No Laga di Reuní

Beibel ta bisa: “No laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.” (Hebreonan 10:25) Klaramente, adoradónan berdadero mester reuní na un lugá di adorashon pa nan “konsiderá kon pa stimulá otro pa stima i hasi bon obra.”—Hebreonan 10:24.

ORA apòstel Pablo a skirbi e palabranan aki den promé siglo di nos era, tabatin un tèmpel impreshonante na Yerúsalèm, ku e hudiunan tabata usa komo un lugá di adorashon. Nan tabatin snoa tambe. Hesus a “siña e hendenan den snoa i den tèmpel, kaminda tur e hudiunan [tabata] reuní.”—Huan 18:20.

Ki sorto di lugá pa reuní Pablo tabatin na mente ora el a enkurashá e kristiannan pa reuní i animá otro? E tèmpel di Yerúsalèm por sirbi di un manera òf otro komo ehèmpel pa e edifisionan religioso grandi ku kristiandat a traha? Na ki tempu hende ku a konsiderá nan mes kristian a kuminsá usa e tipo di edifisionan religioso grandi ei?

‘Un Kas na Dios Su Nòmber’

E promé instrukshon pa traha un lugá pa adorá Dios ta den e buki bíbliko di Éksodo. Yehova Dios a manda su pueblo eskohí, e israelitanan, pa  nan traha “e tabernakel,” òf “e tènt di reunion.” Mester a warda e arka di pakto i vários artíkulo sagrado den dje. Ora nan a kaba di traha e tabernakel na aña 1512 promé ku nos era, e gloria di Yehova “a yena e tabernakel.” Pa mas ku kuater siglo e tènt portátil ei a sirbi komo un elemento sentral den Dios su areglo pa hende por aserk’é. (Éksodo, kapítulo 25 pa 27; 40:33-38) Den Beibel e tènt aki sa ser yamá tambe “e tèmpel di SEÑOR” i “e kas di SEÑOR.”—1 Samuel 1:9, 24.

Mas despues, tempu David tabata rei na Yerúsalèm, el a ekspresá un deseo fuerte pa traha un kas permanente pa e gloria di Yehova. Pero debí ku David tabata un hòmber di guera, Yehova a bis’é: “Abo lo no traha un kas na mi nòmber.” Na su lugá Dios a skohe Sálomon, yu di David, pa traha e tèmpel. (1 Krónikanan 22:6-10) Sálomon a inougurá e tèmpel na aña 1026 promé ku nos era, despues di un periodo di konstrukshon di shete aña i mei. Yehova a mustra ku e edifisio aki tabatin su aprobashon, dor di bisa: “Mi a konsagrá e kas aki ku bo a traha dor di pone mi nòmber ayanan pa semper, i mi wowo i mi kurason lo ta einan kontinuamente.” (1 Reinan 9:3) Tanten ku e israelitanan a keda fiel, Yehova lo a trata e kas ei ku aprobashon. Pero si nan a hala for di loke ta korekto, Yehova lo a kita su aprobashon for di riba e lugá, i ‘e kas lo a bira un monton di ruina.’—1 Reinan 9:4-9; 2 Krónikanan 7:16, 19, 20.

Ku tempu e israelitanan a bandoná adorashon berdadero tòg. (2 Reinan 21:1-5) “P’esei [Yehova] a lanta rei di e kaldeonan kontra nan, kendenan . . . a kima e kas di Dios, i a basha e muraya di Yerúsalèm abou, a pega tur su edifisionan fortifiká na kandela, i a destruí tur su artíkulonan di balor. I esnan ku a skapa for di spada, el a hiba prezu na Babilonia; i nan tabata sirbidó di dje i di su yu hòmbernan.” Segun Beibel esaki a tuma lugá na aña 607 promé ku nos era.—2 Krónikanan 36:15-21; Yeremías 52:12-14.

Manera profeta Isaías a profetisá, Dios a lanta Rei Siro di Pèrsia pa libra e hudiunan for di man dje babilonionan. (Isaías 45:1) Despues di un eksilio ku a dura 70 aña, nan a bolbe Yerúsalèm na aña 537 promé ku nos era, pa nan por a rekonstruí e tèmpel. (Èsdras 1:1-6; 2:1, 2; Yeremías 29:10) Despues di algun retraso den konstrukshon, finalmente nan a kaba di rekonstruí e tèmpel na aña 515, i adorashon puru di Dios tabata restorá. Apesar ku e no tabata mes glorioso ku e tèmpel di Sálomon, e edifisio aki a keda kasi 600 aña riba pia. Pero e tèmpel aki tambe a kai den mal estado debí ku e israelitanan a neglishá adorashon di Yehova. Tempu ku Hesukristu a aparesé riba tera, e tèmpel tabata pasando den un proseso di restorashon riba enkargo di Rei Herodes. Kiko tabata spera e tèmpel aki?

“Lo No Keda Ni un Piedra Riba Otro”

Papiando dje tèmpel na Yerúsalèm, Hesus a bisa su disipelnan: “Akinan lo no keda ni un piedra riba otro, ku lo no wòrdu bashá abou.” (Mateo 24:1, 2) Manera el a bisa, e lugá ku pa siglonan hende a rekonosé komo sentro di adorashon di Dios a ser destruí na aña 70 di nos era dor di sòldánan romano ku a bini pa para e lantamentu dje hudiunan. * E tèmpel  ei no a ser rekonstruí nunka mas. Den siglo 7 nan a lanta e santuario islámiko konosí komo Kupel dje Baranka, i te awe e ta pará n’e mesun lugá kaminda ántes e tèmpel dje hudiunan tabata.

Ki areglo tabatin pa e siguidónan di Hesus por adorá? E kristiannan ku tabata hudiu lo a sigui adorá Dios na e tèmpel ku tabata serka di ser destruí? I kiko di kristiannan ku no tabata hudiu? Unda nan mester a adorá Dios? E edifisionan religioso di kristiandat lo mester a bini na lugá di e tèmpel? Un kòmbersashon ku Hesus tabatin ku un muhé samaritano ta yuda nos komprondé e asuntu aki.

Pa siglonan largu, samaritanonan a adorá Dios na un tèmpel grandi ku tabatin riba Seru Gerizim na Samaria. E muhé samaritano a bisa Hesus: “Nos tatanan tabata adorá riba e seru aki; i boso ta bisa ku ta na Yerúsalèm e lugá ta, kaminda hende mester adorá.” Hesus a kontest’é: “Muhé, kere mi, e ora lo yega ku ni riba e seru aki, ni na Yerúsalèm boso lo no adorá e Tata.” Hende lo no tin mester di un tèmpel trahá ku man mas pa adorá Yehova, pasobra, manera Hesus a splika: “Dios ta Spiritu, i esnan ku ta ador’é mester adorá den spiritu i bèrdat.” (Huan 4:20, 21, 24) Mas despues apòstel Pablo a bisa e hendenan di Aténas: “E Dios ku a traha mundu i tur kos ku tin den dje, siendo Señor di shelu i di tera, no ta biba den tèmpel trahá ku man.”—Echonan 17:24.

Klaramente, e edifisionan religioso di kristiandat no tin nada di haber ku e sistema di tèmpel ku a eksistí promé ku e era kristian. I kristiannan di promé siglo no tabatin niun motibu pa traha e tipo di lugánan ei. Pero despues ku e apòstelnan a muri, e kongregashon kristian a kuminsá desviá for di siñansanan berdadero, manera a ser profetisá. (Echonan 20:29, 30) Hopi aña promé ku emperador romano Konstantino supuestamente a kombertí bira kristian na aña 313 di nos era, hendenan ku a konsiderá nan mes kristian a kuminsá hala for di e siñansanan di Hesus.

Konstantino a yuda meskla “kristianismo” ku religion romano pagano. The Encyclopædia Britannica ta bisa: “Konstantino mes a manda traha tres enorme basílika na Roma: di San Pedro, di San Paolo Fuori le Mura, i di San Giovanni in Laterano. E . . . a bini ku e ‘plattegrond’ na forma di krus ku a bira e modelo standard di misanan na Europa Oksidental durante henter Edat Medio.” Ainda nan ta konsiderá e basílika di San Pedro na Roma, awor rekonstruí, komo e sentro di Iglesia Katóliko Romano.

Historiadó Will Durant ta bisa: “Iglesia a adoptá algun kustumber i método di adorashon ku tabata komun den Roma pre-kristian [pagano].” Un di nan ta e forma di basílika.” Di siglo 10 te siglo 15, masha hopi misa i katedral a ser konstruí, i hopi atenshon a ser duná na nan forma. Ta den e tempu ei nan a traha hopi dje edifisionan di kristiandat ku awendia ta ser konsiderá monumento.

Ta tur hende ta risibí refreskamentu spiritual i animashon den misa? Francisco, di Brazil ta bisa: “Den mi bista, misa a para bira e símbolo di tur loke ta laf i fastioso den religion. Misa tabata un seremonia sin nifikashon ni variashon ku no tabata yena mi berdadero  nesesidatnan. Tabata un alivio ora e kaba.” Sin embargo, Beibel ta manda adoradónan berdadero pa reuní huntu. Ki areglo pa reuní nan mester sigui?

“E Iglesia na Nan Kas”

Nos por haña sa kua ta e manera korekto pa kristiannan reuní, ora nos mira kon kreyentenan di promé siglo tabata bini huntu. Beibel ta indiká ku generalmente nan tabata reuní na kas di hende. Por ehèmpel, apòstel Pablo a skirbi: “Saludá Prisila i Akila, mi kompañeronan di trabou den Kristu Hesus. . . . Saludá tambe e iglesia na nan kas.” (Romanonan 16:3, 5; Kolosensenan 4:15; Filemon 2) E palabra griego ek·kle·sía tradusí aki komo “iglesia” ta referí na un grupo di hende reuní pa un propósito, i no na un edifisio. (Echonan 8:1; 13:1) Kristiannan berdadero no tin mester di edifisio religioso luhoso pa nan adorá aden.

Kon e promé kongregashonnan kristian a tene nan reunionnan? Disipel Santiago a referí na un reunion kristian usando un forma dje palabra griego sy·na·go·gé. (Santiago 2:2) E palabra griego aki ta nifiká “tresementu huntu,” i den Beibel e ta ser usá komo sinónimo di e palabra ek·kle·sía. Pero ku tempu e palabra “sinagoga” (ku na papiamentu a bira “snoa”) a kuminsá nifiká e lugá kaminda e reunion tabata tuma lugá. E promé kristiannan hudiu tabata sa bon kiko tabata tuma lugá na un sinagoga. *

Hudiunan tabata reuní n’e tèmpel na Yerúsalèm pa nan fiestanan anual. E snoanan tabata sirbi pa reunionnan lokal pa siña tokante Yehova i su Lei. Aparentemente, na snoa nan tabatin kustumber di hasi orashon, lesa for dje Skritura, i tambe duna splikashon di e Skritura i animashon òf konseho. Ora Pablo i su kompañeronan a bai un snoa na Antiokia, “e ofisialnan di snoa a manda yama nan, bisando: ‘Rumannan, si boso tin un palabra di eksortashon [òf, animashon] pa e pueblo, papia numa.’” (Echonan 13:15) Ora e promé kristiannan hudiu a reuní na kas di hende, sin duda nan a sigui e mesun kustumber ei.  Nan reunionnan lo mester a yuda hende konosé e Skritura mihó, i edifiká nan spiritualidat.

Kongregashonnan pa Duna Animashon

Meskos ku e promé kristiannan, Testigunan di Yehova awe ta bini huntu na lugánan di adorashon simpel, pa nan siña di Beibel i disfrutá di kompañerismo sano. Pa hopi aña nan a reuní den kas di hende so, i ainda nan ta hasi asina na hopi kaminda. Pero awor e kantidat di kongregashon a bira mas ku 90.000, i e lugánan prinsipal kaminda nan ta reuní yama Salòn di Reino. E edifisionan aki no ta muchu luhoso ni nan no tin aparensia di misa. Nan ta lugánan práktiko i simpel kaminda kongregashonnan di 100 pa 200 hende por reuní pa nan reunionnan semanal afin di skucha i siña for di e Palabra di Dios.

Mayoria kongregashon di Testigunan di Yehova ta reuní tres biaha pa siman. Un dje reunionnan ta un diskurso públiko riba un tópiko di interes aktual. Despues nan ta analisá un tema bíbliko òf un profesia, usando E Toren di Vigilansia. Un otro reunion ta un skol diseñá pa entrená e studiantenan pa presentá e mensahe di Beibel. Despues tin un reunion dediká spesialmente na duna sugerensia práktiko pa e sirbishi di predikashon kristian. Un biaha pa siman Testigunan ta reuní tambe pa un studio di Beibel den grupo mas chikitu na kas di hende. Tur e reunionnan aki ta habrí pa públiko. Nunka no ta pasa kolèkt.

Francisco, ku nos a menshoná mas promé, ta haña ku e reunionnan na Salòn di Reino a yud’é masha hopi. E ta konta: “E promé Salòn ku mi a bishitá tabata un edifisio kómodo den sentro di siudat, i mi a sali ku un bon impreshon. Esnan presente tabata amabel, i mi por a sinti e amor ku tabatin den nan. Mi tabata purá pa bolbe. De echo, for dje dia ei mi no a falta ni un reunion. E reunionnan kristian aki ta animá, i nan ta yena mi nesesidat spiritual. Asta ora mi ta sinti mi desanimá pa un motibu òf otro, mi ta bai Salòn di Reino ku e konfiansa ku ora mi bai kas bèk lo mi ta animá.”

Na reunionnan kristian di Testigunan di Yehova lo bo haña chèns di siña di Beibel, trata ku hende ku ta animá bo, i duna Dios alabansa. Nos ta invitá bo kordialmente pa asistí na e Salòn di Reino mas serka di bo kas. Lo bo no arepentí di hasié.

[Nota]

[Plachinan na página 4, 5]

E tabernakel, i despues e tèmpelnan, a sirbi komo ekselente sentronan di adorashon di Yehova

[Plachi na página 6]

Basílika di San Pedro na Roma

[Plachi na página 7]

E promé kristiannan tabata reuní na kas di hende

 [Plachinan na página 8, 9]

Testigunan di Yehova ta tene reunion kristian na kas di hende i na Salòn di Reino