 90:10-12) Nos por haña un kurason yen di sabiduria solamente si nos ta siña Yehova su lei- i prinsipionan i apliká nan den nos bida. Moises tabata sa esaki i p’esei el a hasi esfuerso pa inkulká e bèrdat vital ei den e nashon di Israel dor di ripití Dios su lei- i reglamentonan pa nan, promé ku nan a tuma posishon di e Tera Primintí. Tur rei humano ku Yehova lo a skohe despues pa goberná riba Israel mester a skirbi pa su mes un kopia dje lei i les’é tur e dianan di su bida. Dikon? Pa asina e siña teme Dios. Esaki lo a mustra si e rei tabata obediente òf nò i lo a evit’é di halsa su mes riba su rumannan. Tambe e lesamentu aki lo a yuda prolongá su dianan riba e trono. (Deuteronomio 17:18-20) Yehova a ripití e promesa aki ora el a bisa Sálomon, yu di David: “Si bo kana den mi kamindanan i warda mi statutonan i mandamentunan, manera bo tata David a kana, e ora ei lo mi prolongá bo dianan.”—1 Reinan 3:10-14.

E asuntu di obedensia ta algu serio pa Dios. Yehova lo ripará sigur si nos ta minimisá sierto aspekto di su rekisito- i mandamentunan i ta konsiderá nan komo kosnan di ménos importansia. (Proverbionan 15:3) E echo ku nos sa esaki mester motivá nos pa sigui mustra gran apresio pa Yehova su guia i siguié, maske esei no ta fásil tur ora. Satanas ta hasi tur loke e por pa “stroba nos” di obedesé e lei- i mandamentunan di Dios.—1 Tesalonisensenan 2:18.

Ta masha importante pa nos kumpli ku e konseho bíbliko pa reuní huntu pa adorá Dios i asosiá ku otro. (Deuteronomio 31:12, 13; Hebreonan 10:24, 25) P’esei, nos tin ku puntra nos mes: ‘Mi tin e determinashon i perseveransia nesesario pa hasi loke realmente ta bale la pena?’ Si nos ta neglishá nos asosiashon i instrukshon na e reunionnan kristian pa por logra siguridat ekonómiko, esei lo suak nos relashon ku Yehova. Apòstel Pablo a skirbi: “Laga boso karakter ta liber di amor pa plaka i sea  kontentu ku loke boso tin; pasobra [Yehova] mes a bisa: ‘Nunka lo mi no bandoná bo, i nunka lo mi no laga bo desampará.’” (Hebreonan 13:5) Dor di obedesé Yehova su mandamentunan boluntariamente, nos ta mustra ku nos tin konfiansa apsoluto ku lo e perkurá pa nos.

Hesus a siña obedensia i el a benefisiá for di esaki. Nos tambe por. (Hebreonan 5:8) Mas nos kultivá e kualidat di obedensia, mas lihé nos ta kla pa obedesé, asta den kosnan chikitu. Ta sierto ku debí na nos integridat, por sosodé ku otro hende ta trata nos di un manera desagradabel i kruel. Esei por sosodé foral na trabou, na skol i den un kas kaminda no ta tur hende tin e mesun religion. Sin embargo, nos ta haña konsuelo for dje deklarashon hasí na e israelitanan, esta, ku si nan ‘a stima Yehova dor di obedesé su bos i dor di tene duru na dje; esei lo tabata nan bida i largura di nan dianan.’ (Deuteronomio 30:20) E promesa aki ta konta pa nos tambe.

Usa Tempu na un Manera Sabí

Otro kos ku lo laga nos dianan konta den bista di Yehova ta si nos ta usa nos tempu na un manera sabí. Tempu no ta manera plaka, bo no por spar e, bo tin ku us’é òf e ta bai pèrdí. Kada ora ku pasa a bai pa semper. Dor ku semper nos tin mas kos di hasi ku nos por kumpli kuné, nos ta usando nos tempu pa logra nos metanan den bida? E meta prinsipal den bida di tur kristian mester ta pa nan partisipá regularmente den e trabou di prediká e Reino i hasi disipel.—Mateo 24:14; 28:19, 20.

Ta solamente si nos ta konsiente ki balor nos tempu tin, nos por us’é bon. Korektamente Efesionan 5:16 ta animá nos pa ‘hasi bon uso di nos tempu,’ i esaki ta nifiká stòp di dediká tempu na kosnan di ménos importansia. E ta nifiká baha man na kosnan ku ta tuma  hopi tempu di bo. Si nos ta pasa hopi tempu ta wak televishon, sùrf riba Internèt, lesa informashonnan inútil òf ta kore demasiado tras di rekreo i dibertishon, nos por keda agotá. Ademas, si nos ta akumulá demasiado kos material, esaki por tuma e tempu ku nos tin mester pa atkerí un kurason yen di sabiduria.

Personanan ku ta boga pa bon maneho di tempu, ta bisa: “Ta imposibel pa bo hasi bon uso di bo tempu si bo no pone metanan spesífiko i kla.” Nan ta sugerí sinku kriterio pa pone meta: e mester ta spesífiko, sistemátiko, alkansabel, realístiko i mará na un tempu.

Un meta ku ta bale la pena ta esun pa mehorá nos lesamentu di Beibel. E promé paso ta di pone un meta spesífiko: lesa Beibel kompleto. E siguiente paso ta pa hasi nos meta sistemátiko. Dor di esei, nos por midi nos progreso. Metanan ku nos pone mester animá nos pa hasi esfuerso i progresá. Tambe nan mester ta alkansabel i realístiko. Pa logra tur esaki nos mester tene kuenta ku nos abilidatnan personal, konosementu práktiko i e tempu ku nos tin na nos disposishon. Algun hende tin mester di mas tempu pa alkansá nan meta. Al final nos tin ku fiha un fecha pa alkansá e meta. Ora bo pone un fecha pa logra algu, esei lo motivá bo mas pa traha pa logr’é.

Tur miembro di e famia di Bètel ku ta sirbi n’e sede mundial di Testigunan di Yehova òf na un di su sukursalnan rònt mundu, tin un meta spesífiko pa lesa Beibel kompleto durante nan promé aña na Bètel. Nan ta realisá ku un lesamentu benefisioso di Beibel ta yuda nan krese spiritualmente i kultivá un relashon mas íntimo ku Yehova, kende ta siña nan benefisiá nan mes. (Isaías 48:17) Nos tambe por pone e meta pa lesa Beibel riba un base regular?

Benefisionan Ora Nos Dianan Ta Konta

Si nos ta duna atenshon primario na asuntunan spiritual, esaki lo resultá den bendishonnan inkontabel. Na promé lugá, e ta yuda nos disfrutá mas ainda di e satisfakshon ku nos ta logra den bida i di e echo ku nos bida tin un propósito. Komunikashon regular ku Yehova via orashon sinsero ta hala nos mas serka dje. E echo so ku nos ta hasi orashon ta mustra ku nos tin konfiansa den dje. Dor di lesa Beibel tur dia i tambe e publikashonnan basá riba Beibel ku e “e esklabo fiel i prudente” ta perkurá, nos ta demostrá ku nos ta dispuesto pa skucha Dios ora e ta papia ku nos. (Mateo 24:45-47) Esaki ta yuda nos atkerí un kurason yen di sabiduria pa asina nos por tuma desishonnan korekto den bida.—Salmo 1:1-3.

Pa nos ta un plaser pa obedesé Yehova su mandamentunan, pasobra nan no ta pisá. (1 Huan 5:3) Segun ku nos ta laga kada dia konta den bista di Yehova, nos ta fortalesé nos relashon kuné. Tambe nos ta bira un berdadero apoyo spiritual pa nos kompañeronan kristian. E echonan ei ta hasi Yehova Dios kontentu. (Proverbionan 27:11) I no tin un rekompensa mas grandi ku disfrutá di Yehova su aprobashon awor i pa semper!

[Plachi na página 21]

Kristiannan ta tuma asuntunan spiritual na serio

[Plachi na página 22]

Bo ta usa bo tempu na un manera sabí?

[Plachinan na página 23]

Segun ku nos ta laga kada dia konta den Yehova su bista, nos ta fortalesé nos relashon kuné