Kristiannan Tin Mester di Otro
Kristiannan Tin Mester di Otro
“Nos ta miembro di otro.”—EFESIONAN 4:25.
1. Kiko un ensiklopedia ta bisa tokante kurpa humano?
KURPA di hende ta un kreashon maravioso! The World Book Encyclopedia ta bisa: “Tin hende ta bisa ku kurpa humano ta un mashin—e mashin mas maravioso ku a yega di ser trahá. Klaru ku kurpa di hende no ta un mashin. Pero den hopi sentido e ta komparabel ku un mashin sí. Por ehèmpel, nos kurpa ta konsistí di hopi diferente parti, meskos ku un mashin. I meskos ku den kaso di un mashin, kada parti di nos kurpa tin su mes funshon spesífiko. Pero tantu serka nos kurpa komo un mashin, tur e partinan ta traha huntu di manera ku e ta funshoná sin problema.”
2. Den ki sentido kurpa humano i e kongregashon kristian ta parse otro?
2 Sí, kurpa humano ta konsistí di diferente parti, òf miembro, i kada un di nan ta yuda ku algu nesesario. No tin ni un solo ader, múskulo ni otro parti di kurpa ku no tin su propósito. Den e kongregashon kristian tambe kada miembro por aportá di un manera òf otro na e salú i bunitesa spiritual dje kongregashon. (1 Korintionan 12:14-26) Niun di su miembronan no mester sintié superior ku e otronan, pero di otro banda, niun no mester sinti tampoko ku e no ta importante.—Romanonan 12:3.
3. Kon Efesionan 4:25 ta mustra ku kristiannan tin mester di otro?
3 Meskos ku ta e kaso ku e diferente miembronan di un kurpa humano, kristiannan tambe tin mester di otro. Apòstel Pablo a bisa su rumannan den fe ungí ku spiritu: “Poniendo mentira un banda, kada un di boso papia bèrdat ku su próhimo, pasobra nos ta miembro di otro.” (Efesionan 4:25) Komo ku e miembronan di Israel spiritual, “e kurpa di Kristu,” ta miembronan “di otro,” nan ta papia bèrdat ku otro i koperá ku otro den tur sentido. Sí, kada un di nan ta pertenesé na tur otro. (Efesionan 4:11-13) I e kristiannan ku tin speransa di keda biba riba tera tambe ta felismente uní ku nan, papiando bèrdat i koperando ku otro.
4. Kon nos por yuda esnan nobo?
4 Tur aña, miónes di kristian ku ta spera di biba den un paradeis riba tera ta batisá. Otro miembronan dje kongregashon ta keda masha kontentu pa yuda nan “sigui dilanti pa yega na madures.” (Hebreonan 6:1-3) Por yuda nan na diferente manera. Nos por kontestá nan preguntanan tokante Beibel òf duna nan yudansa práktiko den predikashon. Tambe nos por yuda e nobonan dor di partisipá regularmente na reunionnan kristian, i asina pone un ekselente ehèmpel pa nan. Den tempu difísil tambe nos por yuda nan dor di duna nan animashon òf kisas konsuelo. (1 Tesalonisensenan 5:14, 15) Nos mester buska manera pa yuda otronan keda “kana den e bèrdat.” (3 Huan 4) Sea ku nos ta hóben òf di edat, sea ku nos a kaba di kuminsá kana den e bèrdat òf nos tin hopi aña ta hasié, nos por duna un aporte na e bienestar spiritual di nos kompañeronan kreyente, pasobra di bèrdat nan tin mester di nos.
Nan A Yuda Kaminda Tabatin Nesesidat
5. Kon Akila ku Prisila tabata un yudansa pa Pablo?
5 Parehanan kristian kasá tambe tin e satisfakshon di yuda nan kompañeronan kreyente. Akila i Prisila, por ehèmpel, a yuda Pablo. Nan a risibié den nan kas, nan a traha huntu komo trahadó di tènt, i nan a yud’é fortalesé e kongregashon nobo na Korinto. (Echonan 18:1-4) Asta nan a pone nan bida na peliger pa Pablo, ounke nos no sa kon. Nan tabata biba na Roma ora Pablo a bisa e kristiannan dje stat ei: “Saludá Prisila i Akila, mi kompañeronan di trabou den Kristu Hesus, kendenan a riska nan bida pa mi, na kendenan no solamente ami ta duna gradisimentu, ma tambe tur e iglesianan di e paganonan.” (Romanonan 16:3, 4) Meskos ku Akila i Prisila, algun kristian den tempu moderno ta fortalesé kongregashonnan i yuda nan kompañeronan di adorashon na diferente manera. Tin bes nan ta asta riska nan bida pa no hinka otro sirbidónan di Dios den peliger di maltrato òf morto na man di persiguidó.
6. Ki yudansa Apólos a risibí?
6 Akila ku Prisila a yuda Apólos tambe, un kristian ku bon abilidat di papia ku tabata siña e hendenan na Efeso tokante Hesukristu. E tempu ei, e úniko boutismo ku Apólos a konosé tabata e boutismo ku Huan tabata hasi komo símbolo di repentimentu pa pikánan kometé kontra e pakto di Lei. Akila ku Prisila a mira ku Apólos tabatin mester di yudansa, i nan “a splik’é e kaminda di Dios na un manera mas eksakto.” Kasi sigur nan a splik’é ku pa bo batisá komo kristian bo mester bai bou di awa i risibí spiritu santu. Apólos a komprondé bon. Despues, na Akaya, “e tabata di gran ayudo pa esnan ku a kere pa medio di grasia; pasobra e tabata refutá e hudiunan fuertemente den públiko, mustrando pa medio di e Skrituranan ku Hesus tabata e Kristu.” (Echonan 18:24-28) Hopi bes komentario di nos kompañeronan di adorashon por yuda nos komprendé e Palabra di Dios mihó. Den e aspekto aki tambe nos tin mester di otro.
Duna Yudansa Material
7. Kon e filipensenan a reakshoná ora nan kompañeronan kristian tabatin mester di yudansa material?
7 Miembronan di e kongregashon kristian na Filípos a stima Pablo hopi, i tempu e tabata na Tesalónika nan a manda sierto kosnan di nesesidat p’e. (Filipensenan 4:15, 16) Ora e rumannan na Yerúsalèm tabatin mester di yudansa material, e kristiannan na Filípos a demostrá ku nan kier a duna asta mas di loke nan tabata por. Pablo tabatin asina tantu apresio pa e aktitut ekselente ku su rumannan filipense tabatin, ku el a usa nan komo un ehèmpel pa otro kreyentenan.—2 Korintionan 8:1-6.
8. Ki aktitut Epafrodito a demostrá?
8 Tempu Pablo tabata prezu, e filipensenan a hasi mas ku djis manda regalo material. Nan a despachá Epafrodito tambe komo nan representante. “[Epafrodito] a hera muri pa e obra di Kristu, riskando su bida pa kompletá loke boso tabata falta den boso sirbishi na mi.” (Filipensenan 2:25-30; 4:18) Beibel no ta bisa si Epafrodito tabata un ansiano òf un sirbidó ministerial. Sin embargo, e tabata un kristian kla pa yuda i dispuesto pa hasi sakrifisio propio, i Pablo tabatin hopi mester di dje. Tin hende manera Epafrodito den bo kongregashon?
Nan Tabata “un Enkurashamentu”
9. Ki ehèmpel Aristarko ta pa nos?
9 Tur kongregashon tin gran apresio pa rumannan amoroso manera Akila, Prisila i Epafrodito. Kisas algun di nos kompañeronan di adorashon ta manera Aristarko, un otro kristian di promé siglo. E i algun otro kristian tabata “un enkurashamentu” pa Pablo. Kisas nan a dun’é konsuelo òf yudansa den maneranan práktiko. (Kolosensenan 4:10, 11) Aristarko a yuda Pablo, mustrando asina ku e tabata un berdadero amigu den tempu di nesesidat. E tabata e sorto di persona menshoná na Proverbionan 17:17: “Un amigu ta stima tur ora bai, i un ruman ta nasí pa tempu di atversidat.” Akaso nos tur no mester ta “un enkurashamentu” pa nos rumannan kristian? I ora rumannan ta enfrentando difikultat, mas ainda nos mester duna nan un man.
10. Ki ehèmpel Pedro ta pa ansianonan kristian?
10 Foral ansianonan kristian mester ta un enkurashamentu pa nan rumannan spiritual. Kristu a bisa apòstel Pedro: “Fortalesé bo rumannan.” (Lukas 22:32) Pedro tabata kapas pa hasi esei debí ku e tabata fuerte i firme manera piedra, prinsipalmente despues ku Hesus a resusitá. Ansianonan, boso tambe mester purba tur manera pa hasi meskos, ku un spiritu dispuesto i suave, pasobra boso kompañeronan kreyente tin mester di boso.—Echonan 20:28-30; 1 Pedro 5:2, 3.
11. Kiko nos por siña for di e bon aktitut di Timoteo?
11 Timoteo, Pablo su kompañero di biahe, tabata un ansiano ku tabatin interes profundo den otro kristiannan. Apesar ku e tabatin problema ku su salú, Timoteo a demostrá un fe firme, i el a ‘sirbi [“manera katibu,” NW] huntu ku Pablo, den e trabou di evangelio.’ P’esei e apòstel por a bisa e filipensenan: “Mi no tin ni un otro hende di e mesun spiritu ku lo preokupá sinseramente pa boso bienestar.” (Filipensenan 2:20, 22; 1 Timoteo 5:23; 2 Timoteo 1:5) Si nos demostrá un aktitut manera di Timoteo, nos por ta un bendishon pa otro adoradónan di Yehova. Ta bèrdat ku nos tin nos propio debilidatnan humano i pruebanan pa lucha kuné. Pero nos tambe por mustra fe firme i interes amoroso den nos rumannan spiritual. De echo, nos mester hasié. Semper kòrda ku nan tin mester di nos.
Hende Muhé ku Interes den Otro Hende
12. Kiko e ehèmpel di Dorkas por siña nos?
12 Un hende muhé ku a mustra interes den otro hende tabata Dorkas. Ora el a muri, e disipelnan a manda yama Pedro i a hib’é na un kamber ariba. Ei “tur e biudanan a bin para banda di dje ta yora, i tabata mustra tur e túnikanan i bistínan ku Dorkas a traha tempu ku e tabata serka nan.” Dorkas a ser lantá bèk na bida, i sin duda el a sigui “abundá den echonan di karidat i bon obra.” Den e kongregashon kristian di awe tambe tin hende muhé manera Dorkas ku kisas ta kose paña òf hasi otro obranan amoroso pa hende den nesesidat. Klaru ku e manera prinsipal ku nan ta hasi bon obra ta dor di traha pa interesnan dje Reino i partisipá den e trabou di hasi disipel.—Echonan 9:36-42; Mateo 6:33; 28:19, 20.
13. Kon Lidia a mustra interes den kompañeronan kristian?
13 Lidia tabata un hende muhé ku a teme Dios, i e tabatin interes den hende. El a nase na Tiatira i tabata biba na Filípos ora Pablo a prediká n’e stat ei na aña 50 di nos era. Probablemente Lidia a kombertí bira hudiu, pero parse ku no tabatin hopi hudiu na Filípos, i no tabatin snoa. E i otro hende muhénan deboto tabata huntu banda di un riu pa adorá ora e apòstel a proklamá e bon nobo na nan. E relato ta bisa: “Señor a habri [Lidia] su kurason pa paga atenshon na e kosnan ku Pablo tabata bisa. I ora ku é i e hendenan di su kas a wòrdu batisá, el a roga nos, bisando: ‘Si boso a husga ku mi ta fiel na Señor, bin mi kas i keda serka mi.’ I el a konvensé nos.” (Echonan 16:12-15) Debí na Lidia su deseo di hasi bon pa hende el a logra konvensé Pablo i su kompañeronan pa keda na su kas. Awe tambe nos ta apresiá mashá ora kristiannan bondadoso i amoroso mustra hospitalidat manera Lidia!—Romanonan 12:13; 1 Pedro 4:9.
Hóbennan, Nos Tin Mester di Boso Tambe
14. Kon Hesukristu a trata mucha?
14 E kongregashon kristian a kuminsá ku e Yu di Dios, Hesukristu. E tabata bondadoso i kariñoso. Hende a sinti nan mes bon den su presensia debí ku e tabatin amor i kompashon. Ora ku na un okashon algun di nan a kuminsá trese nan yunan chikitu serka Hesus, su disipelnan a purba manda nan bai. Pero Hesus a bisa: “Laga e muchanan bin serka mi; no stroba nan, pasobra e reino di Dios ta pertenesé na esnan manera esakinan. Di bèrdat mi ta bisa boso, esun ku no risibí e reino di Dios manera un mucha lo no drenta den dje.” (Marko 10:13-15) Si nos kier risibí e bendishonnan ku e Reino lo trese, nos mester ta mes humilde i kla pa risibí instrukshon ku un mucha chikitu. Hesus a mustra e amor ku e tin pa mucha dor di tuma nan den su brasa i bendishoná nan. (Marko 10:16) Kon ta pará ku hóbennan di nos tempu? Boso por keda sigur ku e kongregashon ta stima boso, i ku e tin mester di boso.
15. Kiko Lukas 2:40-52 ta siña nos tokante e bida di Hesus, i ki ehèmpel el a pone pa hóbennan?
15 Tempu ku Hesus tabata yòn ainda, el a demostrá ku e tabata stima Dios i e Skritura. Ku 12 aña di edat el a biaha di su pueblo Názarèt pa Yerúsalèm huntu ku su mayornan Hosé ku Maria pa selebrá Pasku Hudiu. Bolbiendo kas e mayornan di Hesus a ripará ku Hesus no tabata den e grupo ku tabata biahando huntu. Finalmente nan a bin hañ’é sintá den un pasio dje tèmpel, skuchando e maestronan hudiu i hasiendo nan pregunta. Hesus a keda straño ku Hosé ku Maria no tabata sa unda pa hañ’é. El a puntra nan: “Boso no tabata sa ku mi mester tabata den e kas di mi Tata?” El a bolbe kas ku su mayornan, a keda obedesé nan, i a sigui krese físikamente i den sabiduria. (Lukas 2:40-52) Esta un bon ehèmpel Hesus a pone pa nos hóbennan! Nan tambe mester obedesé nan mayornan i mustra interes pa siña tokante asuntunan spiritual.—Deuteronomio 5:16; Efesionan 6:1-3.
16. (a) Kiko algun mucha a grita ora Hesus tabata dunando testimonio den e tèmpel? (b) Ki privilegio hóbennan kristian tin awendia?
16 Komo hóben, kisas bo ta duna testimonio di Yehova na skol i di kas pa kas huntu ku bo mayornan. (Isaías 43:10-12; Echonan 20:20, 21) Ora Hesus tabata dunando testimonio i kurando hende n’e tèmpel poko promé ku el a muri, algun mucha a grita: “Hosana [“Salba, nos ta roga,” NW] na e Yu di David.” E saserdotenan prinsipal i e eskribanan a rabia ora nan a tende esaki. Nan a bin protestá serka dje, bisando: “Bo ta tende kiko esakinan ta bisa?” Hesus a respondé nan: “Sí; boso no a lesa nunka: ‘For di boka di mucha chikitu i di yunan na pechu bo a prepará alabansa pa bo mes’?” (Mateo 21:15-17) Boso, hóbennan den kongregashon, tin e mesun privilegio ku e muchanan ei, esta, di alabá Dios i su Yu. Nos kier tin boso, i nos tin mester di boso tambe pa traha huntu ku nos komo proklamadó dje Reino.
Den Tempu di Kalamidat
17, 18. (a) Pakiko Pablo a organisá e kolekta p’e kristiannan na Hudea? (b) Ki efekto e donashonnan boluntario pa e kreyentenan di Hudea tabatin riba kristiannan hudiu i no hudiu?
17 Den kualkier sirkunstansia ku nos por ta, amor ta impulsá nos pa yuda kompañeronan kristian den nesesidat. (Huan 13:34, 35; Santiago 2:14-17) Ta e amor ku Pablo tabatin pa su rumannan na Hudea a motiv’é pa organisá e kolekta pa nan entre e kongregashonnan di Akaya, Galasia, Masedonia i e distrito di Asia. Kisas ta e persekushon, lantamentu di pueblo i e hamber ku e disipelnan na Yerúsalèm a pasa aden ta loke a okashoná e “sufrimentu,” “tribulashonnan” i “konfiskashon di [nan] propiedat” ku Pablo a papia di dje. (Hebreonan 10:32-34; Echonan 11:27–12:1) Ku esei na mente el a supervisá un fondo pa kristiannan pober na Hudea.—1 Korintionan 16:1-3; 2 Korintionan 8:1-4, 13-15; 9:1, 2, 7.
18 E donashonnan boluntario pa e santunan na Hudea a demostrá ku tabatin un laso di hermandat entre adoradónan hudiu i no hudiu di Yehova. Ademas e kontribushonnan ei tabata un manera ku e kristiannan no hudiu por a mustra gratitut na nan kompañeronan hudiu pa tur e iluminashon spiritual ku nan a risibí for di nan. Pues, e kristiannan no a kompartí ku otro den sentido material so, sino spiritualmente tambe. (Romanonan 15:26, 27) Awe tambe kontribushonnan pa kreyentenan den nesesidat ta boluntario i motivá dor di amor. (Marko 12:28-31) Nos tin mester di otro den e sentido aki tambe, pa por tin igualdat; pa ‘esun ku poko no falta nada.’—2 Korintionan 8:15.
19, 20. Duna un ehèmpel ku ta mustra kon Yehova su pueblo ta duna yudansa ora di desaster.
19 Ya ku nos ta konsiente ku kristiannan tin mester di otro, nos ta kla pa yuda nos rumannan den fe. Por ehèmpel, konsiderá kiko a pasa ora temblor pisá i avalancha di lodo a asotá El Salvador na komienso di aña 2001. Un informe a bisa: “Rumannan di tur parti di El Salvador a organisá akshonnan di ousilio. Gruponan di ruman for di Guatemala, Merka i Kánada a bin duna nos un man. . . . Den poko tempu nan a traha mas ku 500 kas i 3 bunita Salòn di Reino. E trabou duru, koperashon i sakrifisio propio dje rumannan aki a resultá den un gran testimonio.”
20 Un informe di Suráfrika a bisa: “E inundashonnan teribel ku a destruí partinan grandi di Mozambique a afektá hopi di nos rumannan kristian tambe. E sukursal na Mozambique a perkurá pa mayoria di nan nesesidatnan, pero nan a pidi nos manda paña usá den bon estado pa rumannan den nesesidat. Nos a reuní sufisiente paña pa manda un kònteiner di 40 pia [12 meter] yen di paña pa nos rumannan na Mozambique.” Sí, den e maneranan aki tambe nos tin mester di otro.
21. Kiko nos lo trata den e siguiente artíkulo?
21 Manera nos a bisa kaba, tur parti di un hende su kurpa ta importante. Meskos ta konta pa e kongregashon kristian. Tur su miembronan tin mester di otro. I nan mester sigui sirbi den union tambe. E siguiente artíkulo lo trata algun faktor ku ta hasi esaki posibel.
Kon Lo Bo Kontestá?
• Ki paresido tin entre kurpa humano i e kongregashon kristian?
• Kon e promé kristiannan a reakshoná ora nan kompañeronan kreyente tabatin mester di yudansa?
• Kua ta algun ehèmpel for di e Skritura ku ta mustra ku kristiannan tin mester di otro, i ku nan ta yuda otro?
[Preguntanan di Estudio]
[Plachi na página 10]
Akila ku Prisila tabatin interes den hende
[Plachi na página 12]
Yehova su adoradónan ta yuda otro, i tambe otro hende, den tempu di kalamidat